വിഷുവം
വിക്കിപീഡിയ, ഒരു സ്വതന്ത്ര വിജ്ഞാനകോശം.
 |
ഈ ലേഖനം ഏതെങ്കിലും സ്രോതസ്സുകളില് നിന്നുള്ള വേണ്ടത്ര തെളിവുകളെ ഉള്ക്കൊള്ളുന്നില്ല. ദയവായി യോഗ്യങ്ങളായ സ്രോതസ്സുകളില് നിന്നുമുള്ള അവലംബങ്ങള് ചേര്ത്ത് ലേഖനം മെച്ചപ്പെടുത്തുക. നിലവാരമില്ലാത്ത വസ്തുതകള് ചോദ്യം ചെയ്യപ്പെടുകയും നീക്കപ്പെടുകയും ചെയ്തേക്കാം. |
സൂര്യന് ഖഗോളമദ്ധ്യരേഖ കടന്നു പോകുന്ന ജ്യോതിശാസ്ത്ര സംബന്ധിയായ പ്രതിഭാസത്തിനെയാണ് വിഷുവം (Equinox) എന്നു പറയുന്നത്. ഇതു മാര്ച്ച് 20നും സെപ്റ്റംബര് 23നും ആണ് സംഭവിക്കുന്നത്. സാങ്കേതികമായി പറഞ്ഞാല് ക്രാന്തിവൃത്തവും (ecliptic) ഖഗോളമധ്യ രേഖയും (ഘടികാമണ്ഡലം) (celestial equator) കൂട്ടി മുട്ടുന്ന ഇടത്തിലുള്ള ബിന്ദുക്കളെയാണ് വിഷുവങ്ങള് എന്ന് പറയുന്നത്. ഈ ദിവസങ്ങളില് പകലിനും രാത്രിക്കും ആതാണ്ട് തുല്യ നീളമാണ്.
ഉള്ളടക്കം |
[തിരുത്തുക] വിശദീകരണം
ഭൂമധ്യരേഖ ഖഗോളത്തെ ഛേദിക്കുമ്പോള് ലഭിക്കുന്ന മഹാവൃത്തത്തിന് ഖഗോളമധ്യ രേഖ (celestial equator) അഥവാ ഘടികാമണ്ഡലം എന്ന് പറയുന്നു. രാശിചക്രത്തിലൂടെ സൂര്യന് സഞ്ചരിക്കുന്ന പാതയെ ക്രാന്തിവൃത്തം (ecliptic) എന്നും പറയുന്നു. ഭൂമിയുടെ അച്ചുതണ്ട് 23.5° ചെരിഞ്ഞാണ് കറങ്ങുന്നത് . അപ്പോള് ഖഗോളമധ്യ രേഖയും ക്രാന്തിവൃത്തവും തമ്മില് 23.5° യുടെ ചരിവ് ഉണ്ട്. അതിനാല് ഈ രണ്ട് മഹാവൃത്തങ്ങള് തമ്മില് രണ്ട് ബിന്ദുക്കളില് മാത്രമേ കൂട്ടിമുട്ടുന്നുള്ളൂ. ഈ ബിന്ദുക്കളെ വിഷുവങ്ങള് (Equinox)എന്ന് വിളിക്കുന്നു. Equinox എന്ന വാക്കിന്റെ മൂല പദം ലാറ്റിന് ഭാഷയില് നിന്നുള്ള ഒരു പദമാണ്. Equal night എന്നാണ് അതിന്റെ അര്ത്ഥം. സൂര്യന് ഈ രണ്ട് ബിന്ദുക്കളിലുള്ളപ്പോള് രാത്രിക്കും പകലിനും തുല്യദൈര്ഘ്യമായിരിക്കും.
