മധു

വിക്കിപീഡിയ, ഒരു സ്വതന്ത്ര വിജ്ഞാനകോശം.
(മധു (ചലച്ചിത്രനടൻ) എന്ന താളിൽ നിന്നും തിരിച്ചുവിട്ടതു പ്രകാരം)
മധു എന്ന വാക്കാൽ വിവക്ഷിക്കാവുന്ന ഒന്നിലധികം കാര്യങ്ങളുണ്ട്. അവയെക്കുറിച്ചറിയാൻ മധു (വിവക്ഷകൾ) എന്ന താൾ കാണുക. മധു (വിവക്ഷകൾ)
മധു
Madhu 2008.jpg
2008 ലെ അമ്മയുടെ ജനറൽ ബോഡി മീറ്റിംഗിൽ
ജനനം (1933-09-23) സെപ്റ്റംബർ 23, 1933  (89 വയസ്സ്)
ഗൗരീശപട്ടം, തിരുവനന്തപുരം, തിരുവിതാംകൂർ മഹാരാജ്യം
തൊഴിൽചലച്ചിത്രനടൻ
ജീവിതപങ്കാളി(കൾ)ലക്ഷ്മി
കുട്ടികൾഉമ
2008 ലെ അമ്മയുടെ ജനറൽ ബോഡി മീറ്റിംഗിൽ മോഹൻലാലിനൊപ്പം

മലയാളചലച്ചിത്ര ലോകത്തെ പ്രമുഖ അഭിനേതാക്കളിൽ ഒരാളാണ് മധു (ജനനം: സെപ്റ്റംബർ 23, 1933 [1]). സംവിധായകൻ, നിർമാതാവ്, സ്റ്റുഡിയോ (ഉമ സിനിമ സ്റ്റുഡിയോ) ഉടമസ്ഥൻ എന്നീ നിലകളിലും അദ്ദേഹം പ്രശസ്തി നേടി. തിരുവനന്തപുരം മേയറായിരുന്ന പരമേശ്വരൻ പിള്ളയുടെയും തങ്കമ്മയുടേയും മൂത്തപുത്രനായി ജനിച്ചു. യഥാർത്ഥ പേര്‌ മാധവൻ നായർ. മലയാള സിനിമയുടെ ശൈശവം മുതൽ ഒപ്പമുണ്ടായിരുന്ന ഈ നടൻ ഇപ്പോഴും അഭിനയ രംഗത്ത് സജീവമാണ്. ഇടക്ക്‌ നിർമ്മാണ, സംവിധാന മേഖലകളിലും സാന്നിധ്യമറിയിച്ചു. നിലവിൽ ഇപ്റ്റ സംസ്ഥാന പ്രസിഡന്റായും സാംസ്ക്കാരിക രംഗത്ത് നിറഞ്ഞ് നിൽക്കുന്നു. 2013-ൽ ഇദ്ദേഹത്തിനു പത്മശ്രീ പുരസ്കാരം ലഭിച്ചു.

പശ്ചാത്തലം[തിരുത്തുക]

വിദ്യാർത്ഥിയായിരിക്കെ നാടക രംഗത്ത്‌ സജീവമായി. പിന്നീട്‌ കലാപ്രവർത്തനങ്ങൾക്ക്‌ അവധി നൽകി പഠനത്തിൽ ശ്രദ്ധകേന്ദ്രീകരിച്ചു. ബനാറസ് ഹിന്ദു സർവകലാശാലയിൽനിന്ന് ബിരുദവും തുടർന്ന് ബിരുദാനന്തര ബിരുദവും നേടി. 1957 മുതൽ 1959 വരെയുള്ള കാലഘട്ടത്തിൽ നാഗർകോവിലിലെ ST ഹിന്ദു കോളേജിലും സ്കോട്ട് ക്രിസ്ത്യൻ കോളേജിലും ഹിന്ദി അദ്ധ്യാപകൻ ആയി സേവനം അനുഷ്ഠിച്ചു. [2]

