സംസ്കൃത ചലച്ചിത്രം

വിക്കിപീഡിയ, ഒരു സ്വതന്ത്ര വിജ്ഞാനകോശം.


സംസ്കൃത ഭാഷയിൽ നിർമ്മിക്കുന്ന ചലച്ചിത്രത്തെയാണ് സംസ്കൃത ചലച്ചിത്രം (സംസ്കൃതം : संस्कृतचलच्चित्राणि) എന്നുപറയുന്നത്. പ്രധാനമായും ഇന്ത്യയിലാണ് സംസ്കൃതചലച്ചിത്രങ്ങൾ നിർമ്മിക്കപ്പെടുന്നത്. സംസ്കൃതം അറിയാവുന്നവരുടെ എണ്ണം കുറവായതിനാൽ വളരെ കുറച്ച് ചലച്ചിത്രങ്ങൾ മാത്രമാണ് ഈ ഭാഷയിൽ ഇതുവരെ പുറത്തിറങ്ങിയിട്ടുള്ളത്. ആദി ശങ്കരാചാര്യ (1983), ഭഗവദ് ഗീത (1993), പ്രിയമാനസം (2015), ഇഷ്ടി (2016) മധുരസ്മിതം (2019) എന്നിവ സംസ്കൃത ഭാഷയിൽ നിർമ്മിച്ചിട്ടുള്ള ചില ചലച്ചിത്രങ്ങളാണ്.

ചരിത്രം[തിരുത്തുക]

അയ്യായിരം വർഷത്തോളം പഴക്കമുള്ള ഭാഷയാണ് സംസ്കൃതം. കർണാടകയിലെ മത്തൂരു പോലുള്ള ചില ഗ്രാമങ്ങളിൽ ആശയവിനിമയത്തിനായി ഇപ്പോഴും സംസ്കൃതം ഉപയോഗിക്കുന്നുണ്ട്. സംസ്കൃതം അറിയാവുന്നവരുടെ എണ്ണം കുറഞ്ഞുവരുന്നതിനാൽ ആ ഭാഷയിൽ ഒരു ചലച്ചിത്രം നിർമ്മിക്കുക പ്രയാസമാണ്. പ്രേക്ഷകരുടെ എണ്ണം കുറയുമെന്ന ഭയത്താൽ ഇത്തരം ചിത്രങ്ങൾക്കു വേണ്ടി പണം മുടക്കാൻ പല നിർമ്മാതാക്കളും തയ്യാറാകുന്നില്ല.[1] ചിത്രം പ്രദർശിപ്പിക്കുവാൻ തീയറ്ററുകൾ ലഭിക്കാതിരിക്കുന്നതാണ് മറ്റൊരു പ്രതിസന്ധി.[1] ഈ വെല്ലുവിളികളെ അതിജീവിച്ചുകൊണ്ട് ഏതാനും ചലച്ചിത്രങ്ങൾ സംസ്കൃത ഭാഷയിൽ നിർമ്മിക്കപ്പെട്ടിട്ടുണ്ട്.

ആദ്യകാല ചലച്ചിത്രങ്ങൾ[തിരുത്തുക]

ജി.വി. അയ്യർ സംവിധാനം ചെയ്ത് 1983-ൽ പുറത്തിറങ്ങിയ ആദി ശങ്കരാചാര്യയാണ് ഇന്ത്യയിലെ ആദ്യത്തെ സംസ്കൃത ചലച്ചിത്രം.[2] തത്വചിന്തകനും അദ്വൈതസിദ്ധാന്തത്തിന്റെ ഉപജ്ഞാതാവുമായ ശങ്കരാചാര്യരുടെ ജീവിതത്തെ ആസ്പദമാക്കിയാണ് ചിത്രം നിർമ്മിച്ചിരിക്കുന്നത്. മികച്ച നിരൂപകശ്രദ്ധ നേടിയ ഈ ചിത്രം 31-ആമത് ദേശീയ ചലച്ചിത്ര പുരസ്കാരദാനച്ചടങ്ങിൽ മികച്ച ചലച്ചിത്രം, തിരക്കഥ, ഛായാഗ്രഹണം, ശബ്ദലേഖനം എന്നീ വിഭാഗങ്ങളിലെ പുരസ്കാരങ്ങളും സ്വന്തമാക്കി.[3][4] പത്തുവർഷങ്ങൾക്കു ശേഷം ജി.വി. അയ്യരുടെ തന്നെ സംവിധാനത്തിൽ ഭഗവദ് ഗീത എന്ന സംസ്കൃത ചലച്ചിത്രം പുറത്തിറങ്ങി. മഹാഭാരതത്തെ ആസ്പദമാക്കി നിർമ്മിച്ച ഈ ചിത്രവും മികച്ച ചലച്ചിത്രത്തിനുള്ള ദേശീയ പുരസ്കാരം സ്വന്തമാക്കിയിരുന്നു.[5]

