താര രാജ്കുമാർ
താര രാജ്കുമാർ | |
|---|---|
| ജനനം | എറണാകുളം ജില്ല, കേരളം, ഇന്ത്യ |
| ദേശീയത | ഇന്ത്യൻ |
| തൊഴിൽ | നർത്തകി, നൃത്ത അധ്യാപിക |
| അറിയപ്പെടുന്നത് | കഥകളി, മോഹിനിയാട്ടം |
| മാതാപിതാക്ക(ൾ) | ടിഎംബി നെടുങ്ങാടി |
| പുരസ്കാരങ്ങൾ | Medal of the Order of Australia |
താര രാജ്കുമാർ ഒരു ഇന്ത്യൻ ക്‌ളാസിക്കൽ നർത്തകിയും നൃത്ത അധ്യാപികയുമാണ്. വിവാഹശേഷം ആദ്യം ഇംഗ്ലണ്ടിലേക്കും പിന്നീട് ഓസ്ട്രേലിയയിലേക്കും കുടിയേറിയ അവർക്ക് 2009-ൽ ഓസ്‌ട്രേലിയയുടെ പരമോന്നത സിവിലിയൻ ബഹുമതിയായ മെഡൽ ഓഫ് ദി ഓർഡർ ഓഫ് ഓസ്‌ട്രേലിയ ലഭിച്ചു.
ജീവിതരേഖ[തിരുത്തുക]
കേരള കലാമണ്ഡലം മുൻ ചെയർമാൻ ടി.എം.ബി നെടുങ്ങാടിയുടെ മകളായി കേരളത്തിലാണ് താര രാജ്കുമാർ ജനിച്ചത്.[1] മലയാളത്തിലെ ആദ്യത്തെ നോവലായ ‘കുന്ദലത’യുടെ രചയിതാവ് അപ്പു നെടുങ്ങാടിയുടെ ചെറുമകളുമാണ് താര. ചെറുപ്പം മുതലേ കലയിലേക്ക് ആകർഷിക്കപ്പെട്ട അവർ നാലാം വയസ്സിൽ കഥകളി പഠിക്കാൻ തുടങ്ങി.[1] പിതാവ് ഒരു ഇന്ത്യൻ സേനാംഗമായതിനാൽ അവർക്ക് ചെറുപ്പകാലത്ത് ഇന്ത്യയിൽ പല സ്ഥലങ്ങളിലും ജീവിക്കേണ്ടി വന്നിരുന്നു.[2] നാലര വയസ്സുള്ളപ്പോൾ ബോംബെയിൽ ആയിരുന്നപ്പോൾ കഥകളി അഭ്യസിക്കാൻ തുടങ്ങിയെങ്കിലും അവരുടെ പ്രാഥമിക പരിശീലനം കൊച്ചിയിലെ മോളേരി നമ്പൂതിരിയിൽ നിന്നായിരുന്നു.[3] ഡൽഹിയിലായിരിക്കെ, ഇന്റർനാഷണൽ സെന്റർ ഫോർ കഥകളിയിൽ (ICK) ഗുരു പുന്നത്തൂർ മാധവ പണിക്കരുടെ കീഴിൽ കഥകളി പഠിച്ചു.[3] കലാമണ്ഡലം കൃഷ്ണൻ നായർ, കല്യാണിക്കുട്ടി അമ്മ, മാണി മാധവചാക്യാർ എന്നീ മൂന്ന് ഇതിഹാസങ്ങളുടെ ശിഷ്യയായ അവർ സ്‌കൂളിൽ പഠിക്കുമ്പോൾ തന്നെ പരിപാടികൾ അവതരിപ്പിച്ചു തുടങ്ങി.[1] ഡൽഹിയിൽ ആയിരുന്ന അവർ സുരേന്ദ്ര നാഥ് ജെന ഗുരുവിൽ നിന്ന് ഒഡീസി പരിശീലനവും നേടി.[3]
വിവാഹ ശേഷം അവർ ആദ്യം യുകെയിലേക്കും പിന്നീട് ഓസ്ട്രേലിയയിലേക്കും പോയി.[1]
കരിയർ[തിരുത്തുക]
തന്റെ കരിയറിൽ ഇന്ത്യ, യുണൈറ്റഡ് കിംഗ്ഡം, യൂറോപ്പ്, ഓസ്‌ട്രേലിയ എന്നിവിടങ്ങളിൽ അവർ ഇന്ത്യൻ ക്‌ളാസിക്കൽ നൃത്തം അവതരിപ്പിക്കുകയോ പഠിപ്പിക്കുകയോ ചെയ്തിട്ടുണ്ട്. [4]ലണ്ടനിലെ സൗത്ത് ബാങ്ക്, സിഡ്‌നിയിലെ ഓപ്പറ ഹൗസ്, മെൽബണിലെ വിക്ടോറിയൻ ആർട്സ് സെന്റർ തുടങ്ങിയ പ്രശസ്തമായ തിയേറ്ററുകളിലും അവർ പരിപാടികൾ അവതരിപ്പിച്ചിട്ടുണ്ട്.[4]