അപ്പോഴും മാധവൻ നായരുടെ മനസ്സിലെ അഭിനയമോഹം കെട്ടടങ്ങിയിരുന്നില്ല. ഒരിക്കൽ നാഷണൽ സ്കൂൾ ഓഫ് ഡ്രാമയുടെ പരസ്യം പത്രത്തിൽ കണ്ട അദ്ദേഹം രണ്ടും കൽപ്പിച്ച്‌ അദ്ധ്യാപക ജോലി രാജിവച്ച്‌ ഡൽഹിക്ക് വണ്ടികയറി. 1959 ൽ നാഷണൽ സ്കൂൾ ഓഫ് ഡ്രാമയുടെ ആദ്യ ബാച്ചിലേയ്ക്ക് തിരഞ്ഞെടുക്കപ്പെട്ട ഏക മലയാളിയുമാണ് മധു.[3] എൻ.എസ്‌.ഡിയിൽ പഠിക്കുന്ന കാലത്താണ്‌ രാമു കാര്യാട്ടുമായി അടുപ്പത്തിലായത്‌. പഠനം പൂർത്തിയാക്കിയ ശേഷം നാടക രംഗത്ത്‌ സജീവമാകാനായിരുന്നു ഉദ്ദേശ്യം. പക്ഷേ നിയോഗം മറ്റൊന്നായിരുന്നു.

സിനിമയിൽ[തിരുത്തുക]

മലയാള ചലച്ചിത്രരംഗത്തേക്ക് മധു കടന്ന് വന്നത് 1962 -ൽ ആയിരുന്നു.[4] ആദ്യ മലയാളചിത്രം രാമു കാര്യാട്ടിന്റെ മൂടുപടം ആയിരുന്നു. എന്നാൽ ആദ്യം പുറത്തിറങ്ങിയ ചിത്രം ശോഭനാ പരമേശ്വരൻ നായർനിർമിച്ച്എൻ.എൻ പിഷാരടി സംവിധാനംചെയ്ത നിണമണിഞ്ഞ കാല്പാടുകൾ ആണ്‌. ഈ ചിത്രത്തിൽ പ്രേം നസീറിന്റെ നായകകഥാപാത്രത്തെ വെല്ലുന്ന പ്രകടനത്തിലൂടെ മധു പ്രേക്ഷകരുടെ ശ്രദ്ധ പിടിച്ചുപറ്റി. നിർമ്മാതാക്കൾ സത്യനു വേണ്ടി മാറ്റി വെച്ച വേഷമായിരുന്നു ഇത്‌. തിക്കുറിശ്ശി സുകുമാരൻ നായർ ആണ് മാധവൻ നായരെ മധു ആക്കി മാറ്റിയത്. 1969ൽ ക്വാജ അഹ്മദ് അബ്ബാസ് ഒരുക്കിയ സാത്ത് ഹിന്ദുസ്ഥാനി എന്ന ചിത്രത്തിലൂടെ ഹിന്ദിയിൽ തൻ്റെ അഭിനയമികവ് കാഴ്ചവെച്ചു. പിന്നീട് ബോവുഡിലെ എക്കാലത്തെയും പ്രശസ്ത നടനായി മാറിയ അമിതാഭ് ബച്ചന്റെ ആദ്യത്തെ ചിത്രം കൂടിയാണ് എന്ന പ്രത്യേകത ഈ സിനിമയ്ക്ക് ഉണ്ട്.

പ്രേംനസീറും സത്യനും നിറഞ്ഞു നിൽക്കുന്ന കാലത്താണ് സിനിമയിൽ രംഗപ്രവേശം നടത്തിയതെങ്കിലും അധികം വൈകാതെ സ്വതസ്സിദ്ധമായ അഭിനയശൈലിയിലൂടെ സ്വന്തമായ ഒരു ഇടം നേടിയെടുക്കാൻ മധുവിനായി. ക്ഷുഭിത യൗവനവും പ്രണയാതുരനായ കാമുകനുമൊക്കെയായി അദ്ദേഹം പ്രേക്ഷകരുടെ മനം കവർന്നു.

