ശക്തൻ സ്റ്റാന്റ്

ഇംഗ്ലീഷ് വിലാസം

https://ml.wikipedia.org/wiki/Sakthan_Thampuran_Private_Bus_Stand

ശക്തൻ തമ്പുരാൻ പ്രൈവറ്റ് ബസ് സ്റ്റാന്റ്

സ്ഥാനം	തൃശ്ശൂർ, കേരളം, ഇന്ത്യ
വിലാസം	ശക്തൻ തമ്പുരാൻ നഗർ, തൃശ്ശൂർ
ഉടമസ്ഥത	തൃശ്ശൂർ കോർപ്പറേഷൻ
പാർക്കിങ്	40

കേരളത്തിലെ ഏറ്റവും വലിയ സ്വകാര്യ ബസ് സ്റ്റാന്റാണ് ശക്തൻ സ്റ്റാന്റ്. തൃശ്ശൂർ നഗരത്തിന്റെ തെക്കു ഭാഗത്തായാണ് ഇത് സ്ഥിതി ചെയ്യുന്നത്. തൃശ്ശൂരിന്റെ ശില്പിയെന്നറിയപ്പെടുന്ന കൊച്ചി രാജാവ്, ശക്തൻ തമ്പുരാന്റെ സ്മരണാർത്ഥമാണ് ഈ പേർ വന്നത്. തൃശ്ശൂരിൽ നിന്ന് ഗുരുവായൂർ, കുന്നംകുളം, ചാവക്കാട് (അമല നഗർ വഴിയും കാഞ്ഞാണി വഴിയും), കോഴിക്കോട്, കണ്ണൂർ, പെരിന്തൽമണ്ണ, മഞ്ചേരി, ഇരിഞ്ഞാലക്കുട, കൊടുങ്ങല്ലൂർ, തൃപ്രയാർ (ചേർപ്പ് വഴിയും കാഞ്ഞാണി വഴിയും), പാലക്കാട് (വടക്കഞ്ചേരി, ആലത്തൂർ വഴി), പീച്ചി ഡാം എന്നിവിടങ്ങളിലേക്കുള്ള ബസ്സുകൾ ആരംഭിക്കുന്നത് ഇവിടെനിന്നാണ്.

1986-ലാണ് ശക്തൻ സ്റ്റാന്റിന്റെ പണി ആരംഭിച്ചത്. ഇന്ന് ഇതിരിക്കുന്ന സ്ഥലം പണ്ട് വലിയൊരു നെല്പ്പാടമായിരുന്നു. 1986-ൽ ജോൺ പോൾ രണ്ടാമൻ മാർപ്പാപ്പ തൃശ്ശൂർ സന്ദർശിച്ചപ്പോൾ അദ്ദേഹത്തിന് പ്രസംഗിക്കാനായി പാടം നികത്തുകയായിരുന്നു. അക്കാലത്ത് തൃശ്ശൂർ മുനിസിപ്പൽ ഓഫീസിന് (ഇന്നത്തെ കോർപ്പറേഷൻ ഓഫീസ്) മുന്നിലുള്ള ബസ് സ്റ്റാന്റിൽ നിന്നാണ് ബസുകൾ പുറപ്പെട്ടിരുന്നത്. അവിടെയുണ്ടായിരുന്ന അസൗകര്യങ്ങൾ നിമിത്തം പുതിയ ബസ് സ്റ്റാന്റ് അത്യാവശ്യമായി വന്നു. മാർപ്പാപ്പ പ്രസംഗിച്ച സ്ഥലത്തുതന്നെ പിന്നീട് ബസ് സ്റ്റാന്റിനുള്ള സ്ഥലമെടുക്കുകയും തുടർന്ന് 1988 ഡിസംബർ 20-ന് അന്നത്തെ സംസ്ഥാനനിയമസഭാപ്രതിപക്ഷനേതാവും മുൻ മുഖ്യമന്ത്രിയുമായ കെ. കരുണാകരൻ ബസ് സ്റ്റാന്റ് ഉദ്ഘാടനം ചെയ്യുകയും ചെയ്തു.

വലിപ്പത്തിലും മറ്റും ഏറെ മുന്നിലാണെങ്കിലും ധാരാളം പരിമിതികൾ സ്റ്റാന്റ് നേരിടുന്നുണ്ട്. ശൗചാലയം, കുടിവെള്ളം തുടങ്ങിയവയുടെ കുറവ്, അമിതമായ തിരക്ക് തുടങ്ങിയവ അവയിൽ ചിലതാണ്. ഇതിനെതിരെ ഒരുപാട് പ്രക്ഷോഭങ്ങൾ നടന്നുവരുന്നുണ്ട്.