കെ.കെ. മുഹമ്മദ് അബ്ദുൽ കരീം

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
കെ.കെ. മുഹമ്മദ് അബ്ദുൽകരീം
K.K. Muhammed Abdul kareem.JPG
ജനനം1932 ജൂൺ 1
കൊണ്ടോട്ടി, മലപ്പുറം
മരണം2005 ഏപ്രിൽ 7
കൊണ്ടോട്ടി
ദേശീയത ഇന്ത്യ
തൊഴിൽചരിത്രഗവേഷകൻ, ഗ്രന്ഥകാരൻ
രചനാകാലം1949-2005
വിഷയംചരിത്രവിഭാഗം
പ്രധാന കൃതികൾമക്തിതങ്ങളുടെ സമ്പൂർണ്ണ കൃതികൾ (സമാഹരണം)

കെ.കെ. മുഹമ്മദ് അബ്ദുൽ കരീം. (1932-2005) ചരിത്രഗവേഷകൻ[1]. ഗ്രന്ഥകാരൻ. മാപ്പിള സാഹിത്യകാരൻ. കേരള മുസ്ലിം ചരിത്രഗേവഷണ രംഗത്ത് ശ്രദ്ധേയമായ സംഭാവനകൾ അർപ്പിച്ചു. അറബി-മലയാള സാഹിത്യരംഗത്തെ വിപുലമായ ഗ്രന്ഥ ശേഖരത്തിനുടമയുമായിരുന്ന ഇദ്ദേഹം സ്വാതന്ത്ര്യ സമരചരിത്രം, കേരള മുസ്ലിം ചരിത്രം, ഇസ്ലാമിക ചരിത്രം, ജീവചരിത്രം , പൈതൃക സംരക്ഷണം എന്നീ മേഖലകളിൽ ശ്രദ്ധേയമായ 82 കൃതികൾ പ്രസിദ്ധീകരിച്ചിട്ടുണ്ട്.[അവലംബം ആവശ്യമാണ്] മരുഭൂമിയിലെ സുന്ദരിമാർ, ലൈലാ മജ്നു, നാലു ഖലീഫമാർ, ഇസ്ലാം-ആർഷ സങ്കലിത സംസ്കാരങ്ങൾ-ഭാരതീയ പ്രവാചകൻമാർ, ടിപ്പു സുൽത്താൻ തുടങ്ങിയ കൃതികൾ മലയാളസാഹിത്യ രംഗത്ത് ഇടം നേടിക്കൊടുത്തു. [2]

ജീവിതരേഖ[തിരുത്തുക]

1932 ജൂൺ 1 ന് മലപ്പുറം ജില്ലയിലെ കൊണ്ടോട്ടിക്കടുത്ത് കൊളത്തൂരിൽ (കരിപ്പൂർ അംശം വെള്ളാര്‌ ദേശം) കീടക്കാട്ട് കാവുങ്ങൽ കണ്ടിയിൽ വീരാൻകുട്ടി മുസ്‌ല്യാരുടെയും കീടക്കാട്ട് തെക്കുവീട്ടിൽ ഫാത്വിമക്കുട്ടിയുടെയും മകനായി‌ ജനിച്ചു. പ്രദേശത്തെ ഓത്തുപള്ളി, കൊണ്ടോട്ടി ജി.എം. എൽ . പി സ്കൂൾ, കോഴിക്കോട് ഹിമായത്തുൽ ഇസ്ലാം മദ്രസ, മൊറയൂർ വി.എച്ച്.എം. ഹൈസ്കൂൾ , മലപ്പുറം ഗവ. ട്രെയിനിങ് സ്കൂൾ എന്നിവിടങ്ങളിൽ നിന്ന് ഔപചാരിക വിദ്യാഭ്യാസം കരസ്ഥമാക്കി. മൊറയൂർ പള്ളി ദർസിലും പള്ളിദർസിലും മതാധ്യായനം നടത്തി. പിതാമഹൻ സ്ഥാപിച്ച പ്രൈമറി സ്കൂളിൽ 1951 ൽ അധ്യാപകനായി. 1987 ജൂൺ 30 ന് വിരമിച്ചു. [3]

