ബാഹ്യകേളി

വിക്കിപീഡിയ, ഒരു സ്വതന്ത്ര വിജ്ഞാനകോശം.
(രതിപൂർവ്വലീല എന്ന താളിൽ നിന്നും തിരിച്ചുവിട്ടതു പ്രകാരം)
Jump to navigation Jump to search
ബാഹ്യകേളിയിൽ ഏർപ്പെടുന്ന ഇണകൾ

മനുഷ്യരുടെ ലൈംഗികതയിലെ ഒഴിച്ചുകൂടാനാകാത്ത ഒരു ഘട്ടമാണ് ബാഹ്യകേളി. മുഖ്യമായും ഇത് രണ്ട്‌ രീതിയിൽ കാണപ്പെടുന്നു. ലൈംഗികബന്ധത്തിന് മുൻപും ശേഷവും ആളുകൾ ബാഹ്യകേളികൾ ആസ്വദിക്കാറുണ്ട്. ഇണയിൽ പരമാവധി ലൈംഗിക വികാരമുണർത്തി സംഭോഗത്തിന് തയ്യാറാക്കുന്ന മാനസികവും ശാരീരികവുമായ പ്രവൃത്തിയാണ് സംഭോഗപൂർവ ബാഹ്യകേളി അഥവാ സംഭോഗപൂർവ രതിലാളനകൾ. ഇംഗ്ലീഷിൽ ഫോർപ്ലേ (Foreplay) എന്ന് പറയുന്നു. ഇതൊരു സ്നേഹപ്രകടനം (Love making) കൂടിയാണ്‌. ആവശ്യത്തിന് സമയം സംഭോഗപൂർവ ബാഹ്യകേളിക്ക് ചിലവഴിക്കാതെ തിടുക്കപ്പെട്ടു നടത്തുന്ന ലൈംഗികബന്ധം ചിലപ്പോൾ പങ്കാളിയുടെ അതൃപ്തിക്ക് കാരണമായേക്കാം. മധുരസംഭാഷണം, ചുംബനം, ആലിംഗനം, തലോടൽ എന്നിവ ബാഹ്യകേളിയിൽ പെടുന്നു. ഇണയുടെ ചുണ്ട്, ചെവി, കഴുത്ത്, മാറിടം തുടങ്ങി കാൽപ്പാദങ്ങൾ വരെയുള്ള ശരീര ഭാഗങ്ങളിൽ ചുംബിക്കുന്നതും ലാളിക്കുന്നതും ഫോർപ്ലേയുടെ ഭാഗമാണ്. സ്ത്രീകളിൽ കൃസരി/ഭഗശിശ്നിക, പുരുഷന്മാരിൽ ലിംഗം തുടങ്ങി നാഡീതന്തുക്കൾ ഏറെയുള്ള ഭാഗങ്ങളിലെ മൃദുവായ പരിലാളനവും അതിയായ ആനന്ദം നൽകുന്നു. പലർക്കും ശരീരത്തിന്റെ ചില പ്രത്യേക ഭാഗങ്ങളിലെ സ്പർശനം ശരിയായ ഉത്തേജനത്തിന് ആവശ്യമാണ്. ഇവ ഓരോരുത്തർക്കും വ്യത്യസ്തമാകാം. മനസ്സിനിണങ്ങിയ പങ്കാളി, അവർ തമ്മിലുള്ള ആശയവിനിമയം, സ്നേഹപ്രകടനം, വ്യക്തിശുചിത്വം, മാനസികമായ അടുപ്പം, വൃത്തിയും സുഗന്ധവുമുള്ള അന്തരീക്ഷം മുതലായവ ഇതിന്റെ പ്രധാന ഘടകങ്ങളാണ്. വാസ്തവത്തിൽ ഇത് കിടപ്പറയിൽ മാത്രം ഒതുങ്ങി നിൽക്കുന്ന ഒന്നല്ല. ദിവസം മുഴുവനുമുള്ള പങ്കാളിയുടെ മോശമായ പെരുമാറ്റവും, ലഹരി ഉപയോഗവുമെല്ലാം ബാഹ്യകേളിയെ ബാധിക്കാറുണ്ട്. നാഡീവ്യവസ്ഥയും മത്തിഷ്ക്കവും ഈ സുഖാനുഭൂതിയിൽ പങ്ക് വഹിക്കുന്നു. മനുഷ്യൻ മാത്രമല്ല, പാമ്പ് മുതലായ പല ജീവിവർഗങ്ങളും പ്രാവ് മുതലായ ചില പക്ഷിവർഗങ്ങളും ബാഹ്യകേളിക്ക് സമയം ബാഹ്യകേളിക്ക് ചിലവഴിക്കുന്നതായി കാണാം.

