അഡമൈറ്റ്
| അഡമൈറ്റ് | |
|---|---|
 ലിമോണൈറ്റിലുള്ള മഞ്ഞയും പച്ചയും അഡമൈറ്റ് | |
| General | |
| Category | Arsenate mineral |
| Formula (repeating unit) | Zn2AsO4OH |
അല്പസിലിക സ്വഭാവമുള്ള ജലയോജിത സിങ്ക് ആർസെനൈറ്റാണ് അഡമൈറ്റ്. Zn2(OH)AsO4. നീണ്ട് ഓർതോറോംബിക് പരലായാണ് സാധാരണ കണ്ടുവരിക. എന്നാൽ പരലുകളായിത്തന്നെ കാണണമെന്നില്ല. കാഠിന്യം 3.5; ആ.ഘ. 4.34-4.35. സുതാര്യമോ അർധതാര്യമോ ആയ വസ്തുവാണിത്. സ്ഥായിയായ നിറമില്ല. ഇളംമഞ്ഞ, പച്ച, റോസ്, തവിട്ട് എന്നീ നിറങ്ങളിൽ കാണുന്നു. അൾട്രാവയലറ്റ് രശ്മികൾ തട്ടി പ്രതിദീപ്തമാകുമ്പോൾ നാരങ്ങയുടെ നിറമാകും. അപൂർവമായി നിറമില്ലാതെയോ, വെളുപ്പായോ കാണാറുണ്ട്.
ഇവ സിരാരൂപത്തിലുള്ള നാക-അയിരുകളുടെ ഇടയിലായി കാണപ്പെടുന്നു. നാകവും ആർസെനിക്കും കലർന്നുളള അയിരുനിക്ഷേപങ്ങൾക്ക് ഓക്സികരണം സംഭവിച്ചാൽ ആ ഭാഗത്ത് അഡമൈററ് അവസ്ഥിതമാകാം. പൊതുവേ ഒരു ഉപധാതുവായാണ് കാണപ്പെടുന്നത്. ഫ്രാൻസ്, ഗ്രീസ്, മെക്സിക്കോ, യു.എസ്. എന്നിവിടങ്ങളിലാണ് മുഖ്യമായും ഉള്ളത്. ഫ്രഞ്ചുശാസ്ത്രജ്ഞനായ ആഡംഗിൽബർട്ട് ജോസഫിന്റെ പേരിൽനിന്നുമാണ് അഡമൈറ്റ് എന്ന പേരുകിട്ടിയത്.
അവലംബം[തിരുത്തുക]
 | കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ അഡമൈറ്റ് എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം. |