കവി മോയിൻകുട്ടി വൈദ്യരുടെ ഗുരുവും തബൂക്‌ കിസ്സപ്പാട്ട്‌ രചയിതാവുമായ ചുള്ളിയാടൻ വീരാൻകുട്ടി പിതാമഹനാണ്‌. പിതാവിന്റെ സുഹൃത്തുക്കളായ ഫലകി മുഹമ്മദ്‌ മൗലവിയുടെയും കെ സി കോമുക്കുട്ടി മൗലവിയുടെയും സംഭാഷണങ്ങൾ ശ്രദ്ധിച്ചുവളർന്ന അബ്‌ദുൽകരീമിൽ കൗമാരദശയിൽ തന്നെ ചരിത്രാന്വേഷണ കൗതുകവും എഴുതാനുള്ള വാസനയും വളർന്നുവന്നിരുന്നു. സ്‌കൂൾ പഠനത്തോടൊപ്പം സമാന്തരമായി ദർസ്‌ പഠനവും മുന്നോട്ടുകൊണ്ടുപോയിരുന്ന അദ്ദേഹത്തിന്റെ ഗുരുനാഥൻ മുഹമ്മദ്‌ അമാനി മൗലവിയായിരുന്നു. അദ്ദേഹത്തിന്റെ പ്രപിതാമഹന്മാരിൽ ഒരാളായ ആലിക്കുട്ടി മുസ്‌ല്യാർ മൂന്ന്‌ മൗലിദുകളുടെയും ഏതാനും മർഥിയകളുടെയും കർത്താവായിരുന്നു. അൽമനാർ, ശബാബ്‌, യുവകേസരി, അൽഫാറൂഖ്‌ തുടങ്ങിയ ആനുകാലിക പ്രസിദ്ധീകരണങ്ങളിൽ ലേഖനമെഴുതിത്തുടങ്ങിയ കരീം പഴയ കാല പ്രസിദ്ധീകരണങ്ങൾ സൂക്ഷിക്കുന്നതിൽ അതീവ താല്‌പര്യം കാണിച്ചിന്നു[അവലംബം ആവശ്യമാണ്]. ഇബ്നു മീരാൻ കുട്ടി, അബൂ അബ്ദു റഷീദ്, അബൂ നശീദ, കീടക്കാടൻ തുടങ്ങിയ തൂലികാ നമങ്ങളും അദ്ദേഹം സ്വീകരിച്ചിരുന്നു.

പ്രശസ്തിക്ക് വേണ്ടിയുള്ള ഭ്രമം കരീം മാസ്റ്ററെ പിടികൂടിയതേയില്ല.[4]ഗവേഷണം ജീവിതസപര്യയാക്കിയ യോഗിയായിരുന്ന അദ്ദേഹം മുഖ്യധാരാ അംഗീകാരൾക്ക് ശ്രമിക്കുകയോ പുരസ്കാരങ്ങൾക്ക് പിന്നാലെ പോവുകയോ വേണ്ടത്ര പരിഗണിക്കപ്പെടുകയോ ചെയ്യാതെ പോവുകയായിരുന്നു[അവലംബം ആവശ്യമാണ്]. 83ാം വയസ്സിൽ ഇഹലോകവാസം വെടിഞ്ഞു.

ചരിത്രവും സാഹിത്യവും[തിരുത്തുക]

കേരള മുസ്‌ലിം പാരമ്പര്യത്തെ ആധുനിക സമൂഹത്തിന് പരിചയപ്പെടുത്തുന്ന ആധികാരികവും ബൃഹത്തുമായ മഹത്തായ മാപ്പിള പാരമ്പര്യം എന്ന ഗ്രന്ഥം സി.എൻ. അഹ്മദ് മൗലവിയോടൊപ്പം ചേർന്നെഴുതി. 1978 ൽ പുറത്തിറങ്ങിയ കൃതിക്ക് ഈ ഗ്രന്ഥത്തിന് കേരള സർക്കാർ, കേരള സാഹിത്യ അക്കാദമി, കേരള വഖഫ് ബോർഡ് എന്നിവർ 3000 ക.വീതം പാരിതോഷികം നൽകി. കേരള സർക്കാർ പ്രസിദ്ധീകരിച്ച സർവ്വ വിജ്ഞാന കോശം ഏഴാം വാള്യത്തിൽ മാപ്പിള സാഹിത്യത്തെ കുറിച്ച് ലേഖനം എഴുതിയിട്ടുണ്ട്.

