അല ആർച്ച ദേശീയോദ്യാനം
| അല ആർച്ച ദേശീയോദ്യാനം | |
|---|---|
ഐ.യു.സി.എൻ. ഗണം II (ദേശീയോദ്യാനം) | |
 Looking up the Ala Archa river valley | |
  | |
| സ്ഥലം | ചുയി മേഖല, കിർഗിസ്ഥാൻ |
| അടുത്തുള്ള നഗരം | ബിഷ്കെക്ക് |
| നിർദ്ദേശാങ്കങ്ങൾ | 42°35′N 74°29′E / 42.583°N 74.483°E |
| വിസ്തീർണ്ണം | 164.8 ച. �കിലോ�ീ. (64 ച മൈ) |
| സ്ഥാപിതം | 1976 |
| alaarchapark | |
കിർഗിസ്ഥാന്റെ തലസ്ഥാന നഗരിയായ ബിഷ്കെക്കിൽ നിന്നും ഏകദേശം 35 കിലോമീറ്റർ തെക്ക് ഭാഗത്തായി, കിർഗിസ്ഥാനിലെ ടിയാൻ ഷാൻ പർവ്വതനിരകളിൽ സ്ഥിതിചെയ്യുന്ന ഒരു ആൽപൈൻ ദേശീയോദ്യാനമാണ് അല-ആർച്ച ദേശീയോദ്യാനം (കിർഗിസ്ഃ Ала-арча кыргыз малекетик яратылыsh паркы, റഷ്യൻഃ государstвеный природныy насиональныy park Алa-аарchаль) .[1] 1976 ൽ സ്ഥാപിതമായ ഈ ദേശീയോദ്യാനത്തിന് നിലവിൽ 16,485 ഹെക്ടർ വിസ്തൃതിയുണ്ട്.[2]
പേര്
[തിരുത്തുക]ഈ ദേശീയോദ്യാനത്തിലൂടെ ഒഴുകുന്ന അല-ആർച്ച നദിയുടെ പേരിൽ നിന്നാണ് ദേശീയോദ്യാനത്തിന് നിലവിലെ പേര് ലഭിച്ചത്. ഈ നദിയ്ക്കും ദേശീയോദ്യാനത്തിനും അതിൻ്റെ പേര് ലഭിച്ചത് ഈ മേഖലയിൽ പലവർണ്ണങ്ങളിൽ സമൃദ്ധിയായി കാണപ്പെടുന്ന ആർച്ച എന്ന പേരുള്ള ജൂനിപ്പർ വിഭാഗത്തിലുള്ള മരത്തിൽ നിന്നാണ്. കിർഗിസ്ഥാനിലെ ജനങ്ങൾ പരമ്പരാഗതമായി പ്രത്യേക ബഹുമാനത്തോടെയാണ് ഈ മരത്തെ കാണുന്നത്. അതിൻ്റെ കത്തുന്ന തടിയിൽ നിന്നുള്ള പുക പ്രദേശവാസികൾ ദുഷ്ടാത്മാക്കളെ തുരത്താൻ ഉപയോഗിക്കുന്നു. ഈ പ്രദേശത്ത് താമസിക്കുന്നവർ ആർച്ച മരം വീടിനടുത്ത് നടുകയില്ല. കാരണം ഇത് ക്രമേണ അടുത്തുള്ള മനുഷ്യരിൽ നിന്ന് ഊർജ്ജം ആഗിരണം ചെയ്യുമെന്നാണ് അവർ വിശ്വസിക്കുന്നത്.
ഭൂമിശാസ്ത്രം
[തിരുത്തുക]165 ചതുരശ്ര കിലോമീറ്റർ വിസ്തൃതിയുള്ള ഈ ദേശീയോദ്യാനത്തിന്റെ ഉയരം അതിന്റെ പ്രവേശന കവാടത്തിൽ ഏകദേശം 1,500 മീറ്റർ മുതൽ ടിയാൻ ഷാനിലെ കിർഗിസ് അല-ടൂ പർവതനിരയിലെ ഏറ്റവും ഉയർന്ന കൊടുമുടിയായ സെമെനോവ്-ടിയാൻ-ഷാൻസ്കി കൊടുമുടിയിൽ പരമാവധി 4,895 മീറ്റർ വരെയുമാണ്. ചെറുതും വലുതുമായി ഏകദേശം 20-ലധികം ഹിമാനികളും 50-ഓളം പർവതശിഖരങ്ങളും ഈ ദേശീയോദ്യാനത്തിനുള്ളിലായുണ്ട്. ദേശീയോദ്യാനത്തിലെ ഹിമാനികളുടെ ആകെ വിസ്തീർണ്ണം 53,6 ചതുരശ്ര കിലോമീറ്റർ (20,7 ചതുരശ്ര മൈൽ) ആണ്.
