കഴകം

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
കഴകം എന്ന വാക്കാൽ വിവക്ഷിക്കാവുന്ന ഒന്നിലധികം കാര്യങ്ങളുണ്ട്. അവയെക്കുറിച്ചറിയാൻ കഴകം (വിവക്ഷകൾ) എന്ന താൾ കാണുക. കഴകം (വിവക്ഷകൾ)

വടക്കേ മലബാറിൽ‌ കണ്ടുവരുന്ന ഒട്ടുമിക്ക സമുദായങ്ങളുടേയും ആരാധനാലയങ്ങളായ താനം‌, തറ, പള്ളിയറ, കോട്ടം‌, കാവുകൾ‌, മുണ്ട്യ തുടങ്ങിയ സങ്കേതങ്ങൾ‌ക്ക്‌ നേതൃത്വം‌ നൽ‌കുന്ന ഭരണസിരാകേന്ദ്രവും ആരാധനാലയവുമാണ്‌ കഴകം‌. ഉത്തര കേരളത്തിലെ വൈദികേതരമായ കൂട്ടയ്‌മയിൽ‌ പ്രഥമസ്ഥാനം‌ അർ‌ഹിക്കുന്നവയാണ്‌ കഴകങ്ങൾ‌. സമുദായത്തിന്റെ കീഴിൽ‌ താനങ്ങളുടെ എണ്ണം‌ പെരുകുമ്പോൾ‌ അവയെ നിയന്ത്രിക്കാൻ‌ മേൽ‌ഘടകമായാണ്‌ കഴകം‌ രൂപം‌ കൊള്ളുന്നത്‌.

പദോല്പത്തി[തിരുത്തുക]

കഴകം‌ എന്ന പദം‌ വിവിധ അർ‌ത്ഥങ്ങളിലാണ്‌ ഓരോ ദേശത്തും‌ അറിയപ്പെടുന്നത്‌. കോലസ്വരൂപത്തിലും അള്ളടസ്വരൂപത്തിലുമായിരുന്നു കഴകങ്ങൾ‌ ആരം‌ഭിച്ചത്‌. രാജ്യത്തിന്റെ പൊതുകാര്യങ്ങളിൽ‌ ചർ‌ച്ച നടത്താനും‌ തിരുമാനമെടുക്കാനുമുള്ള സഭ എന്ന അർ‌ത്ഥമാണ്‌ അന്നു കഴകം‌ എന്ന പദത്തിനു നൽ‌കിയിരുന്നത്‌. ഘടകം‌ എന്ന സം‌സ്‌കൃതപദത്തിന്റെ തത്ഭവമാണ്‌ കഴകമെന്ന്‌ ചിലർ‌ അഭിപ്രായപ്പെടുന്നു. കഴകം‌ എന്ന പദം‌ ആദ്യം‌ തമിഴിലും‌ പിന്നീട്‌ മലയാളത്തിലും‌ പണ്ടുമുതലേ ഉപയോഗിച്ചു വരുന്നുണ്ട്. തെക്കേമലബാറിൽ‌ ക്ഷേത്രപൂജ നടത്തുന്ന കർ‌മ്മിയെ സഹായിക്കാനായി ശ്രീകോവിലിനു വെളിയിൽ‌ ഒരുക്കങ്ങൾ‌ ചെയ്തു സഹായിക്കുന്നവരെ കഴകക്കാർ‌ എന്നാണു വിളിക്കുക.

ഉത്ഭവം‌[തിരുത്തുക]

ജാതിവ്യവസ്ഥയും‌ നാട്ടു രാജാക്കൻ‌മാരുടെ ആധിപത്യവും‌ നിലനിന്നിരുന്ന കാലത്ത്‌ ഭരണനി‌ർ‌വ്വഹണത്തിന്റെ ഭാഗമായി ജാതിക്കൂട്ടങ്ങളുടെ ഇടയിലാണ്‌ കഴകങ്ങൾ‌ രൂപം‌ കൊണ്ടത്‌. കഴകത്തിന്റെ നിയമവ്യവസ്ഥയിൽ‌ ഒരു സമുദായം‌ കെട്ടുറപ്പോടെ നിലനിന്നു പോന്നു. വിവാഹം, മരണം, അടിയന്തരം‌, കുടുംബവഴക്ക്‌, സ്വത്ത്‌ തർക്കം‌ തുടങ്ങി സമുദായാം‌ഗങ്ങൾ‌ക്കിടയിലെ എല്ലാ കാര്യങ്ങളിലും‌ കഴകത്തിന്റെ ശക്തമായ ഇടപെടൽ‌ ഉണ്ടായിരുന്നു.