കേരള മുസ്‌ലിം ചരിത്രരചനയിൽ പി എ സെയ്‌തുമുഹമ്മദ്‌, ഡോ. സി കെ കരീം എന്നിവർക്കുശേഷം മൗലികമായ രചനകളൊന്നും തന്നെ ഉണ്ടായിട്ടില്ലല്ലെന്നും ഇവരിൽ തന്നെ കേരള മുസ്‌ലിം പൈതൃകവും അതിന്റെ ശേഷിപ്പുകളും തേടി കേരളം മുഴുവൻ സഞ്ചരിക്കുകയും പരമാവധി രേഖകൾ സമാഹരിക്കുകയും ചെയ്‌തത്‌ കരീം മാഷ്‌ എന്ന ഒറ്റ വ്യക്തി മാത്രമാണെന്ന് ചരിത്രസൂക്ഷിപ്പുകാരനായ അബ്ദുറഹിമാൻ മങ്ങാട് അഭിപ്രായപ്പെട്ടുന്നു[5]. വക്കം മൗലവി, ഹമദാനി തങ്ങൾ, സനാഉല്ല മക്തിതങ്ങൾ, ചാലിലകത്ത്‌ കുഞ്ഞഹമ്മദ്‌ ഹാജി, പി അബ്‌ദുൽഖാദർ മൗലവി തുടങ്ങിയവരെ ആധുനിക തലമുറയ്‌ക്ക്‌ അദ്ദേഹം പരിചയപ്പെടുത്തി. കരീം മാസ്റ്ററുടെ സ്മരണക്കായി ഔദ്യോഗികമായ ചരിത്ര സെമിനാറുകൾക്ക് വേദിയൊരുക്കിയിരുന്നു [6]

അമേരിക്കൻ സാഹിത്യകാരനായ സ്റ്റീഫൻ ഫ്രെഡറിക് ഡേലിൻറെ മാപ്പിളാസ് ഓഫ് മലബാർ [7] (Mapilas of Malabar 1498-1922) എന്ന ഡോക്ടറേറ്റിനായുള്ള ഗവേഷണ രചനക്ക് മുഖ്യ അവംലബമായത് കെ.കെ. അബ്ദുൽ കരീമിൻറെ പഠനങ്ങളായിരുന്നു.ഈ കൃതി ഓക്സ്ഫോർഡ് യൂണിവേഴ്സിറ്റി 1980 ൽ പ്രസിദ്ധീകരിച്ച [8]. റോളണ്ട് ഇ. മില്ലറുടെ കൂടെ മാപ്പിള മുസ്‌ലിം ഓഫ് കേരള (Mapila Muslim of Kerala)[9] എന്ന കൃതി രചിക്കുവാനും കരീം മാസ്റ്ററുടെ സഹായമുണ്ടായിരുന്നു.[10]. മൌലിക രചനകൾക്ക് പുറമെ അറബി, ഉറുദു ഭാഷകളിൽ അനേകം കൃതികൾ മലയാളത്തിലേക്ക് വിവർത്തനം ചെയ്തിട്ടുണ്ട്. കോഴിക്കോട് യുവത ബുക്സ് പ്രസിദ്ധീകരിച്ച കൊന്നിയൂർ രാഘവൻ നായരുടെ ദിവ്യദീപ്തിയെന്ന ഖുർആനിൻറെ കാവ്യാവിഷ്കാരവും കോഴിക്കോട് ഐ.പി.എച്ച്പ്രസിദ്ധീകരിച്ച കെ.ജി. രാഘവൻ നായരുടെ ഖുർആൻ കാവ്യാവിഷ്കാരമായ അമൃതവാണിയും വെളിച്ചം കാണുന്നതിൽ പങ്ക് വഹിച്ചത് കരീം മാസ്റ്ററായിരുന്നു.[11]

മാപ്പിള സാഹിത്യ അക്കാദമി പ്രസിഡന്റ്, ഇന്തോ-അറബ് ഫ്രണ്ട്ഷിപ്പ് സൊസൈറ്റി സംസ്ഥാന വൈസ് പ്രസിഡൻറ്, കലിമ വിജ്ഞാനകോശം ചീഫ് എഡിറ്റർ , ഖിലാഫത് സ്മരണിക പത്രാധിപർ , കേരള മുസ്‌ലിം ഡയറക്ടറി, ഇസ്‌ലാമിക വിജ്ഞാനകോശം (ഐ.പി.എച്ച്), ഇസ്‌ലാം അഞ്ച് വാള്യങ്ങളിൽ എന്നിവയുടെ പത്രാധിപ സമിതിയംഗമായ സേവനമനുഷ്ടിച്ചിട്ടുണ്ട്.

