മഹാത്മാ ഗാന്ധി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്
മഹാത്മാ ഗാന്ധി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എംജിഐഎംഎസ്) ഇന്ത്യയിലെ ആദ്യത്തെ ഗ്രാമീണ മെഡിക്കൽ കോളേജാണ്. മഹാത്മാഗാന്ധിയുടെ കർമ്മഭൂമിയായ സേവാഗ്രാമിലാണ് ഇത് സ്ഥിതി ചെയ്യുന്നത്. കസ്തൂർബ ഹെൽത്ത് സൊസൈറ്റിയാണ് ഇത് നിയന്ത്രിക്കുന്നത്. മുമ്പ് (1969-1997) ഈ കോളേജ് നാഗ്പൂർ സർവ്വകലാശാലയോട് അഫിലിയേറ്റ് ചെയ്യപ്പെട്ടിരുന്നു; 1998 മുതൽ ഇത് മഹാരാഷ്ട്ര യൂണിവേഴ്സിറ്റി ഓഫ് ഹെൽത്ത് സയൻസസിനോടാണ് (MUHS) അഫിലിയേറ്റ് ചെയ്തിരിക്കുന്നത്.[1]
സ്ഥാനം
[തിരുത്തുക]വാർധ നഗരത്തിൽ നിന്ന് ഏകദേശം 8 കി.മീ. അകലെയുള്ള സേവാഗ്രാം എന്ന ചെറിയ ഗ്രാമത്തിലാണ് ഈ ഇൻസ്റ്റിറ്റ്യൂട്ട് സ്ഥിതി ചെയ്യുന്നത്. റെയിൽ, റോഡ് മാർഗ്ഗങ്ങളിലൂടെ രാജ്യത്തിന്റെ മറ്റു ഭാഗങ്ങളുമായി ഇത് നന്നായി ബന്ധിപ്പിക്കപ്പെട്ടിരിക്കുന്നു. നാഗ്പൂരിലെ ഡോ. ബാബാസാഹെബ് അംബേദ്കർ അന്താരാഷ്ട്ര വിമാനത്താവളം ഇൻസ്റ്റിറ്റ്യൂട്ടിൽ നിന്ന് ഏകദേശം 70 കിലോമീറ്റർ അകലെയാണ്.
ചരിത്രം
[തിരുത്തുക]ഗാന്ധി ശതാബ്ദി വർഷമായ 1969ലാണ് എംജിഐഎംഎസ് ആരംഭിച്ചത്. ഇന്ത്യയിലെ ആദ്യത്തെ ഗ്രാമീണ മെഡിക്കൽ കോളേജാണിത്. ഡോ. സുശീല നയ്യാരാണ് ഇതിന് തുടക്കമിട്ടത്. 1944-ൽ ആരംഭിച്ച കസ്തൂർബ ആശുപത്രി രാഷ്ട്രപിതാവ് സ്വയം ആരംഭിച്ച ഏക ആശുപത്രിയാണ്.[2]
അക്കാദമിക് രംഗം
[തിരുത്തുക]ഈ ഇൻസ്റ്റിറ്റ്യൂട്ടിൽ നടത്തുന്ന കോഴ്സുകൾ ഇവയാണ്:[2]
- എം.ബി.ബി.എസ്. (പ്രതിവർഷം 100 വിദ്യാർത്ഥികളുടെ പ്രവേശനം)
- എംഡി / എംഎസ്
- മെഡിസിനിലും സർജറിയിലും ഡിപ്ലോമ കോഴ്സുകൾ
പ്രവേശനം
