സന്ധിവാതം

വിക്കിപീഡിയ, ഒരു സ്വതന്ത്ര വിജ്ഞാനകോശം.
സന്ധിവാതം
തരം തിരിക്കലും പുറമെയുള്ള ഉപാധികളും
Arthrite rhumatoide.jpg
കൈകളിൽ സന്ധിവാതം ബാധിക്കുമ്പോളുള്ള അവസ്ഥ
ICD-10 M00.-M25.
ICD-9 710-719
അസുഖങ്ങളുടെ പട്ടിക 15237
മരുന്നുകൾ 001243
ഇ-മരുന്നുകൾ topic list
MeSH D001168


മനുഷ്യശരീരത്തിലെ ഒന്നോ അതിലധികമോ സന്ധികളിൽ ഉണ്ടാവുന്ന കോശജ്വലനമാണ് (വീക്കം) സന്ധിവാതം (Arthritis)[1]. ഇതു മൂലം സന്ധികളിൽ വേദനയും നീരുമുണ്ടാകുകയും ഇതേ അവസ്ഥ ദീർഘകാലം തുടർന്നാൽ സന്ധികൾ ചലിപ്പിക്കാനാവാതെ ഉറച്ചുപോവുകയും ചെയ്യുന്നു.

നൂറില്പരം വ്യത്യസ്ഥതരത്തിലുള്ള സന്ധിവാതങ്ങളുണ്ട്. [2][3] ഏറ്റവും സാധാരണ ഇനമായ ഓസ്റ്റിയോ ആർത്രൈറ്റിസ് വാർദ്ധക്യമോ, സന്ധിയിലെ അണുബാധയോ, പരിക്കോ മൂലമുണ്ടാകുന്ന ഒരുതരം സന്ധീക്ഷയമാണ് (degenerative joint disease). റൂമറ്റോയ്ഡ് ആർത്രൈറ്റിസ്, സോറിയാറ്റിക് ആർത്രൈറ്റിസ്, സെപ്റ്റിക് ആർത്രൈറ്റിസ് എന്നിവ മറ്റുചില പ്രധാനപ്പെട്ട ഇനം സന്ധിവാതങ്ങളാണ്.

സന്ധിവാതരോഗികളുടെ പ്രധാന പ്രശ്നം സന്ധിവേദനയാണ്. വേദന മിക്കപ്പോഴും ഒരു സന്ധിയിൽ സ്ഥിരമായുണ്ടായിരിക്കും. കോശജ്വലനവും, അസുഖവും പ്രായാധിക്യവും കാരണം സന്ധിക്കുണ്ടാകുന്ന കേടുപാടുകളും മറ്റുമാണ് വേദനയ്ക്ക് കാരണം.

വർഗ്ഗീകരണം[തിരുത്തുക]

സന്ധിയിലെ വേദന പ്രധാന (പ്രാധമിക) ലക്ഷണമായ പല അസുഖങ്ങളുണ്ട്. സന്ധിവാതം ഉണ്ട് എന്നു പറയുന്നയാൾക്ക് താഴെപ്പറയുന്ന അസുഖങ്ങളിലൊന്നാവും സാധാരണ ഉണ്ടാവുക.

സന്ധിവേദന എന്ന ലക്ഷണം മറ്റു പല അസുഖങ്ങളിലും കാണപ്പെടുന്നുണ്ട്. താഴെപ്പറയുന്ന അസുഖങ്ങളിൽ സന്ധിവേദന മറ്റു ലക്ഷണങ്ങളേക്കാൾ പ്രാധാന്യം കുറവുള്ളതായാണ് കാണപ്പെടുക (ദ്വീതീയ ലക്ഷണം):

പരിശോധനയിൽ നിന്ന് ഏതെങ്കിലും വിഭാഗത്തിലുൾപ്പെടുന്നതായി കണ്ടുപിടിക്കാനാവാത്ത തരം സന്ധിവാതങ്ങളെ അൺഡിഫറൻഷിയേറ്റഡ് എന്ന വിഭാഗത്തിൽ പെടുത്തും. ഭാവിയിൽ കൂടുതൽ പരിശോധനകളിലൂടെയോ രോഗലക്ഷണങ്ങളുടെ മാറ്റത്തിൽ നിന്നോ ഏതെങ്കിലും വിഭാഗത്തിലേയ്ക്ക് ഇവയെ മാറ്റാൻ സാധിക്കും. [4]

