സൊറോസ്ട്രിയന് മതം
വിക്കിപീഡിയ, ഒരു സ്വതന്ത്ര വിജ്ഞാനകോശം.
സൊറോസ്റ്റര് അഥവാ സറാത്തുസ്ത്ര[1] എന്ന ഇറാനിയന് പ്രവാചകന്റെ പ്രബോധനങ്ങളെ അടിസ്ഥാനമാക്കിയുള്ള ഒരു മതമാണ് സൊറോസ്ട്രിയന് മതം. അക്കാമെനിഡ് കാലഘട്ടത്തില് വിശാല ഇറാനിലെ ഏറ്റവും പ്രധാനപ്പെട്ട മതമായിരുന്നു ഇത്. ഇസ്ലാംഭരണത്തിനു മുൻപുള്ള പേർഷ്യയിലെ അവസാനസാമ്രാജ്യമായിരുന്ന സസാനിയൻ സാമ്രാജ്യത്തിന്റെ കാലത്ത് സൊറോസ്ട്രിയൻ മതം സാമ്രാജ്യത്തിലെ ഔദ്യോഗികമതമായിരുന്നു. കൂടാതെ ഈ സമയത്ത് മതം സംഘടനാരൂപം കൈവരിക്കുകയും ചെയ്തു[2].
അഹുറ മസ്ദ എന്ന വിവേകത്തിന്റെ ദൈവത്തില് നിന്നും സറാത്തുസ്ട്രക്ക് ലഭിച്ച വെളിപാടുകളാണ് ഈ മതത്തിന്റെ അടിസ്ഥാനമായി കണക്കാക്കുന്നത്. അഹൂറ മസ്ദയുടെ വിശ്വാസികള് എന്ന അര്ത്ഥത്തില് ഈ മതത്തെ മസ്ദ മതം അഥവാ മസ്ദയിസം എന്നും അറിയപ്പെടാറുണ്ട്. ഇന്ന് ഇന്ത്യ, ഇറാന്, പാകിസ്താന് എന്നിവിടങ്ങളിലായി രണ്ടരലക്ഷത്തോളം വിശ്വാസികളാണ് ഈ മതത്തിനുള്ളത്.
അഹൂറ മസ്ദയും മറ്റു ചില ദൈവങ്ങളുമാണ് ഈ മതത്തില് നന്മയുടെ പ്രതീകം. അംഗ്ര മൈന്യുവും കൂട്ടാളികളും ആണ് തിന്മയുടെ പ്രതീകമായി കണക്കാക്കുന്നത്. അംഗ്ര മൈന്യുവിനെ പരാജയപ്പെടുത്തുന്നതിനുള്ള ഒരു യുദ്ധക്കളമായാണ് അഹൂറ മസ്ദ ലോകം നിര്മ്മിച്ചിരിക്കുന്നതെന്നാണ് ഇവരുടെ വിശ്വാസം. തിന്മയോട് പോരാടുന്നതിന് നന്മക്കൊപ്പം അണിനിരക്കാന് മനുഷ്യരോട് ഈ മതം ആഹ്വാനം ചെയ്യുന്നു. ഈ പോരാട്ടത്തിലൂടെ ലോകത്തെ നിര്മ്മലമായ അവസ്ഥയിലേക്ക് കൊണ്ടെത്തിക്കാന് സാധിക്കുമെന്നും ഇവര് വിശ്വസിക്കുന്നു[1].
ഉള്ളടക്കം |
[തിരുത്തുക] അവെസ്ത
സറാത്തുസ്ട്രയുടെ ആശയങ്ങള് അടങ്ങിയിട്ടുള്ള ഗ്രന്ഥമാണ് അവെസ്ത ഇത് ഒരു കൂട്ടം പുരാതനമായ ലിഖിതരേഖകളുടെ ശേഖരത്തിന്റെ പൊതുനാമമാണ്. 300-ആമാണ്ടിനും 600-ആമാണ്ടിനുമിടയില് ഇറാനിലെ സസാനിയന് രാജാക്കന്മാരുടെ കാലത്താണ് ഇതിന്റെ ശേഖരണം നടന്നത്[1]. ഈ മതവിശ്വാസികളുടെ പുണ്യഗ്രന്ഥമാണിത്. അവെസ്തയിലെ ഭാഷക്കും ഇതില് വിവരിച്ചിരിക്കുന്ന ആചാരങ്ങള്ക്കും വേദങ്ങളുമായി സാമ്യമുണ്ട്[3]. ചരിത്രപരമായും പ്രാധാന്യമുള്ള ഒരു ഗ്രന്ഥമാണിത്.
