ചെവിക്കായം

ഇംഗ്ലീഷ് വിലാസം

https://ml.wikipedia.org/wiki/Earwax

മനുഷ്യനടക്കമുള്ള പല സസ്തനികളുടേയും കർണ്ണനാളത്തിൽ (ear canal) ഉണ്ടാക്കപ്പെടുന്ന സ്രവമാണ് ചെവിക്കായം (earwax). ചെവിക്കാട്ടം , കർണ്ണമലം എന്നിങ്ങനേയും ഇത് അറിയപ്പെടുന്നു. സെറുമെൻ (cerumen)എന്ന് സാങ്കേതിക നാമം. മലിനവും ദോഷകരവും എന്നു പണ്ട് കരുതിപോന്നിരുന്ന ചെവിക്കായം കർണ്ണ സംരക്ഷണത്തിനും ശുചിത്വത്തിനും ചെവിയുടെ സുഖപ്രവർത്തനത്തിനും അവശ്യഘടകമാണ്. എന്നാൽ അമിതസ്രവം കേൾവിതകരാറടക്കമുള്ള കർണ്ണരോഗങ്ങൾക്ക് കാരണമായേക്കാം.

നീക്കം ചെയ്യപ്പെട്ട മനുഷ്യ ചെവിക്കായം

ഘടന

സാധാരണയായി മഞ്ഞനിറവും മെഴുകുസമാനമായ രൂപവുമാണ് മനുഷ്യ ചെവിക്കായത്തിനുള്ളത്. സെബേഷ്യസ് ഗ്രന്ഥികളും ചില വിയർപ്പു ഗ്രന്ഥികളും ഉത്പാദിപ്പിക്കുന്ന ഒരു മിശ്രസ്രവമാണ് ചെവിക്കായം. പൊലിഞ്ഞുപോയ ത്വക്ക് കോശങ്ങൾ, കെറാറ്റിൻ, കൊഴുപ്പുകൾ , കൊളസ്ട്രോൾ എന്നിവയും ചെവിക്കായത്തിൽ കാണപ്പെടുന്നു.

ചെവിക്കായത്തിന്റെ പ്രസക്തി

• കർണ്ണപടത്തിനു ചുറ്റും കൊഴിഞ്ഞുവീഴുന്ന കോശങ്ങളടക്കമുള്ള മാലിനവസ്തുക്കൾ ചെവിക്കായത്തിൽപറ്റി ക്രമേണ പുറംകർണ്ണ (outer ear)ദിശയിലേയ്ക്ക് തള്ളപ്പെടുന്നു. ഇതു മൂലം കർണ്ണാന്തരങ്ങൾ ശുചീകരിക്കപ്പെടുന്നു.
• കൊഴുപ്പുകളുടെ സാന്നിധ്യമൂലം നേർത്ത നനവും, അഘർഷണസ്വഭാവവും(lubricant property) കൈവന്ന ചെവിക്കായം കർണ്ണാന്തരത്തെ വരളാതെ സംരക്ഷിക്കുന്നു. അപ്രകാരം ചെവിചൊറിച്ചിലും എരിച്ചിലും ഒഴിവാക്കാൻ ഉപകരിക്കുന്നു
• അനേകതരം ബാക്ടീരിയകളുടെ വളർച്ച ചെവിക്കായം തടസ്സപ്പെടുത്തുന്നത് മൂലം രോഗാണുവിമുക്തമായ കർണ്ണാന്തരീക്ഷം സൃഷ്ടിക്കാൻ സഹായിക്കുന്നു.

ആരോഗ്യപ്രശ്നസാധ്യതകൾ

1. കേൾവിക്കുറവിനുള്ള പ്രധാന കാരണങ്ങളിൽ ഒന്ന് ചെവിക്കായത്തിന്റെ അമിതസ്രാവമാണു്. ശ്രവണോപകരണങ്ങൾ പലപ്പോഴും ഫലം ചെയ്യാത്തതും ഉപയോക്താക്കളിൽ കാണപ്പെടുന്ന അമിതസ്രവം മൂലമാണ്.
2. സ്വയം ചികിൽസാശ്രമങ്ങൾ പരാജയപ്പെടുന്നത് കർണ്ണരോഗങ്ങൾ ഉണ്ടാവാൻ കാരണമായി ഭവിക്കാറുണ്ട്. ചെവിക്കായം നീക്കം ചെയ്യാനുള്ള ശ്രമത്തിൽ കർണ്ണാന്തരത്തിൽ മൂർച്ചയേറിയതും അല്ലാത്തുമായ വസ്തുക്കൾ കടത്തുന്നത് അപകടങ്ങൾ വിളിച്ചുവരുത്തുന്നു. കർണ്ണപടം പൊട്ടുക, ത്വക്കിനു മുറിവും പോറലുമേൽക്കുക തുടങ്ങിയ അവസ്ഥാവിശേഷങ്ങളും ഇതുമൂലം സംജാതമാവുന്നു.