മനോൻമണീയം സുന്ദരൻ പിള്ള

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search

തമിഴ്‌ ഭാഷയിലെ പ്രശസ്ത കാവ്യനാടകമാണ്‌ മനോൻമണീയം. അതിലെ അവതരണഗാനമാണു തമിഴ്‌ നാട്ടിലെ ദേശീയ ഗാനം. കാവ്യരചന നടത്തിയ പ്രൊഫ. പി.സുന്ദരം പിള്ള "മനോൻമണീയം സുന്ദരൻപിള്ള" എന്നു വിളിക്കപ്പെട്ടു.സുന്ദരം പിള്ള ജനിച്ചതും പഠിച്ചതും ഏറെ നാൾ ജോലിചെയ്തതും തിരുവിതാംകൂറിൽ. തിരുവിതാംകൂറിലെ ആദ്യ എം.ഏ. ക്കാരനായതിനാൽ, അതും തിരുവിതാംകൂർ യൂണിവേർസിറ്റി സ്ഥാപിക്കപ്പെടുന്നതിനും മുൻപു, മദ്രാസ്സിൽ നിന്നും, അദ്ദേഹത്തെ നാട്ടുകാർ " എം.ഏ." സുന്ദരം പിള്ള എന്നു വിളിച്ചു.അദ്ദേഹത്തിന്റെ സ്മരണ നിലനിർത്താൻ ജയലളിത സർക്കാർ തിരുനെൽവേലിയിലെ തമിഴ്‌ യൂണിവേർസിറ്റിക്കു " മനോൻമണീയം സുന്ദരനാർ(എം.എസ്‌ യൂണിവേർസിറ്റി) എന്നു പേരിട്ടു.


ജീവിതരേഖ[തിരുത്തുക]

