ഗുഹ്യരോമം
മനുഷ്യരിൽ ലൈംഗിക വളർച്ചയുടെ ഭാഗമായി ടെസ്റ്റോസ്റ്റിറോൺ (Testosterone) അഥവാ ആൻഡ്രജൻ (Androgen) ഹോർമോണുകളുടെ പ്രവർത്തന ഫലമായി ജനനേന്ദ്രിയത്തിനു സമീപത്ത് രോമ വളർച്ച ഉണ്ടാകുന്നു. ഇവയെ ഗുഹ്യരോമം എന്ന് വിളിക്കുന്നു. ഇംഗ്ലീഷിൽ പ്യൂബിക് ഹെയർ (Pubic hair). കൗമാര പ്രായം മുതലാണ് ഇവ വളർന്നു തുടങ്ങുന്നത്. അതിനാൽ ഗുഹ്യ രോമം ശരീരത്തിലെ ടെസ്റ്റോസ്റ്റിറോൺ ഹോർമോണിന്റെ പ്രവർത്തനത്തെ സൂചിപ്പിക്കുന്നു. ജീവിതകാലം മുഴുവൻ ഇവ കാണപ്പെടുന്നുവെങ്കിലും 55 അല്ലെങ്കിൽ 60 വയസ് പിന്നിട്ട പലരിലും ഇവയുടെ വളർച്ച കുറയുന്നു. ഇത് ഹോർമോൺ ഉത്പാദനത്തിലെ കുറവിനെ സൂചിപ്പിക്കുന്നു.
സ്ത്രീകളിലും പുരുഷന്മാരിലും വ്യത്യസ്തമായ രീതിയിലാണ് ഇവ കാണപ്പെടുന്നത്. കക്ഷത്തിലെ രോമങ്ങളും ഇതേ കാലയളവിൽ ഉണ്ടാകുന്നു. കട്ടിയേറിയതും ഇടതൂർന്നതുമായ മുടിയിഴകൾ ആണ് ഗുഹ്യഭാഗത്ത്‌ കാണപ്പെടാറുള്ളത്. തലമുടി, താടിരോമം എന്നിവ പോലെ ഗുഹ്യ രോമം അധികം നീണ്ടു വളരാറില്ല. കൗമാര പ്രായാരംഭം മുതൽക്കേ ജനനേന്ദ്രിയ ഭാഗത്ത്‌ രോമ വളർച്ച ആരംഭിക്കുന്നു. അതായത് പെൺകുട്ടികളിൽ എട്ടു മുതൽ പതിമൂന്ന് വയസ്സിനുള്ളിലും ആൺകുട്ടികളിൽ ഒൻപത് മുതൽ പതിനാല് വയസ്സിനുള്ളിലും ഗുഹ്യ രോമ വളർച്ച ആരംഭിക്കാം. ക്രമേണ ഇവയുടെ വളർച്ച കൂടുതൽ ത്വരിതപ്പെടുന്നു. യവ്വനാരംഭത്തിൽ ഗുഹ്യ രോമത്തിന്റെ വളർച്ച പൂർണ്ണമാകുന്നു.
‘ആൻഡ്രജൻ ഇൻസെൻസിറ്റിവിറ്റി ഡിസോഡർ’ എന്ന ഹോർമോണുമായി ബന്ധപ്പെട്ട രോഗാവസ്ഥ ഉള്ളവരിൽ ഗുഹ്യരോമ വളർച്ച ഉണ്ടാകാറില്ല. പൊതുവേ പ്രായമായവരിൽ ഹോർമോൺ ഉത്പാദനത്തിലെ കുറവ് മൂലം ഗുഹ്യരോമത്തിന്റെ അളവ് കുറഞ്ഞു കാണപ്പെടുന്നു, വിശേഷിച്ചു 60 വയസ് കഴിഞ്ഞവരിൽ ഗുഹ്യ രോമ വളർച്ച കുറയാറുണ്ട്. പുരുഷന്മാരിൽ ആൻഡ്രോപോസ് എന്ന അവസ്ഥ ഉണ്ടാകുമ്പോൾ ഇത് ഉണ്ടാകാറുണ്ട്. സ്ത്രീകളിൽ ആർത്തവവിരാമം (Menopause) എന്ന ഘട്ടം പിന്നിട്ടവരിൽ ഗുഹ്യരോമ വളർച്ച കുറയുന്നു. ഹോർമോൺ ഉത്പാദനത്തിൽ ഉള്ള കുറവാണ് പ്രധാന കാരണം. അഡ്രിനൽ ഗ്രന്ഥിയുടെ പ്രവർത്തനക്കുറവാണ് മറ്റൊരു കാരണം. ഇതുമൂലവും ഹോർമോൺ കുറവ് ഉണ്ടാകാം.