[തിരുത്തുക]പ്രതിവർഷം 100 വിദ്യാർത്ഥികളെയാണ് ഇൻസ്റ്റിറ്റ്യൂട്ടിൽ പ്രവേശിപ്പിക്കുന്നത്.[2] ഇവരിൽ പകുതി പേർ മഹാരാഷ്ട്രയിൽ നിന്നുള്ളവരും ബാക്കി പകുതി ഇന്ത്യയുടെ മറ്റ് ഭാഗങ്ങളിൽ നിന്നുള്ളവരുമാണ്. നേരത്തെ, ഗ്രാമപ്രദേശങ്ങളിൽ നിന്നുള്ള വിദ്യാർത്ഥികൾക്ക് ഇൻസ്റ്റിറ്റ്യൂട്ടിൽ പ്രത്യേക സംവരണം ഉണ്ടായിരുന്നു; ഇൻസ്റ്റിറ്റ്യൂട്ടിന് സ്വന്തമായി പ്രീമെഡിക്കൽ ടെസ്റ്റ് (പിഎംടി) പരീക്ഷയും ഉണ്ടായിരുന്നു. ഫിസിക്സ്, കെമിസ്ട്രി, ബയോളജി എന്നിവയെക്കുറിച്ചുള്ള മൾട്ടിപ്പിൾ ചോയ്സ് ചോദ്യ പരീക്ഷയും ഗാന്ധിയൻ ചിന്തകളെക്കുറിച്ചുള്ള പ്രത്യേക തിയറി പേപ്പറും അതിൽ ഉൾപ്പെട്ടിരുന്നു.[2] ഈ പരീക്ഷകളിൽ ലഭിക്കുന്ന മാർക്കിന്റെ അടിസ്ഥാനത്തിലാണ് വിദ്യാർത്ഥികളെ തിരഞ്ഞെടുത്തിരുന്നത്. എന്നാൽ 2017 മുതൽ നീറ്റ്-യുജി, നീറ്റ്-പിജി (നാഷണൽ എലിജിബിലിറ്റി കം എൻട്രൻസ് ടെസ്റ്റ്) പരീക്ഷകളിലൂടെയാണ് ഇൻസ്റ്റിറ്റ്യൂട്ട് വിദ്യാർത്ഥികളെ പ്രവേശിപ്പിക്കുന്നത്.
ബിരുദാനന്തര കോഴ്സുകൾ
[തിരുത്തുക]മെഡിക്കൽ സയൻസിലെ മിക്കവാറും എല്ലാ പ്രധാന വിഷയങ്ങളിലും ഇൻസ്റ്റിറ്റ്യൂട്ട് ബിരുദാനന്തര പരിശീലനം നൽകുന്നു. നീറ്റ് പിജി പരീക്ഷയിലെ വിദ്യാർത്ഥിയുടെ പ്രകടനത്തെ അടിസ്ഥാനമാക്കിയാണ് ഈ കോഴ്സുകളിലേക്കുള്ള പ്രവേശനം.
മെഡിക്കൽ സേവനങ്ങൾ
[തിരുത്തുക]കസ്തൂർബ ആശുപത്രി
[തിരുത്തുക]ഗാന്ധിജിയുടെ അടുത്ത സഹപ്രവർത്തകയും അദ്ദേഹത്തിന്റെ സ്വകാര്യ ഭിഷഗ്വരയുമായിരുന്ന സുശീല നയ്യാർ 1945-ൽ ആരംഭിച്ചതാണ് കസ്തൂർബ ആശുപത്രി. 770 കിടക്കകളുണ്ടായിരുന്ന ആശുപത്രിയിൽ നിന്ന് സേവാഗ്രാമിലെ കസ്തൂർബ ആശുപത്രി ഇപ്പോൾ ഏകദേശം 1000 കിടക്കകളുള്ള ഒരു അധ്യാപന ആശുപത്രിയായി വളർന്നിരിക്കുന്നു. ഗ്രാമീണ രോഗികൾക്ക് ഇത് ത്രിതീയ തല ആരോഗ്യപരിചരണ സൗകര്യങ്ങൾ നൽകുന്നു.