ചെമ്മീൻ എന്ന വഴിത്തിരിവ്‌[തിരുത്തുക]

മലയാള സിനിമാചരിത്രത്തിലെ നാഴികക്കല്ലെന്ന് വിശേഷിപ്പിക്കപ്പെടുന്ന ചെമ്മീനാണ് മധുവിന്റെ അഭിനയ ജീവിതത്തിലും വഴിത്തിരിവുണ്ടാക്കിയത്‌. കറുത്തമ്മയെ കുടിയിരുത്തിയ പ്രണയതരളമായ മനസ്സുമായി ജീവിച്ച പരീക്കുട്ടി മലയാളികളുടെ ഹൃദയത്തിലേക്കാണ്‌ നടന്നു കയറിയത്‌. മന്നാഡേ ആലപിച്ച മാനസമൈനേ വരൂ.... എന്ന ഗാനം മധുവാണ്‌ പാടിയതെന്നുവരെ ഒരുകാലത്ത് ജനം വിശ്വസിച്ചു.

പതിറ്റാണ്ടുകൾക്കു ശേഷവും മധുവിനെ കാണുമ്പോൾ ചെമ്മീനിലെ സംഭാഷണങ്ങളും ഗാനങ്ങളുമാണ്‌ പ്രേക്ഷകരുടെ മനസ്സിൽ ഓടിയെത്തുന്നത്‌. മിമിക്രി താരങ്ങൾ ഈ നടനെ അനുകരിക്കാൻ ഉപയോഗിക്കുന്നതും ഇതേ ചിത്രത്തിലെ സംഭാഷണങ്ങളാണ്.

പിന്നീട് ഒട്ടേറെ ചിത്രങ്ങളിൽ നായക വേഷത്തിൽ അദ്ദേഹം തിളങ്ങി. ഭാർഗവീ നിലയം, അദ്ധ്യാപിക, മുറപ്പെണ്ണ്, ഓളവും തീരവും, അശ്വമേഥം, തുലാഭാരം, ആഭിജാത്യം, സ്വയംവരം, ഉമ്മാച്ചു, തീക്കനൽ, യുദ്ധകാണ്ഡം, നീതിപീഠം, ഇതാ ഇവിടെവരെ തുടങ്ങിയ ചിത്രങ്ങളിലൂടെ മധു മലയാള സിനിമയുടെ അവിഭാജ്യ ഘടകമായി മാറി.

കാലം മാറുന്നതിനൊപ്പം ചെയ്യുന്ന വേഷങ്ങളും മാറാൻ അദ്ദേഹത്തിനു മടിയില്ലായിരുന്നു. മുഖ്യധാരാ-സിനിമയിലും സമാന്തര-സിനിമയിലും ടെലിവിഷൻ പരമ്പരകളിലും അദ്ദേഹം സാന്നിദ്ധ്യമറിയിച്ചു. അതുകൊണ്ടുതന്നെ മധു എന്ന നായകനടനെ മനസ്സിൽ കുടിയിരുത്തിയ ആരാധകർ, കുടുംബനാഥനായും മുത്തച്ഛനായും അദ്ദേഹം തിരശ്ശീലയിൽ എത്തിയപ്പോൾ ഇരുകൈകളും നീട്ടി സ്വീകരിക്കുകയായിരുന്നു.

അഭിനയത്തിനപ്പുറം[തിരുത്തുക]

കേമറയ്ക്കു മുന്നിൽ മാത്രം ഒതുങ്ങി നിൽക്കുതായിരുന്നില്ല മധുവിന്റെ ജീവിതം. താരജാഡ തൊട്ടു തീണ്ടാത്ത സ്നേഹബന്ധങ്ങൾക്ക്‌ ഉടമയായിരുന്നു അദ്ദേഹം. സംവിധായകൻ, നിർമ്മാതാവ്‌, സ്റ്റുഡിയോ ഉടമ, സ്കൂൾ ഉടമ, കർഷകൻ തുടങ്ങിയ റോളുകളിലും തിളങ്ങി.

മലയാള സിനിമയെ ചെന്നൈയിൽ നിന്നും കേരളത്തിലേക്ക്‌ പറിച്ചു നടുന്ന കാലഘട്ടത്തിലാണ് അദ്ദേഹം‌ തിരുവനന്തപുരത്ത്‌ വള്ളക്കടവിൽ ഉമാ സ്റ്റുഡിയോ സ്ഥാപിച്ചത്‌. മറ്റു പല സിനിമാ നിർമ്മാതാക്കൾക്കും ഈ സ്റ്റുഡിയോ ഒരനുഗ്രഹമായി.