പ്രാധാന്യം‌[തിരുത്തുക]

സമുദായാംഗങ്ങൾഉടെ ക്ഷേമത്തിനും‌ കെട്ടുറപ്പിനും‌ വേണ്ടിയുള്ള കൂട്ടയ്‌മയാണു കഴകം‌. ഇതൊരു പ്രശ്നപരിഹാരവേദി കൂടിയാണ്‌. ഏതൊരു വഴക്കും‌ കഴകത്തിലാണു തീർ‌പ്പുകൽ‌പ്പിക്കുക. കഴകത്തിലും‌ തീരാത്ത പ്രശ്നമാണെങ്കിൽ‌ അതു തൃക്കൂട്ടത്തിലോ മഹാക്ഷേത്രങ്ങളിലോ വെച്ച്‌ തീർ‌പ്പുകല്പിക്കും‌. നാലു കഴകങ്ങൾ‌ ചേരുന്നതാണ്‌ ഒരു തൃക്കൂട്ടം‌. തൃക്കൂട്ടത്തിനും‌ മേലെയാണ്‌ മഹാക്ഷേത്രം‌. വലിയൊരു ജനകീയ സംഘടനയാണ്‌ കഴകം‌. കഴകത്തിനു കീഴിൽ‌ ഒട്ടനവധി ദേവസ്ഥാനങ്ങൾ‌ ഉണ്ടായിരിക്കും‌. കഴകങ്ങളിൽ‌ നടക്കുന്ന ചടങ്ങുകൾ‌ക്ക്‌ ഈ ദേവസ്ഥാനങ്ങളിൽ‌ നിന്നൊക്കെ സമുദായാം‌ഗങ്ങൾ‌ എത്തിച്ചേരുന്നു. പ്രത്യേക ഭരണസം‌വിധാനം‌ ഓരോ കഴകത്തിനും‌ കാണും‌. തീയ്യസമുദായത്തിന്റെ ഒരു കഴകത്തിലെ പ്രധാന സ്ഥാനീയർ‌ താഴെ പറയുന്നവരാണ്‌:

  1. അന്തിത്തിരിയൻ‌
  2. തണ്ടാൻ‌
  3. കൈക്ലോൻ‌
  4. കാർ‌ന്നോൻ‌മാർ‌ - കാരണവൻ‌മാർ‌
  5. വെളിച്ചപ്പാടൻ‌മാർ‌
  6. കൂട്ടായ്‌ക്കാർ‌
  7. കൊടക്കാരൻ‌
  8. കലേയ്‌ക്കാരൻ‌ തുടങ്ങിയവർ‌

കഴകത്തിലെ ഈ സ്ഥാനക്കാർ‌ക്കെല്ലാം‌ ആത്മീയ പരിവേഷവും‌ ബഹുമാനവും‌ സമുദായത്തിനിടയിൽ നിന്നും‌‌ ലഭിക്കുന്നു. ഭരണനിയന്ത്രണത്തിനും സമുദായ പരിഷ്‌കരണത്തിനും‌ സാമുദായിക ഐക്യത്തിനും‌ വേണ്ടി പ്രവർത്തിക്കുന്ന ഇത്തരം‌ സ്ഥാപനങ്ങൾ‌ ജാതിവ്യവസ്ഥയുടെ മൂർ‌ദ്ധന്യത്തിൽ‌ പോലും‌ സമുദായങ്ങളെ ഒന്നിപ്പിച്ച് സാഹോദര്യവും‌ സ്നേഹവും‌ നിലനിർ‌ത്തുന്നതിനായി പരിശ്രമിച്ചിരുന്നു.

