അമ്പിസ്വാമി

അമ്പി സ്വാമി
ജനനം	എം.എസ്.കൃഷ്ണ അയ്യർ തൃശൂർ
മരണം	തൃശൂർ

തൃശ്ശൂർ സ്വദേശിയായ പാചകകലാ വിദഗ്ദ്ധൻ. കേരളീയ സദ്യയുടെ ബ്രാൻഡ് അംബാസിഡർ എന്ന പേരിലറിയപ്പെടുന്നു.

മുൻകാല ജീവിതം

പാലട അടപ്രഥമൻ, പഴം പ്രഥമൻ എന്നിങ്ങനെയുള്ള പായസങ്ങൾ 500 ലിറ്ററോളം ദിവസവും അദ്ദേഹം തന്റെ തൃശൂരുള്ള ഭക്ഷണശാലയിൽ നിന്ന് വിൽക്കുമായിരുന്നു. പണ്ട് പഞ്ചാരപ്പായസം, പാൽപ്പായസം എന്നീ വിഭവങ്ങൾക്കായിരുന്നു ആവശ്യക്കാരെങ്കിലും പിന്നീട് പാലട പ്രശസ്തമായി വരികയായിരുന്നു എന്ന് അദ്ദേഹം പറഞ്ഞിട്ടുണ്ട്. പശുവളർത്തലും നടത്തിയിരുന്ന ഇദ്ദേഹത്തിന് അറുപതോളം പശുക്കളുണ്ടായിരുന്നു. പാചകത്തിനാവശ്യമായ പാലും മറ്റും കഴിയുന്നത്ര അദ്ദേഹം സ്വന്തമായി ഉത്പാദിപ്പിച്ചിരുന്നു. കാളൻ, അവിയൽ, സാമ്പാർ തുടങ്ങി പണ്ടേയുള്ള വിഭവങ്ങൾ കൂടാതെ മസാലക്കറി, തീയൽ, കൈപ്പക്കറി, പൈനാപ്പിൾ കറി എന്നിങ്ങനെയുള്ള വിഭവങ്ങളൊക്കെ അദ്ദേഹത്തിന്റെ സദ്യയിലുണ്ടാവും. മലയാളികൾ വിദേശത്തേയ്ക്കും അദ്ദേഹത്തെ സദ്യകളൊരുക്കാൻ കൂട്ടിക്കൊണ്ടു പോയിരുന്നു. വീട്ടിൽ കൊണ്ടുപോകാവുന്ന സദ്യ കിറ്റുകളുടെ പ്രചാരത്തിൽ അമ്പിസ്വാമി ഒരു പങ്കു വഹിച്ചിട്ടുണ്ട്. സ്കൂൾ യുവജനോത്സവമടക്കം ആയിരക്കണക്കിന് സദ്യകളൊരുക്കിയിട്ടുണ്ട്. ഒരുനേരം ഇരുപതിനായിരത്തിലധികം ആളുകൾക്ക് യുവജനോത്സവത്തിനിടെ അദ്ദേഹം സദ്യയൊരുക്കിയിട്ടുണ്ട്.

കുടുംബം

അമ്പി സ്വാമിയുടെ അച്ഛൻ മാണിക്യനും ഒരു പാചകവിദഗ്ദ്ധനായിരുന്നു. ഭാര്യ: നാരായണി അമ്മാൾ. മക്കൾ: സംഗമേശ്വരൻ (ചെന്നൈ), ശേഷാദ്രി (സുരേഷ്‌ അമ്പിസ്വാമി), ഹരിഹരൻ, രാജ്‌കുമാർ (പ്രകാശ്‌), അനിൽ, സുനിൽ, വേണുഗോപാൽ, പാർവതി, അമ്പിളി, പരേതയായ ധന്യ എന്നിവരാണ്. മരുമക്കൾ: ഭവാനി (ഇന്ത്യൻ ബാങ്ക്‌ ചെന്നൈ), ലക്ഷ്‌മി, അംബിക, ഉഷ, പ്രിയ, ഗണേഷ്‌ (ഷാർജ), കൃഷ്‌ണമൂർത്തി (ധനലക്ഷ്‌മി ബാങ്ക്‌) എന്നിവർ.

ഇദ്ദേഹം 2012 ജൂൺ 4 ന് എം.ജി. റോഡിലെ കാരിക്കത്ത് ലൈനിലെ വീട്ടിൽ ഹൃദ്രോഗബാധയെത്തുടർന്ന് അന്തരിച്ചു. അദ്ദേഹത്തിന് 77 വയസായിരുന്നു.