കലാമണ്ഡലം സിന്ധു

വിക്കിപീഡിയ, ഒരു സ്വതന്ത്ര വിജ്ഞാനകോശം.
കലാമണ്ഡലം സിന്ധു
കലാമണ്ഡലം സിന്ധു കൂടിയാട്ടം വേദിയിൽ
ജനനം
ദേശീയതഇന്ത്യ
തൊഴിൽകൂടിയാട്ടം-നങ്ങ്യാർകൂത്ത് കലാകാരി

കേരളീയയായ ഒരു കൂടിയാട്ടം-നങ്ങ്യാർകൂത്ത് കലാകാരിയാണ് കലാമണ്ഡലം സിന്ധു. ഐ സി സി ആർ എംപാനൽഡ് ആർട്ടിസ്റ്റ് ആയ സിന്ധു കേരള സംഗീത നാടക അക്കാദമി പുരസ്കാരം ഉൾപ്പടെ നിരവധി പുരസ്കാരങ്ങൾ ലഭിച്ചിട്ടുണ്ട്.

ജീവിത രേഖ[തിരുത്തുക]

മുകുന്ദൻ നായരുടെയും പാറുക്കുട്ടി അമ്മയുടെയും മകളായി തൃശ്ശൂർ ജില്ലയിൽ പെരുംതുരുത്തിയിൽ ജനനം.[1] അച്ഛൻ മുകുന്ദൻ നായർ ഒരു നാടകനടനായിരുന്നു.[2] വടക്കാഞ്ചേരിക്കടുത്ത് നെല്ലുവായ അമ്പലത്തിൽ കഥകളിയും കൂത്തും അരങ്ങേറാറുണ്ടായിരുന്നു. അത് കാണാന് അച്ഛൻ എപ്പോഴും പോകും. ഭരതനാട്യവും മോഹിനിയാട്ടവും പഠിക്കാനായിരുന്നു താൽപ്പര്യം എങ്കിലും,[3] അച്ഛന്റെ നിർബന്ധത്തിനു വഴങ്ങി 1992 ൽ പതിനഞ്ചാം വയസ്സിൽ കൂടിയാട്ടം പഠിക്കാനായി കലാമണ്ഡലത്തിൽ എത്തി.[2] കലാമണ്ഡലം രാമചാക്യാർ, പദ്മശ്രീ കലാമണ്ഡലം ശിവൻ നമ്പൂതിരി, കലാമണ്ഡലം ഗിരിജ, കലാമണ്ഡലം ശൈലജ എന്നിവരുടെ കീഴിലായി 1992 മുതൽ 99 വരെ കലാമണ്ഡലത്തിൽ പഠനവും പരിശീലനവും.[4] സ്ഥാപനത്തിൽ നിന്നുള്ള 1997 ലെ കൂടിയാട്ടം ബിരുദധാരികളിൽ സിന്ധു മാത്രമാണ് ഒരു വർഷത്തെ സൂപ്പർ സ്പെഷ്യലൈസേഷനായി തിരഞ്ഞെടുക്കപ്പെട്ടത്.[3] അങ്ങനെയാണ് രാമ ചാക്യാരുടെ കീഴിൽ പ്രത്യേകമായി പരിശീലനം നേടാനുള്ള അവസരം അവർക്ക് ലഭിച്ചത്.[3] പിന്നീട്, മാനവവിഭവശേഷി മന്ത്രാലയത്തിൽ നിന്നുള്ള സ്കോളർഷിപ്പ് നേടി സിന്ധു, തന്റെ ജീവിതത്തിലെ ഏറ്റവും വലിയ സ്വാധീനമായി കണക്കാക്കുന്ന ഉഷ നങ്ങ്യാരുടെ കീഴിൽ നങ്ങ്യാർകൂത്തിൽ രണ്ട് വർഷ പരിശീലനം നേടി.[3]

സിന്ധു, തിരുവനന്തപുരം നിരീക്ഷ എന്ന സ്ത്രീ നാടകവേദിയുടെ പുനർജ്ജനി എന്ന നാടകത്തിലെ പ്രധാന കഥാപാത്രത്തെ അവതരിപ്പിച്ചിട്ടുണ്ട്.[4]

