പഞ്ചാബ്‌ (ഇന്ത്യ)

ഇംഗ്ലീഷ് വിലാസം

http://ml.wikipedia.org/wiki/Punjab

പഞ്ചാബ്
അപരനാമം: അഞ്ചു നദികളുടെ നാട്
തലസ്ഥാനം	ചണ്ഡീഗഡ്
രാജ്യം	ഇന്ത്യ
ഗവർണ്ണർ മുഖ്യമന്ത്രി	ശിവരാജ് പാട്ടീൽ പ്രകാശ് സിംഗ് ബാദൽ
വിസ്തീർണ്ണം	50362ച.കി.മീ
ജനസംഖ്യ	24289296
ജനസാന്ദ്രത	482/ച.കി.മീ
സമയമേഖല	UTC +5:30
ഔദ്യോഗിക ഭാഷ	പഞ്ചാബി
ഔദ്യോഗിക മുദ്ര

പഞ്ചാബ് (പഞ്ചാബി:ਪੰਜਾਬ Punjab.ogg , ഹിന്ദി:पंजाब) ഇന്ത്യയുടെ വടക്കുപടിഞ്ഞാറുള്ള ഒരു സംസ്ഥാനമാണ്. ഇതേ പേരിൽ അയൽ രാജ്യമായ പാകിസ്താനിലും ഒരു പ്രവിശ്യയുണ്ട്. ജമ്മു-കാശ്മീർ, ഹിമാചൽ പ്രദേശ്, രാജസ്ഥാൻ, ഹരിയാന എന്നിവയാണ് അയൽ സംസ്ഥാനങ്ങൾ. പാകിസ്താനുമായി രാജ്യാന്തര അതിർത്തിയുമുണ്ട്. കേന്ദ്ര ഭരണ പ്രദേശമായ ചണ്ഢീഗഡ് ആണ്‌ പഞ്ചാബിന്റെ തലസ്ഥാനം. അയൽ സംസ്ഥാനമായ ഹരിയാനയുടെ തലസ്ഥാനവും ഇതുതന്നെ. പഞ്ചാബിയാണ്‌ പ്രധാന ഭാഷ.

നിരുക്തം

സംസ്കൃതത്തിൽ പഞ്ചനദഃ (पञ्चनदः) എന്നറിയപ്പെട്ടിരുന്ന പ്രദേശമായിരുന്നു ഇത്. അഞ്ചു നദികളുടെ നാട് എന്നാണ് പഞ്ചനദഃ എന്ന പേരിനർഥം. വിതസ്താ, ചന്ദ്രഭാഗാ, ഇരാവതീ, വിപാശാ, ശതദ്രുഃ എന്നിവയാണ് പേരിനു കാരണമായ അഞ്ചുനദികൾ.

1. വിതസ്താ - ഇപ്പോൾ ഝലം എന്നറിയപ്പെടുന്നു.
2. ചന്ദ്രഭാഗാ - ഇപ്പോൾ ചിനാബ് എന്നറിയപ്പെടുന്നു.
3. ഇരാവതീ - ഇപ്പോൾ രവി എന്നറിയപ്പെടുന്നു.
4. വിപാശാ- വസിഷ്ഠന്റെ പാശബന്ധം വേർപടുത്തി അദ്ദേഹത്തെ രക്ഷിച്ചതിനാൾ വിപാശാ എന്ന പേര് ലഭിച്ചു. ഈ നദി ഇപ്പോൾ ബിയാസ് എന്നറിയപ്പെടുന്നു.
5. ശതദ്രുഃ - വസിഷ്ഠന്റെ ശാപം മൂലം അനേകം കൈവഴിയായി ഒഴുകിയ നദി. ശതദാ ദ്രവതീതി ശതദ്രുഃ എന്ന് നിരുക്തം. ഈ നദി ഇപ്പോൾ സത്‌ലജ് എന്നറിയപ്പെടുന്നു.

ഈ അഞ്ച് നദികളും ചേർന്ന് പഞ്ചനദയായി മാറി സിന്ധുവിൽ ചേരുന്നു.

പഴയകാല മലയാള ഗ്രന്ഥങ്ങളിൽ പഞ്ചനദം എന്നപേരിലായിരുന്നു പഞ്ചാബ് സൂചിപ്പിക്കപ്പെട്ടിരുന്നത്.

കൃഷിയും വ്യവസായവും

ഇതര ഇന്ത്യൻ സംസ്ഥാനങ്ങളെ അപേക്ഷിച്ച് പഞ്ചാബ് വ്യാവസായികമായും കാർഷികപരമായും ഏറെ പുരോഗതി കൈവരിച്ചിട്ടുണ്ട്.