പ്രധാന കഴകങ്ങൾ‌[തിരുത്തുക]

തീയ്യ കഴകങ്ങൾ‌[തിരുത്തുക]

  1. നെല്ലിക്കാത്തുരുത്തി കഴകം - ചെറുവത്തൂരിനു പടിഞ്ഞാറുഭാഗം‌
  2. പാലക്കുന്ന്‌ കഴകം‌ - ഉദുമ
  3. രാമവില്യം‌ കഴകം‌ - തൃക്കരിപ്പൂർ‌
  4. കുറുവന്തട്ട കഴകം‌ കണ്ണൂർ‌ ജില്ലയിൽ‌
  5. കുദ്രോളി കൂട്ടക്കളം - കുദ്രോളി മംഗലാപുരം
  6. സസിഹിത്‌ലു കഴകം - സസിഹിത്‌ലു , മംഗലാപുരം

മണിയാണി കഴകങ്ങൾ‌[തിരുത്തുക]

  1. കല്യോട്ട്‌ കഴകം‌ - പുല്ലൂർ‌ പെരിയ
  2. കണ്ണമംഗലം‌ കഴകം‌ - തൃക്കരിപ്പൂർ‌
  3. മുളവന്നൂർ‌ കഴകം‌ - ബേളൂർ‌
  4. കപ്പാട് കഴകം‌ - കണ്ണൂർ‌ ജില്ലയിൽ‌

ശാലിയ കഴകങ്ങൾ‌[തിരുത്തുക]

  1. പീലിക്കോട്‌
  2. നിലേശ്വരം‌
  3. കാഞ്ഞങ്ങാട്‌
  4. അതിഞ്ഞാൽ‌
  5. ഉദുമ
  6. കീഴൂർ‌
  7. ബെരിക്കുളം‌
  8. കാടകം‌
  9. കാസർ‌ഗോഡ്‌

തട്ടാൻ‌മാരുടെ കഴകം‌[തിരുത്തുക]

വടയന്തൂർ‌ കഴകം‌ - നീലേശ്വരം‌

നടത്തിപ്പ്‌[തിരുത്തുക]

കഴകത്തിന്റെ നടത്തിപ്പിനു വേണ്ടുന്ന ചെലവ്‌ കരം‌ പിരിച്ചെടുക്കുകയാണു ചെയ്യുന്നത്‌. കഴകത്തിനു കീഴിലുള്ള സമുദായാം‌ഗങ്ങളിൽ‌ നിന്നും‌ ഇങ്ങനെ പിരിച്ചെടുക്കുന്ന കരത്തെ കൂട്ട്വായി എടുക്കുക എന്നാണു പറയുന്നത്‌. ശാലിയ സമുദായക്കാർ‌ ഇതിനെ കാൽ‌വര എന്നാണു പറയുക. ഇതു മാസത്തിലൊരിക്കലോ വർഷത്തിലൊരിക്കലോ ആയി നൽ‌കിയാൽ‌ മതിയാവും‌. കൂടാതെ ഉത്സവകാലത്ത്‌ ഓരോ കുടും‌ബവും‌ പിരിവു നൽ‌കേണ്ടതുണ്ട്‌. പൊതുവേ മരുമക്കത്തായ രീതിയാണ്‌ കഴകങ്ങൾഇൽ‌ അനുവർത്തിക്കുന്നതെങ്കിലും‌ മക്കത്തായ രീതിയും‌ ചിലയിറ്റങ്ങളിൽ‌ കണ്ടു വരുന്നുണ്ട്‌. കഴകങ്ങളിൽ‌‌ പ്രധാനി അന്തിത്തിരിയനാണ്‌. വിവിധ തറവാടുകളിലെ മൂത്ത വ്യക്തിയെയാണ്‌ കാരണവർ‌ എന്നു വിളിക്കുന്നത്‌. ഓരോ പ്രദേശത്തു നിന്നും‌ തെരഞ്ഞെടുക്കുന്നവർ‌ തൊണ്ടച്ചന്മാരുടേയോ (വയനാട്ടുകുലവൻ) പരദേവതയുടേയോ(വിഷ്ണുമൂർത്തി) വെളിച്ചപ്പാടുകൾ‌ ആവുന്നു. ഇങ്ങനെ 'ആചാരം‌കൊണ്ടവർ‌' ഉത്സവവേളകളിൽ‌ തിരുവായുധവുമേന്തി നർ‌ത്തനം‌ ചെയ്യുന്നു. ക്ഷേത്രങ്ങളിലേയും‌ കഴകങ്ങളിലേയും‌ പൂജാവിധികൾ‌ വ്യത്യസ്തങ്ങളാണ്‌. ഉണക്കലരി, അവിൽ‌, മലർ‌, കർപ്പൂരം‌ തണ്ണിലമൃത്‌ തുടങ്ങിയ ദ്രവ്യങ്ങളാണു പൂജയ്‌ക്കുപയോഗിക്കുക. സക്രമം‌, പൂരം‌, വിഷു, പുത്തരി, പെരുങ്കളിയാട്ടം‌ പോലുള്ള വിശേഷദിവസങ്ങളിലും‌ എല്ലാമാസത്തേയും‌ ആദ്യചൊവ്വാഴ്‌ചകളിലും‌ മാത്രമേ കഴകത്തിൽ‌ നട തുറക്കാറുള്ളൂ. പണ്ട്‌ പെണ്ണുകാണൽ‌ ചടങ്ങു നടക്കുന്നതും അങ്കം‌ കുറിക്കലും‌ കുടിപ്പക തീർക്കലും‌ ഊരുവിലക്കലും‌ ഭ്രഷ്‌ടുകല്പിക്കലുമൊക്കെ കഴകപരിസരത്തു വെച്ചായിരുന്നു. തീയ്യർ‌, മണിയാണി, നായർ, ശാലിയർ‌, ആശാരി, തട്ടാൻ‌, മുകയർ‌, കുശവൻ‌, അരയൻ‌, ധീവരൻ‌, ചക്ലിയർ‌, പുലയർ‌, കൊറഗർ‌ തുടങ്ങിയവർക്കൊക്കെ കഴകങ്ങളോ കഴകസമാനമായ പ്രസ്ഥാനങ്ങളോ ഉണ്ട്‌.