പ്രധാന ലക്ഷണങ്ങൾ[തിരുത്തുക]

സന്ധിയിലല്ലാതെ മറ്റിടങ്ങളിൽ കാണപ്പെടുന്ന രോഗലക്ഷണങ്ങൾ[5]
തൊലിപ്പുറമേ കാണുന്ന നോഡ്യൂൾ (ചെറിയ മുഴ)
തൊലിയിലെ രക്തക്കുഴലുകളെ ബാധിക്കുന്ന വാസ്കുലൈറ്റിസ് മൂലമുണ്ടാകുന്ന മാറ്റങ്ങൾ
ലിംഫ് ഗ്രന്ധികളിലെ വീക്കം
നീര്
കണ്ണിലെ കോശജ്വലനം
യൂറിത്ര (മൂത്രനാളി)യിലെ കോശജ്വലനം
ടീനോസൈനോവൈറ്റിസ് (പേശികളുടെ ടെൻഡൺ എന്ന ഭാഗത്തെ നീർക്കെട്ട്)
ബർസൈറ്റിസ് (ബർസയിലെ നീർവീഴ്ച്ച)
വയറിളക്കം
വായിലും ഗുഹ്യഭാഗത്തും കാണപ്പെടുന്ന വൃണങ്ങൾ

എന്തു കാരണം മൂലം സന്ധിവാതം ഉണ്ടായാലും താഴെപ്പറയുന്ന ലക്ഷണങ്ങൾ സാധാരണഗതിയിൽ ഉണ്ടാവും.

  • സന്ധികളിൽ ഉണ്ടാകുന്ന വേദന, നീർവീക്കം
  • സന്ധികൾ സ്വയമേ ചലിപ്പിക്കുവാൻ സാധിക്കാതെ വരുന്ന അവസ്ഥ
  • സന്ധികൾക്ക് ചുറ്റുപാടും അസാധാരണമായ ചൂട്
  • സന്ധികൾക്ക് ചുറ്റുമുള്ള ചർമ്മത്തിന്റെ നിറം മാറ്റം

ലൂപസ് ആർത്രറ്റിസ്, റൂമാറ്റോയ്ഡ് ആർത്രൈറ്റിസ് എന്നിവ പലതരം ലക്ഷണങ്ങളിലൂടെ ശരീരത്തിലെ മറ്റവയവങ്ങളെയും ബാധിക്കാം. [6]

  • കൈ ഉപയോഗിക്കാനോ നടക്കാനോ ഉള്ള കഴിവില്ലായ്മ.
  • തളർച്ചയും അസുഖമുള്ളതായുള്ള തോന്നലും.
  • ചൂട്
  • ശരീരഭാരം കുറയുക
  • ഉറക്കം കുറയുക
  • പേശീവേദന
  • സന്ധിയിൽ സ്പർശിക്കുമ്പോൾ വേദനയുണ്ടാകുക.
  • സന്ധി ചലിപ്പിക്കാനുള്ള ബുദ്ധിമുട്ട്

മൂർച്ഛിച്ച സന്ധിവാതത്തിൽ ദ്വിതീയമായ പല മാറ്റങ്ങളുമുണ്ടാകും. ഉദാഹരണത്തിന് സന്ധിവാതം മൂലം സാധാരണഗതിയിലുള്ള ശരീരചലനമില്ലാത്തതുമൂലം

  • പേശികളുടെ ബലം ക്ഷയിക്കുക
  • ശരീരം സാധാരണ സാധിക്കുന്ന രീതിയിൽ ചലിപ്പിക്കാൻ സാധിക്കാതെ വരിക
  • ആയാസമുള്ള ജോലിയിലേർപ്പെടുമ്പോൾ സാധാരണയിലും വേഗം തളരുക

എന്നിങ്ങനെയുള്ള മാറ്റങ്ങളുണ്ടാകാം. ഇതുമൂലം ജീവിതത്തിലെയും സമൂഹത്തിലെയും സ്ഥാനങ്ങൾ നഷ്ടപ്പെടുക പോലുള്ള പ്രശ്നങ്ങളുണ്ടാവാം.

