മലയാളം: മനുഷ്യർ മരിച്ച ശേഷം ശരീരം മണ്ണിൽ കുഴിച്ചിടാനായി പ്രത്യേകം നീക്കിവെക്കുന്ന സ്ഥലമാണ് ശ്മ്ശാനം. ശ്മ്ശാനങ്ങൾ കോട്ടകളെ പോലെ മതിലുകൾ കെട്ടി സുരക്ഷിതമാക്കുകയും മരിച്ചതിന് ശേഷം ശരീരത്തെ ശവം എന്ന് പറയുന്നതുകൊണ്ടാകാം ശ്മ്ശാനത്തെ ശവക്കോട്ടയെന്ന് വിളിക്കുന്നത്. ചുടലപറമ്പ് എന്നും പറയാറുണ്ട്. വർഷങ്ങൾക്ക് ശേഷം കുഴി തോണ്ടി, മണ്ണോട് ചേരാതെ കിടക്കുന്ന അവശിഷ്ടങ്ങളെടുത്ത് ശ്മ്ശാനത്തിന്റെയരികിലുള്ള മറ്റൊരു വലിയ കുഴിയിലേക്ക് മാറ്റുന്നതും ചിലയിടങ്ങളിൽ കണ്ടുവരുന്നു. സാധരണയായി അസ്ഥികളും തലയോട്ടിയുമായിരിക്കും അവശിഷ്ടമായുണ്ടാകുക. അതിനാൽ ഈ വലിയ കുഴിയെ "അസ്‌ഥിക്കുഴി"യെന്നും വിളിക്കുന്നു.

സർക്കാർ തലത്തിൽ പൊതുശ്മശാനം ഉണ്ടാകാറുണ്ടെങ്ങിലും മതവിഭാഗങ്ങൾക്കും സമുദായങ്ങൾക്കും പ്രത്യേകം ശ്മ്ശാനങ്ങളാണ് കൂടുതലും കണ്ടുവരുന്നത്. കൃസ്ത്യൻ-മുസ്ലീം-ജൂത മത വിഭാഗങ്ങൾ ശവം കുഴിച്ചിടുന്ന രീതിയാണ് അവലംബിക്കുന്നത്. മറ്റു ഭാഷകളുടെ സ്വാധീനം മൂലമാകാം കൃസ്ത്യാനികൾ സിമിത്തേരിയെന്നും മുസ്ലീമുകൾ ഖബർസ്ഥാനെന്നും ശ്മ്ശാനത്തെ വിളിക്കുന്നത്. ഹൈന്ദവവിശ്വാസികൾ‌ എല്ലാവരും ശവം കുഴിച്ചിടുന്ന രീതിയല്ല പിന്തുടരുന്നത്. അവരിൽ ജാതികൾക്കനുസരിച്ച് വിത്യാസപ്പെട്ടിരിക്കുന്നു. ചിലർ ശരീരം ദഹിപ്പിക്കുന്നു, മറ്റു ചിലർ ശരീരം കുഴിച്ചിടുന്നു. കുഴിച്ചിടുന്നവരിൽ തന്നെ ചിലർ സ്വന്തം വീട്ടുവളപ്പിൽ തന്നെ കുഴിച്ചിടുകയോ പ്രത്യേകം ശ്മ്ശാനങ്ങൾ ഉപയോഗിക്കുകയോ ചെയ്യുകയാണ്.

സർക്കാർതലത്തിൽ വൈദ്യുതിശ്മ്ശാനങ്ങളുടെ ആവിർ‌ഭാവത്തോടെ പലയിടത്തും‌ അത്തരം‌ ശവസം‌സ്കാരരീതികൾ‌ അനുവർ‌ത്തിച്ചു തുടങ്ങിയിട്ടുണ്ട്.

കോട്ടയം ഭരണങ്ങാനം കൃസ്ത്യൻ പള്ളിയിലെ ശ്മ്ശാനത്തിന്റെ പടമാണിവിടെ ചേർത്തിരിക്കുന്നത്.