ജോലി[തിരുത്തുക]

ഒരു വർഷം കലാമണ്ഡലത്തിൽ ജോലി ചെയ്ത സിന്ധു അതിനുശേഷം പൈങ്കുളം രാമു ചാക്യാർ സ്മാരക കലാപീഠത്തിൽ ഒരു വർഷവും മാണി മാധവ ചാക്യാർ സ്മാരക ഗുരുകുലത്തിൽ ഒന്നര വർഷവും ജോലിചെയ്തു. 2007 ൽ മാർഗി സതി കലാമണ്ഡലത്തിലേക്ക് പോയ ഒഴിവിലാണ് സിന്ധു മാർഗിയിൽ സ്റ്റാഫായി ജോയിൻ ചെയ്യുന്നത്.[2] വിദ്യാർഥികളെ പഠിപ്പിക്കുന്നതിനൊപ്പം മാർഗിയിൽ നങ്ങ്യാർകൂത്ത് അവതരിപ്പിക്കുകയും ചെയ്തിരുന്നു. 2007 മുതൽ 2017 വരെ മാർഗിയിൽ ജോലിചെയ്തു.[4] മാർഗിയിൽ ജോലി ചെയ്തകാലത്ത് നങ്യാർകൂത്തിന്റെ ഒട്ടനവധി പാഠങ്ങൾ പഠിക്കാൻ അവസരം ലഭിച്ചതായി സിന്ധു പറയുന്നു.

നൃത്ത രംഗത്ത്[തിരുത്തുക]

2010 ൽ സിന്ധു ദേവി മാഹാത്മ്യത്തെ അടിസ്ഥാനമാക്കി ഭദ്രകാളിചരിതം നങ്ങ്യാർകൂത്ത് അവതരിപ്പിച്ചു.[3] കാലൊടിഞ്ഞ് പ്ലാസ്റ്റർ ഇട്ട് കിടക്കുന്ന സമയത്ത് ആറ്റുകാലമ്മയ്ക്ക് നേർന്ന നേർച്ചയായിരുന്നു ഭദ്രകാളിചരിതം നങ്ങ്യാർകൂത്ത്.[2] മാർഗി സതി രചിച്ച ശ്രീകൃഷ്ണചരിതം നങ്ങ്യാർകൂത്ത് മുഴുവൻ ഒരു വേദിയിൽ പ്രതിമാസം (തഞ്ചാവൂർ അമ്മവീട്, തിരുവനന്തപുരം) ഒരു പരമ്പരയായി അവതരിപ്പിക്കാനുള്ള വെല്ലുവിളി ഈ കലാകാരി ഏറ്റെടുത്തിട്ടുണ്ട്.[3][4] 40 എപ്പിസോഡുകൾ ആയാണ് ശ്രീരാമചരിതം നങ്ങ്യാർകൂത്ത്‌ അരങ്ങിൽ നടത്തേണ്ടത്. 2015 ൽ ആരംഭിച്ച ശ്രീരാമചരിതം അവതരണം കാണാൻ രോഗം മൂർച്ഛിച്ച അവസ്ഥയിൽ പോലും സതി കലാമണ്ഡലത്തിൽ നിന്ന് തിരുവനന്തപുരത്ത് എത്താറുണ്ടായിരുന്നു. പക്ഷെ സതിയുടെ വിയോഗത്തോടെ കൂടി അവതരണം നിലച്ചു.[4] കുറച്ചു നാളുകൾക്കു ശേഷം വീണ്ടും ആരംഭിച്ച നൃത്ത പരമ്പര കാവാലത്തിന്റെയും ഓ.എൻ.വിയുടെയും മരണത്തോടെ വീണ്ടും നിലച്ചു.[4] 2019 സെപ്റ്റംബറിൽ ഭദ്രകാളിചരിതം നങ്ങ്യാർക്കൂത്ത് പരമ്പര വീണ്ടും തുടങ്ങുകയുണ്ടായി.[4] സിന്ധു അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലും തുടർച്ചയായി നങ്യാർക്കൂത്ത് അവതരിപ്പിച്ചിട്ടുണ്ട്.[2]