ഘടന[തിരുത്തുക]

മണിയാണിമാർ‌ അവരുടെ എല്ലാ പ്രശ്നങ്ങൾ‌ക്കും‌ പരിഹാരം‌ കഴകത്തിനകത്തു വെച്ചുതന്നെ നടത്തിവന്നിരുന്നു.തീയ്യസമുദായത്തിൽ‌ കഴകത്തിൽ‌ നിന്നും‌ തീർ‌പ്പുകല്പിക്കാനാവാത്ത കാര്യങ്ങൾ‌ തൃക്കൂട്ടത്തിലേക്കാണു പിന്നീട്‌ എത്തിച്ചേരുക. കഴകത്തിനു കീഴിലായി ഒളവറ മുണ്ട്യ, കൂലേരി മുണ്ട്യ തുടങ്ങി നിരവധി മുണ്ട്യകളും‌ തറകളും‌ അനേകം‌ ഭഗവതി ക്ഷേത്രം‌ക്ഷേത്രങ്ങളും‌ ഉണ്ട്. ഭഗവതി ക്ഷേത്രം‌ കേന്ദ്രമാക്കിയാണ്‌ തറ എന്ന പ്രാദേശിക ഘടകം‌ രൂപം‌ കൊള്ളുന്നത്‌. നാലു തറകൾ‌ ചേർ‌ന്നാൽ‌ ഒരു നാല്‌പാടും നാലു നാല്‌പാടുകൾ‌ ചേർ‌ന്നാൽ‌ ഒരു തൃക്കൂട്ടവും‌ എന്നാണു കണക്ക്‌. തൃക്കൂട്ടത്തിനും‌ മുകളിലായി ഒരു മഹാക്ഷേത്രവും‌ ഉണ്ടായിരിക്കും‌. കാരണവർ‌ എന്ന സ്ഥാനീയന്റെ അധികാരപരിധി ഒരു തറവാട്ടിനകത്താണ്‌. ഒരു തറവാട്ടിനു കീഴിൽ‌ അനവധി കുടുംബങ്ങൾ‌ ഉണ്ടായിരിക്കും‌. തറവാടുകൾ‌ രൂപീകൃതമാവുന്നത്‌ ഇല്ലത്തെ അടിസ്ഥാനപ്പെടുത്തിയാണ്‌ പ്രധാനമായി എട്ടില്ലങ്ങളാണ്‌ തീയ്യർ‌ക്കുള്ളത്. നാലു കഴകങ്ങളും‌ പതിനാറ് നാല്‌പാടുകളും‌ ഇരുന്നൂറ്റി അമ്പത്താറു തറവാടുകളും‌ ചേർ‌ന്നാൽ‌ ഒരു തൃക്കൂട്ടമായി. ഇതിന്റെ നേതൃത്വം അന്തിത്തിരിയൻ‌മാരും‌ അച്ഛൻ‌മാരും‌ സമ്മേളിക്കുന്ന സ്ഥലത്തിനു കൊട്ടിൽ‌ എന്നണു പറയുക. ശാലിയർ‌ക്ക് തളിപ്പറമ്പിലെ പട്ടുവം‌ മുതൽ‌ പനമ്പൂർ‌ വരെ നിരവധി കഴകങ്ങൾ‌ ഉണ്ട്‌. ഇവരുടെ കഴകത്തെ നഗരമെന്നാണു വിളിക്കുക. കീഴൂരാണ്‌ ഈ കഴകങ്ങളുടെ ആസ്ഥാനം‌. വാണിയർ‌ക്കു പ്രധാനം‌ മുച്ചിലോട്ടു കാവികളാണ്‌. ഇവർ‌ക്ക് പതിനാല്‌ കഴകങ്ങളുണ്ട്. കഴകത്തെ കിരിയമെന്നാണ്‌ ആശാരിമാർ‌ വിളിക്കുന്നത്. ധീവരന്‌ കുറുമ്പാക്ഷേത്രവും‌ മുകയർ‌ക്കും‌ കുശവർ‌ക്കും ഭഗവതീ ക്ഷേത്രങ്ങളും‌ നായർ‌ക്ക്‌ തറവാടുകളും‌ പ്രധാനമാണ്‌. പുലയർ‌ക്ക്‌ നാലു കഴകങ്ങളുണ്ട്‌. രാമന്തളി കഴകമാണിതിൽ‌ പ്രധാനം‌.