പ്രധാനകൃതികൾ[തിരുത്തുക]

ചരിത്രം - ചരിത്രാനുബന്ധമേഖലകളിലാണ് കരീം സാഹിബിൻറെ രചനകൾ എറെയും. വിവിധ വിഷയങ്ങളിലാണ് എൺപതിൽപരം കൃതികൾ എഴുതിയിട്ടുണ്ട്. സി. എൻ അഹ്മദ് മൗലവിയോടൊപ്പം രചിച്ച മഹത്തായ മാപ്പിള സാഹിത്യപാരമ്പര്യം പ്രധാനപ്പെട്ട കൃതി. കെ എം സീതി സാഹിബ്‌, മക്തി തങ്ങൾ, ചാലിലകത്ത്‌, കെ എം മൗലവി എന്നിവരുടെ ജീവചരിത്രം എഴുതിയത് അദ്ദേഹമാണ്. മക്തി തങ്ങളുടെ സമ്പൂർണകൃതികൾ സമാഹരിക്കുന്നതിനുവേണ്ടി അദ്ദേഹം കേരളത്തിന്റെ വിവിധഭാഗങ്ങളിൽ സഞ്ചരിച്ചു. ഈ ഗ്രന്ഥം 1981-ൽ കേരള ഇസ്‌ലാമിക്‌ മിഷൻ പ്രസിദ്ധീകരിച്ചു. ഇപ്പോൾ വചനം ബുക്‌സ്‌ പ്രസിദ്ധീകരിക്കുന്നു. കൂടാതെ മക്തി തങ്ങളുടെ ജീവചരിത്രവും കേരള ഇസ്‌ലാമിക്‌ മിഷൻ പ്രസിദ്ധീകരിച്ചു. മൗലാനാ മുഹമ്മദ്‌ മൻസൂർ നുഅ്‌മാനി എഴുതിയ ശൈഖ്‌ മുഹമ്മദുബ്‌നു അബ്‌ദുൽ വഹ്‌ഹാബിനെക്കുറിച്ചുള്ള ആരോപണങ്ങൾക്കുള്ള മറുപടിയായ `ദി ആയ മുകസ്സഫ അനിശ്ശൈഖ്‌ മുഹമ്മദുബ്‌നു അബ്‌ദിൽ വഹ്‌ഹാബ്‌' എന്ന കൃതി കരീം സാഹിബ്‌ മലയാളത്തിലേക്ക്‌ വിവർത്തനം ചെയ്‌തിട്ടുണ്ട്‌.

ഗവേഷണം[തിരുത്തുക]

  • മഹത്തായ മാപ്പിള സാഹിത്യപാരമ്പര്യം (സി.എൻ . അഹ്മദ് മൌലവിയോടൊപ്പം)-1978
  • മുഹമ്മദ് നബി ലോകവേദങ്ങളിൽ യുവത ബുക്സ്
  • ഖുർആനും ആർഷ സംസ്കാരവും ഒരു താരതമ്യം പഠനം (1963)
  • കപ്പപ്പാട്ടും നൂൽ മദ്ഹും ഒരു വിശകലന പഠനം (1984)
  • ക്രിസ്തുമതം മാറ്റിമറിക്കപ്പെട്ടതെങ്ങിനെ?

ജീവചരിത്രം[തിരുത്തുക]

