മഹാബോധിവൃക്ഷം

മഹാബോധി

ലോകമാകമാനമുള്ള ബുദ്ധമതവിശ്വാസികള്‍ വിശുദ്ധമായി കണക്കാക്കുന്ന ഒരു കേന്ദ്രമാണ്‌ ശ്രീലങ്കയിലെ അനുരാധപുരത്തുള്ള മഹാബോധി എന്ന ആല്‍മരം. ഗൗതമബുദ്ധന്‍ നിര്‍വാണം പ്രാപിച്ചയിടത്തെ ബോധീവൃക്ഷത്തില്‍ നിന്നുള്ള തൈ ആണ്‌ ഇതെന്നാണ്‌ വിശ്വസിക്കപ്പെടുന്നത്. ബി.സി.ഇ. 288-ല്‍ നട്ട ഈ വൃക്ഷമാണ്‌ മനുഷ്യന്‍ നട്ടുവളര്‍ത്തിയ അറിയപ്പെട്ടിട്ടുള്ളതില്‍ വച്ച് ഏറ്റവും പുരാതനമായ വൃക്ഷം.

ചരിത്രം

ബി.സി.ഇ. മൂന്നാം നൂറ്റാണ്ടില്‍ അശോകചക്രവര്‍ത്തിയുടെ മകള്‍ സംഘമിത്രയാണ്‌ ഈ തൈ ഇന്ത്യയില്‍ നിന്നും ശ്രീലങ്കയില്‍ എത്തിച്ചതെന്നും അവരുടെ നിര്‍ദ്ദേശപ്രകാരം ഇത് ഇവിടെ നട്ടുവളര്‍ത്തുകയായിരുന്നെന്നും വിശ്വസിക്കപ്പെടുന്നു.

ബുദ്ധഗയയിലെ ബോധീവൃക്ഷത്തിന്റെ ദക്ഷിണശാഖയാണ്‌ ഈ വൃക്ഷം എന്നാണ്‌ വിശ്വാസം. രാജാവ് ദേവനമ്പിയതിസയാണ്‌ ബി.സി.ഇ. 249-ല്‍ വൃക്ഷം അനുരാധപുരത്തെ മഹാമേഘവനം ഉദ്യാനത്തില്‍ നട്ടത്.

സം‌രക്ഷണം

വടക്കുകിഴക്കു ദിശയിലേക്ക് ചെരിഞ്ഞിരിക്കുകയായിരുന്ന ഈ വൃക്ഷം വീഴാതിരിക്കുന്നതിന്‌ ഒരു താങ്ങ് കൊടുത്തിരുന്നു എന്ന് അഞ്ചാം നൂറ്റാണ്ടില്‍ ഇവിടം സന്ദര്‍ശിച്ച ചൈനീസ് സഞ്ചാരി ഫാഹുസീന്‍ രേഖപ്പെടുത്തിയിട്ടുണ്ട്. ഇന്ന് ഈ വൃക്ഷത്തിന്‌ സ്വര്‍ണം പൂശിയ മൂന്നു താങ്ങുകള്‍ നല്‍കിയിട്ടുണ്ട്.

ഭൂനിരപ്പില്‍ നിന്നും ആറര മീറ്റര്‍ ഉയരത്തിലുള്ള ഒരു തറയില്‍ നട്ടിരുന്ന ഇതിനു ചുറ്റും വേലി കെട്ടി ഭദ്രമാക്കിയിരുന്നു. വൃക്ഷത്തെ കാട്ടാനകളില്‍ നിന്നും സം‌രക്ഷിക്കുന്നതിനായി രാജാവായിരുന്ന കീര്‍ത്തി ശ്രീ രാജസിംഹനാണ്‌ ചുറ്റുമതില്‍ കെട്ടിയത്.