ചുനക്കര രാമൻകുട്ടി
മലയാള ചലച്ചിത്രഗാനരചയിതാക്കളിൽ പ്രമുഖനാണ് ചുനക്കര രാമൻ കുട്ടി. 1936 ജനുവരി19 ന് മാവേലിക്കരയിൽ ചുനക്കര കാര്യാട്ടിൽ വീട്ടിൽ ജനനം. പന്തളം എൻ എസ് എസ് കോളജിൽ നിന്നും മലയാള സാഹിത്യത്തിൽ ബിരുദം നേടി.[1] 75ഓളം സിനിമകൾക്കായി 200ലധികം ഗാനങ്ങൾ അദ്ദേഹം രചിച്ചിട്ടുണ്ട്.[2] 1978 ൽ ആശ്രമം എന്ന ചിത്രത്തിലെ അപ്സരകന്യക എന്ന ഗാനം എഴുതിക്കൊണ്ടാണ് സിനിമയുമായി ചുനക്കര രാമൻ കുട്ടി ബന്ധപ്പെട്ടത്. ആകാശവാണിക്കുവേണ്ടി നാടകങ്ങൾ എഴുതുകയും പുരസ്കാരങ്ങൾ നേടുകയും ചെയ്തിട്ടുണ്ട്.[3] ശാരീരിക അസ്വസ്ഥതകളെ തുടർന്ന് ഏതാനും ദിവസങ്ങളായി ചികിത്സയിലായിരുന്ന അദ്ദേഹം 2020 ആഗസ്റ്റ് 12 ന് രാത്രി 84 ആമത്തെ വയസിൽ തിരുവനന്തപുരത്തെ ഒരു സ്വകാര്യ ആശ്രുപത്രിയിൽവച്ച് അന്തരിച്ചു.[4]
ജീവിതരേഖ
[തിരുത്തുക]ആലപ്പുഴ ജില്ലയിലെ മാവേലിക്കര താലൂക്കിൽ ചുനക്കര പഞ്ചായത്തിൽ കരിമുളയ്ക്കൽ കാര്യാട്ടിൽ കിഴക്കതിൽ വീട്ടിൽ കൃഷ്ണന്റെയും നാരായണിയുടെയും മകനായി 1936 ജനുവരി 19നു രാമൻകുട്ടി ജനിച്ചു. ചുനക്കര ഹൈസ്കൂളിൽനിന്നും സ്കൂൾവിദ്യാഭ്യാസം നേടിയ ശേ-ഷം പന്തളം എൻ.എസ്.എസ്. കോളേജിൽ നിന്നും മലയാള സാഹിത്യത്തിൽ ബിരുദം നേടി.[5] [6] വാണിജ്യ വ്യവസായ വകുപ്പിൽ ഉദ്യോഗസ്ഥനായി ജോലിനേടി. പരേതയായ കെ.വി. തങ്കമ്മയാണ് അദ്ദേഹത്തിന്റെ പത്നി. രേണുക, രാധിക, രാഗിണി എന്നിവർ അദ്ദേഹത്തിന്റെ മക്കളാണ്.