  • ഖാജാ മുഈനുദ്ദീൻ ചിശ്തി (1956-60നും ഇടക്ക്)
  • ശൈഖ് അബ്ദുൽ ഖാദർ ജീലാനി (1956-60നും ഇടക്ക്)
  • ഗാസി അൻവർ പാഷ (1956-60നും ഇടക്ക്)
  • ശാഹുൽ ഹമീദ് മീറാൻ സാഹിബ് (1956-60നും ഇടക്ക്)
  • വിശുദ്ധ നബിയുടെ രണ്ട് പിതൃവ്യന്മാർ (ഹംസ, അബ്ബാസ്) (1956-60നും ഇടക്ക്)
  • ഇബ്റാഹിമ് ബ്നു അദ്ഹം (1956-60നും ഇടക്ക്)
  • മമ്പുറം അലവി തങ്ങൾ (1960)
  • ചേരമാൻ പെരുമാൾ (1960)
  • മോയിൻ കുട്ടി വൈദ്യർ (1961)
  • ഹസ്രത് മുഹമ്മദ് ശാഹ് തങ്ങൾ
  • ഹസ്രത് മുഹമ്മദ് നബി(സ)
  • മാലിക് ബ്നു ദീനാർ (1967)
  • ഹാറൂൻ റഷീദ് (1963)
  • ശഹീദെ മില്ലത്ത് ടിപ്പു സുൽത്താൻ (1961)
  • ഹസ്രത്ത് മൂസാ നബി (1965)
  • ഈസ ബ്നു മർയം (1965)
  • മരിക്കാത്ത മനുഷ്യൻ: മുഹമ്മദ് അബ്ദുറഹ്മാൻ സാഹിബ് (1958)
  • അഇമ്മതുൽ അർബഅ (നാല് ഇമാമുമാരുടെ ചരിത്രം)(1972)
  • വാരിയൻകുന്നത്ത് കുഞ്ഞഹമ്മദ് ഹാജി (1991)
  • സനാഉള്ള മക്തി തങ്ങൾ
  • സുൽത്താൻ സലാഹുദ്ദീൻ അയ്യൂബി (1990)
  • കെ.എം. മൌലവി (1982)
  • ഹസ്രത് ഫാത്തിമ (വളാഞ്ചേരി മുഹമ്മദീയ്യ ബുക് സ്റ്റാൾ- 1958)
  • വിശുദ്ധ നബിയുടെ പത്നിമാർ (1974)
  • ഹസ്രത് അബൂബക്കർ (1962-63)
  • ഹസ്രത് ഉമർ (1962-63)
  • ഹസ്രത് ഉസ്മാൻ (1962-63)
  • ഹസ്രത് അലി (1962-63)
  • വിശുദ്ധ നബിയുടെ സന്താനങ്ങൾ (1981)
  • പത്ത് സ്വർഗ നിവാസികൾ-അശ്റതുൽ മുബശ്ശിറ ചരിത്രം (1967)
  • ഹസ്രത് ദുൽ ഖർനൈൻ (1981)
  • മമ്പുറം തങ്ങൾ
  • ലോകോദ്ധാരകൻ (1960)
  • മുഗൾ സുൽത്താൻമാർ (1970)
  • ഫത്ഹുൽ ബയാൻ ഫീ സീറത്തിന്നബീയ്യിൽ അമീൻ (പ്രവാചക ചരിത്രം-രണ്ട് ഭാഗം)
  • ശേറെ കേരള സീതിസാഹിബ് -1962

സമാഹരണം[തിരുത്തുക]

  • മക്തി തങ്ങളുടെ സമ്പൂർണ കൃതികൾ[12]
  • തിരുനബി മഹാത്മ്യം
  • മരുഭൂമിയിലെ ചന്ദ്രോദയം
  • പ്രവാചക സൂക്തികൾ (1962)
  • ആശിഖ് മഅശൂഖ് കത്ത് പാട്ടുകൾ (രണ്ട് ഭാഗം)
  • മഹാകവി മോയിൻകുട്ടി വൈദ്യരുടെ സമ്പൂർണ്ണ കൃതികൾ (കെ. അബൂബക്കറിനൊപ്പം

ചരിത്രം[തിരുത്തുക]

  • കോഴിക്കോട് ചരിത്രം (പി.കെ. ബ്രദേഴ്സ് പ്രസിദ്ധീകരിച്ചു. 1962)
  • ഗസ്വതു ബദ്റുൽ കുബ്റാ (ബദ്ർ യുദ്ധം)
  • 1921 ലെ ഖിലാഫത്ത് ലഹളയും ആലിമുസ്ല്യാരും - 1965
  • അറബികളുടെ കപ്പലോട്ടം -1967 (കേരള സാഹിത്യഅക്കാദമി സാമ്പത്തിക സഹായം കിട്ടി)
  • ശിപായി ലഹളയുടെ രഹസ്യങ്ങൾ -(നവപ്രഭ, കണ്ണൂർ-1965)
  • ഫത്ഹുൽ മുബീൻ-പ്രത്യക്ഷ സമരം (പറങ്കികളുമായി നടന്ന ചാലിയം യുദ്ധചരിത്രം -1985)
  • ഇരുട്ടറയും വാഗൺ ട്രാജഡിയും
  • ഖിലാഫത്ത് സമരനേതാക്കൾ
  • മലബാറിലെ രത്നങ്ങൾ

വ്യാഖ്യാനം[തിരുത്തുക]

  • ബദ്റുൽ മുനീർ ഹുസ്നുൽ ജമാൽ
  • മലപ്പുറം പടപ്പാട്ട് -മോയിൻ കുട്ടിവൈദ്യർ (1964-65)

സാഹിത്യം[തിരുത്തുക]

