ജീവിതശൈലീരോഗങ്ങൾ
തെറ്റായ ജീവിത ശൈലികളുടെ ഫലമായി ഉണ്ടാവുന്ന രോഗങ്ങളാണിവ. ആരോഗ്യം നിലനിർത്താനും രോഗങ്ങളെ ചെറുത്ത് തോൽപ്പിക്കാനും ശരീരത്തിനുള്ള പ്രതിരോധശേഷിയെ ജീവിത ശൈലിയിൽ വന്ന മാറ്റം നശിപ്പിക്കുന്നു.[1] ജീവിത ശൈലീരോഗങ്ങൾ ചെറുപ്പത്തിൽ തന്നെ ബാധിക്കുന്നത് വ്യാപകമാവുകയാണ്. ജീവിതചര്യയിലുള്ള മാറ്റംമൂലം ശരീരം പല തരത്തിലുള്ള രോഗങ്ങൾക്കും അടിമപ്പെടുകയാണ്. ഇങ്ങനെയുണ്ടാകുന്ന പ്രധാന പ്രശ്നങ്ങളാണ് പ്രമേഹം, കൊളസ്ട്രോൾ ആധിക്യം, രക്തസമ്മർദം, അമിതഭാരം എന്നിവ.[2]
കാരണങ്ങൾ[തിരുത്തുക]
ആഹാര രീതിയിലെ മാറ്റം[തിരുത്തുക]
- എണ്ണയിൽ വറുത്തതും പൊരിച്ചതുമായ ഭക്ഷണ വസ്തുക്കളുടെ അമിതോപയോഗം. മാംസാഹാരത്തോടുള്ള അഭിനിവേശം.
- ജോലിത്തിരക്കിനിടയിൽ ഭക്ഷണം ഒഴിവാക്കൽ
- ഒന്നിച്ച് പാചകം ചെയ്ത് സൂക്ഷിക്കുന്ന ഭക്ഷണം വീണ്ടും വീണ്ടും ചൂടാക്കി ഉപയോഗിക്കുന്നത്.
- ഫാസ്റ്റ്ഫുഡ് ഉപയോഗം.
- ബേക്കറി പലഹാരങ്ങളുടെ അമിതോപയോഗം.
- പ്രിസർവേറ്റീവുകൾ ചേർത്ത ഭക്ഷ്യ വസ്തുക്കൾ.
- നിറവും മണവും ലഭിക്കാൻ കൃത്രിമ രാസവസ്തുക്കൾ ചേർത്ത ഭക്ഷ്യവസ്തുക്കൾ.
- പഞ്ചസാര, ഉപ്പ്‌, മൈദ എന്നിവയുടെ അമിതമായ അളവ്.
- പച്ചക്കറികളുടേയും പഴവർഗ്ഗങ്ങളുടേയും ഉപയോഗക്കുറവ്
- പുകവലി, മദ്യപാനം എന്നിവ
- അജിനോമോട്ടോ പോലുള്ള രാസവസ്തുക്കൾ രുചി കൂട്ടുന്നതിനാൽ ഭക്ഷണം അമിതാഹാരത്തിലേക്ക് നയിക്കുന്നു. ഇത് പൊണ്ണത്തടിയുണ്ടാക്കുന്നു. ഇവ അതിറോസ്ക്ലീറോസിസിനും പ്രമേഹം തുടങ്ങിയ മറ്റ് രോഗങ്ങൾക്കും കാരണമാകുന്നു.
വ്യായാമമില്ലായ്മ[തിരുത്തുക]
സാങ്കേതികവിദ്യ വികാസം പ്രാപിച്ചതോടെ ആയാസമുള്ള പ്രവർത്തനങ്ങൾ നാം യന്ത്രങ്ങൾക്ക് നൽകിത്തുടങ്ങി. ചെറിയ ദൂരത്തേക്ക് പോലും വാഹനങ്ങളെ ആശ്രയിക്കാൻ തുടങ്ങി. കമ്പ്യൂട്ടർ, മൊബൈൽ ഫോൺ എന്നിവയുടെ ഉപയോഗം അലസത വർദ്ധിപ്പിക്കുന്നു. ഇത് ദുർമേദസ്സിനും രോഗങ്ങൾക്കും കാരണമാകുന്നു.
മാനസിക സമ്മർദ്ദങ്ങൾ[തിരുത്തുക]
കൂട്ടുകുടുംബവ്യവസ്ഥയിൽ നിന്ന് അണുകുടുംബങ്ങളിലേക്ക് മാറിയപ്പോൾ മാനസിക സമ്മർദ്ദങ്ങളും വർദ്ധിക്കുന്നു. ജോലി സ്ഥലത്തുനിന്നുള്ള ടെൻഷനും പുതിയ തലമുറയിൽ താരതമ്യേന കൂടുതലാണ്. ഇത് മാനസികവും ശാരീരികവുമായ രോഗാവസ്ഥയിലേക്ക് നയിക്കുന്നു.
പരിഹാരമാർഗങ്ങൾ[തിരുത്തുക]
- ഫാസ്റ്റ്ഫുഡ് സംസ്കാരം ഒഴിവാക്കുക.
- മാംസാഹാരം മിതമാക്കുക.
- കൊഴുപ്പിന്റെ ഉപയോഗം പരിമിതമാക്കുക.
- പഴങ്ങളും പച്ചക്കറികളും കൂടുതലായി ഉപയോഗിക്കുക.
- നാരുള്ള ഭക്ഷ്യ വസ്തുക്കൾ ഉപയോഗിക്കുക.
- കൊഴുപ്പ് വിഘടിപ്പിക്കുന്നതിന് ഉതകുന്ന തരത്തിലുള്ള ശാരീരിക പ്രവർത്തനങ്ങൾ ചെയ്യുക.
- ശരീരത്തിനും മനസ്സിനും ഉൻമേഷം നൽകുന്ന വിനോദങ്ങളിൽ ഏർപ്പെടുക.
- ധ്യാനം, യോഗ, സംഗീതം, നല്ല രചനകളുടെ വായന തുടങ്ങിയവ ഒരു ശീലമാക്കുക.
- നല്ല സുഹൃത് ബന്ധങ്ങൾ ഉണ്ടാക്കുക.
- കുടുംബ ബന്ധങ്ങൾ സുദൃഡമാക്കുക.
അവലംബം[തിരുത്തുക]
- ↑ ജീവിതശൈലീരോഗങ്ങൾ, ഡോ: വേണുഗോപാൽ. എ. കെ, അസി. പ്രൊഫസർ, പരിയാരം മെഡിക്കൽ കോളേജ്, പ്രാണൻ ആരോഗ്യമുദ്ര ത്രൈമാസിക, ലക്കം 5, പുസ്തകം 2, 25 ജനുവരി 2016.
- ↑ ജീവിതശൈലീരോഗങ്ങൾ, ഡോ. കെ ഹരി, ദേശാഭിമാനി, 7 ആഗസ്ത് 2014