ഉള്ളടക്കത്തിലേക്ക് പോവുക

ഫുഗ്ഡി

വിക്കിപീഡിയ, ഒരു സ്വതന്ത്ര വിജ്ഞാനകോശം.

വിനായക ചതുർഥി, വ്രതം തുടങ്ങിയ ഹിന്ദു മതപരമായ ഉത്സവങ്ങളിലോ ധാലോ പോലുള്ള മറ്റ് നൃത്തങ്ങളുടെ അവസാനത്തിലോ മഹാരാഷ്ട്ര, ഗോവ എന്നീ സംസ്ഥാനങ്ങളിലെ കൊങ്കൺ മേഖലയിലെ സ്ത്രീകൾ അവതരിപ്പിക്കുന്ന നാടോടി നൃത്തമാണ് ഫുഗ്ഡി. ചില ചരിത്രവിവരണങ്ങൾ അനുസരിച്ച്, ഈ നൃത്തശൈലി പുരാതന ഗോവൻ പാരമ്പര്യങ്ങളിൽ നിന്ന് ഉടലെടുത്തതാണെന്ന് പറയപ്പെടുന്നു. ഹിന്ദു മാസമായ “ഭദ്രപദ”ത്തിലാണ് ഈ നൃത്തം പ്രധാനമായും അവതരിപ്പിക്കുന്നത്. മതപരവും സാമൂഹികവുമായ പരിപാടികളിൽ ഇത് നടത്താറുണ്ട്.

പരമ്പരാഗത വേരുകൾ

[തിരുത്തുക]

മഹാരാഷ്ട്രയിലെയും ഗോവയിലെയും സാംസ്കാരിക പാരമ്പര്യങ്ങളിൽ വേരുകളുള്ള ഒരു നാടോടി കലാരൂപമാണ് ഫുഗ്ഡി. വിവിധ മത, സാമൂഹിക അവസരങ്ങളിൽ ഇത് നടത്താറുണ്ട്. ഭദ്രപദ മാസത്തിലാണ് ഫുഗ്ഡി പൊതുവേ നടത്തുന്നത്; സ്ത്രീകൾക്ക് അവരുടെ ഏകതാനമായ ദൈനംദിന ജീവിതത്തിൽ നിന്ന് താൽക്കാലികമായി ഒരു ഇടവേള എടുക്കാനുള്ള അവസരമാണിത്.[1] ധൻഗാർ (ഇടയ സമൂഹം) സ്ത്രീകൾക്കിടയിൽ ഫുഗ്ഡിയുടെ ഒരു പ്രത്യേക രീതി കാണപ്പെടുന്നു. ദേവിക്കായുള്ള വ്രതത്തിനിടെ മഹാലക്ഷ്മി ദേവിയുടെ മുമ്പിലാണ് കലാഷി ഫുഗ്ഡി നടത്തുന്നത്.

നൃത്തരീതി

[തിരുത്തുക]

വൃത്താകൃതിയിലോ വരിയായോ നിന്നാണ് സ്ത്രീകൾ പാടുകയും നൃത്തം ചെയ്യുകയും ചെയ്യുന്നത്. സാധാരണയായി ഗ്രാമങ്ങളിലെ സ്ത്രീകൾ വട്ടത്തിൽ നിന്ന് ഫുഗ്ഡി നൃത്തം ചെയ്യുമ്പോൾ, വനമേഖലകളിലെ സ്ത്രീകൾ വരികളായി നിന്നാണ് നൃത്തം ചെയ്യുന്നത്.[2] ഹിന്ദു പ്രാർത്ഥനയോടെയാണ് നൃത്തം ആരംഭിക്കുന്നത്. തുടക്കത്തിൽ മന്ദഗതിയിലാണെങ്കിലും നൃത്തം പെട്ടെന്നുതന്നെ വേഗം കൈവരിച്ച് പാരമ്യത്തിലെത്തുന്നു. നൃത്തത്തിന് താളവാദ്യങ്ങളുടെ അകമ്പടിയില്ല. പരമാവധി വേഗതയിൽ "ഫൂ" എന്ന് തോന്നിക്കുന്ന ഒരു ശബ്ദം ഉണ്ടാകുന്നതിനാലാണ് ഫുഗ്ഡി എന്ന പേര് വന്നതെന്ന് കരുതപ്പെടുന്നു. ഏതാനും നിശ്ചിത ചുവടുകളും കൈ ആംഗ്യങ്ങളുമാണ് നൃത്തത്തിലെ പ്രധാന ഘടകങ്ങൾ. നൃത്തത്തിന് സംഗീതോപകരണങ്ങൾ ഒന്നും ഉപയോഗിക്കുന്നില്ലെങ്കിലും ഫുഗ്ഡിക്കായുള്ള പ്രത്യേക ഗാനങ്ങൾ എണ്ണമറ്റതാണ്.

ഉപവിഭാഗങ്ങൾ

[തിരുത്തുക]

ഗിർകി, സൈക്കിൾ, റാഹത്ത്, സിമ്മ, കാർവർ, ബസ് ഫുഗ്ഡി, കോംബ്ഡ, ഘുമ, പഖ്‌വ എന്നിവ ഫുഗ്ഡിയുടെ ജനപ്രിയ ഉപരൂപങ്ങളിൽ പെടുന്നു. വളരെ ദൂരെ നിന്ന് വെള്ളം കൊണ്ടുവരുന്ന ദിനചര്യയുടെ ഏകതാനത ഒഴിവാക്കുന്നതിനുള്ള ഒരു മാർഗമായാണ് കലാഷി ഫുഗ്ഡി ആരംഭിച്ചത്. ജലസ്രോതസ്സുകളിലേക്ക് നടന്നുപോകുന്ന വഴിയിൽ സ്ത്രീകൾ നൃത്തം ചെയ്യുമായിരുന്നു. ഫുഗ്ഡിയുടെ മറ്റൊരു ജനപ്രിയ രൂപമായ കട്ടി ഫുഗ്ഡി കൈയിൽ ചിരട്ട പിടിച്ചുകൊണ്ടുള്ള നൃത്തമാണ്.

അവലംബം

[തിരുത്തുക]
  1. ↑ "Folk Dances of South West India" (in ഇംഗ്ലീഷ്). Archived from the original on 2020-11-01. Retrieved 2021-02-14.
  2. ↑ "Goan Folk Arts". Archived from the original on 2011-11-03. Retrieved 23 November 2011.
"https://ml.wikipedia.org/w/index.php?title=ഫുഗ്ഡി&oldid=4679810" എന്ന താളിൽനിന്ന് ശേഖരിച്ചത്