നായ്ക്കുരണ

വിക്കിപീഡിയ, ഒരു സ്വതന്ത്ര വിജ്ഞാനകോശം.
Mucuna pruriens
ശാസ്ത്രീയ വർഗ്ഗീകരണം
സാമ്രാജ്യം: Plantae
Division: Magnoliophyta
ക്ലാസ്സ്‌: Magnoliopsida
നിര: Fabales
കുടുംബം: Fabaceae
ഉപകുടുംബം: Faboideae
Tribe: Phaseoleae
ജനുസ്സ്: Mucuna
വർഗ്ഗം: M. pruriens
ശാസ്ത്രീയ നാമം
Mucuna pruriens
(L.) DC.

ഭാരതത്തിൽ ഉടനീളം കണ്ടുവരുന്നതും പയർ വർഗ്ഗത്തിൽ ഉൾപ്പെടുന്നതുമായ ഒരു ഔഷധസസ്യമാണ്‌ നായ്ക്കുരണ. ഉപയോഗത്തെ അടിസ്ഥാനമാക്കി ആയുർവേദത്തിൽ ഇതിനെ വാജീകരണ ഔഷധങ്ങളുടെ കൂട്ടത്തിൽ ഉൾപ്പെടുത്തിയിരിക്കുന്നു.

പേരുകൾ[തിരുത്തുക]

അജഡാ, കണ്ഡുര:, പ്രാവൃഷേണ്യ:, ശുകശിംബി:, കപികച്ഛു:, മർക്കടീ, കുലക്ഷയാ എന്നീ പേരുകളിൽ സംസ്കൃതത്തിൽ അറിയപ്പെടുന്ന ഇതിന്റെ ഹിന്ദിയിലെ പേരുകൾ കാവച, കിവച, കൊഞ്ചാ എന്നിവയാണ്‌. ബംഗാളിയിൽ അൽക്കുഷി എന്ന പേരിലും നായ്ക്കുരണ അറിയപ്പെടുന്നു. പൂനക്കാലി, പൂനക്കജോരി എന്നീ പേരുകളി തമിഴിൽ അറിയപ്പെടുന്ന ഇതിന്റെ തെലുഗു നാമം പില്ലിയഡാഗു എന്നാണ്‌.

രസഗുണങ്ങൾ[തിരുത്തുക]

മധുര തിക്ത രസവും, ഗുരു സ്നിഗ്ധ ഗുണവുമുള്ള ഇതിന്റെ വീര്യം ഉഷ്ണവും വിപാകം മധുരവുമാണ്‌.

ഘടന[തിരുത്തുക]

ഏകവർഷമായും ചിലപ്പോൾ ബഹുവർഷിയായും കാണപ്പെടുനതും പടർന്നു വളരുന്നതുമായ ഒരു വള്ളിച്ചെടിയാണിത്. ഇളം തണ്ടുകൾ, കായ്കൾ എന്നിവ രോമത്താൽ മൂടപ്പെട്ടിരിക്കും. ഈ രോമങ്ങൾ മനുഷ്യന്റെ ശരീരത്തിൽ സ്പർശിച്ചാൽ ചൊറിച്ചിൽ വരാറുമുണ്ട്. ഇലകൾക്ക് മൂന്ന് ഇതളുകൾ ആണ്‌ ഉള്ളത്. 5 മുതൽ 300 സെന്റീമീറ്റർ വരെ നീളമുള്ളതും അനേകം പൂക്കളുള്ളതുമായ പൂങ്കുലകൾ പത്രകക്ഷത്തിൽ നിന്നും ഉണ്ടാകുന്നു. പൂങ്കുലകൾക്ക് സഹ പതങ്ങളൂം സഹപത്രകങ്ങളും ഉണ്ട്. പുഷ്പങ്ങളുടെ നിറം നീല കലർന്നതാണ്‌. അവ ഉണങ്ങുമ്പോൾ കറുത്ത നിറമായി ത്തീരുന്നു. പൂക്കൾക്ക് ബാഹ്യ ദളങ്ങൾ 5 എണ്ണം വീതമാണ്‌ ഉള്ളത്. പത്ത് കേസരങ്ങൾ ദ്വിസന്ധിതമായതാണ്‌. അതിൽ ഒൻപതെണ്ണം ചേർന്ന് ഒരു കറ്റയായി സ്ഥിതിചെയ്യുന്നു. 8-12 സെന്റീമീറ്റർ നീളമുള്ളതും ഒന്നര സെന്റീമീറ്റർ വീതിയുള്ളതുമായ കായ്കൾ രോമങ്ങൾ കൊണ്ട് പൊതിഞ്ഞവയാണ്‌. ഒരു കായിൽ 5-6 വിത്തുകൾ വരെ ഉണ്ടായിരിക്കും. മിനുസമാർന്നതും, കറുപ്പ്, തവിട്ട് നിറങ്ങളോടുകൂടിയ വിത്തുകൾക്ക് ചിലപ്പോൾ പുള്ളികളും കാണാറുണ്ട്.

വിത്തുകളിൽ 25.03% പ്രോട്ടീൻ, 6.75% ഖനിജങ്ങൾ, 3.95% കാൽസ്യം, 0.02% സൾഫർ അത്രയും തന്നെ മാംഗനീസ് എന്നിവയും ഡൈഹഐഡ്രോക്സിഫിനൈൽ അലനിൻ, ഗ്ലൂട്ടാത്തിയോൺ, ലെസിഥിൻ, ഗാലിക് അമ്‌ളം, ഗ്ലൂക്കോസൈഡ് എന്നീ രാസ പദാർത്ഥങ്ങളും അടങ്ങിയിരിക്കുന്നു. ഈ പദാർത്ഥങ്ങൾ തന്നെ അവയുടെ വേരിലും അടങ്ങിയിരിക്കുന്നു. വേര്‌, വിത്ത്, ഫലരോമം എന്നിവയാണ്‌ നായ്ക്കുരണയുടെ ഔഷധയോഗ്യമായ ഭാഗങ്ങൾ

ചിത്രശാല[തിരുത്തുക]

Commons:Category
വിക്കിമീഡിയ കോമൺസിലെ Mucuna_pruriens എന്ന വർഗ്ഗത്തിൽ ഇതുമായി ബന്ധപ്പെട്ട കൂടുതൽ പ്രമാണങ്ങൾ ലഭ്യമാണ്:
"http://ml.wikipedia.org/w/index.php?title=നായ്ക്കുരണ&oldid=1847842" എന്ന താളിൽനിന്നു ശേഖരിച്ചത്