സാമുഹിക പ്രസക്തി[തിരുത്തുക]

ദൈനംദിന ജീവിതത്തെ ക്രമപ്പെടുത്തുന്നതിനും‌ നിയന്ത്രിക്കുന്നതിനുമായി രൂപം‌ കൊണ്ട താനങ്ങളും‌ കഴകങ്ങളും‌ മുച്ചിലോട്ടുകളും‌ പിന്നീട്‌ അരാധനാകേന്ദ്രങ്ങളായി മാറുകയായിരുന്നു. സമുദായത്തിനകത്തെ ഭരണക്രമീകരണവും‌ അനുഷ്‌ഠാനങ്ങളും‌ ചടങ്ങുകളുമൊക്കെയായി അം‌ഗങ്ങൾ‌കിടയിൽ‌ ശക്തമായ സ്വാധീനം‌ ചെലുത്തിപ്പോന്നവയായിരുന്നു ഇത്തരം‌ പ്രസ്ഥാനങ്ങൾ‌. എന്നാൽ‌ പിന്നീട്‌ രാഷ്‌ട്രീയ പ്രസ്ഥാനങ്ങളും‌ ജാതി സംഘടനകളും‌ നിയമവ്യവസ്ഥയും‌ പൊലീസും‌ കോടതിയുമൊക്കെ വളർ‌ന്നുവന്നതോടുകൂടി സമുദായാം‌ഗത്തിനു മേലുള്ള കഴകത്തിന്റെ അധികാരനിയന്ത്രണങ്ങൾ‌ കുറഞ്ഞു വന്നു. എന്നാൽ‌ ഇപ്പോഴും‌ നമ്മുടെ സാമൂഹ്യജീവിതത്തിന്റേയും‌ പാരമ്പര്യത്തിന്റേയും‌ അടയാളങ്ങളായി കഴകങ്ങൾ‌ നിലനിൽ‌ക്കുന്നു.

ചിത്രശാല[തിരുത്തുക]

അവലം‌ബം‌[തിരുത്തുക]

കാസർ‌കോട്‌ ചരിത്രവും‌ സമൂഹവും‌ - കാസർ‌ഗോഡ് ജില്ലാ പഞ്ചായത്തു പ്രസിദ്ധീകരണം‌

"https://ml.wikipedia.org/w/index.php?title=കഴകം&oldid=2919925" എന്ന താളിൽനിന്നു ശേഖരിച്ചത്