  • ലൈലാ മജ്നൂൻ (നോവൽ -1956-60നും ഇടക്ക്)
  • രാജ്ഞി നൂർജഹാൻ(നോവൽ -1965)
  • ഹസ്രത്ത് ആയിശ (നോവൽ -1965)
  • മരുഭൂമിയിലെ സുന്ദരികൾ (നോവൽ-ജമാഅത്ത് ടൈംസിൽ ഖണ്ഡശ്ശ: പ്രസിദ്ധീകരിച്ചു)
  • മങ്ങാട്ടച്ചനും കുഞ്ഞായിൻ മുസ്ല്യാരും (ഫലിത കഥകൾ -1960)
  • ഹസ്രത് നുഅ്മാനും അബൂനുവാസും (ഫലിതം -1966)
  • നൌശർവാൻറെ കാമുകി (ചരിത്ര നാടകം-1961)
  • സിന്ദ്ബാദിൻറെ കപ്പൽയാത്ര (അറബിക്കഥകൾ -1961)
  • ഇസ്ലാമിക ചരിത്രത്തിലെ അനർഘ നിമിഷങ്ങൾ (ചരിത്രകഥകൾ )
  • മൌലിദുന്നബി-നബിയുടെ ലഘു ചരിത്രം (ബാലസാഹിത്യം-1962)
  • ഖിലാഫത്ത് സമരപ്പാട്ടുകൾ

ഇസ്ലാമിക പഠനം[തിരുത്തുക]

  • ഇസ്ലാമിൻറെ സന്ദേശം (1964)
  • ഇന്ത്യയിൽ ഇസ്ലാം പ്രചരിച്ചതെങ്ങിനെ? (1966)
  • ഇസ്ലാമിലെ ആരാധനാകർമ്മങ്ങൾ (1963)
  • ഇസ്ലാമിക നമസ്കാരങ്ങൾ
  • നമസ്കാര ക്രമം
  • ഹനഫീ നമസ്കാരക്രമം - 1958
  • വിശുദ്ധ ഹജ്ജും ഉംറയും (1966)

മറ്റു കൃതികൾ[തിരുത്തുക]

  • തംരീനുൽ ഖുതുബാത് -അറബി മലയാളം (1961)
  • പ്രസംഗപരിശീലനം (1962)
  • മനുഷ്യൻറെ യാഥാർഥ്യം (ഫിലോസഫി-1963)
  • ക്രിസ്തു ദൈവമോ ദൈവപുത്രനോ അല്ല (മറുപടി-1992)

പുരസ്കാരങ്ങൾ[തിരുത്തുക]

  • ഉബൈദ് സാബിബ് അവാർഡ്
  • പി.എ. സൈദ് മുഹമ്മദ് പുരസ്കാരം
  • തിരൂർ സർഗശാല അവാർഡ്
  • കാസർഗോഡ് കലാസാഹിത്യ അവാർഡ്
  • ഉൻഡോ അറബ് ഫ്രണ്ട്ഷിപ് അവാർഡ്
  • ഫ്രൈഡെ ക്ലബ് അവാർഡ്
  • ദുബായ് ബ്രദേഴസ് ഇന്ത്യാ ഫൌണ്ടേഷൻ അവാർഡ്

പ്രമുഖരുടെ അഭിപ്രായങ്ങൾ[തിരുത്തുക]