1970ൽ പുറത്തിറങ്ങിയ പ്രിയ ആയിരുന്നു അദ്ദേഹം ആദ്യമായി സംവിധാനം ചെയ്ത ചിത്രം. സിന്ദൂരച്ചെപ്പ്, സതി, നീലക്കണ്ണുകൾ, മാന്യശ്രീ വിശ്വാമിത്രൻ, അക്കൽദാമ, കാമ ക്രോധം മോഹം, തീക്കനൽ, ധീര സമീരേ യമുനാ തീരേ, ആരാധന, ഒരു യുഗസന്ധ്യ, ഉദയം പടിഞ്ഞാറ് എന്നിവയും അദ്ദേഹം സംവിധാനം ചെയ്ത ചിത്രങ്ങളാണ്.[5] സതി, ആക്കൽദാമ, തീക്കനൽ എന്നീ ചിത്രങ്ങൾ സൂപ്പർ ഹിറ്റുകളായിരുന്നു. മാന്യശ്രീ വിശ്വാമിത്രൻ, സംരംഭം തുടങ്ങിയ ചിത്രങ്ങളാണ്‌ അദ്ദേഹം നിർമ്മിച്ചവ. അദ്ദേഹം തന്നെ സംവിധാനം ചെയ്ത പ്രിയ, സിന്ദൂരച്ചെപ്പ് എന്നിവ മികച്ച രണ്ടാമത്തെ ചിത്രത്തിനുള്ള സംസ്ഥാന അവാർഡ്‌ നേടിയിരുന്നു. ഓമലാളെ കണ്ടൂ ഞാൻ പൂങ്കിനാവിൽ ..... എന്ന പ്രശസ്തമായ ഗാനം സിന്ദൂരച്ചെപ്പ് എന്ന ചിത്രത്തിലേതാണ്.


കുടുംബം[തിരുത്തുക]

പരേതയായ ജയലക്ഷ്മിയാണ് മധുവിന്റെ ഭാര്യ. ഇവർക്ക് ഉമ എന്ന പേരിൽ ഒരു മകളുണ്ട്.

പുരസ്കാരങ്ങൾ[തിരുത്തുക]

  • 1980 സംസ്ഥാന സർക്കാരിന്റെ പ്രത്യേക പുരസ്കാരം
  • 1995 മികച്ച കുട്ടികളുടെ ചിത്രത്തിനുള്ള(നിർമാതാവ്‌) അവാർഡ്‌ (മിനി എന്ന ചിത്രത്തിന്‌)
  • 2004 സമഗ്ര സംഭാവനക്കുള്ള ജെ. സി ഡാനിയൽ അവാർഡ്‌
  • 2013 പത്മശ്രീ പുരസ്കാരം[6]

മധു -ചലച്ചിത്രസംഭാവനകൾ[തിരുത്തുക]

മലയാളം[തിരുത്തുക]