ഇംഗ്ലണ്ടിലായിരിക്കുമ്പോൾ, അവർ അവിടെ ഒരു ശാസ്ത്രീയ നൃത്ത കേന്ദ്രമായ അക്കാദമി സ്ഥാപിച്ചു, അത് ഇന്നും (2023 വരെ) പ്രവർത്തിക്കുന്നു.[5]
1983-ൽ ഓസ്‌ട്രേലിയയിലേക്ക് കുടിയേറിയ താര രാജ്കുമാർ മെൽബണിൽ ഇന്ത്യൻ ക്‌ളാസിക്കൽ നൃത്തം പഠിപ്പിക്കുന്നതിനായി നാട്യ സുധ സ്‌കൂളും, നാട്യ സുധ ഡാൻസ് കമ്പനിയും സ്ഥാപിച്ചു.[4] അവരുടെ പ്രൊഡക്ഷനുകൾ ഓസ്‌ട്രേലിയ, യുണൈറ്റഡ് കിംഗ്ഡം, ഇന്ത്യ, ന്യൂസിലാൻഡ്, തായ്‌ലൻഡ് എന്നിവിടങ്ങളിൽ പര്യടനം നടത്തിയിട്ടുണ്ട്.[4] കമ്മീഷൻ ഫോർ ദ ഫ്യൂച്ചർ, ഏഷ്യാ ലിങ്ക്, മൾട്ടി കൾച്ചറൽ ആർട്സ് വിക്ടോറിയ എന്നിവയുടെ പിന്തുണയോടെ, ട്രഡീഷൻസ് ഇൻ ട്രാൻസിഷൻ എന്ന സവിശേഷമായ ക്രോസ്-കൾച്ചറൽ പ്രോജക്റ്റ് അവർ വികസിപ്പിച്ചെടുത്തു, ഇത് CUB മാൾട്ട്ഹൗസിലെ പ്രകടനങ്ങളുടെ ഒരു സീസണിൽ കലാശിച്ചു.[4] ഓസ്‌ട്രേലിയയിൽ താമസിക്കുന്ന കലാകാരന്മാർ ഓസ്‌ട്രേലിയൻ ദേശീയ സാംസ്‌കാരിക ഘടനയ്‌ക്ക് നൽകിയ സംഭാവനകൾ എടുത്തുകാണിച്ചുകൊണ്ട് ജപ്പാൻ, ചൈന, ഇന്ത്യ എന്നിവിടങ്ങളിൽ നിന്നുള്ള ക്ലാസിക്കൽ, സമകാലിക നൃത്തങ്ങൾ ഒരുമിച്ച് കൊണ്ടുവന്ന പ്രോജക്റ്റിന്റെ ആർട്ടിസ്റ്റിക് ഡയറക്ടറായിരുന്നു അവർ.[4]
വിക്ടോറിയൻ ആർട്സ് സെന്ററിൽ വെച്ചു നടന്ന ഓസ്‌ട്രേലിയൻ ഫെസ്റ്റിവൽ ഓഫ് ജപ്പാൻ ടു വെനീസ് പ്രോഗ്രാമിൽ ഇന്ത്യൻ നൃത്ത ഘടകത്തിന്റെ കലാസംവിധായകയും പ്രധാന നർത്തകിയും ആയിരുന്നു താര. [4]യുകെയിലെ അക്കാദമിയിലൂടെയുള്ള താരയുടെ പ്രോജക്ടുകളും ഓസ്‌ട്രേലിയയിലെ അവരുടെ പ്രവർത്തനങ്ങളും ഇരു രാജ്യങ്ങൾക്കിടയിൽ സാംസ്‌കാരിക തലത്തിൽ ഒരു പാലം സൃഷ്ടിക്കുന്നതിൽ വിജയിച്ചിരുന്നു. മോനാഷ് യൂണിവേഴ്‌സിറ്റിയിലെ ബിരുദ വിദ്യാർത്ഥികൾക്കായി അവർ ഓസ്‌ട്രേലിയയിൽ ആദ്യമായി New Dance Forms and Old Cultures (പുതിയ നൃത്തരൂപം പഴയ സംസ്‌കാരങ്ങൾ ) എന്ന ഒരു കോഴ്‌സ് വികസിപ്പിച്ചെടുത്തു.[4] അത്തരം പ്രോഗ്രാമുകളിലൂടെ അവർ ക്ലാസിക്കൽ സൗത്ത് ഏഷ്യൻ നൃത്തം സമൂഹത്തിന് പൊതുവെ പ്രാപ്യമാക്കി.