വൈകല്യം[തിരുത്തുക]

അമേരിക്കൻ ഐക്യനാടുകളിൽ ശാരീരിക വൈകല്യമുണ്ടാകുന്നതിന്റെ ഏറ്റവും സാധാരണ കാരണം സന്ധിവാതമാണത്രേ. [7] ദൈനം ദിന ജോലികൾ ചെയ്യാൻ സാധിക്കാതെ വരുന്ന രണ്ടു കോടി ആൾക്കാരുണ്ടത്രേ. ജോലിയിൽ നിന്ന് വിട്ടുനിൽക്കേണ്ടി വരുക, ഇടയ്ക്കിടെ ഡോക്ടറെ കാണേണ്ടി വരുക എന്നിങ്ങനെ പല പ്രശ്നങ്ങളും സന്ധിവാതരോഗികൾ നേരിടേണ്ടിവരുന്നുണ്ട്. പലർക്കും ഈ അസുഖം മൂലം വീട്ടിൽ തന്നെ കഴിയേണ്ടി വരുന്നുണ്ട്. [8]

ശാരീരികാദ്ധ്വാനം കുറയുന്നതു മൂലം പൊണ്ണത്തടി, കൊളസ്ട്രോൾ വർദ്ധിക്കുന്നതു മൂലം ഹൃദയാഘാതം വരാനുള്ള സാദ്ധ്യത എന്നിവയും വർദ്ധിക്കും. ഡിപ്രഷൻ പോലെയുള്ള മാനസിക പ്രശ്നങ്ങളും ഈ അസുഖമുള്ളവർക്ക് കൂടുതലായി കാണപ്പെടുന്നുണ്ട്.

രോഗനിർണയം[തിരുത്തുക]

ക്ലിനിക്കൽ പരിശോധനയിലൂടെയാണ് രോഗനിർണയം നടത്തുന്നത്. എക്സ്-റേ, സി.ടി. സ്കാൻ, എം.ആർ.ഐ എന്നിങ്ങനെയുള്ള പരിശോധനകളും രക്തപരിശോധനയും ചിലപ്പോൾ ആവശ്യമായി വരും. വേദനയുടെ വിശദാംശങ്ങൾ പലതരം സന്ധിവാതങ്ങളിൽ വ്യത്യസ്ഥമായിരിക്കും. ഉറക്കമുണരുന്ന സമയത്താണ് റൂമറ്റോയ്ഡ് ആർത്രറ്റിസിന്റെ വേദന കൂടുതലായി കാണുന്നത് - ഇതോടൊപ്പം സന്ധി ചലിപ്പിക്കാനുള്ള ബുദ്ധിമുട്ടുമുണ്ടാവും. അസുഖത്തിന്റെ ആദ്യ ഘട്ടങ്ങളിൽ പുലർച്ചെ കുളികഴിഞ്ഞാൽ രോഗികൾക്ക് വേദനയനുഭവപ്പെടാറില്ല. ഓസ്റ്റിയോ ആർത്രൈറ്റിസ് എന്ന അസുഖത്തിൽ വ്യായാമത്തിനു ശേഷം വേദന കൂടുകയാണ് ചെയ്യുക. പ്രായമായവർ ചലനങ്ങളിൽ മിതത്വം കാണിച്ച് വേദന കുറയ്ക്കാൻ ശ്രമിക്കുമ്പോൾ കുട്ടികൾ വേദനയുള്ള കൈയ്യോ കാലോ ഉപയോയിക്കാതിരിക്കുകയാണ് ചെയ്യുക.

രോഗത്തിന്റെ ചരിത്രം രോഗനിർണയത്തിൽ സഹായകമാവും. എപ്പോഴാണ് തുറങ്ങിയത്, അസുഖം എത്ര പെട്ടെന്നാണ് മൂർച്ഛിച്ചത്, ഏതൊക്കെ സന്ധികളാണ് വേദനയുള്ളവ, ശരീരത്തിന്റെ രണ്ടുവശത്തും വേദനയുണ്ടോ, പുലർച്ചെ സന്ധികളനക്കാൻ ബുദ്ധിമുട്ടുണ്ടോ, തൊടുമ്പോൾ വേദനയുണ്ടോ, എന്തൊക്കെ കാരണങ്ങളാലാണ് വേദന കുറയുന്നതും കൂടുന്നതും, ശാരീരികമായുള്ള മറ്റു രോഗലക്ഷണങ്ങൾ എന്തൊക്കെ, എന്നിങ്ങനെയുള്ള വിവരങ്ങൾക്ക് പ്രാധാന്യമുണ്ട്.