  • ചരിത്രഗവേഷണം പൊതുവെ ഗൌരവമായി കാണാത്ത ഇന്ത്യൻ സമൂഹത്തിൽ , കെ.കെ. അബ്ദുൽ കരീം അറബി മലയാള സാഹിത്യ കൃതികളെ പൊതുധാരയുമായി ബന്ധപ്പെടുത്താൻ പരിശ്രമിച്ച മാപ്പിള സാഹിത്യ ചരിത്രരന്മാരിൽ പ്രമുഖനാണ്.- മുഖ്യമന്ത്രി ഉമ്മൻ ചാണ്ടി [13]
  • ഔപചാരിക വിദ്യാഭ്യാസത്തിൻരെ പശ്ചാത്തലമോ പാണ്ഡിത്യത്തിന്റെ പരിവേശമോ ഇല്ലാതെ ഗവേഷകന്മാരുടെയും പണ്ഡിതന്മാരുടെയും ഗുരുവും ഗൈഡും സ്രോതസ്സുമായി വർത്തിച്ച അത്യപൂർവ്വ വ്യക്തിത്വത്തിന്റെ ഉടമ- മാധ്യമം മാധ്യമം എഡിറ്റോറിയൽ [14]
  • ഒരു നാട്യവുമില്ലാതെ തൻറെ അഭിപ്രായങ്ങൾ കാര്യകാരണ സഹിതം ആർജ്ജവത്തോടെ തുറന്നു പറയുന്ന സ്വഭാവമാണ് അദ്ദേഹത്തിൽ കണ്ടിരുന്നത്. മറ്റു പല പണ്ഡിതന്മാരിലും കാണാത്ത ഈ നാടൻ വിനയം എനിക്കിഷ്ടപ്പെട്ടു - ഡോ. എം.ജി.എസ്. നാരായണൻ[15]
  • ഒരു കേവല ചരിത്രകാരൻ എന്നതിനേക്കാൾ, ഒരു പോപ്പുലർ ഹിസ്റ്റോറിയൻ എന്ന പദവിയേക്കാൾ ഞാൻ അദ്ദേഹത്തെ തിരിച്ചറിയുന്നത് ചരിത്ര വസ്തുതകളുടെ വിപുലമായ ശേഖരണം നടത്തിയൊരാൾ (A Collector of Historical Meterials) എന്ന നിലക്കാണ് - പ്രൊഫ. കെ.എൻ. പണിക്കർ[16]
  • മലബാർ കാലപത്തെ കുറിച്ച് പഠനം നടത്തിയ എനിക്കും ഡോ. കെ.എൻ. പണിക്കർ, സ്റ്റീഫൻ ഡെയ്ൽ തുടങ്ങിയ ഒട്ടേറെ പേർക്കും കരീമിൻറെ ഗ്രന്ഥങ്ങൾ വഴികാട്ടിയായിട്ടുണ്ട്. അദ്ദേഹം കൈ വെച്ച മേഖലകളിൽ അദ്ദേഹം ഒരു അഥോറിറ്റിയായിരുന്നു. ചെയ്ത അധ്വാനത്തിനനുസരിച്ച് അദ്ദേഹത്തിന് അംഗീകരം കിട്ടിയിട്ടില്ല. ഈ മേഖലയിൽ ഒട്ടേറെ പണം ചെലവഴിക്കുന്ന സർക്കാർ സംവിധാനങ്ങൾ അബ്ദുൽ കരീമിൻറെ പ്രധാന കൃതികൾ പുനപ്രസിദ്ധീകരിച്ചാൽ അത് ആ ചരിത്രാന്വേഷകനോട് ചെയ്യാവുന്ന സമാന്യനീതിയാവും.- ഡോ. എം. ഗംഗാധരൻ[17]
  • അക്കാദമികമായ ശാസ്ത്രീയ രചനയിൽ നിന്ന് വ്യത്യസ്തമായി അനൌപചാരികമായി ഇസ്ലാമിക കേരളത്തിൻറെ ചരിത്രവും സാഹിത്യവും അർപ്പണബോധത്തോടെ കണ്ടെത്തുകയും അത് നിരന്തരം പ്രചരിപ്പിക്കുകയും അക്കാദമിക ചരിത്രകാരൻമാർക്ക് അമൂല്യ സ്രോതസ്സായി പ്രവർത്തിക്കുകയും ചെയ്ത കരീം മാസ്റ്റർ സ്വയം ഒരു ചരിത്രപൈതൃകത്തിൻറെ ഭാഗമായി മാറിയിരിക്കുന്നു. ഡോ. കെ.കെ.എൻ. കുറുപ്പ്[18]
  • മലബാർ ചരിത്രത്തെ പറ്റി പൊതുവിലും മാപ്പിള ചരിത്രത്തെ പറ്റി വിശേഷിച്ചും പഠിക്കുന്നവർ എന്നും ആശ്രയിച്ചു പോന്നത് അബ്ദുൽ കരീമിൻരെ ഹോം ലൈബ്രറിയാണ്. മലബാറിൻറെ ചരിത്രം കേരള മുസ്ലിംകളുടെ പാരമ്പര്യം എന്നിവ സംബന്ധിച്ച വിലപിടിച്ച പല കൃതികളും രേഖകളും അദ്ദേഹത്തിൻരെ ശേഖരത്തിൽ കിടപ്പുണ്ടാകും. അവ സംരംക്ഷിക്കാനും വരും തലമുറക്ക് ലഭ്യമാക്കാനും വേണ്ടതൊക്കെ ചെയ്യുവാൻ നമുക്ക് ബാദ്ധ്യതയുണ്ട്.- എം.എൻ. കാരശ്ശേരി[19]

സ്മരണിക[തിരുത്തുക]

കരീം മാസ്റ്ററുടെ സ്മരണക്കായി മാപ്പിള കലാ അക്കാദമി കെ.കെ. അബ്ദുൽ കരീം അവാർഡ് ഏർപ്പെടുത്തി.[20] കെ.കെ. മുഹമ്മദ് അബ്ദുൽ കരീമിൻറെ നിര്യാണത്തെ തുടൃർന്ന് മുഹമ്മദ് അബ്ദുൽ കരീം സെൻറർ ഫോർ ഹിസ്റ്റോറിക്കൽ സ്റ്റഡീസ് പുറത്തിറക്കിയ കൃതിയാണ് ചരിത്രം ചരിത്രം വർത്തമാനമാക്കിയ ഒരാൾ.[21] അനുസ്മരണങ്ങളും ചരിത്രകാരനെ കുറിച്ചുള്ള പ്രമുഖരുടെ അഭിപ്രായങ്ങളും നിരീക്ഷണങ്ങളും പഠനങ്ങളുമാണ് ഇതിൽ ഉൾപ്പെടുത്തിയിരിക്കുന്നത്. [22]