2015-നു ശേഷം[തിരുത്തുക]

ആദി ശങ്കരാചാര്യ (1983), ഭഗവദ് ഗീത (1993) എന്നീ ചിത്രങ്ങൾ പുറത്തിറങ്ങി 22 വർഷം കഴിഞ്ഞാണ് അടുത്ത സംസ്കൃതചലച്ചിത്രം പുറത്തിറങ്ങുന്നത്.[6] വിനോദ് മങ്കര സംവിധാനം ചെയ്ത് 2015-ൽ പുറത്തിറങ്ങിയ പ്രിയമാനസം എന്ന ചിത്രമാണ് ഇന്ത്യയിലെ മൂന്നാമത്തെ സംസ്കൃത ചലച്ചിത്രം. കേരളത്തിൽ നിർമ്മിക്കുന്ന ആദ്യത്തെ സംസ്കൃത ചലച്ചിത്രം എന്ന പ്രത്യേകതയും ഇതിനുണ്ട്. ഉണ്ണായി വാര്യരുടെ ജീവിതകഥ പറഞ്ഞ ഈ ചിത്രം 2015-ലെ മികച്ച സംസ്കൃത ചലച്ചിത്രത്തിനുള്ള ദേശീയ പുരസ്കാരവും നേടിയിരുന്നു.

ഒരു സാമൂഹ്യ വിഷയത്തെ ആസ്പദമാക്കിയുള്ള ആദ്യത്തെ സംസ്കൃത ചലച്ചിത്രമാണ് 2016-ൽ പുറത്തിറങ്ങിയ ഇഷ്ടി.[7] നമ്പൂതിരി സമുദായത്തിൽ നിലനിന്നിരുന്ന അനാചാരങ്ങൾക്കെതിരെ 1940-കളിലുണ്ടായ ചെറുത്തുനിൽപ്പുകളുടെ കഥയാണ് ഈ ചിത്രം പറയുന്നത്. ഈ ചിത്രവും കേരളത്തിലാണ് നിർമ്മിച്ചത്.[1]

2017-ൽ പുറത്തിറങ്ങിയ സൂര്യകാന്തഃ ആണ് സംസ്കൃതത്തിലെ അഞ്ചാമത്തെ ചലച്ചിത്രം. സമകാലിക സംഭവത്തെ ആസ്പദമാക്കിയുള്ള ഈ ചലച്ചിത്രം, വാർദ്ധക്യത്തിൽ ഉപേക്ഷിക്കപ്പെടുന്നവരുടെ കഥപറയുന്നു.[8][9] ഈ ചിത്രത്തിന് 2017-ലെ കേരള ഫിലിം ക്രിട്ടിക്സ് അസോസിയേഷൻ അവാർഡ്സിൽ പ്രത്യേക ജൂറി പുരസ്കാരം ലഭിച്ചിരുന്നു.

ആദ്യത്തെ ത്രിമാന (3ഡി) സംസ്കൃത ചലച്ചിത്രം[10], ആദ്യമായി ഗാനം ഉൾപ്പെടുത്തിയ സംസ്കൃത ചലച്ചിത്രം എന്നീ വിശേഷണങ്ങളോടെ 2017-ൽ പുറത്തിറങ്ങിയ ചലച്ചിത്രമാണ് അനുരക്തി. കൂടിയാട്ടം അഭ്യസിക്കുന്നതിനായി കേരളത്തിലെത്തിയ പഞ്ചാബി നർത്തകിയുടെ കഥ പറയുന്ന ഈ ചിത്രം പി.കെ. അശോകനാണ് സംവിധാനം ചെയ്തതിരിക്കുന്നത്. കേരളീയ പശ്ചാത്തലത്തിൽ നിർമ്മിക്കുന്ന മൂന്നാമത്തെ സംസ്കൃതചലച്ചിത്രമാണ് അനുരക്തി. പ്രിയമാനസം, ഇഷ്ടി, അനുരക്തി എന്നീ ചലച്ചിത്രങ്ങൾ ഗോവയിലെ രാജ്യാന്തര ചലച്ചിത്രോത്സവത്തിൽ പ്രദർശിപ്പിച്ചിട്ടുണ്ട്.[11][12][13]

സംസ്കൃത ഭാഷയിൽ നിർമ്മിക്കുന്ന ആദ്യത്തെ അനിമേഷൻ ചലച്ചിത്രമാണ് പുണ്യകോടി. വാക്കുപാലിക്കുന്നതിനായി ജീവത്യാഗം ചെയ്യാൻ തയ്യാറാകുന്ന പശുവിന്റെ കഥയാണ് ചിത്രം പറയുന്നത്. രവി ശങ്കർ വി. സംവിധാനം ചെയ്ത ഈ അനിമേഷൻ ചിത്രം 2018-ൽ പുറത്തിറങ്ങുമെന്ന് പ്രതീക്ഷിക്കുന്നു.