ഓസ്റ്റിയോആർത്രറ്റിസ്[തിരുത്തുക]

ഓസ്റ്റിയോ ആർത്രൈറ്റിസ് ആണ് ഏറ്റവും സാധാരണയായി കാണപ്പെടുന്ന ഇനം. [9] ശരീരത്തിലെ ചെറുതും വലുതുമായ സന്ധികളെ ഈ അസുഖം ബാധിക്കാം. കൈപ്പത്തി, കാൽപ്പാദം, നടുവ്, ഇടുപ്പ്, കാൽമുട്ട് എന്നീ ഭാഗങ്ങളൊക്കെ ബാധിതമായേക്കാം. ശരീര ചലനങ്ങളിൽ നിന്ന് സന്ധിക്കുണ്ടാകുന്ന ഉരവും തേയ്മാനവും കാരണമാണ് പ്രധാനമായി ഈ അസുഖമുണ്ടാകുന്നത്. പരിക്കുകാരണവും ഈ അസുഖമുണ്ടാകാം. തരുണാസ്ഥി നഷ്ടത്തിൽ നിന്നാണ് ഈ അസുഖത്തിന്റെ തുടക്കം. അന്തിമമായി സന്ധിക്കിരുവശവുമുള്ള അസ്ഥികൾ പരസ്പരം ഉരസാൻ തുടങ്ങും. നടക്കുമ്പോഴുള്ള ചെറിയ വേദനയാണ് ആദ്യ ലക്ഷണം. പിന്നെപ്പിന്നെ വേദന ദിവസം മുഴുവൻ (രാത്രിയിൽ ഉറക്കത്തിലും) ഉണ്ടാവുകയും ചെയ്യും. ദൈനം ദിന പ്രവൃത്തികളിൽ ഏർപ്പെടുന്നതിൽ നിന്ന് വേദന അന്തിമമായി രോഗിയെ തടയും. ഭാരം താങ്ങുന്ന സന്ധികളിലാണ് സാധാരണ ഈ അസുഖം ബാധിക്കുന്നത്. പ്രായമായവർക്ക് അസുഖം വരാനുള്ള സാദ്ധ്യത കൂടുതലാണ്.

ഈ അസുഖം (റൂമറ്റോയ്ഡ് ആർത്രൈറ്റിസിനെപ്പോലെ) സുഖപ്പെടുത്താനാവില്ല. രോഗം മൂർച്ഛിക്കുന്നത് തടയാൻ ചികിത്സ കൊണ്ട് സാദ്ധ്യമാണ്. പേശികളും സന്ധികളും ബലപ്പെടുത്താനുള്ള ചികിത്സ സഹായകരമാണ്. വേദനയ്ക്കുള്ള മരുന്നുകൾ സാധാരണഗതിയിൽ ആവശ്യമാണ്. ശരീരഭാരം കുറയ്ക്കുന്നത് രോഗലക്ഷണങ്ങൾക്ക് ശമനമുണ്ടാക്കും. തുടർച്ചയായ വേദനയുള്ള തരത്തിൽ രോഗം മൂർച്ഛിച്ചവർക്ക് ശസ്ത്രക്രിയ വേണ്ടിവന്നേയ്ക്കാം. സന്ധി മാറ്റിവയ്ക്കൽ ശസ്ത്രക്രിയ പലർക്കും ഫലപ്രദമാണ്. [10]

റൂമറ്റോയ്ഡ് ആർത്രൈറ്റിസ്[തിരുത്തുക]