ഓസ്‌ട്രേലിയയിലേക്കുള്ള കുടിയേറ്റക്കാരി എന്ന നിലയിൽ സമൂഹത്തിന് നൽകിയ സംഭാവനകളെ മാനിച്ച് താരയുടെ വർക്കുകൾ മെൽബണിലെ ഇമിഗ്രേഷൻ മ്യൂസിയത്തിൽ പ്രദർശിപ്പിച്ചിട്ടുണ്ട്.[4] നർത്തകി, നൃത്തസംവിധായിക, കലാസംവിധായിക, അദ്ധ്യാപിക, ഗവേഷക, ആശയവിനിമയക്കാരി എന്നീ നിലകളിൽ അവർ അറിയപ്പെടുന്നു.
പുരസ്കാരങ്ങൾ[തിരുത്തുക]
2009-ൽ ഓസ്‌ട്രേലിയയുടെ പരമോന്നത സിവിലിയൻ ബഹുമതിയായ മെഡൽ ഓഫ് ദി ഓർഡർ ഓഫ് ഓസ്‌ട്രേലിയ അവർക്ക് ലഭിച്ചു.[1] വിക്ടോറിയയ്ക്കും രാജ്യത്തിനും നൽകിയ സംഭാവനകൾ കണക്കിലെടുത്ത് നൽകുന്ന വിക്ടോറിയൻ ഹോണർ റോൾ ഓഫ് വുമൺ ആദ്യമായി ലഭിച്ച ഒരാൾ കൂടിയാണ് അവർ.[6] 2006-ൽ വിക്ടോറിയൻ ഗവൺമെന്റിന്റെ വിക്ടോറിയൻ വോളണ്ടിയർ അവാർഡും 1981 എത്‌നിക് ആർട്സ് അവാർഡും ഉൾപ്പെടെ നിരവധി അവാർഡുകളും അവർക്ക് ലഭിച്ചു.[3]
അവലംബം[തിരുത്തുക]
- ↑ 1.0 1.1 1.2 1.3 1.4 "Torchbearer of tradition". The Hindu (in ഇംഗ്ലീഷ്). 3 March 2011.
- ↑ "10 Indian Origin Women Making a Difference in Australia - The Australia Today" (in ഓസ്‌ട്രേലിയൻ ഇംഗ്ലീഷ്).
- ↑ 3.0 3.1 3.2 3.3 "The Sunil Kothari Column - Australian Diary: Part 1 - Interview with Kathakali and Mohiniattam dancer Tara Rajkumar". narthaki.com.
- ↑ 4.0 4.1 4.2 4.3 4.4 4.5 4.6 4.7 4.8 "Tara Rajkumar OAM | Victorian Government". www.vic.gov.au (in ഇംഗ്ലീഷ്).
- ↑ "Profiles - From Slum Dog Millionaire to 'Temple Dreaming' - Sumi Krishnan". narthaki.com.
- ↑ "Tara Rajkumar". MPavilion.