തെക്കൻ താണിശ്ശേരി പള്ളി

തൃശൂർ ജില്ലയുടെയും എറണാകുളം ജില്ലയുടെയും അതിർത്തി പങ്കിടുന്ന കുഴൂർ ഗ്രാമപഞ്ചായത്തിൽ സ്ഥിതിചെയ്യുന്ന ഒരു പള്ളിയാണ് തെക്കൻ താണിശ്ശേരി പള്ളി. വിശുദ്ധ ഫ്രാൻസിസ് സേവ്യർ ൻ്റെ നാമധേയത്തിലുള്ളതാണ് ഈ പള്ളി. സിറോ മലബാർ സഭയിലെ ഇരിങ്ങാലക്കുട രൂപതയിലാണ് ഈ പള്ളി സ്ഥിതിചെയ്യുന്നത്.

ചരിത്രം

1807 ലായിരുന്നു ഈ പള്ളി ഒരു ഓലക്കെട്ടിടത്തിൽ പ്രവർത്തനമാരംഭിച്ചത്. അതുവരെ അമ്പഴക്കാട് ഫൊറോന പള്ളിയുടെ കീഴിലായിരുന്നു തെക്കൻ താണിശേരി. പള്ളിക്കുവേണ്ടിയുള്ള സ്ഥലം പൊട്ടേപറമ്പിൽ, കാച്ചപ്പിള്ളി എന്നീ വീട്ടുകാർ ദാനമായി നൽകി. പിന്നീട് കല്ലുകൊണ്ട് അടിത്തറകെട്ടി ചെറിയൊരു പള്ളി പണിഞ്ഞു. അമ്പഴക്കാട് പള്ളിയിൽ നിന്നു കൊണ്ടു വന്ന വിശുദ്ധ ഫ്രാൻസിസ് സേവ്യറിന്റെ രൂപം പള്ളിയിൽ സ്ഥാപിച്ചു. കല്ലുകൊണ്ടു നിർമിച്ച അൾത്താരയും മദ്ബഹയുമുള്ള പള്ളി 1900 നുശേഷമാണ് യാഥാർഥ്യമായത്. 1927 ൽ അന്നത്തെ വികാരി ഫാ. ജോർജ് പുതുശ്ശേരി ഇവിടെ ഒരു പള്ളിക്കൂടം സ്ഥാപിച്ചു. അതാണ് ഇന്ന് കാണുന്ന സെൻ്റ്. സേവ്യേഴ്സ് എൽ പി സ്കൂൾ. 1945 ൽ ഫ്രാൻസിസ്കൻ ക്ലാരിസ്റ്റ് കോൺഗ്രിഗേഷൻ സിസ്റ്റേഴ്‌സ് (FCC) യുപി സ്‌കൂൾ തുടങ്ങി. യുപി സ്‌കൂൾ പിന്നീട് സെൻ്റ്. ആൻ്റണീസ് ഗേൾസ് ഹൈസ്കൂൾ ആയി.