ശരീരത്തിന്റെ രോഗപ്രതിരോധ സംവിധാനം ശരീരകലകളെ ആക്രമിക്കുന്ന ഒരു തരം അസുഖമാണ് റൂമറ്റോയ്ഡ് ആർത്രൈറ്റിസ്. സന്ധികളെ മാത്രമല്ല, മറ്റു ഭാഗങ്ങളെയും ഈ അസുഖം ബാധിക്കും. തരുണാസ്ഥികളെയും സന്ധിയെ ആവരണം ചെയ്യുന്ന ഒരു പാളിയെയുമാണ് രോഗം കൂടുതലായി ബാധിക്കുക. രണ്ടസ്ഥികൾ തമ്മിൽ ഉരസാൻ ഈ അസുഖവും കാരണമാകും. കൈവിരലുകളിലെ സന്ധികൾ, മണിബന്ധം, കൈമുട്ട്, കാൽമുട്ട് എന്നിവയാണ് സാധാരണയായി ബാധിക്കപ്പെടുന്ന സന്ധികൾ. ശരീരത്തിന്റെ രണ്ടു ഭാഗത്തെയും ഈ അസുഖം ഒരുപോലെ ബാധിക്കും. ശരിയായ ചികിത്സ ലഭിച്ചില്ലെങ്കിൽ ചില വർഷങ്ങൾ കൊണ്ട് അംഗഭംഗം ഉണ്ടാവാൻ സാദ്ധ്യതയുണ്ട്. 20 വയസ്സിനു മുകളിൽ പ്രായമുള്ളവർക്കാണ് സാധാരണ ഈ അസുഖമുണ്ടാകുന്നത്. കുട്ടികളിൽ, തൊലിപ്പുറമേയൂള്ള ചുവന്നു തടിക്കൽ (skin rash), പനി, വേദന, ശരീരചലനങ്ങൾ പരിമിതമാവുക എന്നീ ലക്ഷണങ്ങൾ കാണപ്പെടാം. പലപ്പോഴും ഈ രോഗമുണ്ടാകാനുള്ള കാരണമെന്തെന്ന് വ്യക്തമാവില്ല. പെട്ടെന്നു തന്നെ കണ്ടുപിടിക്കുകയും കൃത്യമായി ചികിത്സിക്കുകയും ചെയ്താൽ പലർക്കും സാധാരണ ജീവിതം നയിക്കാൻ സാധിക്കും. കോർട്ടിക്കോസ്റ്റീറോയ്ഡുകൾ മുതൽ മോണോക്ലോണൽ ആന്റീബോഡി വരെയുള്ള മരുന്നുകൾ ചികിത്സയ്ക്കുപയോഗിക്കുന്നുൻട്. ചിലർക്ക് ശസ്ത്രക്രീയ (സന്ധി മാറ്റിവയ്ക്കൽ) ആവശ്യമായി വരും. [11] ഈ രോഗത്തിന് പൂർണ്ണശാന്തി നല്കുന്ന ചികിത്സയൊന്നുമില്ല.

ലൂപസ്[തിരുത്തുക]

ഈ അസുഖം ചിലപ്പോൾ വളരെ രൂഷമായ സന്ധിവേദനയുണ്ടാക്കാം. തൊലിപ്പുറമേയുള്ള ചുവന്നുതടിക്കൽ, സൂര്യപ്രകാശമേറ്റാൽ തൊലിയിൽ ചൊറിച്ചിലും ചുവന്നുതടിക്കലും മറ്റുമുണ്ടാവുക (ഫോട്ടോസെൻസിറ്റിവിറ്റി), മുടികൊഴിയൽ, വൃക്കയ്ക്കുള്ള പ്രശ്നങ്ങൾ, ശ്വാസകോശത്തിലെ ഫൈബ്രോസിസ് എന്നിവയാണ് മറ്റു ലക്ഷണങ്ങൾ. [12]

ഗൗട്ട്[തിരുത്തുക]

സന്ധികളിൽ യൂറിക് ആസിഡ് ക്രിസ്റ്റലുകൾ അടിയുന്നതുകൊണ്ടുള്ള കോശജ്വലനമാണ് ഈ അസുഖത്തിന് കാരണം. കാൽസ്യം ഫോസ്ഫേറ്റ് ക്രിസ്റ്റലുകൾ രൂപപ്പെടുന്നതുമൂലം ഗൗട്ട് മാതിരി ലക്ഷണങ്ങളുള്ള സ്യൂഡോഗൗട്ട് എന്ന അസുഖം ഉണ്ടാകാറുണ്ട്. രോഗത്ത്ന്റെ ആദ്യഘട്ടങ്ങളിൽ വേദനയുണ്ടാകുന്നത് ഒരു സന്ധിയിൽ മാത്രമാണ്. പിന്നീട് മറ്റു സന്ധികളിലേയ്ക്കും ഇവ പടരുകയും ശരീരം തീരെയനക്കാൻ സാധിക്കാത്ത സ്ഥിതി വരുകയും ചെയ്തേക്കാം. സന്ധികൾ നീരുവന്ന് വീർക്കുകയും പ്രവർത്തനക്ഷമമല്ലാതാവുകയും ചെയ്യാറുണ്ട്. ചികിത്സയില്ലെങ്കിൽ കഠിനമായ വേദനയും മറ്റുമുണ്ടാവും. [13] യൂറിക് ആസിഡിന്റെ അളവ് സാധാരണ മരുന്നുകൾ (ഉദാഹരണം അല്ലോപ്യൂരിനോൾ, ഫെബുക്സോസ്റ്റാറ്റ്, പ്രോബെനാസിഡ്) കൊണ്ട് നിയന്ത്രിക്കാൻ സാധിക്കുന്നില്ലെങ്കിൽ അസുഖത്തെ റിഫ്രാക്ടറി ക്രോണിക് ഗൗട്ട് എന്നു വിളിക്കാം. [14]