ഫ്രാൻസ്, ജർമ്മനി, ഹോളണ്ട്, റഷ്യ, സൈബീരിയ, ജപ്പാൻ, സിംഗപ്പൂർ എന്നിവിടങ്ങളിൽ പരിപാടികൾ നടത്തിയിട്ടുള്ള സിന്ധു യുനെസ്കോയുടെ ക്ഷണപ്രകാരം റഷ്യയിൽ കൂടിയാട്ടം-നങ്ങ്യാർകൂത്ത് അവതരിപ്പിച്ചിട്ടുണ്ട്.[4]

കുടുംബം[തിരുത്തുക]

ഭർത്താവ് ശശികുമാർ, മകൻ ശ്രീഹരി.[2]

പുരസ്കാരങ്ങളും അംഗീകാരങ്ങളും[തിരുത്തുക]

  • കേരള സംഗീത നാടക അക്കാദമി പുരസ്കാരം[5]
  • കേരള കലാമണ്ഡലം അവാർഡ്[6]
  • നവരസം സംഗീതസഭ അവാർഡ്[6]
  • ഭാഗവതർ കുഞ്ഞുണ്ണിത്തമ്പുരാൻ അവാർഡ്[4]
  • തിരുവനന്തപുരം സ്വരലയ അവാർഡ്[4]
  • തൃശ്ശൂർ ഡോക്ടർ ടി. ഐ രാധാകൃഷ്ണൻ ഫൗണ്ടേഷൻ അവാർഡ്[4]
  • ശ്രീരാമകൃഷ്ണാശ്രമം അവാർഡ്[4]
  • കേന്ദ്ര ഗവൺമെന്റിന്റെ ജൂനിയർ ഫെലോഷിപ്പ്[4]
  • കൂടിയാട്ടത്തിൽ ഐ സി സി ആർ എംപാനൽഡ് ആർട്ടിസ്റ്റ് ആണ് സിന്ധു[7]

അവലംബം[തിരുത്തുക]

  1. "Thiraseela.com". thiraseela.com.
  2. 2.0 2.1 2.2 2.3 2.4 2.5 "Interview - Kalamandalam Sindhu | സിന്ധു ചോദിക്കുന്നു "കൂടിയാട്ടത്തെ ശ്രദ്ധിക്കാത്തതെന്തേ?"". malayalam.webdunia.com.
  3. 3.0 3.1 3.2 3.3 3.4 3.5 Sathyendran, Nita (1 ജൂൺ 2012). "Art of theatre". The Hindu (in Indian English).
  4. 4.00 4.01 4.02 4.03 4.04 4.05 4.06 4.07 4.08 4.09 4.10 4.11 4.12 "മാർഗി സതിയുടെസ്വപ്നത്തിലേക്ക് ചുവടുവച്ച് കലാമണ്ഡലം സിന്ധു; മാർഗി സതി രചിച്ച ശ്രീരാമചരിതം നങ്യാരമ്മ കൂത്ത് സമ്പൂർണ അവതരണം, നാളെ കഥ സീതാ ജനനം". Janachinda Daily. 20 സെപ്റ്റംബർ 2019. Archived from the original on 2021-09-04. Retrieved 2021-09-04.
  5. "കേരള സംഗീത നാടക അക്കാദമി: ഫെലോഷിപ്പ്, അവാർഡ്, ഗുരുപൂജാ പുരസ്കാരങ്ങൾ പ്രഖ്യാപിച്ചു". News18 Malayalam. 17 സെപ്റ്റംബർ 2020.
  6. 6.0 6.1 "Kalamandalam Sindhu". meetkalakar.com.
  7. "Kalamandalam Sindhu | Indian Council for Cultural Relations". www.iccr.gov.in.
"https://ml.wikipedia.org/w/index.php?title=കലാമണ്ഡലം_സിന്ധു&oldid=3830656" എന്ന താളിൽനിന്ന് ശേഖരിച്ചത്