സംസ്‌കൃത ഭാഷയിൽ നിർമ്മിച്ച ആദ്യ കുട്ടികൾക്കുള്ള ചലച്ചിത്രമാണ് "മധുരസ്മിതം".[14] സാൻസ്ക്രിറ്റ് പ്രൊഡക്ഷൻ നിർമ്മിച്ച ഈ ചിത്രത്തിന്റെ സംവിധാനം സുരേഷ് ഗായത്രി.[15].പൊതു വിദ്യാലയങ്ങളിലെ വിദ്യാർത്ഥികളുടെ മികവിന്റെ കഥ പറയുന്ന സാമൂഹിക ചിത്രമാണിത്.[16] നവവാണിയുടെ പ്രഥമ സംസ്‌കൃത ചലച്ചിത്ര പുരസ്‌കാരം ലഭിച്ചത് മധുരസ്മിതം ത്തിനാണ്.[17], [18].രാജസ്ഥാനിൽ നടന്ന ആദ്യ സംസ്‌കൃത ഫിലിം ഫെസ്റ്റിവല്ലിൽ മധുരസ്മിതം[19] തെരഞ്ഞെടുത്ത് പ്രദർശിപ്പിച്ചു.

ലോക റെക്കോർഡ് ലക്ഷ്യമാക്കി സുരേഷ് ഗായത്രി സംവിധാനം ചെയ്യുന്ന രണ്ടാമത്തെ സംസ്‌കൃത ചലച്ചിത്രമാണ് "മധുഭാഷിതം".[20]

സംസ്കൃത ചലച്ചിത്രങ്ങളുടെ പട്ടിക[തിരുത്തുക]

വർഷം ചിത്രം സംവിധാനം കുറിപ്പുകൾ
1983 ആദി ശങ്കരാചാര്യ ജി.വി. അയ്യർ ലോകത്തിലെ ആദ്യത്തെ സംസ്കൃത ചലച്ചിത്രം,
മികച്ച ചലച്ചിത്രം ഉൾപ്പെടെ 4 ദേശീയ പുരസ്കാരങ്ങൾ നേടി.
1993 ഭഗവദ് ഗീത ജി.വി. അയ്യർ മികച്ച ചിത്രത്തിനുള്ള ദേശീയ പുരസ്കാരം നേടി.
2015 പ്രിയമാനസം വിനോദ് മങ്കര മികച്ച സംസ്കൃത ചലച്ചിത്രത്തിനുള്ള ദേശീയ പുരസ്കാരം,
46-ആമത് ഗോവ അന്താരാഷ്ട്ര ചലച്ചിത്രോത്സവത്തിൽ പ്രദർശിപ്പിച്ചു.
2016 ഇഷ്ടി ജി. പ്രഭ സാമൂഹ്യ വിഷയം കൈകാര്യം ചെയ്ത ആദ്യത്തെ സംസ്കൃത ചലച്ചിത്രം,
47-ആമത് ഗോവ അന്താരാഷ്ട്ര ചലച്ചിത്രോത്സവത്തിൽ പ്രദർശിപ്പിച്ചു.
2017 സൂര്യകാന്തഃ എം. സുരേന്ദ്രൻ 2017-ലെ കേരള ഫിലിം ക്രിട്ടിക്സ് അസോസിയേഷൻ അവാർഡ്സിൽ പ്രത്യേക ജൂറി പുരസ്കാരം
2017 അനുരക്തി പി.കെ. അശോകൻ ആദ്യത്തെ ത്രിമാന സംസ്കൃത ചലച്ചിത്രം,
ആദ്യമായി ഗാനം ഉൾപ്പെടുത്തി,
48-ആമത് ഗോവ അന്താരാഷ്ട്ര ചലച്ചിത്രോത്സവത്തിൽ പ്രദർശിപ്പിച്ചു.
2018 പുണ്യകോടി രവി ശങ്കർ വി. ആദ്യത്തെ സംസ്കൃത അനിമേഷൻ ചലച്ചിത്രം
2019 മധുരസ്മിതം സുരേഷ് ഗായത്രി ആദ്യത്തെ കുട്ടികൾക്കുള്ള ചലച്ചിത്രം
2022 മധുഭാഷിതം സുരേഷ് ഗായത്രി ചിൽഡ്രൻസ് ഫിലിം.
2023 മഹാപീഠം സുരേഷ് ഗായത്രി കുട്ടികളുടെ ആദ്യ ഭക്തി സിനിമ