ആലപ്പുഴ തുറമുഖം സ്ഥാപിച്ച കേശവപിള്ള വലിയ ദിവാൻജി കണക്കെഴുതാൻ തിരുനെവേലിയിൽ നിന്നും രണ്ടു ശൈവവെള്ളള പിള്ള കുടുംബങ്ങളെ കൊണ്ടു വന്നു. അവർ വലിയ തോടിന്റെ വലത്തും ഇടത്തും കരകളിൽ താമസമായി. "തെക്കേക്കര" താമസിച്ചിരുന്ന അർജുനൻ പിള്ള പെരുമാൾ പിള്ള - മാടത്തിയമ്മാൾ ദമ്പതികൾക്ക്‌ അനേകവർഷമായിട്ടും കുട്ടികളുണ്ടായില്ല. മധുരയിൽ ചെന്നു കുലദൈവമായ സോമസുന്ദരനെ അവർ ഭജിച്ചു. ൧൮൫൫ ല്‌ അവർക്കുണ്ടായ മകനു "സുന്ദരം" എന്ന പേരിട്ടു. ആലപ്പുഴയിലും തിരുവനന്തപുരത്തുമായി വിദ്യാഭ്യാസം കഴിച്ചു. ബൻസിലി ശേഷയ്യർ, പിള്ളവീട്ടിൽ മാതേവൻ പിള്ള, പണ്ഡിതർ സ്വാമി നാഥപിള്ള തുടങ്ങിയവർആയിരുന്നു ഗുരുക്കൻമാർ. സർ മാധവരായരുടെ മകൻ രങ്കരായൻ സഹപാഠിയും. ൧൮൮൦ ല്‌ തത്ത്വശാസ്ത്രത്തിൽ അദ്ദേഹം എം.ഏ കർസ്ഥമാക്കി. താമസിയാതെ തിരുനെൽവേലി കോളേജിൽ ജോലി കിട്ടി. മഹാരാജാസ്‌ കോളേജിലെ പ്രൊഫസറും ഗുരുനാഥനുമായ ഡോ.ഹാർവി അവധി എടുത്തപ്പോൽ പകരം സുന്ദരം പിള്ള നിയമിതനായി. രാജകൊട്ടാരത്തിലും അദ്യാപകനായി. ശിവരാജയോഗി തൈക്കാട്‌ അയ്യസ്വാമികളിൽ നിന്നും ജ്ഞാനസിദ്ധി കിട്ടിയ സുന്ദരം പിള്ള "മനോൻമണീയം" രചിച്ചു. തമിഴ്‌ഭാഷയിലെ ഒന്നാമത്തെ കൃതി എന്നാണ്‌ ഡോ.ജി.യു. പോപ്പ്‌ ഈ കൃതിയെ വിശേഷിപ്പിച്ചത്‌ . "പത്തുപ്പാട്ട്‌" എന്ന സംഘകൃതിയെക്കുറിച്ചുള പഠനം, "തിരുവിതാംകൂറിലെ ചില പുരാതന രാജാക്കൻമാർ" തുടങ്ങിയ ഗവേഷണപ്രബന്ധങ്ങൾ അദ്ദേഹം തയ്യാറാക്കി. ലണ്ടൻ ഹിസ്റ്റോറിക്കൽ സൊസ്സൈറ്റി അംഗം ആയിരുന്നു.പേരൂർക്കടയിൽ മരുതൻമൂട്ടിൽ ആയിരം ഏക്കർ കുന്നു വങ്ങി ഗുരുവിന്റെ പേരു നൽകപ്പെട്ട, "ഹാർവിപുരം ബംഗ്ലാവ്‌" പണിയിച്ചു. സി.വി. രാമൻപിള്ള, ആർ.ഈശ്വരപിള്ള , കെ.പി.ശങ്കര മേനോൻ, പോൾ ഡാനിയേൽ, എന്നിവർ ശിഷ്യരായിരുന്നു. ശിവരാജയോഗി അയ്യാസ്വാമികളുമൊത്തു ചെന്തിട്ടയിൽ " ശൈവപ്രകാശ സഭ" സ്ഥാപിച്ചു . ചട്ടമ്പിയും നാണുവും ഹാർവിപുരത്തെ സ്ഥിരം സന്ദർശകരായിരുന്നു.അവരുടെ തലതൊട്ടപ്പനുമായിരുന്നു. ഭാര്യ ശിവകാമിയമ്മലാകട്ടെ ഇരുവരുടേയും പോറ്റമ്മയായും. സ്വാമി വിവേകാനന്ദന ഹാർവിപുരത്തെത്തി സുന്ദരൻപിള്ളയുമായി ചർച്ച നടത്തി . "ജൻമനാ തത്ത്വചിന്തകൻ" ആയിരുന്ന ചീഫ്‌ സെക്രട്ടറി താണുപിള്ളയുമായി "പഠനം കൊണ്ടു തത്ത്വചിന്തകൻ" ആയി മാറിയ സുന്ദരൻ പിള്ളയും വലിയ കൂട്ടുകാരായിരുന്നു. അവർ ഇരുവരും ചേർന്നു സൃഷ്ടിച്ച ആർക്കിയോളജി വകൂപ്പിന്റെ ആദ്യ മേധാവിയും സുന്ദരൻ പിള്ള ആയിരുന്നു. ഏകമകൻ പി.എസ്‌.നടരാജ പിള്ള തിരു-ക്കൊച്ചി ധനകാര്യമന്ത്രിയായിരുന്നു .൪൨ വയസ്സുള്ളപ്പോൾ അർബുദബാധയാൽ ൧൮൯൭ ൽ` അദ്ദേഹം അന്തരിച്ചു.


കൃതികൾ[തിരുത്തുക]

  • മനോൻമണീയം,
  • പത്തുപാട്ട്‌ പഠനം,
  • നൂറ്റൊകൈവിളാകം,
  • ദക്ഷിണഭാരത ചരിത്രം


അവലംബം[തിരുത്തുക]

  • പി.സുബ്ബയ്യാപിള്ള, പി.എസ്സ്‌ നടരാജ പിള്ള 1981 സാംസ്കാരിക വകുപ്പ്‌,കേരളം