സ്റ്റാര്‍ വാര്‍സ്

വിക്കിപീഡിയ, ഒരു സ്വതന്ത്ര വിജ്ഞാനകോശം.

ജോര്‍ജ്ജ് ലൂക്കാസ് സൃഷ്ടിച്ച ഒരു ബഹിരാകാശ ഓപ്പറ ഫ്രാഞ്ചൈസിയാണ് സ്റ്റാര്‍ വാര്‍സ്. ഇതിലെ ആദ്യ ചിത്രം സ്റ്റാര്‍ വാര്‍സ് എന്ന പേരിലാണ് പുറത്തിറങ്ങിയത്. പിന്നീട് പരമ്പരയിലെ മറ്റ് ചിത്രങ്ങളില്‍ നിന്നും വേര്‍തിരിച്ചറിയുന്നതിനായി പേരിനോട് എപ്പിസോഡ് IV: എ ന്യൂ ഹോപ് എന്ന് പുനര്‍നാമകരണം ചെയ്യപ്പെട്ടു. 1977 മെയ് 25-ന് 20ത് സെഞ്ച്വറി ഫോക്സ് ആണ് ആദ്യ ചിത്രം പുറത്തിറക്കിയത്. മൂന്ന് വര്‍ഷങ്ങളുടെ ഇടവേളയില്‍ രണ്ട് ചിത്രങ്ങള്‍ കൂടി പുറത്തിറങ്ങിയതോടെ ഇത് ഒരു ജനകീയ പ്രതിഭാസമായി മാറി. ഈ മൂന്ന് സിനിമകള്‍ക്ക് ശേഷം 16 വര്‍ഷം കഴിഞ്ഞ് പരമ്പരയിലെ അടുത്ത ചിത്രവും 2005-ല്‍ അവസാന ചിത്രവും പുറത്തിറങ്ങി.

2008 വരെയുള്ള കണക്കുകളനുസരിച്ച് 6 സ്റ്റാര്‍ വാര്‍സ് ചിത്രങ്ങളും ചേര്‍ന്ന് ബോക്സ് ഓഫീസില്‍ 430 കോടി ഡോളറാണ് വരവ് നേടിയിരിക്കുന്നത്. ജെയിംസ് ബോണ്ട്, ഹാരി പോട്ടര്‍ എന്നിവക്ക് പിന്നിലായി ഏറ്റവുമധികം പണം കൊയ്ത മൂന്നാമത്തെ ചലച്ചിത്ര പരമ്പരയാണ് സ്റ്റാര്‍ വാര്‍സ്.