ചില പ്രധാന തരം സന്ധിവാതങ്ങളുടെ താരതമ്യം[15]
ഓസ്റ്റിയോ ആർത്രൈറ്റിസ് റൂമറ്റോയ്ഡ് ആർത്രൈറ്റിസ് ഗൗട്ടി ആർത്രൈറ്റിസ്
രോഗം ആരംഭിക്കാനെടുക്കുന്ന സമയം മാസങ്ങൾ ആഴ്ച്ചകൾ മുതൽ മാസങ്ങൾ വരെ[16] ഒരു രോഗബാധയ്ക്ക് മണിക്കൂറുകൾ മതി[17]
പ്രധാനമായി അസുഖം ബാധിക്കുന്ന സന്ധികൾ ഭാരം താങ്ങുന്ന സന്ധികൾ (കാൽമുട്ട്, ഇടുപ്പ്, നട്ടെല്ല്, കൈകൾ എന്നിവ ഉദാഹരണം) കൈകൾ (വിരലുകളിലെ ആദ്യ രണ്ടു സന്ധികൾ - പ്രോക്സിമൽ ഇന്റർഫലാഞ്ച്യൽ, മെറ്റാകാർപോഫലാഞ്ച്യൽ എന്നിവ), മണിബന്ധം, കാൽക്കുഴ, കാൽമുട്ട് എന്നിവ കാലിന്റെ തള്ളവിരൽ, കാൽക്കുഴ, കാൽമുട്ട്, കൈമുട്ട് എന്നിവ
കോശജ്വലനം (Inflammation) ഉണ്ടാവാമെങ്കിലും റൂമറ്റോയ്ഡ് ആർത്രൈറ്റിസിനോളം രൂഷമല്ല. ഉണ്ട് ഉണ്ട്
എക്ഷ്-റേയും മറ്റു റേഡിയോളജിക്കൽ പരിശോധനകളും
  • സന്ധിയിലെ അസ്ഥികൾക്കിടെയിലുള്ള ഭാഗം ഇടുങ്ങിയതായി കാണപ്പെടും
  • ഓസ്റ്റിയോഫൈറ്റുകൾ
  • ബാധിതപ്രദേശത്തുള്ള ഓസ്റ്റിയോസ്ക്ലീറോസിസ്
  • സബ്കോണ്ട്രൽ സിസ്റ്റുകൾ
  • സന്ധിയിലെ അസ്ഥികൾക്കിടെയിലുള്ള ഭാഗം ഇടുങ്ങിയതായി കാണപ്പെടും
  • അസ്ഥികൾക്ക് തേയ്മാനം വന്നതായി കാണപ്പെടും
  • കുത്തിയെടുത്ത പോലുള്ള ("പഞ്ച്ഡ് ഔട്ട്") തരത്തിൽ അസ്ഥിനഷ്ടം
ലാബോറട്ടറി പരിശോധനാഫലം ഒന്നുമില്ല വിളർച്ചയുടെ ലക്ഷണവും, ഇ.എസ്.ആർ., റൂമാറ്റോയ്ഡ് ഫാക്ടർ, സി-റിയാക്ടീവ് പ്രോട്ടീൻ എന്ന മാനകങ്ങളുടെ വർദ്ധന സന്ധികളിൽ ക്രിസ്റ്റലുകൾ കാണുക
മറ്റു ലക്ഷണങ്ങൾ

ചികിത്സ[തിരുത്തുക]