ജനനേന്ദ്രിയ ഭാഗത്തിന്റെ സംരക്ഷണമാണ് ഗുഹ്യ രോമത്തിന്റെ ധർമ്മം. ലൈംഗികമായി ബന്ധപ്പെടുമ്പോൾ ലോലമായ ഗുഹ്യഭാഗത്തെ ചർമ്മത്തിലേക്ക് നേരിട്ടുള്ള ഉരസൽ അഥവാ ഘർഷണം കുറയ്ക്കുവാനും, അതുവഴി രോഗാണുബാധകളെ തടയുവാനും, ഫിറമോണുകൾ ശേഖരിക്കുന്നതിനും, പൊടിയും മറ്റും യോനിയുടെ ഉള്ളിലേക്ക് കടക്കാതിരിക്കുന്നതിനും ഗുഹ്യരോമങ്ങൾ സഹായിക്കുന്നു. ലൈംഗികബന്ധത്തിലൂടെ പകരുന്ന രോഗങ്ങൾ തടയാൻ ഗുഹ്യ രോമം ഒരുപരിധിവരെ സഹായിക്കുന്നു.
പലപ്പോഴും ഗുഹ്യരോമം അവയുടെ മൂടോടെ ഷേവ് ചെയ്യുന്നത് നിമിത്തം ഗുഹ്യചർമ്മത്തിൽ സൂക്ഷ്മമായ മുറിവുകൾ ഉണ്ടാകുവാനും, രോഗാണുബാധകൾ എളുപ്പം പടരുവാനും സാധ്യതയുണ്ട്; പ്രത്യേകിച്ച് സുരക്ഷിതമല്ലാത്ത ലൈംഗികബന്ധത്തിലൂടെ പകരുന്ന രോഗങ്ങൾ, ഉദാഹരണത്തിന് എച്ഐവി (എയ്ഡ്‌സ്) (HIV), എച്പിവി (HPV) ഉൾപ്പടെയുള്ള രോഗാണുബാധകൾ (STDs) എളുപ്പത്തിൽ പകരാം. അതിനാൽ ഇവ ബുദ്ധിമുട്ട് ഉണ്ടാക്കുക ആണെങ്കിൽ ഷേവ് ചെയ്യുന്നത് ഒഴിവാക്കി പകരം ട്രിമ്മറോ ചെറിയ കത്രികയോ ഉപയോഗിച്ച് വെട്ടി നീളം കുറച്ചു നിർത്തുകയോ ചെയ്യുന്നതാണ് കൂടുതൽ ആരോഗ്യകരം എന്ന് ആരോഗ്യ വിദഗ്ദർ സാക്ഷ്യപ്പെടുത്തുന്നു. ഗുഹ്യ രോമങ്ങൾ നീക്കം ചെയ്യുമ്പോൾ ജനനേന്ദ്രിയ ഭാഗത്ത്‌ പരുക്കുകൾ പറ്റാതെ പ്രത്യേകം ശ്രദ്ധിക്കേണ്ടത് അത്യാവശ്യമാണ്.
ചില ആളുകൾ ഗുഹ്യരോമങ്ങൾ നിലനിർത്തുമ്പോൾ, ചിലർ ഇവ നീക്കം ചെയ്യാൻ ഇഷ്ടപെടുന്നു, എന്നാൽ മറ്റു ചിലരാകട്ടെ ഇവ പ്രത്യേക ശൈലിയിൽ ക്രമീകരിച്ചു സൂക്ഷിക്കുന്നു. ചിലർ ഗുഹ്യരോമങ്ങൾ ഇഷ്ടപ്പെടുമ്പോൾ ചിലർ ഇത് പാടേ ഒഴിവാക്കുന്നു. പലവിധ ഫാഷനുകളിൽ ഇവ വെട്ടി സൂക്ഷിക്കുന്നതും സാധാരണമാണ്. ഇത് വ്യക്തിപരമായ തീരുമാനം ആണ്. ചിലർ മതപരമായ ആചാരത്തിന്റെ ഭാഗമായും ഗുഹ്യരോമം നീക്കാറുണ്ട്.
ഗുഹ്യ രോമങ്ങൾ നിലനിർത്തുന്നത് വൃത്തിക്കുറവിന്റെ ഭാഗമായി ചിലർ കാണുന്നു. എന്നാൽ ഇത് തികച്ചും തെറ്റാണ്. ഗുഹ്യ രോമം ശരീരത്തിൽ സാധാരണയായി വളരാറുള്ളതും ഹോർമോൺ പ്രവർത്തനത്തിന്റെ ഭാഗവുമാണ്. അത് ശുചിത്വവുമായി ബന്ധപ്പെട്ട കാര്യമില്ല.
