മോനിഷ
| മോനിഷ ഉണ്ണി | |
|---|---|
 |
|
| ജനനം | മോനിഷ ഉണ്ണി 1971 പന്നിയങ്കര, കോഴിക്കോട് |
| മരണം | 1992 ഡിസംബർ 5 ചേർത്തല, ആലപ്പുഴ |
| സജീവം | 1986–1992 |
ആദ്യസിനിമയിൽ തന്നെ തന്റെ പ്രതിഭ തെളിയിച്ച പ്രശസ്ത മലയാള ചലച്ചിത്ര താരം. മലയാളത്തിനു പുറമേ തമിഴിലും കന്നടയിലും അഭിനയിച്ചിട്ടുണ്ട്. 1986-ൽ തന്റെ ആദ്യ ചലച്ചിത്രമായ നഖക്ഷതങ്ങളിലെ അഭിനയത്തിനു മികച്ച നടിക്കുള്ള ദേശീയ അവാർഡ് നേടുമ്പോൾ 15 വയസ്സ് മാത്രമേ ഉണ്ടായിരുന്നുള്ളൂ[1]. ഏറ്റവും കുറഞ്ഞ പ്രായത്തിൽ ഈ ബഹുമതി നേടിയത് മോനിഷയാണ്. 21 വയസ്സുള്ള സമയത്ത്, അഭിനയരംഗത്ത് സജീവമായി നിൽക്കുമ്പോൾ ഒരു കാറപകടത്തിൽ മരണപ്പെട്ടു.
ഉള്ളടക്കം |
ജീവിതരേഖ [തിരുത്തുക]
1971-ൽ കേരളത്തിലെ ആലപ്പുഴയിൽ ഉണ്ണിയുടെയും,ശ്രീദേവിയുടെയും മകളായി ജനിച്ചു.സഹോദരൻ സജിത്.അച്ഛൻ ഉണ്ണിക്ക് ബാംഗ്ലൂരിൽ തുകൽ വ്യവസായം ആയിരുന്നതിനാൽ അവിടെയായിരുന്നു മോനിഷയുടെ ബാല്യം.നർത്തകി കൂടെയായിരുന്ന അമ്മ ശ്രീദേവിയിൽ നിന്നായിരുന്നു നൃത്തത്തിന്റെ ആദ്യപാഠങ്ങൾ പഠിച്ചത്.9 വയസ്സുള്ളപ്പോൾ നൃത്തത്തിൽ അരങ്ങേറ്റം കുറിച്ചു.1985-ൽ കർണ്ണാടക ഗവൺമെന്റ് ഭരതനാട്യ നർത്തകർക്കായി നൽകുന്ന കൗശിക അവാർഡ് ലഭിച്ചു. ബാംഗ്ലൂരിലെ സെന്റ് ചാൾസ് ഹൈസ്കൂളിൽ നിന്നും,ബിഷപ്പ് കോട്ടൺ ഗേൾസ് ഹൈസ്കൂളിൽ നിന്നുമായി പ്രാഥമിക വിദ്യാഭ്യാസവും മൗണ്ട് കാർമൽ കോളേജിൽ നിന്നു സൈക്കോളജിയിൽ ബിരുദവും ലഭിച്ചു..[2]
അഭിനേത്രി [തിരുത്തുക]
പ്രശസ്ത സാഹിത്യകാരനും,തിരക്കഥാകൃത്തും,ചലച്ചിത്ര സംവിധായകനുമായ എം.ടി. വാസുദേവൻ നായർ മോനിഷയുടെ കുടുംബസുഹൃത്തായിരുന്നു.അദ്ദേഹമാണ് മോനിഷയുടെ സിനിമാരംഗത്തേക്കുള്ള പ്രവേശനത്തിന് കാരണമായത്. എം.ടി. കഥയും, ഹരിഹരൻ സംവിധാനവും നിർവഹിച്ച 'നഖക്ഷതങ്ങൾ' (1986) ആണ് ആദ്യചിത്രം. കൗമാരപ്രായത്തിലുള്ള ഒരു ത്രികോണ പ്രണയകഥയാണ് ഈ ചിത്രത്തിലേത്. മറ്റൊരു പുതുമുഖമായിരുന്ന വിനീത് ആയിരുന്നു ഈ ചിത്രത്തിൽ മോനിഷയുടെ നായകൻ. ഈ ചിത്രത്തിൽ മോനിഷ അഭിനയിച്ച 'ഗൗരി' എന്ന ഗ്രാമീണ പെൺകുട്ടിക്കു 1987-ലെ മികച്ച നടിക്കുള്ള ദേശീയ അവാർഡ് ലഭിച്ചു.[3] മലയാളത്തിനു പുറമേ പൂക്കൾ വിടും ഇതൾ (നഖക്ഷതങ്ങളുടെ റീമേക്ക്), ദ്രാവിഡൻ തുടങ്ങിയ തമിഴ് ചലച്ചിത്രങ്ങളിലും, രാഘവേന്ദ്ര രാജ്കുമാർ നായകനായി അഭിനയിച്ച ചിരംജീവി സുധാകർ(1988) എന്ന കന്നട ചിത്രത്തിലും അഭിനയിച്ചിട്ടുണ്ട്.
മരണം [തിരുത്തുക]
1992 ഡിസംബർ 5-ന് 'ചെപ്പടിവിദ്യ' എന്ന ചിത്രത്തിന്റെ ചിത്രീകരണം നടക്കുന്നതിനിടയിൽ മോനിഷയും, അമ്മയും സഞ്ചരിക്കുകയായിരുന്ന കാർ ആലപ്പുഴക്കടുത്തുള്ള ചേർത്തലയിൽ വെച്ച് മറ്റൊരു വാഹനവുമായി കൂട്ടിയിടിക്കുകയും, തലച്ചോറിനുണ്ടായ പരിക്കു മൂലം മരണപ്പെടുകയും ചെയ്തു.
അഭിനയിച്ച സിനിമകൾ [തിരുത്തുക]
- നഖക്ഷതങ്ങൾ (1986)
- ഋതുഭേദം (1986)
- പൂക്കൾ വിടും ഇത ൾ (തമിഴ്) (1987)
- ആര്യൻ (1988)
- ചിരംജീവി സുധാകര (കന്നട)(1988)
- കനകാംബരങ്ങൾ (1988)
- ദ്രാവിഡൻ (1989)
- അധിപൻ (1989)
- ദ്രാവിഡൻ (തമിഴ്)(1989)
- കുറുപ്പിന്റെ കണക്കുപുസ്തകം (1990)
- പെരുന്തച്ചൻ (1990)
- വീണ മീട്ടിയ വിലങ്ങുകൾ (1990)
- വേനൽകിനാവുകൾ (1991)
- കടവ് (1991)
- ഉന്നാ നെനച്ചേൻ പാട്ടു പഠിച്ചേൻ (തമിഴ്) (1992)
- തലസ്ഥാനം (1992)
- ഒരു കൊച്ചു ഭൂമികിലുക്കം (1992)
- കുടുംബസമേതം (1992)
- കമലദളം (1992)
- ചമ്പക്കുളം തച്ചൻ (1992)
- ചെപ്പടിവിദ്യ (1992)
