കൊണ്ടാപ്പള്ളി കളിപ്പാട്ടങ്ങൾ

കൊണ്ടാപ്പള്ളി കളിപ്പാട്ടങ്ങൾ
വിജയവാഡയിലെ ഒരു ഭവനത്തിൽ പ്രദർശിപ്പിച്ചിരിക്കുന്ന കൊണ്ടാപ്പള്ളി കളിപ്പാട്ടങ്ങൾ
മറ്റു പേരുകൾ	കൊണ്ടാപ്പള്ളി ബൊമ്മലു
വിവരണം	Toys crafted out of Softwood namely, Tella Poniki
തരം	കരകൗശലം
പ്രദേശം	കൊണ്ടാപ്പള്ളി, കൃഷ്ണ ജില്ല, ആന്ധ്രാപ്രദേശ്
രാജ്യം	ഇന്ത്യ
പദാർത്ഥം	തടി

ആന്ധ്രാപ്രദേശിലെ കൃഷ്ണ ജില്ലയിൽ വിജയവാഡയ്ക്ക് സമീപമുള്ള കൊണ്ടാപ്പള്ളി എന്ന പ്രദേശത്ത് പരമ്പരാഗതമായി നിർമ്മിക്കപ്പെടുന്ന കളിപ്പാട്ടങ്ങളാണ് കൊണ്ടാപ്പള്ളി കളിപ്പാട്ടങ്ങൾ (Kondapalli Toys) അഥവാ കൊണ്ടാപ്പള്ളി ബൊമ്മലു. ദക്ഷിണേന്ത്യൻ ഭവനങ്ങളിൽ നവരാത്രി കാലയളവിൽ പാവകളും ചെറുപ്രതിമകളും അണിനിരത്തി പ്രദർശിപ്പിക്കപ്പെടുന്ന ബൊമ്മക്കൊലുവിൽ കൊണ്ടാപ്പള്ളി കളിപ്പാട്ടങ്ങളും പ്രദർശിപ്പിക്കാറുണ്ട്. ഈ കളിപ്പാട്ടങ്ങളുടെ പ്രശസ്തി കാരണം കൊണ്ടാപ്പള്ളിയെ കളിപ്പാട്ടങ്ങളുടെ കോളനി എന്നർത്ഥത്തിൽ ബൊമ്മല കോളനി എന്നു വിശേഷിപ്പിക്കാറുണ്ട്.

ചരിത്രം

കൊണ്ടാപ്പള്ളി കളിപ്പാട്ടങ്ങളുടെ ഒരു പ്രദർശനം

കളിപ്പാട്ട നിർമ്മാണത്തിൽ ഏകദേശം 400 വർഷത്തെ പാരമ്പര്യം കൊണ്ടാപ്പള്ളി എന്ന ചെറുപട്ടണത്തിന് അവകാശപ്പെടാനുണ്ട്. പരമ്പരാഗതമായി ആര്യക്ഷത്രിയർ എന്ന വിഭാഗമാണ് ഈ കളിപ്പാട്ടത്തിന്റെ നിർമ്മാണത്തിലേർപ്പെട്ടിരിക്കുന്നത്. എന്നാൽ ആധുനികകാലത്ത്, സമുദായ വ്യത്യാസങ്ങൾ കൂടാതെ ഈ പ്രദേശത്തുള്ള എല്ലാ വിഭാഗങ്ങളിലും പെട്ടവർ ഈ തൊഴിലിലേർപ്പെടാറുണ്ട്. എങ്കിലും ഇവിടുത്തെ പുതിയ തലമുറ മറ്റ് തൊഴിലുകൾ തേടുന്നതിൽ താത്പര്യം ഈ കളിപ്പാട്ട നിർമ്മാണത്തിന്റെ ഭാവി ആശങ്കാജനകമാക്കുന്നു. ഇതോടൊപ്പം കളിപ്പാട്ട നിർമ്മാണ കലാകാരന്മാർക്ക് ലഭിക്കുന്ന കുറഞ്ഞ ലാഭവും നിർമ്മാണം പൂർത്തീകരിക്കാനുള്ള സമയദൈർഘ്യവും കൊണ്ടാപ്പള്ളി കളിപ്പാട്ട നിർമ്മാണത്തിന് വെല്ലുവിളികൾ ഉയർത്തുന്നുണ്ട്.

നിർമ്മാണം

കൊണ്ടാപ്പള്ളിക്ക് സമീപമുള്ള മലനിരകളിൽ നിന്ന് ശേഖരിക്കുന്ന തെല്ല പൊനികി എന്ന കനംകുറഞ്ഞ മരയിനം(soft wood) ആണ് കൊണ്ടാപ്പള്ളി കളിപ്പാട്ടങ്ങളുടെ നിർമ്മാണത്തിനുപയോഗിക്കുന്നത്. ഈ മരത്തിൽ കൊത്തിയെടുക്കുന്ന രൂപങ്ങളുടെ അഗ്രഭാഗങ്ങൾ മിനുസപ്പെടുത്തിയെടുക്കുന്നു. ഇതിനു ശേഷം ജലച്ചായം, വെജിറ്റബിൾ ഡൈ, ഇനാമൽ പെയിന്റ് ഇവയിലേതെങ്കിലും ഉപയോഗിച്ച് ഈ കളിപ്പാട്ടങ്ങളെ വർണ്ണാഭമാക്കിയെടുക്കുന്നു.