ബ്‌ളൂ ഡയമണ്ട്‌സ് ഓർക്കസ്ട്ര

1970 ൽ അമേച്വർ നാടകങ്ങളും സംഗീത പരിപാടികളും സംഘടിപ്പിക്കാനായി ആലപ്പുഴയിലെ കലാകാരൻമാരും കലാസ്വാദകരുമായ ചെറുപ്പക്കാർ രൂപീകരിച്ച കൂട്ടായ്മയയാണ് പിന്നീട് ബ്‌ളൂ ഡയമണ്ട്‌സ് ഓർക്കസ്ട്ര ആയി മാറിയത്. വാടകയ്ക്കെടുത്ത സംഗീതോപകരണങ്ങളുമായിട്ടായിരുന്നു ആദ്യ കാലങ്ങളിൽ പരിപാടികൾ അവതരിപ്പിച്ചിരുന്നത്.

പ്രശസ്തമായ ഭീമ ജ്യൂവലേഴ്സിന്റെ ഉടമയായ ഭീമ ഭട്ടരുടെ മകൻ ബിന്ദു മാധവ് ഈ സംഘത്തിൽ വന്നതോടെ ആധുനിക ഇലക്ട്രോണിക് സംഗീതോപകരണങ്ങൾ ട്രൂപ്പിന് സ്വന്തമായി. സംഘത്തിന് ബ്ലൂ ഡയമണ്ട്സ് എന്ന പേരു നൽകിയതും ബിന്ദു മാധവ് ആണ്. 1973 ൽ ബിന്ദു മാധവിന്റെ വിവാഹ സൽക്കാരവേളയിലായിരുന്നു ഔദ്യോഗിക ഉദ്ഘാടനം. എ.ആർ റഹ്മാന്റെ പിതാവ് ആർ.കെ ശേഖറും എം.കെ അർജുനനും കുമരകം രാജപ്പനും ചേർന്നാണ് തിരിതെളിച്ചത്.

ഗാനമേളകളിൽ ആദ്യമായി ത്രീ-വേ സൗണ്ട് സിസ്റ്റം അവതരിപ്പിച്ചത് ബ്‌ളൂ ഡയമണ്ട്‌സ് ഓർക്കസ്ട്ര ആണ്

ഇടവ ബഷീർ, പട്ടണക്കാട് പുരുഷോത്തമൻ, കെ.ജി മാർക്കോസ്, പന്തളം ബാലൻ, സുദീപ് കുമാർ, ദലീമ ജോജോ , മിൻമിനി, ജെൻസി ആന്റണി, ലതിക എന്നിവരെല്ലാം ബ്ലൂ ഡയമണ്ട്സിന്റെ ഗാനമേളകളിൽ പാട്ടുകൾ പാടിയിട്ടുണ്ട്. സംഗീത സംവിധായകരായ ഔസേപ്പച്ചൻ, ജോൺസൺ മാസ്റ്റർ, റെക്സ് ഐസക്ക് , സിനിമാ സംവിധായകൻ ഫാസിൽ, നടൻ നെടുമുടി വേണു എന്നിവരും ബ്ലൂ ഡയമണ്ട് ഓർക്കസ്ട്രയുമായി സഹകരിച്ചിരുന്നു.