എം.കെ. ബിനോദിനി ദേവി

മഹാരാജ് കുമാരി ബിനോദിനി ദേവി
ജനനം	വംഗോൽസന (1922-02-06)6 ഫെബ്രുവരി 1922 രാജകൊട്ടാരം, ഇംഫാൽ, മണിപ്പൂർ
മരണം	17 ജനുവരി 2011(2011-01-17) (88 വയസ്സ്) യെയ്സ്കുൾ, ഇംഫാൽ, മണിപ്പൂർ
തൊഴിൽ	നോവലിസ്റ്റ്, ചെറുകഥാകൃത്ത്, നാടകകൃത്ത്, ഗാനരചയിതാവ്.
പൗരത്വം	ഇന്ത്യൻ
അവാർഡുകൾ	ജാമിനി സുന്ദർ ഗുഹ ഗോൾഡ് മെഡൽ (1966) പത്മശ്രീ (1976) സാഹിത്യ അക്കാദമി അവാർഡ് (1979)
കുട്ടികൾ	എൽ. ദേവബ്രത റോയ് എൽ. സോമി റോയ്

മഹാരാജ് കുമാരി ബിനോദിനി ദേവി (ജീവിതകാലം: 6 ഫെബ്രുവരി 1922 - 17 ജനുവരി 2011) ഒരു ഇന്ത്യൻ നോവലിസ്റ്റ്, ചെറുകഥാകൃത്ത്, നാടകകൃത്ത്, ഗാനരചയിതാവ് എന്നീ നിലകളിൽ പ്രശസ്തയായ വനിയെന്നതിലുപരി മണിപ്പൂർ രാജകുടുംബത്തിലെ അംഗവുംകൂടിയായിരുന്നു. ബിനോദിനി എന്ന തൂലികാ നാമത്തിലാണ് അവർ പുസ്തകങ്ങൾ പ്രസിദ്ധീകരിച്ചത്. 1976 ൽ എഴുതിയ ബോരോ സാഹേബ് ഓങ്ബി സനാറ്റോംബി എന്ന നോവലിലൂടെയാണ് അവർ കൂടുതൽ അറിയപ്പെടുന്നത്.

ജീവിതരേഖ

മണിപ്പൂർ രാജാവായിരുന്ന സർ മഹാരാജ് ചുരചന്ദ് സിംഗിൻറേയും അദ്ദേഹത്തിൻറെ പത്നി മഹാറാണി ധനമഞ്ചൂരിയുടെയും പുത്രിയായി 1922 ഫെബ്രുവരി 6 ന് രാജകൊട്ടാരത്തിൽ ജനിച്ച ബിനോദിനി ദേവി കൊട്ടാരവൃത്തങ്ങളിൽ വംഗോൽസന അല്ലെങ്കിൽ സന വംഗോൾ എന്ന പേരിൽ അറിയപ്പെട്ടിരുന്നു. മണിപ്പൂരിലെ ആദ്യ വനിതാ ബിരുദധാരിണിയായിരുന്നു അവർ. ഡോ.ലൈഫുങ്ബാം നന്ദലാൽ റോയിയെ വിവാഹം കഴിച്ച അവർക്ക് രണ്ട് ആൺമക്കളുണ്ടായിരുന്നു.

സാഹിത്യജീവിതം

17-ാം വയസ്സിൽ ഇമാറ്റോൺ എന്ന ചെറുകഥ രചിച്ചുകൊണ്ട് അവർ സാഹിത്യവേദിയിൽ അരങ്ങേറ്റം കുറിച്ചു. 1965 ൽ പ്രസിദ്ധീകരിച്ച 16 ചെറുകഥകളുടെ സമാഹാരമായ നുങ്കൈരക്ത ചന്ദ്രമുഖിയെന്ന ആദ്യ പുസ്തകത്തിന് ജാമിനി സുന്ദർ ഗുഹ ഗോൾഡ് മെഡൽ ലഭിച്ചു. അവരുടെ മികച്ച സൃഷ്‌ടിയായി കണക്കാക്കപ്പെടുന്ന ബോറോ സാഹേബ് ഓങ്ബി സനാറ്റോമ്പി എന്ന മികച്ച കൃതിക്ക് 1979 ൽ സാഹിത്യ അക്കാദമി അവാർഡ് ലഭിച്ചിരുന്നു. അമ്മായി സനാറ്റോമ്പിയെയും മണിപ്പൂരിനെയും കുറിച്ചുള്ളതായിരുന്നു ഈ നോവൽ.