കുടുബം[തിരുത്തുക]

മേലങ്ങാടി കദീശുമ്മയായിരുന്നു ഭാര്യ. 1983 ജൂൺ 23 ന് അവരുടെ ദേഹവിയോഗത്തെ തുടർന്ന് കൊളത്തൂർ വള്ളത്തൊടി ഉമ്മാച്ചുവിനെ വിവാഹം ചെയ്തു. മക്കൾ : ഡോ. കെ.കെ. മുഹമ്മദ് അബ്ദുൽ സത്താർ (ചരിത്രവിഭാഗം തലവൻ -പി.എസ്.എം.ഒ കോളേജ് തിരൂരങ്ങാടി[23]),സുബൈദ, കെ.കെ. മുഹമ്മദ് അബ്ദുൽ ജബ്ബാർ -(അധ്യാപകൻ, കാലിക്കറ്റ് ഗേൾസ് ഹയർ സെക്കന്ററി സ്കൂൾ, കോഴിക്കോട്), റഷീദ -അധ്യാപിക നഷീദ -അധ്യാപിക, മാജിദ.

അവലംബം[തിരുത്തുക]

  1. Husain Randathani (2007). "ആമുഖം". Mappila Muslims: A Study on Society and Anti Colonial Struggles. കോഴിക്കോട്: അദർ ബുക്സ്. p. 8. ISBN 81-903887-8-9.
  2. എഡിറ്റർ : ഡോ. പി.വി.കൃഷ്ണൻനായർ (2004). സാഹിത്യകാര ഡയറക്ടറി. കേരള സാഹിത്യ അക്കാദമി. p. 352. ISBN 81-7690-042-7.
  3. ചരിത്രം വർത്തമാനമാക്കിയ ഒരാൾ പേജ് : 267 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡി
  4. ദേശാഭിമാനി ദിനപത്രം 2005 ഏപ്രിൽ 8
  5. http://www.shababweekly.net/archives/1881-2013-03-08-05-12-48
  6. http://www.hindu.com/2005/06/26/stories/2005062604150300.htm
  7. http://www.muslimmodernities.org/items/show/13
  8. മലയാള മനോരമ ദിനപത്രം 2005 ഏപ്രിൽ 8
  9. http://www.bookadda.com/books/mappila-muslims-kerala-study-islamic-roland-e-0863112706-9780863112706
  10. മാതൃഭൂമി ദിനപത്രം 2005 ഏപ്രിൽ 8
  11. ശബാബ് വാരിക 2005 ഏപ്രിൽ 15
  12. Reasoning Indian Politics: Philosopher Politicians to Politicians Seeking Philosophy, Narendar Pani & Anshuman Behera
  13. ചരിത്രം വർത്തമാനമാക്കിയ ഒരാൾ പേജ് : 8 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  14. മാധ്യമം ദിനപത്രം 2005 ഏപ്രിൽ 9
  15. ചരിത്രം വർത്തമാനമാക്കിയ ഒരാൾ പേജ് : 94 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  16. ചരിത്രം വർത്തമാനമാക്കിയ ഒരാൾ പേജ് : 96 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  17. ചരിത്രം വർത്തമാനമാക്കിയ ഒരാൾപേജ് : 98 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  18. ചരിത്രം വർത്തമാനമാക്കിയ ഒരാൾപേജ് : 99 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  19. ചരിത്രം വർത്തമാനമാക്കിയ ഒരാൾപേജ് : 101 , പ്രസാധനം: മുഹമ്മദ് അബ്ദുൽ കരീം സെൻറർ ഫോർ ഹിസ്റ്റാറിക്കൽ സ്റ്റഡീസ്
  20. http://www.hindu.com/2006/05/07/stories/2006050719680300.htm
  21. http://www.mathrubhumi.com/nri/gulf/article_335211/
  22. http://www.malabarkalapam.com/2012/12/k-k-muhammed-abdul-kareem-orma-pusthakam.html
  23. ദ ഹിന്ദു 11-29-2012, A clan from Yemen and history of Malabar