നെറ്റ്‌വർക്ക് സ്വിച്ച്

ഇംഗ്ലീഷ് വിലാസം

https://ml.wikipedia.org/wiki/Network_switch

റാക്കിൽ ഘടിപ്പിച്ചിരിക്കുന്ന ഒരു സ്വിച്ചിലേക്ക് യു.ടി.പി. കേബിളുകൾ വഴി നെറ്റ്‌വർക്ക് ഉപകരണങ്ങൾ ബന്ധിപ്പിച്ചിരിക്കുന്നു

പരിമിത പരിധി കമ്പ്യൂട്ടർ ശൃംഖലയിലെ (Local Area Network) കമ്പ്യൂട്ടറുകൾ അടക്കമുള്ള ശൃംഖലയിൽ ഉൾപ്പെടുന്ന ഉപകരണങ്ങളെ പരസ്പരം നക്ഷത്രരൂപത്തിൽ (Star topology) ബന്ധിപിക്കുന്നതിനുള്ള ഒരു ഉപകരണമാണ് നെറ്റ്വർക്ക് സ്വിച്ച് (switch). ഇത്തരത്തിലുള്ള ശൃംഖലകളെ ബന്ധിപ്പിക്കാനുപയോഗിക്കുന്ന ഹബുകളുടെ പ്രവർത്തനം തന്നെയാണ്‌ സ്വിച്ചുകൾ ചെയ്യുന്നതെങ്കിലും, സ്വിച്ചുകൾക്ക് ഹബ്ബിനേക്കാൾ കൂടുതൽ പ്രവർത്തനക്ഷമതയുണ്ട്. അതുകൊണ്ടുതന്നെ സ്വിച്ചുകൾക്ക് ഹബ്ബുകളേക്കാൾ വിലയും താരതമ്യേന കൂടുതലാണ്. നെറ്റ്വർക്ക് സ്വിച്ചുകൾ അവയിൽക്കൂടി കടന്നുപോകുന്ന ഡേറ്റപാക്കറ്റുകൾ എവിടെനിന്ന് വരുന്നു എന്നും ഈ പാക്കറ്റുകൾ എവിടേക്ക് പോകുന്നു എന്നും നിരീക്ഷിച്ച് അവയെ ലക്ഷ്യസ്ഥാനത്തേക്കു മാത്രം വഴിതിരിച്ചു വിടുന്നു. എന്നാൽ ഹബുകൾ കിട്ടുന്ന ഡാറ്റയെ അതിലെ എല്ലാ പോർട്ടുകളിലേക്കും പ്രക്ഷേപണം (Broadcast) നടത്തുന്നതിനാൽ ഒരു കമ്പ്യൂട്ടർ, ഡാറ്റ പ്രേക്ഷണം നടത്തുമ്പോൾ ശൃംഖല പൂർണ്ണമായും തിരക്കിലാകുന്നു. മറിച്ച് സ്വിച്ചുകൾ ഡേറ്റയെ‍ നിർദ്ദിഷ്ട കംപ്യൂട്ടറിലേക്ക് മാത്രം അയയ്ക്കുന്നതിനാൽ ഹബ്ബിനേക്കാൾ മികച്ച പ്രകടനം കാഴ്ചവെയ്ക്കാൻ അവക്കാകുന്നു.

പോർട്ടുകൾ

സ്വിച്ചിലേക്ക് നെറ്റ്വർക്ക് ഉപകരണങ്ങൾ ബന്ധിപ്പിക്കുന്ന ഇടങ്ങളെയാണ്‌ പോർട്ട് എന്നു പറയുന്നത് 4 മുതൽ 24 വരെ പോർട്ടുകളുള്ള സ്വിച്ചുകൾ ലഭ്യമാണ്‌. നിരവധി സ്വിച്ചുകൾ ഒരുമിച്ച് അടുക്കിയ മൊഡ്യൂളുകളും ലഭ്യമാണ്.

കംപ്യൂട്ടർ ശൃംഖലകളിൽ സ്വിച്ചിന്റെ സ്ഥാനം

നെറ്റ്വർക്ക് സ്വിച്ച് ഒരു സാങ്കേതിക നാമത്തെക്കാളുപരി ഒരു വാണിജ്യ നാമമാണ് . വാണിജ്യ ആവിശ്യങ്ങൾക്കുവേണ്ടി നിർമിച്ചിരിക്കുന്ന സ്വിച്ചുകൾ പല തരത്തിലുള്ള കംപ്യൂട്ടർ ശ്രംഖലകളിലും പ്രവർത്തിക്കുന്നവയാണ്. ഉദാഹരണത്തിന് ഇഥർനെറ്റ്(Ethernet), ഫൈബർ ചാനൽ(Fibre Channel)‍, എ.റ്റി.എം(ATM) തുടങ്ങിയവ. വളരെ പ്രധാനപ്പെട്ട ചില നെറ്റ്വർക്കുകൾ എപ്പോഴും അപഗ്രഥനത്തിനു വിധേയമാക്കേണ്ടി വരും. അതുപോലെ തന്നെ ചില നെറ്റ്വർക്കുകളിൽ കൂടുതൽ സുരക്ഷിതത്വവും വേണ്ടിവരും. അത്തരം നെറ്റ്വർക്കുകളിൽ റൂട്ടറുകളുടെ ഇടയിൽ സ്വിച്ചുകൾ ഘടിപ്പിക്കാറുണ്ട്. സ്വിച്ചുകളുടെ പോർട്ടുകളിലേക്ക് ഫയർവാൾ(firewall) അതുപോലെതന്നെ നെറ്റ്വർക്കിന്റെ പ്രവർത്തനക്ഷമത നിർണയിക്കാനുള്ള ഉപകരണങ്ങൾ തുടങ്ങിയ അനുബന്ധഘടകങ്ങൾ ചേർക്കാൻ സാധിക്കും എന്നതാണ് ഇതിനു കാരണം.

കൂടുതൽ ചിത്രങ്ങൾ

• 8 പോർട്ടുകളുള്ള ലിങ്ക്സിസ് സ്വിച്ച്
  8 പോർട്ടുകളുള്ള ലിങ്ക്സിസ് സ്വിച്ച്
• 48 പോർട്ടുകളുള്ള ലിങ്ക്സിസ് സ്വിച്ച്
  48 പോർട്ടുകളുള്ള ലിങ്ക്സിസ് സ്വിച്ച്

പുറത്തേക്കുള്ള കണ്ണികൾ

2006 ന്റെ ആദ്യ പാദത്തിൽ ഇഥർനെറ്റ് സ്വിച്ച് മാർക്കറ്റ്

CIO ഗവേഷണ ഫലങ്ങൾ

റൂട്ടറുകൾ എങ്ങനെ പ്രവർത്തിക്കുന്നു?