[തിരുത്തുക] സറാത്തുസ്ത്ര
അവെസ്തയുടെ ഏറ്റവും പുരാതനമായ ഭാഗമായ ഗാഥാകളില് (Gathas) പരാമര്ശിക്കപ്പെടുന്ന ഒരു പുരോഹിതനാണ് സറാത്തുസ്ട്ര അഥവാ സൊറോസ്റ്റര്. സറാത്തുസ്ത്രയുടെ ജീവിതകാലത്തെക്കുറിച്ചും ജന്മദേശത്തെക്കുറിച്ചും വാസ്തവത്തില് അദ്ദേഹം ജീവിച്ചിരുന്നോ എന്നു പോലും തര്ക്കങ്ങളുണ്ട്. ബി.സി.ഇ. രണ്ടാം സഹസ്രാബ്ദമാണ് അദ്ദേഹത്തിന്റെ ജീവിതകാലം എന്നാണ് ഒരു മതം. എന്നാല് ഏതാണ്ട് ബി.സി.ഇ. 600-നടുത്താണെന്നാണ് എന്നാണ് മറ്റൊരു വാദം.ഗാഥാകളിലെ ഭാഷയും, ബി.സി.ഇ. രണ്ടാം സഹസ്രാബ്ദത്തിന്റെ അവസാനകാലത്ത് രചിക്കപ്പെട്ടിട്ടുള്ള ഋഗ്വേദത്തിലെ ഭാഷയും തമ്മിലുള്ള സാരമായ സാദൃശ്യം, ആദ്യത്തെ വാദത്തിന് ആക്കം കൂട്ടുന്ന ഒന്നാണ്.
പരമ്പരാഗതമായി സറാത്തുസ്ട്ര, ബാക്ട്രിയയിലാണ് ജീവിച്ചിരുന്നത് എന്നാണ് വിശ്വസിക്കപ്പെടുന്നത്. അഫ്ഘാനിസ്താന്റെ വടക്കന് പ്രദേശങ്ങളുടെ പുരാതനനാമമാണ് ബാക്ട്രിയ. കിഴക്കന് ഇറാനിലും ഇന്നത്തെ അഫ്ഘാനിസ്താനിലുമുള്ള നിരവധി പ്രദേശങ്ങള് അവെസ്തയില് പരാമര്ശിക്കപ്പെടുന്നെങ്കിലും അവെസ്തയുടെ പ്രസ്തുതഭാഗങ്ങളെല്ലാം പില്ക്കാലത്ത് രചിക്കപ്പെട്ടതിനാല് സറാത്തുസ്ത്ര ഈ പ്രദേശത്തല്ല ജീവിച്ചിരുന്നതെന്ന് അനുമാനിക്കപ്പെടുന്നു. വടക്കുപടിഞ്ഞാറന് ഇറാനിലുള്ള അസര്ബയ്ജാനുമായും സറാത്തുസ്ട്രയുടെ പേര് ബന്ധപ്പെടുത്തിക്കാണുന്നുണ്ട്. ഇറാന്റെ കിഴക്കോ വടക്കുകിഴക്കോ ഉള്ള ഏതോ ഒരു പ്രദേശത്ത്, ബാഹ്യലോകവുമായി വലിയ ബന്ധമൊന്നുമില്ലാത്ത, മൃഗപരിപാലനം തൊഴിലാക്കിയവരുടെ കൂട്ടത്തിലാണ് ഇദ്ദേഹം ജീവിച്ചിരുന്നതെന്ന് അനുമാനിക്കപ്പെടുന്നു[1].
