മലബാർ സ്വതന്ത്ര സുറിയാനി സഭ

വിക്കിപീഡിയ, ഒരു സ്വതന്ത്ര വിജ്ഞാനകോശം.
മലബാർ സ്വതന്ത്ര സുറിയാനി സഭ
വിഭാഗംപൗരസ്ത്യ സഭ
പ്രദേശംകേരളം
സ്ഥാപകൻഅബ്രാഹം മാർ കൂറിലോസ്
ഉത്ഭവം1772.
മാതൃസഭമലങ്കര സിറിയൻ സഭ
Congregations16
അംഗങ്ങൾ35,000
ആശുപത്രികൾ1
പ്രൈമറി സ്കൂളുകൾ3
സെക്കൻഡറി
സ്കൂളുകൾ
1
മറ്റ് പേരുകൾ
  1. തോഴിയൂർ സഭ
  2. അഞ്ഞൂര് സഭ

കേരളത്തിലെ മാർത്തോമാ നസ്രാണിവിഭാഗത്തിൽ ഉൾപ്പെടുന്ന ഒരു സഭയാണ് മലബാർ സ്വതന്ത്ര സുറിയാനി സഭ (ഇംഗ്ലീഷ്: Malabar Independent Syrian Church). തൃശ്ശൂർ ജില്ലയിലെ കുന്നംകുളത്തിനടുത്തുള്ള തൊഴിയൂർ ആണ് ആസ്ഥാനം. 1772-ൽ മലങ്കര സുറിയാനി ഓർത്തഡോക്സ് സഭയിൽ നിന്ന് പിരിഞ്ഞാണ് ഈ സഭ ഉണ്ടായത്. ഈ സഭയെ തൊഴിയൂർ സഭ എന്നും അഞ്ഞൂർ സഭ എന്നും അറിയപ്പെടുന്നു. സിറിൾ മാർ ബാസ്സേലിയോസ് I മെത്രാപ്പോലീത്തയാണ് ഇപ്പോഴത്തെ സഭാ തലവൻ.

മെത്രാപ്പോലീത്തമാർ[തിരുത്തുക]

മലബാർ സ്വതന്ത്ര സുറിയാനി സഭയെ ഭരിച്ച പിതാക്കൻമാർ

1. പരി. കാട്ടുമങ്ങാട്ട് അബ്രഹാം മാർ കൂറിലോസ് I (1771-1802)

2. പരി. കാട്ടുമങ്ങാട്ട് ഗീവർഗ്ഗീസ് മാർ കൂറിലോസ് II (1802-1808)

3. ജോസഫ് മാർ ഈവാനിയോസ്സ് I (1807-6 മാസം)

4. സ്കറിയാ മാർ ഫീലക്സിനോസ് I (1808-1811)

5. ഗീവർഗീസ്സ് മാർ ഫീലക്സിനോസ് II (1811-1829)

6. ഗീവർഗീസ് മാർ കൂറിലോസ് III (1829-1856)

7. ജോസഫ് മാർ കൂറിലോസ് IV (1856-1888)

8. ജോസഫ് മാർ അത്താനാസ്സിയോസ് I (1888-1898)

9. ഗീവർഗ്ഗീസ്സ് മാർ കൂറിലോസ് V (1898-1935)

10. പൗലോസ് മാർ അത്താനാസ്സിയോസ് സഹായ മെത്രാപ്പോലീത്ത (1917-1927)

11. കുരിയാക്കോസ് മാർ കൂറിലോസ് VI(1935-1947)

12. ഗീവർഗീസ്സ് മാർ കൂറിലോസ് VII (1948-1967)

13. പൗലോസ് മാർ ഫീലക്സിനോസ് III (1967-1977)

14. മാത്യൂസ് മാർ കൂറിലോസ് VIII (1978-1986)

15. ജോസഫ് മാർ കൂറിലോസ് IX (1986-2001)

16. സിറിൾ മാർ ബാസ്സേലിയോസ് I (2001 -

തുടക്കം[തിരുത്തുക]