പൊതുവേ തണുപ്പുള്ള ചില പടിഞ്ഞാറൻ രാജ്യങ്ങളിലെ ജനങ്ങൾ ശാരീരിക രോമങ്ങൾ നിലനിർത്താൻ ആഗ്രഹിക്കുന്നതായി കാണപ്പെടാറുണ്ട്. അത് മിക്കപ്പോഴും ശരീര താപനില നിലനിർത്താനും, പുരുഷത്വത്തിന്റെ അല്ലെങ്കിൽ പ്രായപൂർത്തിയുടെ ലക്ഷണമായും വ്യാഖ്യാനിക്കാറുണ്ട്. ഉദാ: ഫ്രാൻസ്, ഇറ്റലി തുടങ്ങിയ ചില രാജ്യങ്ങളിലെ പുരുഷന്മാർ ഗുഹ്യ രോമങ്ങൾ നിലനിർത്താൻ താല്പര്യപ്പെടുന്നതായി പഠനങ്ങൾ തെളിയിക്കുന്നു. എന്നാൽ ചിലർക്ക് ഗുഹ്യ രോമങ്ങൾ അസ്വസ്ഥത ഉണ്ടാക്കിയേക്കാം, പ്രത്യേകിച്ച് ഉഷ്ണ മേഖലാ പ്രദേശങ്ങളിൽ.
പോഷക സമൃദ്ധമായ ആഹാരം ഹോർമോൺ സന്തുലിതാവസ്ഥയ്ക്കും ശാരീരിക രോമ വളർച്ചയ്ക്കും അനിവാര്യമാണ്. വിറ്റാമിൻ ബി 2 (റിബോഫ്ലാവിൻ), ബയോട്ടിൻ (വിറ്റാമിൻ ബി 7), ഫോളേറ്റ്, വിറ്റാമിൻ ബി 12, സിങ്ക് തുടങ്ങിയവ അടങ്ങിയ പോഷക സമൃദ്ധമായ ഭക്ഷണം കഴിക്കുന്നതും, ശരീരത്തിൽ ഹോർമോൺ സന്തുലിതാവസ്ഥ നിലനിർത്തുന്നതും തലമുടിയുടെ പോലെ തന്നെ ഗുഹ്യരോമങ്ങളുടെ ആരോഗ്യത്തിനും നിലനിൽപ്പിനും സഹായിക്കുന്നു. [1][2][3][4][5][6][7][8][9][10][11][12][13][14][15][16].
അവലംബം
[തിരുത്തുക]- ↑ "Pubic hair - Wikipedia". en.wikipedia.org.[പ്രവർത്തിക്കാത്ത കണ്ണി]
- ↑ "What's the Purpose of Pubic Hair? And 8 Other FAQs - Healthline". www.healthline.com.[പ്രവർത്തിക്കാത്ത കണ്ണി]
- ↑ "How to Look After Your Pubic Hair: A Medically-Approved Guide". How to Look After Your Pubic Hair: A Medically-Approved Guide.[പ്രവർത്തിക്കാത്ത കണ്ണി]
- ↑ "Hairy Penis: Why It's Normal and Tips for Management". www.healthline.com.
- ↑ "To Shave or Not to Shave: An Ob-Gyn's Guide to Pubic Hair". www.acog.org.[പ്രവർത്തിക്കാത്ത കണ്ണി]
- ↑ "Pubic Hair Trends & Pubic Hair Styles – Bushbalm". bushbalm.com.[പ്രവർത്തിക്കാത്ത കണ്ണി]
- ↑ "5 Women Pose for Striking Pubic Hair Portraits | Allure". www.allure.com.[പ്രവർത്തിക്കാത്ത കണ്ണി]
- ↑ "www.gillette.co.uk". www.gillette.co.uk.[പ്രവർത്തിക്കാത്ത കണ്ണി]
- ↑ "The Pubic Hair Guide for Men -- Everything You Need to Know". www.menshealth.com.
- ↑ "Women proudly flaunt their pubic and underarm hair". www.dailymail.co.uk.[പ്രവർത്തിക്കാത്ത കണ്ണി]
- ↑ "Pubic hair removal among women in the United States". pubmed.ncbi.nlm.nih.gov.[പ്രവർത്തിക്കാത്ത കണ്ണി]
- ↑ "A Look at Pubic Hairstyles Around the World - Matador Network". matadornetwork.com.[പ്രവർത്തിക്കാത്ത കണ്ണി]
- ↑ "Why Shaving or Waxing Pubic Hair Might Be an STI Risk". www.verywellhealth.com.[പ്രവർത്തിക്കാത്ത കണ്ണി]
- ↑ "Association between pubic hair grooming and prevalent". www.ncbi.nlm.nih.gov.[പ്രവർത്തിക്കാത്ത കണ്ണി]
- ↑ "Correlation between pubic hair grooming and STIs". pubmed.ncbi.nlm.nih.gov.[പ്രവർത്തിക്കാത്ത കണ്ണി]
- ↑ "Pubic Hair Loss: Causes and Treatment Options - Healthline". www.healthline.com.[പ്രവർത്തിക്കാത്ത കണ്ണി]