വർഷം ചലച്ചിത്രം
2019 മാജിക് മൊമൻറ്സ്
2019 ചിൽഡ്രൻസ് പാർക്ക്
2019 വിശുദ്ധ പുസ്തകം
2019 ഒരു യമണ്ടൻ പ്രേമകഥ
2019 വള്ളിക്കെട്ട്
2018 വേലക്കാരി ആയി ഇരുന്താലും നീ എൻ മോഹവല്ലി
2018 സ്ഥാനം
2018 മൈ സ്കൂൾ
2018 ഡസ്റ്റ് ബിൻ
2017 നെക്സ്റ്റ് ടോക്കൺ നമ്പർ
2017 വളപ്പൊട്ടുകൾ
2017 ബഷീറിന്റെ പ്രേമലേഖനം
2017 ഏലിയാമ്മച്ചിയുടെ ആദ്യത്തെ ക്രിസ്തുമസ്
2017 വേദം
2017 സ്വയം
2016 സെലിബ്രേഷൻസ്
2015 ഞാൻ സംവിധാനം ചെയ്യും
2015 കിഡ്നി ബിരിയാണി
2015 സാമ്രാജ്യം II: സൺ ഓഫ് അലക്സാണ്ടർ
2015 അമ്മയ്ക്കൊരു താരാട്ട്
2014 ഡോൾഫിൻസ്
2014 നെലുമ്പൂ
2014 മൈലാഞ്ചിമൊഞ്ചുള്ള വീട്
2013 72 മോഡൽ
2012 സ്പിരിറ്റ്
2012 സിംഹാസനം
2011 ആഗസ്റ്റ് 15
2011 ഉമ്മ
2011 മൗനഗുരു
2010 കാര്യസ്ഥൻ
2010 പത്താം അധ്യായം
2010 ബ്രഹ്മാസ്ത്രം
2008 റോബോ
2008 റ്റ്വന്റി:20
2007 പന്തയക്കോഴി
2007 ഹലോ
2006 രാവണൻ
2006 രാഷ്ട്രം
2005 തസ്കരവീരൻ
2005 നരൻ
2005 ബെൻ ജോൺസൺ
2001 ഷാർജാ ടു ഷാർജാ
1999 എഴുപുന്ന തരകൻ
1997 വർണ്ണപ്പകിട്ട്
1995 സമുദായം
1994 മലപ്പുറം ഹാജി മഹാനായ ജോജിi
1994 വരണമാല്യം
1993 തലമുറ
1992 കുടുംബസമേതം
1992 ശബരിമലയിൽ തങ്കസൂര്യോദയം
1992 ചമ്പക്കുളം തച്ചൻ
1990 നമ്മുടെ നാട്
1989 നാടുവാഴികൾl
1989 ദേവദാസ്
1988 സൈമൺ പീറ്റർ നിനക്കുവേണ്ടി
1988 1921
1987 ഇത്രയും കാലം
1986 ഒരു യുഗസന്ധ്യ
1986 ഇതിലേവന്നവർ
1986 ഉദയം പടിഞ്ഞാറ്
1985 പച്ചവെളിച്ചം
1985 വെള്ളം
1985 കണ്ണാരം പൊത്തി പൊത്തി
1984 ചക്കരയുമ്മ
1984 അലകടലിനക്കരെ
1984 കുരിശുയുദ്ധം
1984 ആറ്റുവഞ്ചി ഉലഞ്ഞപ്പോൾ
1984 ഇത്തിരിപ്പൂവേ ചുവന്നപൂവേ
1984 ആരോരുമറിയാതെ
1984 ജീവിതം
1984 ഒരു പൈങ്കിളിക്കഥ
1983 മോർച്ചറി
1983 പിൻനിലാവ്
1983 നാണയം
1983 രതിലയം
1983 എന്നെ ഞാൻ തേടുന്നു
1983 കൊടുങ്കാറ്റ്
1983 അങ്കം
1983 ബന്ധം
1983 ആധിപത്യം
1983 ആന
1983 യുദ്ധം
1982 പടയോട്ടം
1982 ഞാൻ ഏകനാണ്
1982 ആരംഭം
1982 പോസ്റ്റുമാർട്ടം
1982 കർത്തവ്യം
1981 രക്തം
1981 താറാവ്
1981 ഗൃഹലക്ഷ്മി
1981 കോളിളക്കം
1981 സംഭവം
1981 അരിക്കാരി അമ്മു
1981 ആക്രമണം
1981 ഒരിക്കൽ കൂടി
1980 അമ്പലവിളക്ക്
1980 അകലങ്ങളിൽ അഭയം
1980 തീക്കടൽ
1980 വൈകി വന്ന വസന്തം
1980 സ്വന്തം എന്ന പദം
1980 മുത്തുച്ചിപ്പികൾ
1980 രജനീഗന്ധി
1980 ദീപം
1980 മീൻ
1979 ഹൃദയത്തിന്റെ നിറങ്ങൾ
1979 കള്ളിയങ്കാട്ടു നീലി
1979 ജീവിതം ഒരു ഗാനം
1979 ശുദ്ധികലശം
1979 പ്രതീക്ഷ
