മലയാളം: താറാവ്‌ ഒരു വളർത്തുപക്ഷിയാണ്. അൻസെറിഫോമസ് (Anseriformes) പക്ഷിഗോത്രത്തിൽപ്പെട്ട അനാട്ടിഡേ (Anatidae) കുടുംബത്തിന്റെ അനാറ്റിനേ (Anatinae) ഉപകുടുംബത്തിൽപ്പെടുന്നു. ശാ.നാ. അനാസ് പ്ലാറ്റിറിങ്ക പ്ലാറ്റിറിങ്ക (Anas platyrhyncha platyrhyncha). ഇന്ത്യയിൽ വളർത്തു പക്ഷികളിൽ രണ്ടാം സ്ഥാനം താറാവിനാണ്; ഒന്നാം സ്ഥാനം കോഴിക്കും. കേരളത്തിൽ വീടുകളിൽ ചെറിയ തോതിൽ ഇറച്ചിക്കും മുട്ടയ്ക്കുമായി വളർത്തുന്നുണ്ട്. കുട്ടനാട് മേഖലയിൽ വളരെ വ്യാപകമായി താറാവുകളെ വളർത്തുന്നുണ്ട്. കരയിലും വെള്ളത്തിലും സഞ്ചരിക്കുവാനും ഇരതേടുവാനും കഴിവുള്ള ഇവയുടെ വംശത്തിലുള്ളവ ശുദ്ധജലത്തിലും കടൽ‌ വെള്ളത്തിലും കാണപ്പെടുന്നു. കൂട്ടമായിട്ടാണ് സഞ്ചാരം. മുട്ട വിരിയിക്കുന്നതിനായി കോഴികൾ അടയിരിക്കുന്നതുപോലെ താറാവുകൾ അടയിരിക്കുന്ന സ്വഭാവമില്ല. അതിനാൽ കോഴികൾ അടയിരിക്കുമ്പോൾ താറാവ് മുട്ട കൂടെ വെച്ചോ അല്ലെങ്ങിൽ ശാസ്ത്രീയമാർഗ്ഗങ്ങളോ ആണ് മുട്ട വിരിയിക്കുന്നതിന് ഉപയോഗിക്കുന്നത്