കുത്താമ്പുള്ളി

തൃശൂർ ജില്ലയിലെ തിരുവില്വാമല ഗ്രാമപഞ്ചായത്തിൽ പെട്ട ഒരു ഗ്രാമമാണ് കുത്താമ്പുള്ളി. തിരുവില്വാമലയിൽ നിന്ന് അഞ്ച് കിലോമീറ്റർ അകലെയായി തൃശ്ശൂർ-പാലക്കാട് ജില്ലകളുടെ അതിർത്തി പ്രദേശത്തുള്ള ഈ ഗ്രാമം കൈത്തറി വസ്ത്രനിർമ്മാണത്തിന് പ്രശസ്തമാണ്. മിക്കവാറും എല്ലാ വീടുകളിലും തറികൾ സജ്ജീകരിച്ചിരിക്കുന്നു. കുടുംബാംഗങ്ങളുടെ കൂട്ടായ തൊഴിൽ എന്ന നിലയ്ക്കാണ് ഈ ഗ്രാമവ്യവസായം തുടരുന്നത്. കുത്താമ്പുള്ളി സാരികൾ ഭൗമസൂചിക അംഗീകാരം നേടിയിട്ടുള്ളവയാണ്. ഇവിടെ കേരള സാരി എന്നറിയപ്പെടുന്ന സാരികളാണ് പരമ്പര്യമായി നിർമിച്ചുവരുന്നത്.