24 മണിക്കൂർ കാലയളവിൽ ശരാശരി 1700 ഓളം രോഗികൾ ആശുപത്രിയിലെ പുറംരോഗി വിഭാഗത്തിൽ ചികിത്സ തേടുന്നു, ആശുപത്രി ഫാർമസികൾ 1800 കുറിപ്പടികൾ കൈകാര്യം ചെയ്യുന്നു, 140 രോഗികൾ ആശുപത്രി വാർഡുകളിൽ പ്രവേശനം തേടുന്നു, 14 രോഗികൾ വലിയ ശസ്ത്രക്രിയകൾക്ക് വിധേയരാകുന്നു, 12 പ്രസവങ്ങൾ നടക്കുന്നു, 20 യൂണിറ്റ് രക്തം പകർന്നുനൽകുന്നു. കൂടാതെ ശരാശരി 270 രോഗികൾക്ക് റേഡിയോഗ്രാഫി, 65 അൾട്രാസൗണ്ട് പരിശോധനകൾ, 14 കംപ്യൂട്ടഡ് ടോമോഗ്രഫി, ഏഴ് രോഗികൾക്ക് മാഗ്നറ്റിക് റിസോണൻസ് ഇമേജിംഗ് സ്കാൻ എന്നിവയും 24 മണിക്കൂറിൽ ഇവിടെ നടത്തുന്നു. ലബോറട്ടറികൾ 750 ബയോകെമിക്കൽ പരിശോധനകൾ, 510 സമ്പൂർണ രക്തപരിശോധനകൾ, 100 സെറോളജിക്കൽ പരിശോധനകൾ, 20 സൈറ്റോളജി സാമ്പിളുകൾ, 15 ബയോപ്സി സാമ്പിളുകൾ എന്നിവ റിപ്പോർട്ട് ചെയ്യുന്നു.
ഗവേഷണം
[തിരുത്തുക]മാതൃ, നവജാതശിശു, ശിശു ആരോഗ്യ സംരക്ഷണം, പകർച്ചവ്യാധികൾ, പോഷകാഹാരക്കുറവുമൂലമുള്ള രോഗങ്ങൾ, ജീവിതശൈലി, രോഗാവസ്ഥകൾ തുടങ്ങിയ മേഖലകളിൽ സമൂഹാധിഷ്ഠിത ഗവേഷണം ഇവിടെ നടത്തുന്നു.
ഐസിഡിഎസിന്റെ സംസ്ഥാനതല നിരീക്ഷണത്തിനുള്ള പ്രധാന കേന്ദ്രം
[തിരുത്തുക]മഹാരാഷ്ട്രയിലെ ഐസിഡിഎസ് പ്രവർത്തനങ്ങളുടെ സംസ്ഥാനതല നിരീക്ഷണത്തിനുള്ള പ്രധാന കേന്ദ്രമായി കമ്മ്യൂണിറ്റി മെഡിസിൻ വകുപ്പിനെ നിയോഗിച്ചിരിക്കുന്നു. ഡോ. ബി.എസ്. ഗാർഗ്, ഡോ. സുബോധ് എസ്. ഗുപ്ത, ഡോ. പി.ആർ. ദേശ്മുഖ് എന്നിവരെ സംസ്ഥാന ഐസിഡിഎസ് കൺസൾട്ടന്റുമാരായി നിയമിച്ചു. 2008-09 വർഷത്തിൽ മഹാരാഷ്ട്രയിലെ ആറ് ജില്ലകളിലെ ഐസിഡിഎസ് പ്രവർത്തനങ്ങൾ അവർ നിരീക്ഷിച്ചു; അതായത് വാർധ, യവത്മാൽ, അമരാവതി, ചന്ദ്രപൂർ, അകോല, ബുൽധാന എന്നിവിടങ്ങളിൽ. ഇതിനായി തിരഞ്ഞെടുത്ത മെഡിക്കൽ കോളേജുകൾ സംസ്ഥാനത്തുടനീളം നടത്തിയ ഐസിഡിഎസ് പ്രവർത്തനങ്ങളുടെ നിരീക്ഷണവും അവർ ഏകോപിപ്പിച്ചു.
