മാർത്തോമാ ക്രിസ്ത്യാനികൾ
കേരളത്തിലെ പരമ്പരാഗത ക്രിസ്ത്യാനികളുടെ ജാതിനാമമാണ് മാർത്തോമാ ക്രിസ്ത്യാനികൾ (Saint Thomas Christians). ഒന്നാം നൂറ്റാണ്ടിൽ ക്രിസ്തു ശിഷ്യനായ സെന്റ് തോമസ് (മാർത്തോമ) കേരളത്തിൽ സുവിശേഷ പ്രചരണം നടത്തി എന്നും അതിൽ നിന്നാണ് കേരളത്തിലെ ക്രിസ്തീയസഭ ഉടലെടുത്തത് എന്നും ഇവർ വിശ്വസിക്കുന്നു. അവരുടെ ആരാധനാ ഭാഷ സുറിയാനി (Syriac) ആയിരുന്നതിനാൽ ഇവരെ സുറിയാനി ക്രിസ്ത്യാനികൾ, സിറിയൻ മലബാർ ക്രിസ്ത്യാനികൾ എന്നും അറിയപ്പെടുന്നു.
ഇവർക്ക് നസ്രാണികൾ എന്നും പേരുണ്ടു്. അപൂർവ്വമായി നസ്രാണി മാപ്പിളമാർ എന്നും ഇവരെ വിളിക്കാറുണ്ട്. മലയാളത്തിലെ ആദ്യത്തെ നിഘണ്ടു നിർമ്മിച്ച ഹെർമൻ ഗുണ്ടർട്ടിന്റെ അഭിപ്രായ പ്രകാരം മാപ്പിള എന്ന പദം കേരളത്തിലേക്ക് കുടിയേറിയ പശ്ചിമേഷ്യയിലെ സെമെറ്റിക് വംശജർക്ക് (യഹൂദർ, അറബികൾ തുടങ്ങി ശേമിന്റെ വംശപരമ്പരയിൽ പെട്ടവർക്ക്) പൊതുവായി പറയുന്നതാണ്.[അവലംബം ആവശ്യമാണ്] കേരളത്തിലെ ജാതിവ്യവസ്ഥയിൽ സവർണരായി ഗണിയ്ക്കപ്പെട്ടിരുന്നതായും ചേരമാൻ പെരുമാൾ ഇവർക്കു് മാപ്പിളമാർ എന്ന പദവി കല്പിച്ചു് കൊടുത്തിട്ടുള്ളതായും ഇവർ അവകാശപ്പെടുന്നു. 18-ആം നൂറ്റാണ്ടിലാണു് സുറിയാനി ക്രിസ്ത്യാനികൾ എന്ന പേരു് അവർക്കുണ്ടായതു്. അതുവരെ മലങ്കര മാർത്തോമ്മാ നസ്രാണി സമുദായമെന്നായിരുന്നു വിളിച്ചു് വന്നിരുന്നതു്. ഉദയംപേരൂർ സുന്നഹദോസിന്റെ കാനോനകളിൽ മലങ്കര മാർത്തോമ്മാ നസ്രാണി ഇടവക എന്നു് പരാമർശിച്ചിരിയ്ക്കുന്നു.
ഒറ്റ സമുദായമായി കഴിഞ്ഞിരുന്ന മാർത്തോമാ ക്രിസ്ത്യാനികൾ കൂനൻ കുരിശു സത്യത്തിനു ശേഷം 1657-63 കാലത്താണു് ആദ്യമായി പിളർന്നതു്.ഇപ്പോൾ ഇവർ സീറോ മലബാർ കത്തോലിക്കാ സഭ, ഓർത്തഡോക്സ് സുറിയാനി സഭ, യാക്കോബായ സുറിയാനി ക്രിസ്ത്യാനി സഭ, മാർത്തോമ്മാ സുറിയാനി സഭ, സീറോ മലങ്കര കത്തോലിക്കാ സഭ, കൽദായ സുറിയാനി സഭ, സ്വതന്ത്ര സുറിയാനി സഭ, സെന്റ് തോമസ് ഇവാഞ്ചലിക്കൽ സഭ, സി.എസ്.ഐ. സഭയുടെ മദ്ധ്യകേരള ഇടവക എന്നിവകളിലായി ചിതറിക്കിടക്കുന്നു.
 |
ക്രിസ്തുമതവുമായി ബന്ധപ്പെട്ട ഈ ലേഖനം അപൂർണ്ണമാണ്. ഇതു വികസിപ്പിക്കുവാൻ സഹായിക്കുക. |
