മല്ലിക (വൃത്തം)

മല്ലിക: ഒരു സം‍സ്കൃത‍വർണ്ണവൃത്തം. ധൃതി എന്ന ഛന്ദസ്സിൽ പെട്ട (ഒരു വരിയിൽ 18 അക്ഷരങ്ങൾ) സമവൃത്തം.

ലക്ഷണം (വൃത്തമഞ്ജരി)

രം സജം ജഭ രേഫമിഗ്ഗണയോഗമത്ര ഹി മല്ലിക.

വൃത്തശാസ്ത്രസങ്കേതമനുസരിച്ചു്  “ര സ ജ ജ ഭ ര” എന്നീ ഗണങ്ങൾ വരുന്ന വൃത്തമാണു മല്ലിക.

- v - v v - v - v v - v - v v - v -

ഉദാഹരണങ്ങൾ

1. കുമാരനാശാന്റെ ഒരു പ്രാർത്ഥനയിൽനിന്നു്.

ചന്തമേറിയ പൂവിലും, ശബളാഭമാം ശലഭത്തിലും

സന്തതം കരതാരിയന്നൊരു ചിത്രചാതുരി കാട്ടിയും,

ഹന്ത, ചാരുകടാക്ഷമാലകളർക്കരശ്മിയിൽ നീട്ടിയും

ചിന്തയാം മണിമന്ദിരത്തിൽ വിളങ്ങുമീശനെ വാഴ്ത്തുവിൻ!

സാദൃശ്യമുള്ള മറ്റു വൃത്തങ്ങൾ

1. മല്ലികയുടെ നാലു തവണ ആവർത്തിക്കുന്ന - v - v v എന്ന രീതിയിൽ ഒരു ലഘു കൂടി ചേർത്തു് - v - v v v എന്നായാൽ കുസുമമഞ്ജരി എന്ന വൃത്തം.
2. ഈ വൃത്തത്തിലുള്ള പദ്യങ്ങൾ ഓമനക്കുട്ടൻ എന്ന ഭാഷാവൃത്തരീതിയിലും പാടാവുന്നതാണു്.

മറ്റു വിവരങ്ങൾ

    വൃത്തമഞ്ജരിയിലെ വൃത്തങ്ങൾ