ക്ലിനിക്കൽ എപ്പിഡെമിയോളജി യൂണിറ്റ്
[തിരുത്തുക]ഇന്ത്യക്ലെൻ അംഗീകാരം നൽകിയതിനെത്തുടർന്ന് കൂടുതൽ അംഗങ്ങളെ ഉൾപ്പെടുത്തുന്നതിനായി ക്ലിനിക്കൽ എപ്പിഡെമിയോളജി യൂണിറ്റ് വിപുലീകരിച്ചു. അംഗങ്ങളുടെ ശേഷി വർദ്ധിപ്പിക്കുന്നതിനുള്ള പരിപാടിയോടെയാണ് ക്ലിനിക്കൽ എപ്പിഡെമിയോളജി യൂണിറ്റ് അതിന്റെ ആദ്യ പ്രവർത്തനം ആരംഭിച്ചത്. സേവാഗ്രാമിലെ എംജിഐഎംഎസിൽ പ്രവേശനം നേടുന്ന എല്ലാ പുതിയ ബിരുദാനന്തര ബിരുദ വിദ്യാർത്ഥികൾക്കായി ഒരു ഓറിയന്റേഷൻ പരിപാടിയും യൂണിറ്റ് ആരംഭിച്ചിട്ടുണ്ട്.
കാമ്പസിലെ ജീവിതം
[തിരുത്തുക]ഗാന്ധിയൻ തത്വങ്ങൾ പാലിക്കുന്നതിൽ ഈ സ്ഥാപനം അതുല്യമാണ്. എല്ലാ വിദ്യാർത്ഥികളും ജീവനക്കാരും ഖാദി ധരിക്കുന്നു. ജീവനക്കാരും വിദ്യാർത്ഥികളും ശ്രമദാനത്തിൽ പങ്കെടുക്കുന്നു. കർശനമായ സസ്യാഹാര നയമാണ് ഇൻസ്റ്റിറ്റ്യൂട്ട് പിന്തുടരുന്നത്. സ്ഥാപനത്തിൽ മദ്യപാനം നിരോധിച്ചിരിക്കുന്നു.
മെഡിക്കൽ ഓറിയന്റേഷൻ ക്യാമ്പ്
[തിരുത്തുക]ഗാന്ധിയൻ ജീവിതരീതിയുമായി പരിചയപ്പെടുന്നതിനായി പുതുതായി പ്രവേശനം നേടിയ വിദ്യാർഥികൾ 15 ദിവസം സേവാഗ്രാം ആശ്രമത്തിൽ ചെലവഴിക്കുന്നു. ഈ ദിവസങ്ങളിൽ അവർ ആശ്രമ നിയമങ്ങൾ പാലിക്കുന്നു. ശ്രമദാനവും ഖാദി നൂൽക്കലും ഇവിടത്തെ പ്രവർത്തനങ്ങളിൽ ഉൾപ്പെടുന്നു. ജീവിതത്തിന്റെ വിവിധ മേഖലകളിൽ നിന്നുള്ള ആളുകളുടെ പ്രഭാഷണങ്ങളും ഉണ്ടാകാറുണ്ട്.[2]
സാമൂഹിക സേവന ക്യാമ്പ്
[തിരുത്തുക]മെഡിക്കൽ വിദ്യാർത്ഥികളുടെ ഓരോ ബാച്ചിനും വാർധയ്ക്ക് ചുറ്റുമുള്ള ഒരു ചെറിയ ഗ്രാമം അനുവദിച്ചു നൽകുന്നു. 15 ദിവസമാണ് വിദ്യാർത്ഥികൾ ആ ഗ്രാമത്തിൽ താമസിക്കുന്നത്. ഓരോ വിദ്യാർത്ഥിക്കും ഒരു നിശ്ചിത എണ്ണം കുടുംബങ്ങളെ അനുവദിച്ചു നൽകുന്നു. ആ കുടുംബങ്ങളിലെ എല്ലാ അംഗങ്ങളുടെയും ആരോഗ്യകാര്യങ്ങളിൽ ആ വിദ്യാർത്ഥിക്കാണ് ഉത്തരവാദിത്തം. ഈ കുടുംബങ്ങൾക്ക് ആരോഗ്യവിവരങ്ങൾ നൽകിക്കൊണ്ടാണ് വിദ്യാർത്ഥികൾ ഈ സമയം ചെലവഴിക്കുന്നത്. ഗ്രാമീണ ജനതയുടെ യഥാർത്ഥ പ്രശ്നങ്ങളെക്കുറിച്ചും അവർ വളരെയധികം പഠിക്കുന്നു. ഗ്രാമവാസികൾക്കെല്ലാം സൗജന്യ ആരോഗ്യ പരിശോധന നൽകുകയും മലേറിയ, ഫൈലേരിയ തുടങ്ങിയ സാധാരണ അണുബാധകൾക്കുള്ള പരിശോധനകൾക്ക് അവരെ വിധേയരാക്കുകയും ചെയ്യുന്നു.