1979 പ്രഭാതസന്ധ്യ
1979 കായലും കയറും
1979 മനുഷ്യൻ
1979 എനിക്കു ഞാൻ സ്വന്തം
1979 ഒരു രാഗം പല താളം
1979 വേനലിൽ ഒരു മഴ
1978 അസ്തമയം
1978 റൗഡി രാമു
1978 ഈ മനോഹര തീരം
1978 സ്നേഹിക്കാൻ സമയമില്ല
1978 വാടകയ്ക്ക് ഒരു ഹൃദയം
1978 ജലതരംഗം (ചലച്ചിത്രം)
1978 ബീന
1978 ഞാൻ ഞാൻ മാത്രം
1978 കന്യക
1978 ഇതാ ഒരു മനുഷ്യൻ
1978 ഈറ്റ
1978 ഉറക്കം വരാത്ത രാത്രികൾ
1977 ആരാധന
1977 വിടരുന്ന മൊട്ടുകൾ
1977 റൗഡി രാജമ്മ
1977 അപരാധി
1977 യുദ്ധകാണ്ഡം
1977 ഇതാ ഇവിടെ വരെ
1977 ശാന്ത ഒരു ദേവത
1977 ധീരസമീരേ യമുനാ തീരേ
1977 നീതിപീഠം
1977 പൂജയ്ക്കെടുക്കാത്ത പൂക്കൾ
1976 കന്യാദാനം
1976 തെമ്മാടി വേലപ്പൻ
1976 അമ്മ
1976 യക്ഷഗാനം
1976 തീക്കനൽ
1976 മുറപ്പെണ്ണ്
1976 ഹൃദയം ഒരു ക്ഷേത്രം
1975 സിന്ധു
1975 അക്കൽദാമ
1975 ബോയ് ഫ്രണ്ട്
1975 കാമം ക്രോധം മോഹം
1974 മാന്യശ്രീ വിശ്വാമിത്രൻ
1974 ഭൂമീദേവി പുഷ്പിണിയായി
1974 യൗവനം
1973 ഏണിപ്പടികൾ
1973 പോലീസ് അറിയരുത്
1973 നഖങ്ങൾ
1973 സ്വപ്നം
1973 സ്വർഗ്ഗപുത്രി
1973 മനുഷ്യപുത്രൻ
1973 മഴക്കാറ്
1973 തിരുവാഭരണം
1973 യാമിനി
1973 മാധവിക്കുട്ടി
1973 തെക്കൻ കാറ്റ്
1973 കാട്
1973 ഉദയം
1973 ദിവ്യദർശനം
1972 തീർത്ഥയാത്ര
1972 ആറടി മണ്ണിന്റെ ജന്മി
1972 സതി
1972 ഇനി ഒരു ജന്മം തരൂ
1972 മനുഷ്യബന്ധങ്ങൾ
1972 പുത്രകാമേഷ്ടി
1972 ചെമ്പരത്തി
1972 പണിമുടക്ക്
1972 വിദ്യാർത്ഥികളേ ഇതിലേ ഇതിലേ
1972 നാടൻ പ്രേമം
1972 ഗന്ധർവ്വക്ഷേത്രം
1972 സ്നേഹദീപമേ മിഴിതുറക്കൂ
1971 കരകാണാക്കടൽ
1971 സിന്ദൂരച്ചെപ്പ്
1971 ലൈൻ ബസ്സ്
1971 ശരശയ്യ
1971 വിലയ്ക്കുവാങ്ങിയ വീണ
1971 ബോബനും മോളിയും
1971 ആഭിജാത്യം
1971 ഉമ്മാച്ചു
1971 കൊച്ചനിയത്തി
1971 വിത്തുകൾ
1970 ഭീകര നിമിഷങ്ങൾ
1970 തുറക്കാത്ത വാതിൽ
1970 പ്രിയ
1970 അഭയം
1970 സ്വപ്നങ്ങൾ
1970 ഓളവും തീരവും
1969 കള്ളിച്ചെല്ലമ്മ
1969 നദി
1969 വെള്ളിയാഴ്ച
1969 വിരുന്നുകാരി
1969 സാത് ഹിന്ദുസ്ഥാനി
1969 വീട്ടുമൃഗം
1968 തുലാഭാരം
1968 കടൽl
1967 അന്വേഷിച്ചു കണ്ടെത്തിയില്ല
1967 ഉദ്യോഗസ്ഥ
1967 ലേഡി ഡോക്ടർ
1967 അശ്വമേധം
1967 രമണൻ
1967 നഗരമേ നന്ദി
1966 അർച്ചന
1965 പുത്രി
1965 ചെമ്മീൻ
1965 കാട്ടുപൂക്കൾ
1965 മായാവി
1965 സുബൈദ
1965 പട്ടുതൂവാാല
1965 ജീവിതയാത്ര
1965 സർപ്പക്കാട്
1964 ഭാർഗ്ഗവീനിലയം
1964 കുട്ടിക്കുപ്പായം
1964 തച്ചോളി ഒതേനൻ
1963 അമ്മയെ കാണാൻ
1963 മൂടുപടം
1963 നിണമണിഞ്ഞകാല്പാടുകൾ