കലാ സാഹിത്യ ജീവിതം
[തിരുത്തുക]ആകാശവാണിയിലെ ലളിതഗാനങ്ങളിലൂടെയാണ് അദ്ദേഹം ശ്രദ്ധേയനായത്. പിന്നീട് നാടകരംഗത്ത് സജീവമായി. കൊല്ലം അസീസി, മലങ്കര തീയറ്റേഴ്സ്, നാഷണൽ തീയറ്റേഴസ്, കൊല്ലം ഗായത്രി, കേരള തീയറ്റേഴ്സ് എന്നീ നാടകസംഘങ്ങൾക്കായി ഗാനങ്ങൾ എഴുതി.[6] തിരുവനന്തപുരം മലയാള നാടകവേദി എന്ന പേരിൽ സ്വന്തം നാടകസമിതി തുടങ്ങി. 1977ൽ ആശ്രമം എന്ന സിനിമയിൽ (1978ൽ പുറത്തിറങ്ങിയത്) ഗാനങ്ങളെഴുതിയാണ് സിനിമാഗാന രചനാരംഗത്തേക്ക് ചുവടുവച്ചത്.[5] പി.ജി. വിശ്വംഭരൻ സംവിധാനം ചെയ്ത ഒരു തിര പിന്നെയും തിര എന്ന സിനിമയിലെ ഗാനങ്ങൾ ചുനക്കര രാമൻകുട്ടിയെ പ്രശസ്തനാക്കി. സംഗീത സംവിധായകൻ ശ്യാമുമായി ചേർന്ന് നിരവധി ഹിറ്റ് ഗാനങ്ങൾ രചിച്ചിരുന്നു. 1984ൽ മാത്രം മുപ്പതിലധികം ഗാനങ്ങളാണ് വിവിധ സിനിമകൾക്കായി അദ്ദേഹം രചിച്ചത്.[5]
പുസ്തകങ്ങൾ
[തിരുത്തുക]എന്റെ ഭാരതം, ബാപ്പുജി കരയുന്നു, മഹാഗണി, അഗ്നിസന്ധ്യ (2004), സ്നേഹാടനക്കിളികൾ എന്നിവയാണ് കവിതാസമാഹാരങ്ങൾ.[6]
പുരസ്കാരങ്ങൾ
[തിരുത്തുക]നാടകരംഗത്തെ സമഗ്ര സംഭാവനയ്ക്ക് കേരള സംഗീതനാടക അക്കാദമിയുടെ ഗുരുശ്രേഷ്ഠ പുരസ്കാരം (2015) ലഭിച്ചു.[6]
പ്രസിദ്ധ ഗാനങ്ങൾ
[തിരുത്തുക]- ദേവീ നിൻ രൂപം - ഒരു തിര പിന്നെയും തിര
- ശ്യാമമേഘമേ നീ - അധിപൻ
- ദേവദാരു പൂത്തു - എങ്ങനെ നീ മറക്കും
- ശരത്കാല സന്ധ്യ കുളിർ തൂകി നിന്നു - എങ്ങനെ നീ മറക്കും
- സിന്ദൂര തിലകവുമായ് - കുയിലിനെ തേടി
- പാതിരാ താരമേ - കുയിലിനെ തേടി
- ധനുമാസക്കാറ്റേ വായോ - മുത്തോടു മുത്ത്
- ഹൃദയവനിയിലേ ഗായികയോ - കോട്ടയം കുഞ്ഞച്ചൻ
- ചന്ദനക്കുറിയുമായി വാ സുകൃതവനിയിൽ - ഒരുനോക്കു കാണാൻ
- നീയറിഞ്ഞോ മേലെ മാനത്ത് - കണ്ടു കണ്ടറിഞ്ഞു
- ഓ ശാരികേ - വീണ്ടും ചലിക്കുന്ന ചക്രം
അവലംബം
[തിരുത്തുക]- ↑ വെള്ളിനക്ഷത്രം ഇയർ ബൂക് 2010
- ↑ "ആർക്കൈവ് പകർപ്പ്". Archived from the original on 2014-10-18. Retrieved 2015-10-04.
- ↑ http://www.m3db.com/chunakkara
- ↑ "ഹൃദയവനിയിലെ ആ ഗായക കവി യാത്രയായി; ചുനക്കര രാമൻകുട്ടിക്ക് വിട".
- ↑ 5.0 5.1 5.2 "ചുനക്കര രാമൻകുട്ടി അന്തരിച്ചു". മാതൃഭൂമി. 2020-08-13.
{{cite news}}: CS1 maint: url-status (link) - ↑ 6.0 6.1 6.2 6.3 "ഹൃദയവനിയിൽ പൂത്ത ദേവദാരു". ദേശാഭിമാനി. 2020-08-13.
{{cite news}}: CS1 maint: url-status (link)