ഈ ഹിമാനികളിൽനിന്ന് ഉരുകിയെത്തുന്ന വെള്ളത്തിൽ നിന്നാണ് അഡിജീൻ, അക്-സായ് എന്നീ രണ്ട് ചെറു നദികൾ ഉത്ഭവിക്കുന്നത്. വെള്ളച്ചാട്ടങ്ങളും നീരുറവകളും സമൃദ്ധമായ ട്രൌട്ട് മത്സ്യങ്ങളുമുള്ള ഒരു വനപ്രദേശമാണ് അഡിജീൻ മലയിടുക്ക്.
അല-ആർച്ച നദിയുടെ മലയിടുക്കും ചുറ്റുമുള്ള പർവതങ്ങളും ഈ ദേശീയോദ്യാനത്തിൽ ഉൾപ്പെടുന്നു.
മലകൾ
[തിരുത്തുക]4000 മീറ്റർ ഉയരമുള്ള നിരവധി കൊടുമുടികൾ സ്ഥിതിചെയ്യുന്ന ഈ ദേശീയോദ്യാനത്തിലെ ഒരു ജനപ്രിയ വിനോദസഞ്ചാരമാണ് പർവ്വതാരോഹണം.
- സെമെനോവ്-ടിയാൻ-ഷാൻസ്കി കൊടുമുടി (4895 മീറ്റർ)
- കൊറോണ കൊടുമുടി (4860 മീറ്റർ)
- ഫ്രീ കൊറിയ പീക്ക് (4740 മീറ്റർ)
ജൈവമണ്ഡലം
[തിരുത്തുക]അമു ദര്യാ ട്രൌട്ടിനെക്കുറിച്ച് പഠിക്കുന്നതിനായി കാർഗയ്-ബുലക് നദിയിൽ ഒരു ചെറിയ ജലസംഭരണി നിർമ്മിക്കപ്പെട്ടു. ഇവിടെ കാണപ്പെടുന്ന വന്യജീവികളിൽ വളരെ അപൂർവമായ ഹിമപ്പുലിയും (കിർഗിസ്ഃ "ഇൽബിർസ്") കൂടാതെ 2,500 മീറ്റർ ഉയരത്തിലുള്ള ആൽപൈൻ പുൽമേടുകളിലും മഞ്ഞുപാളികളിലുമായി കാട്ടുപോത്തുകൾ, റോ ഡീർ, നിലയണ്ണാൻ എന്നിവ ഉൾപ്പെടുന്നു.
2017 മെയ് മാസത്തിൽ ഈ ദേശീയോദ്യാനത്തിൽ സ്ഥാപിക്കപ്പെട്ട ഒരു ക്യാമറ ആദ്യമായി ഒരു ഹിമപ്പുലിയുടെ ഫോട്ടോ എടുത്തു.
ക്രോക്കസ് അലാറ്റാവികസ് ഉൾപ്പെടെ നിരവധി സസ്യയിനങ്ങളും ദേശീയോദ്യാനത്തിൽ കാണാം.[3]
വിനോദസഞ്ചാരം
[തിരുത്തുക]വാരാന്ത്യത്തിൽ പിക്നിക്കിന് പോകുന്നവർ, പർവ്വതാരോഹകർ, കുതിരസവാരിക്കാർ, സ്കീ ചെയ്യുന്നവർ, ഐസ്, പാറ തുടങ്ങിയ മിശ്രിത വഴികൾ തേടുന്ന പർവതാരോഹകർ എന്നിവരുടെ ഒരു ലക്ഷ്യസ്ഥാനമാണ് ഈ ദേശീയോദ്യാനം. ദേശീയോദ്യാനം വർഷം മുഴുവനും തുറന്നിരിക്കും, എന്നിരുന്നാലും ഇവിടുത്തെ ഏറ്റവും ജനപ്രിയമായ സീസൺ വേനൽക്കാലത്തിന്റെ അവസാനവും ശരത്കാലത്തിന്റെ തുടക്കവുമാണ്. എല്ലാ മെയ് 1 നും, നൂറുകണക്കിന് ആളുകൾ ഈ താഴ്വരയിൽ ക്യാമ്പ് ചെയ്ത് ആൽപിനാഡ ഉത്സവത്തിനായി കൊംസോമോലെറ്റ്സ് പർവതത്തിൽ കയറുന്നു.[ അവലംബം ആവശ്യമാണ് ]
ദേശീയോദ്യാനത്തിലേയ്ക്കുള്ള പ്രവേശനത്തിതിന് നാമമാത്രമായ ഫീസാണ് ഈടാക്കാറുള്ളത്. പ്രവേശന കവാടത്തിനടുത്തായി, പുതുതായി നവീകരിച്ച ഒരു ലോഡ്ജ് സ്ഥിതിചെയ്യുന്നുണ്ട്. 