സുരേന്ദ്രമോഹൻ ടാഗൂർ
പ്രശസ്തനായ ഇന്ത്യൻ സംഗീത ശാസ്ത്രജ്ഞനാണ് സുരേന്ദ്രമോഹൻ ടാഗൂർ(1840 - 1914).
ജീവിതരേഖ[തിരുത്തുക]
1840-ൽ കൊൽക്കൊത്തയിൽ ജനിച്ചു. പതിനേഴാം വയസ്സു മുതൽ സംഗീതാഭ്യസനം തുടങ്ങിയ സുരേന്ദ്രമോഹൻ വളരെ പെട്ടെന്നു തന്നെ ഭാരതീയ സംഗീതത്തിലെന്നപോലെ യൂറോപ്യൻ സംഗീതത്തിലും പ്രാവീണ്യം നേടി. 1871-ൽ ഇദ്ദേഹം 'ബംഗാൾ മ്യൂസിക് സൊസൈറ്റി' സ്ഥാപിച്ചു. 1881-ൽ ബംഗാൾ അക്കാദമി ഒഫ് മ്യൂസിക് സ്ഥാപിതമായതും ഇദ്ദേഹത്തിന്റെ നേതൃത്വത്തിലായിരുന്നു. ഈ രണ്ടു പ്രസ്ഥാനങ്ങളിലും മരണം വരെ ഇദ്ദേഹം തന്നെയായിരുന്നു പ്രധാനി. സംഗീതോപകരണങ്ങളെക്കുറിച്ചുള്ള ഇദ്ദേഹത്തിന്റെ അഗാധമായ ജ്ഞാനം, നിരവധി വിദേശ മ്യൂസിയങ്ങളുടെ നിർമ്മാണത്തിനു പോലും പ്രയോജനപ്പെടുത്തിയിട്ടുണ്ട്. ന്യൂയോർക്കിലെ മെട്രോപ്പോളിറ്റൻ മ്യൂസിയം ഇദ്ദേഹം സംവിധാനം ചെയ്ത സംഗീത മ്യൂസിയങ്ങളിൽ പ്രധാനപ്പെട്ടതാണ്. 1914 ജൂൺ 18-ന് ഇദ്ദേഹം അന്തരിച്ചു.
കൃതികൾ[തിരുത്തുക]
പ്രഗല്ഭനായ ഒരു ഗ്രന്ഥകാരൻ കൂടിയായിരുന്നു സുരേന്ദ്രമോ ഹൻ ടാഗൂർ. സംഗീതമുൾപ്പെടെയുള്ള വിവിധ വിഷയങ്ങളിലായി അറുപതോളം ഗ്രന്ഥങ്ങൾ ഇദ്ദേഹം രചിച്ചിട്ടുണ്ട്. യന്ത്രകോശ അഥവാ എ ട്രഷറി ഒഫ് ദ് മ്യൂസിക്കൽ ഇൻസ്ട്രുമെന്റ്സ് ഒഫ് ഏൻഷ്യന്റ് ആൻഡ് മോഡേൺ ഇൻഡ്യ (1875), ഹിന്ദു മ്യൂസിക് (1875), ഷോർട്ട് നോട്ടീസസ് ഒഫ് ഹിന്ദു മ്യൂസിക്കൽ ഇൻസ്ട്രുമെന്റ്സ് (1877), 6 പ്രിൻസിപ്പൽ രാഗാസ് (1877), ദി 8 പ്രിൻസിപ്പൽ രാഗാസ് ഒഫ് ദ് ഹിന്ദൂസ് (1880), ദ് ഫൈവ് പ്രിൻസിപ്പൽ മ്യൂസീഷ്യൻസ് ഒഫ് ദ് ഹിന്ദൂസ് അഥവാ എ ബ്രീഫ് എക്സ്പോസിഷൻ ഒഫ് ദി എസ്സെൻഷ്യൽ എലിമെന്റ്സ് ഒഫ് ദ് ഹിന്ദു മ്യൂസിക് (1881), യൂണിവേഴ്സൽ ഹിസ്റ്ററി ഒഫ് മ്യൂസിക് (1896) എന്നിവ ഇദ്ദേഹത്തിന്റെ സംഗീത ഗ്രന്ഥങ്ങളിൽ പ്രധാനപ്പെട്ടവയാണ്. 1875-ൽ പ്രസിദ്ധീകരിക്കപ്പെട്ട ഹിന്ദു മ്യൂസിക് എന്ന കൃതി വ്യത്യസ്ത സംഗീതജ്ഞരുടെ രചനകളുടെ സമാഹാരമാണ്. 1882-ൽ ഇതു രണ്ടു വാല്യങ്ങളിലായി പുനഃപ്രസിദ്ധീകരിക്കപ്പെട്ടു.
പുരസ്കാരങ്ങൾ[തിരുത്തുക]
ബ്രിട്ടിഷ് സർക്കാർ ഇദ്ദേഹത്തെ സർ സ്ഥാനം നൽകി ആദരിക്കുകയുണ്ടായി.
അവലംബം[തിരുത്തുക]
പുറം കണ്ണികൾ[തിരുത്തുക]
 | കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ സുരേന്ദ്രമോഹൻ (1840 - 1914) ടാഗൂർ, സുരേന്ദ്രമോഹൻ (1840 - 1914) എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം. |