1751-ൽ മാർ ബസേലിയോസ് ശക്രള്ള കാതോലിക്കോസിനോടൊപ്പം കേരളത്തിലെത്തിയ മാർ ഗ്രിഗോറിയോസ് മെത്രാപ്പോലീത്ത, 1772-ൽ കാട്ടുമങ്ങാട്ട് അബ്രഹാം റമ്പാനെ കൂറിലോസ് എന്ന പേരിൽ മെത്രാനായി വാഴിച്ചതോടെയാണ് ഈ സഭയുടെ തുടക്കം . അന്നത്തെ മലങ്കര മെത്രാപ്പോലീത്തയ്ക്ക് സമാന്തരമായി വാഴിയ്ക്കപ്പെട്ടതായതിനാൽ‍ മലങ്കര മെത്രാപ്പോലീത്ത ഇതിനെ എതിർത്തു. തിരുവിതാംകൂർ, കൊച്ചി സർക്കാരുകൾ നിയമസാധുത്വം നല്കാത്തതിനാൽ പുതിയ മെത്രാൻ സഹോദരനായ ഗീവറുഗീസ് റമ്പാനോടൊപ്പം അഭയാർത്ഥിയായി മലബാർ ബ്രിട്ടീഷ് മലബാറിലെ ആഞ്ഞൂർ എന്ന സ്ഥലത്തേയ്ക്കും അവിടെ നിന്ന് തൊഴിയൂർ എന്ന സ്ഥലത്തേയ്ക്കും പോയി അവിടെ താമസിച്ചു. പുതിയ ഒരു പള്ളിയും സഭയും കെട്ടിപ്പടുത്തു.

മാർത്തോമാ നസ്രാണികളിലെ വിവിധ വിഭാഗങ്ങൾ

മലങ്കരയിലെ ഇതര സഭകളുമായുള്ള ബന്ധം[തിരുത്തുക]

പിന്നീട്, ഈ സഭ പല നിർണായകഘട്ടങ്ങളിലും മെത്രാൻ വാഴ്ച നടത്താൻ മറ്റു മലങ്കര സഭകളെ സഹായിച്ചിട്ടുണ്ട്. മലങ്കര സഭയെ പ്രതിസന്ധികളിൽ നിന്ന് മൂന്ന് വട്ടം കരകയറ്റിയിട്ടുണ്ട്. തൊഴിയൂർ സഭാദ്ധ്യക്ഷൻ കിടങ്ങൻ ഗീവറുഗീസ് മാർ പീലക്സിനോസ് മെത്രാപ്പോലീത്ത (1811-1829)യാണ് മലങ്കരയുടെ മാർ ദിവന്നാസിയോസ് രണ്ടാമൻ (മാർത്തോമ്മാ-x)(1816-1817), പുന്നത്ര മാർ ദിവന്നാസിയോസ് (മാർത്തോമ്മാ-xi)(1817-1825), ചേപ്പാട്ട് മാർ ദിവന്നാസിയോസ് (മാർത്തോമ്മാ-xii)(1827-1852) എന്നീ മെത്രാപ്പോലീത്തമാരെ വാഴിച്ചത്. മലങ്കര മാർത്തോമ്മാ സഭയുടെ (നവീകരണ വിഭാഗം) പതിനാലാമത് മെത്രാപ്പോലീത്തയായിരുന്ന തോമസ് മാർ അത്താനാസ്യോസ് മെത്രാപ്പോലീത്താ ദിവംഗതനായതിനെത്തുടർന്ന് 1894 ജനുവരി 18-ന് കോട്ടയം ചെറിയ പള്ളിയിൽ വച്ച് മലബാർ സ്വതന്ത്ര സുറിയാനി സഭയുടെ അധിപൻ യൗസേഫ് മാർ അത്താനാസ്യോസ് മെത്രാപ്പോലീത്താ തീത്തൂസ് പ്രഥമനെ മാർത്തോമ്മാ മെത്രാപ്പോലീത്തയായി അഭിഷേകം ചെയ്തു.

പാശ്ചാത്യ സുറിയാനി പാരമ്പര്യത്തിലുള്ള മറ്റ് സഭകളുടെ ആരാധനാക്രമങ്ങൾക്ക് സമാനമായ ആരാധന ക്രമമാണ് മലബാർ സ്വതന്ത്ര സുറിയാനി സഭയും പിന്തുടരുന്നത്. ഈ സഭ മാർത്തോമ്മാ സഭയുമായി പൂർണ്ണ സംസർഗത്തിൽ കഴിയുന്നു. മെത്രാൻ അഭിഷേക ചടങ്ങുകളിൽ ഇരുസഭകളും അന്യോന്യം പങ്കെടുക്കുന്ന പതിവുണ്ട്. എങ്കിലും വിശ്വാസപരമായി മാർത്തോമ്മാ സഭയുമായി പൂർണ്ണ ഐക്യമില്ല. മാർത്തോമ സഭയുടെ നവീകരണ ആശയങ്ങൾ മലബാർ സ്വതന്ത്ര സുറിയാനി സഭ സ്വീകരിക്കുന്നില്ല.