താമരശ്ശേരി ചുരം

താമരശ്ശേരി ചുരം
ചുരത്തിൽ നിന്നുള്ള കാഴ്ച
Elevation	800 m (2,625 ft)
Traversed by	എൻഎച് 766
Location	കോഴിക്കോട്, കേരളം, ഇന്ത്യ
Range	പശ്ചിമഘട്ടം
Coordinates	11°29′54″N 76°1′20″E

കേരളത്തിലെ കോഴിക്കോട് ജില്ലയിൽ പശ്ചിമഘട്ടത്തിന് കുറുകെ സ്ഥിതി ചെയ്യുന്ന ഒരു ചുരമാണ് താമരശ്ശേരി ചുരം. ഇത് ദേശീയപാത 766 ന്റെ ഭാഗമാണ്.

കോഴിക്കോട് ജില്ലയിലെ താമരശ്ശേരിക്കടുത്ത് അടിവാരത്തുനിന്ന് തുടങ്ങുന്ന 12 കിലോമീറ്ററോളം ദൈർഘ്യമുള്ള ഈ വഴിയിൽ കഠിനമായ 9 ഹെയർപിൻ വളവുകളാണുള്ളത്. ഈ പാത അവസാനിക്കുന്ന വയനാട് ജില്ലയിലെ ലക്കിടിയിൽ എത്തുമ്പോഴേക്കും സമുദ്ര നിരപ്പിൽ നിന്ന് ഏകദേശം 2,625 അടി ഉയരം താണ്ടിയിരിക്കും. ഒമ്പതാമത്തെ ഹെയർപിൻ വളവിലെ വ്യൂ പോയന്റിൽ നിന്ന് പടിഞ്ഞാറോട്ട് നോക്കിയാൽ കോഴിക്കോട് ജില്ലയുടെ മൊത്തത്തിലുള്ള ആകാശദൃശ്യം കാണാനാകും. അസ്തമയവും 55 കിലോമീറ്റർ അകലെയുള്ള കടൽപ്പരപ്പും അപൂർവ്വമായി കാണാം. മേഘങ്ങളും കോടമഞ്ഞും ചിലപ്പോൾ കാഴ്ചയെ മറക്കാറുണ്ട്. മൈസൂരിലേക്കും ബാംഗ്ലൂരിലേക്കുമുള്ള അന്തർസംസ്ഥാന പാതയായും ചുരം അറിയപ്പെടുന്നു.

കോഴിക്കോട് കൊല്ലഗൽ ദേശീയപാത 766 ൽ കോഴിക്കോട് വയനാട് ജില്ലകളെ ബന്ധിപ്പിക്കുന്ന പ്രധാന പാതയിലെ ഭാഗമാണ് താമരശ്ശേരി ചുരം. കേരളത്തിൻറെ വ്യവസായ, വാണിജ്യ, ടുറിസം മുന്നേറ്റങ്ങൾക്ക് ഈ പാതയുടെ പങ്ക് ഏറെയുണ്ട്. മുത്തങ്ങ, ബന്ദിപ്പുർ വനമേഖലയിലൂടെ കടന്നു പോവുന്ന ഈ പാതയ്ക്ക് കർണ്ണാടക വനം ഭാഗത്തു രാത്രി നിരോധനം ഏർപ്പെടുത്തിയതിനാൽ വളരെ ക്രമീകരണങ്ങൾ നടത്തിയും ബുദ്ധിമുട്ടുകൾ സഹിച്ചുമാണ് കേരളത്തിലേതടക്കം യാത്രക്കാർ കടന്നു പോവുന്നത്. ഇടക്കിടെ ഉണ്ടാവുന്ന മണ്ണിടിച്ചിൽ ചുരത്തിലെ ഗതാഗതത്തെ പലപ്പോഴും ബാധിക്കാറുണ്ട്. ഈ ചുരത്തിന് ബദലായി മറ്റൊരു പാത നിർമ്മിക്കുന്നതിനുള്ള ആവശ്യം കാലങ്ങളായി നിലനിൽക്കുന്നു

ചരിത്രം

താമരശ്ശേരി ചുരം റോഡ് ബ്രിട്ടീഷുകാരാണ് വികസിപ്പിച്ചത്. ബ്രിട്ടീഷ് എഞ്ചിനീയർക്ക് ഈ വഴി കാണിച്ച് കൊടുത്തത് തദ്ദേശീയരായ ആദിവാസികളായിരുന്നു. വഴി കാണിച്ചു കൊടുത്ത കരിന്തണ്ടൻ എന്ന ആദിവാസിയെ ഈ കണ്ടുപിടിത്തത്തിന്റെ ഖ്യാതി സ്വന്തമാക്കുവാനായി ബ്രിട്ടീഷ് എഞ്ചിനീയർ കൊന്നു കളഞ്ഞു എന്നും പിന്നീട് പാതയിൽ അപകടങ്ങൾ സൃഷ്ടിച്ച ഈ ആദിവാസിയുടെ ആത്മാവിനെ ചങ്ങലയിൽ ബന്ധിച്ചു എന്നും പറയപ്പെടുന്നു. ആദിവാസിയുടെ ആത്മാവിനെ ബന്ധിച്ചിരിക്കുന്നു എന്നു വിശ്വസിക്കപ്പെടുന്ന ചങ്ങല മരം വയനാട്ടിലെ ലക്കിടിയിൽ സ്ഥിതി ചെയ്യുന്നു.

പ്രത്യേകതകൾ

• ഏറ്റവും വലിയ കുരിശിൻറെ വഴി താമരശേരി ചുരത്തിലാണ് നടക്കുന്നത്.
• വെള്ളാനകളുടെ നാട് എന്ന ചിത്രത്തിലൂടെ നടൻ കുതിരവട്ടം പപ്പു താമരശ്ശേരി ചുരത്തെക്കുറിച്ച് "താമരശ്ശേരി ചൊരം... അയ്.. മ്മഡെ താമരശ്ശേരി ചൊരന്നേയ് " എന്ന സംഭാഷണം വളരെ പ്രശസ്തമാണ്.

ചിത്രശാല

• 
  താമരശ്ശേരി ചുരം, ഒരു ദൃശ്യം
• 
  താമരശ്ശേരി ചുരം, മറ്റൊരു ദൃശ്യം
• 
  വ്യൂ പോയിന്റ്
• 
• 
• 
• 
• 
• 
• 
• 
• 
• 
• 
  ചുരം, രാത്രി ദൃശ്യം
• 

ഇതും കൂടി കാണുക

• കുറ്റ്യാടി ചുരം
• പാൽച്ചുരം
• നാടുകാണി ചുരം
• വാളയാർ ചുരം

പുറത്തേക്കുള്ള കണ്ണികൾ

• Wayanad Ghats or Thamarassery Churam | Kerala Tourism