തമിഴ്[തിരുത്തുക]

സംവിധാനം[തിരുത്തുക]

നിർമ്മാണം[തിരുത്തുക]

[7]

ക്ര.നം. സിനിമ വർഷം സംവിധാനം
1 സതി 1972 മധു
2 മാന്യശ്രീ വിശ്വാമിത്രൻ 1974 മധു
3 അക്കൽദാമ 1975 മധു
4 കാമം ക്രോധം മോഹം 1975 മധു
5 അസ്തമയം 1978 പി ചന്ദ്രകുമാർ
6 കൈതപ്പൂ 1978 രഘുരാമൻ
7 പ്രഭാതസന്ധ്യ 1979 പി ചന്ദ്രകുമാർ
8 ശുദ്ധികലശം 1979 പി ചന്ദ്രകുമാർ
9 വൈകി വന്ന വസന്തം 1980 ബാലചന്ദ്ര മേനോൻ
10 ഗൃഹലക്ഷ്മി (ചലച്ചിത്രം) 1981 എം കൃഷ്ണൻ നായർ
11 അർച്ചന ടീച്ചർ 1981 പി എൻ മേനോൻ
12 ഞാൻ ഏകനാണ് 1982 പി ചന്ദ്രകുമാർ
13 രതിലയം 1983 പി ചന്ദ്രകുമാർ
14 ഉദയം പടിഞ്ഞാറ് 1986 മധു
15 മിനി 1995 പി ചന്ദ്രകുമാർ

പിന്നണിഗാനം[തിരുത്തുക]

  • സഹകരിക്കട്ടെ സഹകരിക്ക [Bit] ... രമണൻ (1967)
  • അറിയൂ [Bit] ... രമണൻ (1967)
  • രമണീയെന്നിൽ [Bit] ... രമണൻ (1967)

അവലംബം[തിരുത്തുക]

  1. "ആർക്കൈവ് പകർപ്പ്". മൂലതാളിൽ നിന്നും 2013-09-26-ന് ആർക്കൈവ് ചെയ്തത്. ശേഖരിച്ചത് 2013-09-24.
  2. https://www.youtube.com/watch?v=Qjdr4x7tUAs
  3. മാത്റ്ഭൂമി വാർഷിക പതിപ്പ് 2013 പേജ്178
  4. https://www.youtube.com/watch?v=Qjdr4x7tUAs
  5. m3db മധു
  6. "ആർക്കൈവ് പകർപ്പ്". മൂലതാളിൽ നിന്നും 2013-01-29-ന് ആർക്കൈവ് ചെയ്തത്. ശേഖരിച്ചത് 2013-01-26.
  7. "മധു നിർമ്മിച്ച ചിത്രങ്ങൾ". മലയാളസംഗീത്ം ഇൻഫോ. ശേഖരിച്ചത് 2019-11-29. {{cite web}}: Cite has empty unknown parameter: |1= (help)

പുറത്തേക്കുള്ള കണ്ണികൾ[തിരുത്തുക]

"https://ml.wikipedia.org/w/index.php?title=മധു&oldid=3831224" എന്ന താളിൽനിന്ന് ശേഖരിച്ചത്