തിയോഫിലസ് ജോൺ മെറ്റ്കാഫ്

ബ്രിട്ടീഷ് ഇന്ത്യയിലെ ഒരു ഭരണകർത്താവായിരുന്നു തിയോഫിലസ് ജോൺ മെറ്റ്കാഫ് (ഇംഗ്ലീഷ്: Theophilus John Metcalfe, ജീവിതകാലം: 1828 നവംബർ 28 - 1883 നവംബർ 10 ). തിയോ എന്നു മാത്രമായും അറിയപ്പെടുന്നു. ഡെൽഹിയിലെ ബ്രിട്ടീഷ് റെസിഡന്റായിരുന്ന തോമസ് മെറ്റ്കാഫിന്റെ പുത്രനായിരുന്നു അദ്ദേഹം. 1857-ലെ ലഹളയുടെ അവസാനം ദില്ലി നിവാസികൾക്കെതിരെയുള്ള ബ്രിട്ടീഷ് സേനയുടെ കൂട്ടക്കുരുതിയിൽ മുഖ്യ പങ്കുവഹിച്ചതിന്റെ പേരിൽ പ്രസിദ്ധനാണ്.

ദില്ലിയിൽ

ഇംഗ്ലണ്ടിലെ പഠിത്തത്തിനുശേഷം ഈസ്റ്റ് ഇന്ത്യ കമ്പനിയിൽ ഒരു ജൂനിയർ മജിസ്ട്രേറ്റായി ജോലിയിൽ പ്രവേശിച്ചിരിക്കുകയായിരുന്നു തിയോഫിലസ്. 1851-ൽ ദില്ലിയിൽ പിതാവിനോടൊപ്പം നിയമനം ലഭിച്ചു. തന്നിലേക്കൊതുങ്ങിക്കഴിഞ്ഞിരുന്ന പിതാവ് തോമസ് മെറ്റ്കാഫിൽ നിന്ന് വ്യത്യസ്തനായി തിയോ, സാമൂഹ്യബന്ധങ്ങൾ കൂടുതലുള്ളയാളായിരുന്നു. സുഹൃത്തുക്കളോടൊത്ത് പാർട്ടികളിൽ പങ്കെടുക്കുകയും നിയമലംഘനങ്ങൾ നടത്തുകയും ചെയ്തു. ദില്ലിയിൽ നിയമനം ലഭിക്കുന്ന കാലത്ത് തിയോഫിലസിനെതിരെ ഗുരുതരമായ കൃത്യവിലോപത്തെ സംബന്ധിച്ച ആരോപണവും കോടതിവ്യവഹാരവും നിലനിൽക്കുന്നുണ്ടായിരുന്നു. ഇക്കാരണങ്ങൾ കൊണ്ട് അച്ഛനും മകനും തമ്മിൽ നല്ല ബന്ധത്തിലായിരുന്നില്ല.

1857-ലെ ലഹളക്കാലത്ത് പുരാതനദില്ലി നഗരമതിലിനുള്ളിൽ നിന്ന് രക്ഷപ്പെട്ട ചുരുക്കം ബ്രിട്ടീഷ് ഉദ്യോഗസ്ഥരിലൊരാളായിരുന്നു തിയോ. ഇക്കാലത്ത് അദ്ദേഹം ഡെൽഹിയിലെ ജോയിന്റ് മജിസ്ട്രേറ്റ് ആയിരുന്നു. തുടർന്ന് ബ്രിട്ടീഷുകാർ ദില്ലി പിടിച്ചടക്കുന്ന കാലത്ത് ഡെൽഹി ഫീൽഡ് ഫോഴ്സിൽ ചേരുകയും, നഗരവാസികളോടുള്ള ബ്രിട്ടീഷുകാരുടെ രക്തരൂഷിതമായ പ്രതികാരത്തിന് നേതൃത്വം നൽകുകയും ചെയ്തു.

കുടുംബം

ഷാർലറ്റ് ആയിരുന്നു തിയോയുടെ ഭാര്യ. ഒരു ആൺകുട്ടിയെ പ്രസവിച്ചതിനെത്തുടർന്ന് അവരുടെ ആരോഗ്യസ്ഥിതി വഷളാകുകയും, 1853 സെപ്റ്റംബർ 26-ന് സിംലയിൽവച്ച് മരണമടയുകയും ചെയ്തു. ഭാര്യയുടെ മരണത്തിനുപിന്നാലെത്തന്നെ പിതാവും മരണമടഞ്ഞു. ഈ മരണങ്ങൾ മൂലമുള്ള മാനസികസമ്മർദ്ദം അദ്ദേഹത്തിന്റെ ശാരീരികസ്ഥിതിയെ കാര്യമായി ബാധിച്ചിരുന്നു.

കുറിപ്പുകൾ

• ൧ ^{^} വില്ല്യം ഡാൽറിമ്പിൾ (2006). ദ ലാസ്റ്റ് മുഗൾ - ദ ഫോൾ ഓഫ് എ ഡൈനസ്റ്റി, ഡെൽഹി 1857 (in ഇംഗ്ലീഷ്). പെൻഗ്വിൻ ബുക്സ്. ISBN 9780670999255. Retrieved 2013 ജൂലൈ 4. {{cite book}}: Check date values in: |accessdate= (help)