അവലംബം[തിരുത്തുക]

  1. ↑ 1.0 1.1 1.2 "സംസ്കൃതം മരിച്ചിട്ടില്ല; എന്നെ നിലനിർത്തുന്നത് അതാണ്'". futurekerala.in. 2016-12-12. മൂലതാളിൽ നിന്നും 2019-12-21-ന് ആർക്കൈവ് ചെയ്തത്. ശേഖരിച്ചത് 2018-01-22.
  2. ↑ "Adi Shankaracharya (1983)". IMDb. ശേഖരിച്ചത് 9 March 2012.
  3. ↑ "31st National Film Awards". India International Film Festival. മൂലതാളിൽ നിന്നും 2013-11-12-ന് ആർക്കൈവ് ചെയ്തത്.
  4. ↑ "31st National Film Awards (PDF)" (PDF). Directorate of Film Festivals.
  5. ↑ "Bhagvad Gita (film) G V Iyer". IMDb. ശേഖരിച്ചത് 9 March 2012.
  6. ↑ "Sanskrit Cinema: A creative way to revive Sanskrit". www.newsgram.com. 7 July 2015.
  7. ↑ "First Sanskrit social movie flays Namboothiri practices". The Times of India.
  8. ↑ "വാർധക്യത്തിൽ ഉപേക്ഷിക്കപ്പെടുന്നവരുടെ ആത്മനൊമ്പരങ്ങളുമായി "സൂര്യകാന്തഃ'". ദീപിക ദിനപത്രം. മൂലതാളിൽ നിന്നും 2018-01-22-ന് ആർക്കൈവ് ചെയ്തത്. ശേഖരിച്ചത് 2018-01-22.
  9. ↑ "A tale told in Sanskrit". The New India Express.
  10. ↑ "ആദ്യ സംസ്കൃത 3ഡി സിനിമ ഒരുങ്ങുന്നു". ദേശാഭിമാനി ദിനപത്രം. 2017-09-09. മൂലതാളിൽ നിന്നും 2018-01-22-ന് ആർക്കൈവ് ചെയ്തത്. ശേഖരിച്ചത് 2018-01-22.
  11. ↑ "Ishti is the first ever Sanskrit film based on a social issue". iffigoa.org. 23 November 2016. മൂലതാളിൽ നിന്നും 2017-08-08-ന് ആർക്കൈവ് ചെയ്തത്. ശേഖരിച്ചത് 2018-01-22.
  12. ↑ "World's first 3D Sanskrit film screened at IFFI". DD News.
  13. ↑ "World's First 3D Sanskrit Film Anurakthi Screened at 2017 IFFI Goa". India.com. 25 November 2017.
  14. ↑ http://navavani.org.in/wp/archives/10862
  15. ↑ vellinakshatram film, TV& Vedio Weekly, Thiruvanathapuram-11, published on Sunday 2019 November 17, page No.45,
  16. ↑ http://epaper.keralabhooshanam.com/m5/2290225/Weekend-Supplement/18-08-2019#page/4/1
  17. ↑ "ആർക്കൈവ് പകർപ്പ്". മൂലതാളിൽ നിന്നും 2020-02-09-ന് ആർക്കൈവ് ചെയ്തത്. ശേഖരിച്ചത് 2020-05-12.
  18. ↑ "ആർക്കൈവ് പകർപ്പ്". മൂലതാളിൽ നിന്നും 2020-02-12-ന് ആർക്കൈവ് ചെയ്തത്. ശേഖരിച്ചത് 2020-05-12.
  19. ↑ https://www.abplive.com/states/rajasthan/magh-festival-started-in-rajasthan-film-lovers-saw-sanskrit-language-films-2080512
  20. ↑ SGI SANSKRIT, FILM SOCIETY (17/08/2021). "MADHUBHASHITHAM". MADHUBHASHITHAM. SGI SANSKRIT FILM SOCIETY. ശേഖരിച്ചത് 17/08/2021. {{cite web}}: Check date values in: |access-date= and |date= (help)
"https://ml.wikipedia.org/w/index.php?title=സംസ്കൃത_ചലച്ചിത്രം&oldid=3922317" എന്ന താളിൽനിന്ന് ശേഖരിച്ചത്