റൂമാറ്റോയ്ഡ് സന്ധിവാതത്തിനും ഓസ്റ്റിയോ ആർത്രൈറ്റിസിനും പൂർണ്ണമായി ഭേദമാക്കാവുന്ന ചികിത്സയില്ല. ചികിത്സാമുറകൾ അസുഖമനുസരിച്ച് വ്യത്യാസപ്പെട്ടാണിരിക്കുന്നത്. ഫിസിക്കൽ തെറാപ്പി, ജീവിതരീതിയിൽ മാറ്റം വരുത്തൽ (വ്യായാമം, ഭാരനിയന്ത്രണം), ബ്രേസുകൾ, മരുന്നുകൾ എന്നിവയൊക്കെ ചികിത്സയുടെ ഭാഗമാണ്. സന്ധി മാറ്റിവയ്ക്കുന്ന ശസ്ത്രക്രീയ അസ്ഥിക്ക് തേയ്മാനം വരുന്ന ചിലയവസരങ്ങളിൽ വേദന കുറയ്ക്കാനായി ചെയ്യേണ്ടിവരും. ശസ്ത്രക്രീയ കോശജ്വലനം കുറയ്ക്കാൻ സഹായിക്കുന്നതിനാൽ സന്ധിക്കുണ്ടാകുന്ന കേടുകൾ ഭാവിയിൽ കുറയാൻ കാരണമായേക്കാം. [18]

ഫിസിക്കൽ തെറാപ്പിയും ജോലിസംബന്ധമായ ചികിത്സയും[തിരുത്തുക]

പൊതുവിൽ അസുഖം ബാധിച്ച സന്ധിക്ക് വ്യായാമം നൽകുന്നത് രോഗത്തിന് ദീർഘകാലാടിസ്ഥാനത്തിൽ ഗുണം ചെയ്യുമെന്ന് പൊതുവിൽ പഠനങ്ങൾ സൂചിപ്പിക്കുന്നു. വ്യായാമം രോഗം ബാധിച്ച സന്ധിക്ക് മാതമല്ല പൊതുവിൽ രോഗിയുടെ ആരോഗ്യവും മെച്ചപ്പെടുത്തും. [19]

ഫിസിക്കൽ തെറാപ്പിയും ജോലിസംബന്ധമായ ചികിത്സയും രോഗികൾക്ക് ഗുണം ചെയ്യും. സന്ധിവാതത്തിൽ സന്ധികളുടെ ചലനം പരിമിതമാവുന്നതു കാരണം ഫിസിക്കൽ തെറാപ്പി നൽകിയാൽ ചലനശേഷി വർദ്ധിപ്പിക്കാൻ സാധിക്കും. വേദന കുറയ്ക്കാനും ശസ്ത്രക്രീയ ചെയ്യാൻ നിർബന്ധിതമാവുന്ന സമയം ദീർഘിപ്പിക്കാനും ഇതുമൂലം സാധിക്കും.[20] ഫിസിക്കൽ തെറാപ്പിസ്റ്റ് പറഞ്ഞു തരുന്ന വ്യായാമങ്ങളാണ് കാൽമുട്ടിലെ വേദന കുറയ്ക്കാൻ കൂടുതൽ ഫലപ്രദമെന്ന് കണ്ടിട്ടുണ്ട്.

യന്ത്രങ്ങളും മറ്റും ഉപയോഗിക്കാനുള്ള പരിശീലനമാണ് ജോലി സംബന്ധമായി നൽകാവുന്ന ചികിത്സ.

മരുന്നുകൾ[തിരുത്തുക]

പലതരം മരുന്നുകൾ ചികിത്സയ്ക്കായി ഉപയോഗിക്കപ്പെടുന്നുണ്ട്. പാർശ്വഭലങ്ങൾ ഏറ്റവും കുറഞ്ഞ മരുന്നുകൾ തുടങ്ങി രോഗം മൂർച്ഛിക്കും തോറും കൂടുതൽ വീര്യമുള്ള മരുന്നുകൾ നൽകുകയാണ് സാധാരണ ചെയ്യാറ്. [21]

രോഗത്തിന്റെ ഇനമനുസരിച്ച് മരുന്നുകളിൽ മാറ്റമുണ്ടാകും.

ലോക സന്ധിവാത ദിനം[തിരുത്തുക]

ഒക്ടോബർ 12 ലോക സന്ധിവാതദിനമായി ആചരിക്കുന്നു. ഈ രോഗത്തേക്കുറിച്ച് മനുഷ്യനെ ബോധവാനാക്കുകയെന്നതാണ് ഇതിന്റെ ലക്ഷ്യം.