[തിരുത്തുക] രണ്ട് വിഷുവങ്ങള്
സൂര്യന് അതിന്റെ സഞ്ചാരമധ്യേ തെക്ക് നിന്ന് വടക്കോട്ട് ഘടികാമണ്ഡലത്തെ മുറിച്ച് കിടക്കുന്ന ബിന്ദുവിനെ മഹാവിഷുവം അഥവാ മേഷാദി (Vernal Equinox) എന്ന് വിളിക്കുന്നു. അതേ പോലെ സൂര്യന് വടക്ക് നിന്ന് തെക്കോട്ട് ഘടികാമണ്ഡലത്തെ മുറിച്ചു കിടക്കുന്ന ബിന്ദുവിനെ അപരവിഷുവം തുലാവിഷുവം അഥവാ തുലാദി (Autumnal Equinox) എന്ന് വിളിക്കുന്നു. മഹാവിഷുവം മാര്ച്ച് 20-നും അപരവിഷുവം സെപ്റ്റമ്പര് 23-നും ആണ് സംഭവിക്കുന്നത്.
[തിരുത്തുക] അയനാന്തങ്ങള്
സൂര്യന് ക്രാന്തിവൃത്തത്തിലൂടെ(ecliptic) സഞ്ചരിക്കുമ്പോള് എത്തുന്ന ഏറ്റവും തെക്കും വടക്കും ഉള്ള രണ്ട് ബിന്ദുക്കളെ ആണ് അയനാന്തങ്ങള് എന്നു പറയുന്നത്. അയാന്തങ്ങള് ദക്ഷിണ അയനാന്തവും ഉത്തര അയനാന്തവും ആണ്.
[തിരുത്തുക] പുരസ്സരണം
സൂര്യചന്ദ്രന്മാര് ഭൂമിയില് ചെലുത്തുന്ന ഗുരുത്വ ആകര്ഷണം മൂലം ഭൂമിയുടെ അച്ചുതണ്ട് അതിന്റെ സ്വാഭാവികമായുള്ള കറക്കത്തിന് പുറമേ 26,000 വര്ഷം കൊണ്ട് പൂര്ത്തിയാകുന്ന വേറൊരു ഭ്രമണവും ചെയ്യുന്നുണ്ട്. ഇത് പുരസ്സരണം (precission) എന്ന പേരില് അറിയപ്പെടുന്നു.
ഭൂമിയുടെ അച്ചുതണ്ടിന്റെ പുരസ്സരണം മൂലം ഘടികാമണ്ഡലം ഓരോ വര്ഷവും 50.26‘’ (50.26 ആര്ക് സെക്കന്റ് ) വീതം കറങ്ങികൊണ്ടിരിക്കുന്നു. അതിന്റെ ഫലമായി വര്ഷം തോറും വിഷുവങ്ങളുടെ സ്ഥാനവും ഇത്രയും ദൂരം മാറുന്നു. ഏകദേശം 71 വര്ഷം കൊണ്ട് ഒരു ഡിഗ്രിയുടെ മാറ്റം ഉണ്ടാകും.
[തിരുത്തുക] അയനചലനം
മഹാവിഷുവം, തുലാ വിഷുവം, ഉത്തര അയനാന്തം, ദക്ഷിണ അയനാന്തം തുടങ്ങിയ ക്രാന്തിവൃത്തത്തിലെ വിവിധ ബിന്ദുക്കള്ക്ക് പുരസ്സരണം കാരണം സംഭവിക്കുന്ന സ്ഥാനചനത്തിനു അയനം എന്നു പറയുന്നു. ഈ ബിന്ദുക്കളെല്ലാം വര്ഷം തോറും 50.26 ആര്ക് സെക്കന്റ് വീതം നീങ്ങി കൊണ്ടിരിക്കുന്നു.
[തിരുത്തുക] വിഷുവങ്ങളുടെ ഇപ്പോഴത്തെ സ്ഥാനം
പണ്ട് (ഏതാണ്ട് 1000 വര്ഷങ്ങള്ക്ക് മുന്പ്) മേഷാദി മേടമാസത്തിലായിരുന്നു. സൂര്യന് മേഷാദിയില് വരുന്ന ദിവസം ആയിരുന്നു കേരളത്തില് വിഷുവായി ആഘോഷിച്ചിരുന്നത്. എന്നാല് വിഷുവങ്ങളുടെ പുരസ്സരണം നിമിത്തം മേഷാദി ഇപ്പോള് മീനം രാശിയില് ആണ്. എങ്കിലും ഇപ്പോഴും വിഷു ആഘോഷിക്കുന്നത് മേടത്തില് തന്നെയാണ്. ഇതേ പോലെ തുലാദി ഇപ്പോള് കന്നി രാശിയില് ആണ്.
