ലക്ഷ്മീരോഗം
നെല്ലിനെ ബാധിക്കുന്ന ഒരു കുമിൾരോഗമാണ് ലക്ഷ്മീരോഗം[1] (False smut). വാരിപ്പു രോഗം എന്നും ഇതിന് പേരുണ്ട്[2]. നെന്മണികളെ ആക്രമിച്ച് മണികൾക്ക് പകരം മഞ്ഞ നിറത്തിലുള്ള കുമിളിന്റെ തന്തുക്കൾ അടങ്ങിയ പന്തുപോലുള്ള ഗോളങ്ങളാക്കി മാറ്റുന്നതാണ് രോഗലക്ഷണം. നെല്ല് അരിയുറയ്ക്കുമ്പോൾ നെന്മണിയിൽ ഉണ്ടാകുന്ന പാൽ കവിഞ്ഞ് ഒഴുകുന്നത് മൂലമാണ് ലക്ഷ്മീരോഗം ഉണ്ടാകുന്നതെന്നാണ് പഴമക്കാർ പറഞ്ഞിരുന്നത്[3]. വിളവ് കൂടുന്ന കാലത്ത് ചില കണ്ടങ്ങളിൽ ഏതാനും കതിരുകളിൽ ഈ രോഗം കാണുക സാധാരണമായതുകൊണ്ട്, ഈ രോഗം വരുമ്പോൾ വിളവ് കൂടുമെന്നൊരു വിശ്വാസം കൃഷിക്കാർക്കിടയിലുണ്ട്[4][5]. ഈ രോഗം മൂലം വിളഞ്ഞ ധാന്യങ്ങളുടെ തൂക്കത്തിൽ കുറവുണ്ടാകുന്നു[6]. ഇവയിൽനിന്നെടുക്കുന്ന വിത്ത് മുളയ്ക്കൽ കുറവായിരുക്കും. 90% മുകളിൽ ആപേക്ഷിക ആർദ്രതയും 25-35ºC താപനിലയിലും ആണ് ഈ രോഗം ഉണ്ടാകാനുള്ള സാധ്യത കൂടുതൽ.
ലക്ഷണങ്ങൾ[തിരുത്തുക]
നെൽക്കതിരുകളിൽ നെന്മണിയോട് ചേർന്ന് മഞ്ഞനിറത്തിൽ രൂപപ്പെടുന്ന ഉരുണ്ട മണികൾ ഉണ്ടാകുന്നതാണ് പ്രധാനലക്ഷണം. സ്വർണ്ണ മണികളെപ്പോലെ കാണുന്ന ഇവയുടെ മുകളിൽ നിന്ന് മഞ്ഞ നിറത്തിലുള്ള ഒരു പൊടിയും ഉണ്ടാകും. മഴയും കൂടിയ ആദ്രതയും മണ്ണിലെ ഉയർന്ന നൈട്രജൻ സാന്നിദ്ധ്യവും ഈ രോഗമുണ്ടാകുന്നതിനുള്ള അനുകൂലകങ്ങളാണ്. കാറ്റ്, ഈ ഫംഗസ്സ് രോഗത്തിന്റെ ബീജങ്ങൾ ഒരു ചെടിയിൽ നിന്ന് മറ്റൊരു ചെടിയിലേയ്ക്ക് പകരുന്നത് സഹായിക്കുന്നു. പൂക്കുന്ന ഘട്ടത്തിലാണ് ഈ രോഗം ചെടിയെ ബാധിക്കുന്നത്.
നിയന്ത്രണ മാർഗ്ഗങ്ങൾ[7][തിരുത്തുക]
- പൂവിടുന്ന സമയത്ത് വരമ്പിലെ കളകൾ നിയന്ത്രിയ്ക്കുക.
- വിളവെടുപ്പിനുശേഷം രോഗം ബാധിച്ച വിത്തുകൾ, കതിരുകൾ, ചെടിയുടെ അവശിഷ്ടങ്ങൾ എല്ലാം നീക്കം ചെയ്യുക.
- സ്ഥിരമായി വെള്ളം കൂട്ടിയിടുന്നതിനുപകരം, ഒന്നിടവിട്ട ഇടവേളകളിൽ വെള്ളം കുറച്ചുകൊണ്ടുവന്ന് വളരാളിനിട്ടും കുതർത്തിയും ആൎദ്രത കുറച്ചുകൊണ്ടുവരുക.
- നൈട്രജൻ വളകൾ മിതമായ അളവിൽ മാത്രം ഉപയോഗിക്കുക.
- ഗുണമേന്മയുള്ള, രോഗപ്രതിരോധശേഷിയുള്ള വിത്തിനങ്ങൾ ഉപയോഗിക്കുക.
- 52ഡിഗ്രിയിൽ പത്തുമിനിറ്റുനേരം വിത്തുകൾ പരിചരിക്കുക.
- രോഗ ബാധിത പ്രദേശങ്ങളിൽ 50 ശതമാനത്തിൽ കൂടുതൽ പൂ നിരന്നു കഴിയുമ്പോൾ ടിൽറ്റ് 1 ML/ലി അല്ലെങ്കിൽ കോപ്പർ ഹൈഡ്രോക്സൈഡ് 2g/ലി അല്ലെങ്കിൽ സ്യൂഡോമോണസ് 20g/ലി എന്ന തോതിൽ ലായനി തയ്യാർ ചെയ്ത് ഉച്ചയ്ക്ക് 3 മണിക്ക് ശേഷം തളിക്കുക[8].
അവലംബം[തിരുത്തുക]
- ↑ "വിളപരിപാലന ഗവേഷണത്തിന് അംഗീകാരവുമായി പട്ടാമ്പി കാർഷിക ഗവേഷണകേന്ദ്രം". 14 ഏപ്രിൽ 2016. Archived from the original on 2019-12-21.
- ↑ "ആർക്കൈവ് പകർപ്പ്". Archived from the original on 2019-07-09. Retrieved 2017-02-06.
- ↑ "ഭീഷണിയായി കോൾ പടവുകളിൽ 'ലക്ഷ്മി' രോഗം". കാട്ടകാമ്പാൽ. Retrieved 14 ഏപ്രിൽ 2012.[പ്രവർത്തിക്കാത്ത കണ്ണി]
- ↑ "നമ്മുടെ നാട്ടറിവുകൾ (നെല്ല്)". Archived from the original on 2017-02-03. Retrieved 2017-02-06.
- ↑ http://www.puzha.com/blog/nattariv-chandi_abraham-karshika9/
- ↑ "False smut - IRRI Rice Knowledge Bank". knowledgebank.irri.org. Retrieved 6 ഫെബ്രുവരി 2017.
- ↑ K. Karunanithi; R. Rajendran. "Managing false smut disease in rice". The Hindu. Archived from the original on 2017-01-26. Retrieved 6 ഫെബ്രുവരി 2014.
- ↑ http://www.krishi.info/query/query_details/4110[പ്രവർത്തിക്കാത്ത കണ്ണി]