12 കിലോമീറ്റർ വരെ റോഡിനിരുവശവും അങ്ങിങ്ങായി ഇവിടെ കെട്ടിടങ്ങൾ കാണാം. റോഡിന്റെ അവസാനത്തിൽ, ഇടതുവശത്തുള്ള ഒരു പാതയിലാണ് (കിഴക്ക്) അക്-സായ് ഗ്ലേസിയർ സ്ഥിതിചെയ്യുന്നത്. അവിടെ സോവിയറ്റ് കാലത്തുള്ള ഒരു പർവ്വതാരോഹക ബേസ് ക്യാമ്പിന്റെ അവശിഷ്ടങ്ങൾ കാണാം. ഇത് പണ്ടുമുതലേ ഇവിടെ പർവതാരോഹണം നടന്നിട്ടുള്ളതിനെയാണ് സൂചിപ്പിക്കുന്നത്. സോവിയറ്റ് പർവ്വതാരോഹക ബേസ് (റാറ്റ്സെക് ഹട്ട്) അടുത്തിടെ മെച്ചപ്പെടുത്തുകയും കൊടുമുടികയറ്റക്കാരുടെ ബേസ് ക്യാമ്പായി പ്രവർത്തിക്കുകയും ചെയ്യുന്നു.[4] ഈ മേഖലയിലെ ഏറ്റവും പ്രശസ്തമായ കൊടുമുടികൾ കൊറോണ കൊടുമുടി (4860 മീറ്റർ), ഫ്രീ കൊറിയ കൊടുമുടി, (4740 മീറ്റർ) എന്നിവയുൾപ്പെടെ അക്-സായ് ഹിമാനിയിലാണ് സ്ഥിതിചെയ്യുന്നത്. അലാ ആർച്ച താഴ്വരയുടെ പടിഞ്ഞാറ് വശത്ത് അഡിജീൻ താഴ്വരയിലേക്ക് നയിക്കുന്ന ഒരു പാതയുണ്ട്. അവിടെ പർവതാരോഹകരുടെ ഒരു സെമിത്തേരി സ്ഥിതിചെയ്യുന്നു. മൂന്നാമത്തെ പ്രധാന പാത അല-ആർച്ച താഴ്വരയുടെ മധ്യഭാഗത്ത് നിന്ന് 10 കിലോമീറ്റർ അകലെ പഴയതും ഇപ്പോൾ ഉപേക്ഷിക്കപ്പെട്ടതുമായ സ്കീ മേഖലയിലേക്കുള്ളതാണ്. ഈ പാത മറ്റ് നിരവധി കൊടുമുടികളിലേക്കും തുടരുന്നു. ഈ കൊടുമുടികൾക്ക് ഏകദേശം 4000 മീറ്ററോളം ഉയരമുണ്ട്.
2016 ഡിസംബറിൽ, ട്രിപ്പ് അഡ്വൈസർ പ്രസിദ്ധീകരിച്ച എല്ലാ രാജ്യങ്ങളിലെയും ഏറ്റവും ജനപ്രിയമായ വിനോദസഞ്ചാര കേന്ദ്രങ്ങളുടെ ഒരു ഭൂപടം സൂചിപ്പിക്കുന്നത് പ്രകാരം കിർഗിസ്ഥാനിലെ ഏറ്റവും ജനപ്രിയമായ ലക്ഷ്യസ്ഥാനമാണ് അല ആർച്ച ഗോർജ് എന്ന കേന്ദ്രം.
ചിത്രശാല
[തിരുത്തുക]
അല ആർച്ച നദി.
അല ആർച്ച ദേശീയോദ്യാനത്തിലെ പർവ്വത ശിഖിരങ്ങൾ.
അല ആർച്ച ദേശീയോദ്യാനത്തിലെ ഒരു വലിയ പാറക്കല്ല്.
അല ആർച്ച ദേശീയോദ്യാനത്തിലെ കൊടുമുടിയുടെ ദൃശ്യം.
അല ആർച്ച ദേശീയോദ്യാനത്തിലെ താഴ്വര.
അല ആർച്ച ദേശീയോദ്യാനം.
അല ആർച്ച ദേശീയോദ്യാനത്തിലെ കെട്ടിടം.
അവലംബങ്ങൾ
[തിരുത്തുക]- ↑ "Ala-Archa". protected planet.
- ↑ "Specially protected natural territories of the Kyrgyz Republic". Department of Biodiversity Conservation and Specially Protected Natural Areas. Archived from the original on 14 November 2019. Retrieved 11 January 2022.
- ↑ Hayes, Patrick. "KYRGYZSTAN" (PDF). kewguild.org.uk. Archived from the original (PDF) on 19 October 2014. Retrieved 11 October 2014.
- ↑ "Ala Archa - Central Asia Guide". Central Asia Guide.[പ്രവർത്തിക്കാത്ത കണ്ണി]