അവലംബം[തിരുത്തുക]

  1. thefreedictionary.com > arthritis in turn citing:
    • The American Heritage Dictionary of the English Language, Fourth Edition copyright 2000
    • Collins English Dictionary – Complete and Unabridged, HarperCollins Publishers 2003
    • The American Heritage Science Dictionary Copyright 2005
  2. Healthline
  3. Web MD
  4. PMID 9725091 (PubMed)
    Citation will be completed automatically in a few minutes. Jump the queue or expand by hand
  5. Swash, M, Glynn, M.(eds). 2007. Hutchison's Clinical Methods. Edinburgh. Saunders Elsevier.
  6. Arthritis: The Nation’s Most Common Cause of Disability Centers for disease prevention and health promotion. Retrieved on 2010-01-24
  7. ^ Arthritis: The Nation’s Most Common Cause of Disability Centers for disease prevention and health promotion. Retrieved on 2010-01-24
  8. Chronic Arthritis treatment, symptoms and relief Retrieved on 2010-01-24
  9. VanItallie TB (October 2010). "Gout: epitome of painful arthritis". Metab. Clin. Exp. 59 (Suppl 1): S32–6. PMID 20837191. ഡി.ഒ.ഐ.:10.1016/j.metabol.2010.07.009. 
  10. Witter J, Dionne RA (2004). "What can chronic arthritis pain teach about developing new analgesic drugs?". Arthritis Res. Ther. 6 (6): 279–81. PMC 1064875. PMID 15535840. ഡി.ഒ.ഐ.:10.1186/ar1450. 
  11. Chronic Diseases Australian Institute Of Health And Welfare. Retrieved on 2010-01-24
  12. Rheumatoid Arthritis: Differential Diagnoses & Workup~diagnosis at eMedicine
  13. Becker, Michael A. (2005). Arthritis and Allied Conditions: A textbook of Rheumatology edition 15. Lippincot Williams & Wilkins. pp. 2303–2339. 
  14. Ali, S; Lally, EV (2009 Nov). "Treatment failure gout.". Medicine and health, Rhode Island 92 (11): 369–71. PMID 19999896. 
  15. Unless otherwise specified in table box, the reference is: Agabegi, Elizabeth D.; Agabegi, Steven S. (2008). "Table 6–7". Step-Up to Medicine. Step-Up Series. Hagerstwon MD: Lippincott Williams & Wilkins. p. 253. ഐ.എസ്.ബി.എൻ. 0-7817-7153-6. 
  16. Diagnosis lag time of median 4 weeks, and median diagnosis lag time of 18 weeks, taken from: PMID 8003053 (PubMed)
    Citation will be completed automatically in a few minutes. Jump the queue or expand by hand
  17. Schaider, Jeffrey; Wolfson, Allan B.; Gregory W Hendey; Louis Ling; Carlo L Rosen (2009). Harwood-Nuss' Clinical Practice of Emergency Medicine (Clinical Practice of Emergency Medicine (Harwood-Nuss)). Hagerstwon, MD: Lippincott Williams & Wilkins. pp. 740 (upper right of page). ഐ.എസ്.ബി.എൻ. 0-7817-8943-5. 
  18. How to treat arthritis Retrieved on 2010-02-01
  19. PMID 8980206 (PubMed)
    Citation will be completed automatically in a few minutes. Jump the queue or expand by hand
  20. Fransen M, Crosbie J, Edmonds J (January 2001). "Physical therapy is effective for patients with osteoarthritis of the knee: a randomized controlled clinical trial". J. Rheumatol. 28 (1): 156–64. PMID 11196518. 
  21. "Arthritis Drugs". arthritistoday.org. ആർക്കൈവ് ചെയ്തത് സൈറ്റിൽ നിന്ന്, യഥാർത്ഥം: 22 July 2010. ശേഖരിച്ചത് July 5, 2010.  Unknown parameter |unused_data= ignored (സഹായം)

പുറത്തേക്കുള്ള കണ്ണികൾ[തിരുത്തുക]


"http://ml.wikipedia.org/w/index.php?title=സന്ധിവാതം&oldid=1910681" എന്ന താളിൽനിന്നു ശേഖരിച്ചത്