എല്ലാ മാസവും ഒരിക്കൽ എന്ന നിലയിൽ മൂന്ന് വർഷം വിദ്യാർത്ഥികൾ ഈ ഗ്രാമം സന്ദർശിക്കുന്നത് തുടരുന്നു.
മെഡിക്കൽ വിദ്യാഭ്യാസത്തിലേക്കുള്ള പുനഃക്രമീകരണ ക്യാമ്പ്
[തിരുത്തുക]മെഡിക്കൽ വിദ്യാഭ്യാസത്തിലേക്കുള്ള പുനഃക്രമീകരണം അഥവാ റോം (ROME) ക്യാമ്പ് രണ്ടാം പ്രൊഫഷണലിന്റെ അവസാനത്തിലാണ് നടക്കുന്നത്. മുമ്പ് ഇത് ആഞ്ഞിയിലെ കസ്തൂർബ റൂറൽ ഹെൽത്ത് ട്രെയിനിംഗ് സെന്ററിലാണ് (കെആർഎച്ച്ടിസി) നടന്നിരുന്നത്. 2008 മുതൽ ഇത് ഭിദിയിലെ റൂറൽ ഹെൽത്ത് ട്രെയിനിംഗ് സെന്ററിൽ (ആർഎച്ച്ടിസി) നടക്കുന്നു. വിദ്യാർത്ഥികൾ പൊതുജനാരോഗ്യത്തിന്റെ വിവിധ വശങ്ങൾ പഠിക്കുകയും ഗ്രാമീണ ഇന്ത്യയെക്കുറിച്ച് നേരിട്ടുള്ള അനുഭവം നേടുകയും ചെയ്യുന്ന 15 ദിവസത്തെ പരിശീലനമാണ് ഇത്.
ശ്രദ്ധേയരായ പൂർവ്വ വിദ്യാർത്ഥികൾ
[തിരുത്തുക]- ഡോ. കെ.കെ. അഗർവാൾ, കാർഡിയോളജിസ്റ്റ്
- ഹാർവാർഡ് മെഡിക്കൽ സ്കൂളിലെ പ്രൊഫസർ ഡോ. മൻദീപ് ആർ. മെഹ്റ
- ഡോ. രാംദാസ് റാൻസിങ്, ന്യൂറോ സൈക്യാട്രിസ്റ്റ്
ഇതും കാണുക
[തിരുത്തുക]അവലംബം
[തിരുത്തുക]- ↑ "Archived copy". Archived from the original on 29 December 2008. Retrieved 2008-11-22.
{{cite web}}: CS1 maint: archived copy as title (link) M.U.H.S. College Information - 1 2 3 4 5 http://www.mgims.ac.in/index.php Information from MGIMS's Official website
| International | |
|---|---|
| National | |