ബാഹ്യകേളിയുടെ പ്രാധാന്യം[തിരുത്തുക]

ഇരുപത് മിനിറ്റ് എങ്കിലും സംഭോഗപൂർവരതിലീലകൾക്ക് വേണ്ടി ചിലവഴിക്കുന്നത് ലൈംഗികബന്ധത്തിന്റെ ആസ്വാദ്യത മെച്ചപ്പെടുത്തും എന്ന് ചില പഠനങ്ങൾ പറയുന്നുണ്ട്. സന്തോഷകരമായ ബാഹ്യകേളിയിലൂടെ ശരിയായ ഉത്തേജനമുണ്ടാവുകയും ശരീരവും മനസും ലൈംഗികബന്ധത്തിനു തയ്യാറാവുകയും ചെയ്യുന്നു. അതോടെ ലിംഗത്തിലെ അറകളിലേക്കും യോനീഭാഗത്തേക്കും ഉള്ള രക്തയോട്ടം വർധിക്കുന്നു. അതിന്റെ ഫലമായി പുരുഷലിംഗത്തിന് കൂടുതൽ മെച്ചപ്പെട്ട ഉദ്ധാരണം ലഭിക്കുന്നു. സ്ത്രീകളിൽ മുറുകി ഇരിക്കുന്ന യോനീനാളം വികസിക്കുകയും നനവും വഴുവഴുപ്പും നൽകുന്ന സ്നേഹദ്രവങ്ങൾ (Lubrication) ഉൽപ്പാദിപ്പിക്കപ്പെടുകയും, കൃസരി ഉദ്ധരിക്കുകയും ചെയ്യുന്നു. ഇത് സുഗമവും സുഖകരവുമായ ലൈംഗിക ബന്ധത്തിന് അത്യാവശ്യമാണ്. ഇത്തരം സ്രവങ്ങളുടെ അഭാവത്തിൽ ലൈംഗികബന്ധം വേദനാജനകമോ വിരസമോ ബുദ്ധിമുട്ടേറിതോവാകാനും സാധ്യതയുണ്ട്. അത് താല്പര്യക്കുറവിന് കാരണമാകാം. ഇവിടെയാണ് രതിപൂർവ്വലാളനകളുടെ പ്രാധാന്യം. എന്നാൽ പങ്കാളിക്ക് താല്പര്യമില്ലാത്ത രീതികൾ പൂർണമായും ഒഴിവാക്കുക തന്നെ വേണം.

സ്ത്രീകളിൽ രതിമൂർച്ഛ സംഭവിക്കുന്നത് പുരുഷന്മാരേക്കാൾ വൈകിയായതിനാലും, ലൈംഗിക ഉണർവ്വ് ഏറെ നേരം നീണ്ടു നിൽക്കുന്നതിനാലും ബാഹ്യകേളിയിൽ ഏർപ്പെടുന്നത് സംഭോഗത്തിന്റെ ദൈർഘ്യം വർദ്ധിപ്പിക്കുവാനും, പുരുഷന്മാരിലെ 'സമയക്കുറവ്' ചെറുക്കുവാനും സഹായിക്കുന്നു. ഇത് പുരുഷ ബീജങ്ങളുടെ ഗുണമേന്മ വർധിക്കുവാനും ഉപയുക്തമാണെന്ന് ചില പഠനങ്ങൾ തെളിയിക്കുന്നു. ആർത്തവവിരാമം കഴിഞ്ഞ സ്ത്രീകൾക്കും, പ്രായമായ പുരുഷന്മാർക്കും ഉത്തേജനത്തിന് കൂടുതൽ സമയം രതിപൂർവലാളനകൾ വേണ്ടി വന്നേക്കാം. യോനീവരൾച്ചയും തന്മൂലം ബന്ധപ്പെടുമ്പോൾ ഉണ്ടാകുന്ന വേദനയും പരിഹരിക്കാൻ ദീർഘനേരം ഫോർപ്ലേയിൽ ഏർപ്പെടുന്നത് സഹായിക്കും. കൃത്രിമമായി നനവ് നൽകുന്ന ഏതെങ്കിലും മികച്ച ലൂബ്രിക്കന്റുകളും (ഉദാ. KY ജെല്ലി) ഉപയോഗിക്കാം. പുതുമയുള്ള ബാഹ്യകേളികൾ ലൈംഗികതയിലെ ആവർത്തനവിരസത അകറ്റും. എല്ലാവരും പൂർവകേളികൾ ഇഷ്ടപ്പെടുന്നവരാണെങ്കിലും പൊതുവേ സ്ത്രീകൾ കൂടുതലായി ബാഹ്യകേളികൾ ആസ്വദിക്കുന്നവരാണെന്ന് പഠനങ്ങൾ പറയുന്നു. പങ്കാളിയുടെ വ്യക്തി ശുചിത്വവും ഇവിടെ പ്രധാനമാണ്.

ലൈംഗിക വികാരത്തിന്റെ ഉറവിടം തലച്ചോർ തന്നെ. ഈ ഉത്തേജനം വർധിപ്പിക്കുവാൻ പൂർവ്വലീലകൾ ആവശ്യമാണ്. മാനസിക സമ്മർദം/ സ്ട്രെസ് ഒഴിവാക്കുന്നത് ബാഹ്യകേളികൾ ആസ്വദിക്കുന്നതിന് സഹായിക്കും. എന്നാൽ ലൈംഗിക ന്യൂനപക്ഷങ്ങളിൽ (LGBTIA) ഉൾപ്പെടുന്ന അലൈംഗികരായ (Asexuals) വ്യക്തികൾക്ക് ലൈംഗിക താല്പര്യമോ ചിലപ്പോൾ ലൈംഗിക ശേഷിയോ ഉണ്ടാകണമെന്നില്ല. ഇത്തരം സവിശേഷത ഉള്ളവർ ബാഹ്യകേളികളിൽ ഏർപ്പെട്ടത് കൊണ്ട് മാത്രം ലൈംഗിക ഉത്തേജനം ഉണ്ടാവുകയില്ല.

"https://ml.wikipedia.org/w/index.php?title=ബാഹ്യകേളി&oldid=3431896" എന്ന താളിൽനിന്ന് ശേഖരിച്ചത്