[തിരുത്തുക] ഇന്തോ ആര്യന്മാരുടെ മതവിശ്വാസങ്ങളുമായുള്ള ബന്ധം
സറാത്തുസ്ട്രയുടെ മതം ഏതാണ്ട് ഏകദൈവത്തിലടിസ്ഥിതമായിരുന്നെങ്കിലും, മറ്റു മൂര്ത്തികളിലും ഇവര് വിശ്വസിച്ചിരുന്നു. സൊറോസ്ട്രിയന് വിശ്വാസികളുടെ മിക്ക മൂര്ത്തികളേയും ഇന്തോ ആര്യന്മാരുടെ മതത്തിലും (ഹിന്ദുമതം) കാണാന് സാധിക്കും.
- രണ്ടു മതങ്ങളിലും അഗ്നിയും ജലവും നിത്യപൂജകളിലും പ്രാര്ഥനകളിലും പ്രധാനപ്പെട്ടതാണ്. വലിയ പൂജകളിലെ സോമത്തിന്റെ സാന്നിധ്യവും എടുത്തുപറയത്തക്കതാണ്.
- സൊറോസ്ട്രിയന് മതവും ഇന്തോ ആര്യന്മാരുടെ മതവും തമ്മിലുള്ള പ്രധാനവ്യത്യാസം ഇതാണ്: സൊറോസ്ട്രിയന് വിശ്വാസങ്ങളിലെ തിന്മയുടെ അധിപനമായ അംഗ്ര മൈന്യുവിന്റെ കൂട്ടാളികളായ മൂര്ത്തികളെ ദേവ എന്നാണ് അറിയപ്പെടുന്നത്. ഇവരെ സംബധിച്ചിടത്തോളം ഇന്ദ്രന്, അത്തരത്തില് തിന്മയുടെ ഒരു ദേവനാണ്. ആര്യന്മാരുടെ കാര്യത്തില് ഇന്ദ്രനടക്കമുള്ള ദേവന്മാര് ആരാധനാമൂര്ത്തികളാണ്.
ഇതില് നിന്നും സറാത്തുസ്ട്രയും അദ്ദേഹത്തിന്റെ വിശ്വാസികളും പുരാതന ഇന്തോ ഇറാനിയന് ജനങ്ങളുടെ മതവിശ്വാസത്തെ എതിര്ത്തിരുന്നതായി കണക്കാക്കാം. അവെസ്തയുടെ പില്ക്കാലഭാഗങ്ങളില് ദേവന്മാരേയും അവരുടെ പ്രവൃത്തികളേയ്യും തികച്ചും അധമമായി ചിത്രീകരിക്കുന്നുണ്ട്[1].
[തിരുത്തുക] ഇന്ത്യയില്
ഇറാനില് നിന്നും ഇന്ത്യയില് കുടിയേറിയ സൊറോസ്ട്രിയന് വിശ്വാസികള് ഇന്നത്തെ ഗുജറാത്ത് -മഹാരാഷ്ട്ര ഭാഗങ്ങളിലെ കടലോരനഗരങ്ങളില് എത്തിച്ചേര്ന്നു. ഇന്ത്യയില് ഇവര് പാര്സികള് എന്നറിയപ്പെടുന്നു.[3].
[തിരുത്തുക] അവലംബം
- ↑ 1.0 1.1 1.2 1.3 1.4 Vogelsang, Willem (2002). "4 - Advent of the Indo Iranian Speaking Peoples". The Afghans. LONDON: Willey-Blackwell, John Willey & SOns, Ltd, UK.. pp. 62-65. ISBN 978-1-4051-8243-0.
- ↑ Vogelsang, Willem (2002). "10-THe Reassertion of the Iranian West". The Afghans. LONDON: Willey-Blackwell, John Willey & SOns, Ltd, UK.. pp. 159. ISBN 978-1-4051-8243-0.
- ↑ 3.0 3.1 "CHAPTER 7 - NEW QUESTIONS AND IDEAS". Social Science - Class VI - Our Pasts-I. New Delhi: NCERT. 2007. pp. 73. ISBN 8174504931. http://www.ncert.nic.in/textbooks/testing/Index.htm.
 |
ഈ ലേഖനം അപൂര്ണ്ണമാണ്. ഇതു പൂര്ത്തിയാക്കുവാന് സഹകരിക്കുക. |
