മാക്സിമിലിയൻ വൂൾഫ്ഗാങ്ങ് ഡങ്കർ

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
മാക്സിമിലിയൻ വൂൾഫ്ഗാങ്ങ് ഡങ്കർ

ജർമൻ ചരിത്രകാരനും രാഷ്ട്രീയ നേതാവുമാണ് മാക്സിമിലിയൻ വൂൾഫ്ഗാങ്ങ് ഡങ്കർ. ജർമനിയുടെ ഏകീകരണമെന്ന തത്ത്വമാണ് ഇദ്ദേഹത്തെ രാഷ്ട്രീയത്തിലേക്കു നയിച്ചത്.

1811 ഒക്ടോബർ 15-ന് ഇദ്ദേഹം ബെർലിനിൽ ജനിച്ചു. ബോണിലും ബെർലിനിലുമായി വിദ്യാഭ്യാസം പൂർത്തിയാക്കി. വിദ്യാർഥി പ്രവർത്തനവുമായി ബന്ധപ്പെട്ടതിനാൽ ആറുമാസക്കാലം ഇദ്ദേഹത്തിന് ജയിലിൽ കഴിയേണ്ടിവന്നു. 1842-ൽ ഹാലിയിൽ പ്രൊഫസറായി നിയമിതനായി.

1848-ൽ ഇദ്ദേഹം ഫ്രാങ്ക്ഫർട്ട് അസംബ്ലിയിൽ അംഗമായി. ജർമനിയുടെ ഏകീകരണമെന്ന ആശയം ഡങ്കനെ സംബന്ധിച്ചിടത്തോളം കേവലം അക്കാദമികമായിരുന്നില്ല. ജനഹൃദയങ്ങളിൽ ഇതു സന്നിവേശിപ്പിക്കുവാൻ ഇദ്ദേഹം ശ്രമിച്ചിരുന്നു. എന്നാൽ ഡങ്കറുടെ ലിബറൽ ചിന്താഗതിക്ക് അക്കാലത്തെ പ്രഷ്യയിൽ പ്രസക്തി കുറവായിരുന്നു. 1859-ൽ ഇദ്ദേഹം ബെർലിനിൽ പ്രസ് ഓഫീസറായി നിയമിതനായി. അതേവർഷം തന്നെ വിദേശകാര്യ ആഫീസിൽ അസിസ്റ്റന്റും തുടർന്ന് പ്രഷ്യൻ അസംബ്ലിയിലെ അധോമണ്ഡലത്തിൽ അംഗവുമായി. പ്രഷ്യൻ കിരീടാവകാശിയുടെ ഉപദേഷ്ടാവായി ഇദ്ദേഹം 1861-ൽ നിയമിക്കപ്പെട്ടു. പ്രാരംഭത്തിൽ ബിസ്മാർക്കുമായി യോജിച്ചുപോകാൻ കഴിയാതിരുന്ന ഡങ്കർ പിന്നീട് അദ്ദേഹത്തിനുവേണ്ടിയും പ്രവർത്തിക്കുവാൻ സന്നദ്ധനായി. 1967-74 കാലത്ത് പ്രഷ്യയിലെ ആർക്കൈവ്സ് ഡയറക്ടറായി സേവനം അനുഷ്ഠിച്ചു. ഹിസ്റ്ററി ഒഫ് ആന്റിക്വിറ്റി [ഇംഗ്ലീഷ് തർജുമ 6 വാല്യങ്ങൾ (1878-82)] എന്ന കൃതി ഡങ്കറെ പ്രശസ്തനാക്കി. 1886 ജൂലൈ 21-ന് ഇദ്ദേഹം അന്തരിച്ചു.

Heckert GNU white.svgകടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ഡങ്കർ,_മാക്സിമിലിയൻ_(1811_-_86) എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.