വി.ടി. ഇന്ദുചൂഡൻ

ഇംഗ്ലീഷ് വിലാസം

https://ml.wikipedia.org/wiki/V.T._Induchoodan

മലയാളത്തിലെ ഒരു പത്രപ്രവര്‍ത്തകനും എഴുത്തുകാരനുമായിരുന്നു വി.ടി. ഇന്ദുചൂഡന്‍ (സെപ്റ്റംബര്‍ 19, 1919 - ജനുവരി 25, 2002). കമ്മ്യൂണിസ്റ്റ് അനുഭാവിയായിരുന്ന ഇദ്ദേഹം ദേശാഭിമാനി പത്രത്തിന്റെ പത്രാധിപരുമായിരുന്നു. പില്‍ക്കാലത്ത് കമ്മ്യൂണിസ്റ്റ് വിരോധിയായി മാറിയ ഇന്ദുചൂഡന്‍ ആര്‍.എസ്.എസ്. പ്രവര്‍ത്തകനായി മാറി.

ജീവിതരേഖ

1919-ല്‍ കൊടുങ്ങല്ലൂരില്‍ ഇദ്ദേഹം ജനിച്ചത്. ബിരുദമെടുത്ത ശേഷം ഇന്ത്യന്‍ നാഷണല്‍ കോണ്‍ഗ്രസ്സിലും കൊച്ചി പ്രജാമണ്ഡലത്തിലും പ്രവര്‍ത്തിച്ച ഇദ്ദേഹം ഇന്ത്യന്‍ സ്വാതന്ത്ര്യസമരത്തിലും പങ്കെടുത്തു. പിന്നീടാണ് കമ്മ്യൂണിസ്റ്റ് പ്രസ്ഥാനത്തോട് ആകര്‍ഷിക്കപ്പെട്ടത്. തുടര്‍ന്ന് അവിഭക്ത കമ്യൂണിസ്റ്റു പ്രസ്ഥാനത്തില്‍ കുറേക്കാലം പ്രവര്‍ത്തിച്ച ഇന്ദുചൂഡന്‍ ചരിത്രഗവേഷണം, ലളിതകലകള്‍ എന്നിവയിലും പ്രത്യേക താല്പര്യം പുലര്‍ത്തി. ദേശാഭിമാനി, ജഗല്‍സാക്ഷി എന്നീ പത്രങ്ങളുടെ അധിപനായും ഇദ്ദേഹം സേവനം അനുഷ്ടിച്ചിട്ടുണ്ട്.

1964-ല്‍ കമ്മ്യൂണിസ്റ്റ് പാര്‍ട്ടി പിളര്‍ന്നതിനെ തുടര്‍ന്ന് ഇന്ദുചൂഡന്‍ സി.പി.ഐയോടൊപ്പം നിന്നു. ഇതിനെത്തുടര്‍ന്ന് സി.പി.എമ്മില്‍ നിന്ന് പുറത്തായ ഇദ്ദേഹത്തിന് രണ്ടു ദശകത്തോളം പത്രാധിപരായി സേവനമനുഷ്ഠിച്ച ദേശാഭിമാനി പത്രവും വിടേണ്ടിവന്നു. 1972 മുതല്‍ 1978 വരെ ഇദ്ദേഹം കേരള കലാമണ്ഡലത്തിന്റെ സെക്രട്ടറിസ്ഥാനം വഹിച്ചു.

മഹാകവി വള്ളത്തോള്‍ നാരായണമേനോന്റെ മകള്‍ മല്ലികയാണ് ഭാര്യ. രണ്ട് ആണ്‍മക്കളും ഒരു മകളുമുണ്ട്.

സാഹിത്യരംഗത്ത്

ആമിനാബീവി, ചാണക്യന്‍ എന്നീ തൂലികാനാമങ്ങളിലാണ് ഇദ്ദേഹം എഴുതിയിരുന്നത്. വെല്‍ഡല്‍ വില്‍ക്കിയുടെ വണ്‍വേള്‍ഡിന്റെ (ഏകലോകം) വിവര്‍ത്തനത്തിനു പുറമേ ശുദ്ധീകരണം, നിവര്‍ന്നു നില്‍ക്കാറായി എന്നീ പ്രഹസനങ്ങളും കലയും മാര്‍ക്സിസവും എന്ന ഒരു നിരൂപണഗ്രന്ഥവും ഇദ്ദേഹം എഴുതിയിട്ടുണ്ട്.