നായ
വിക്കിപീഡിയ, ഒരു സ്വതന്ത്ര വിജ്ഞാനകോശം.
 |
||||||||||||||||||
|---|---|---|---|---|---|---|---|---|---|---|---|---|---|---|---|---|---|---|
 ലാബ്രഡോര് റിട്രീവര് ജനുസ്സിലെ ഒരു നായ
|
||||||||||||||||||
|
|
||||||||||||||||||
|
വളര്ത്തുമൃഗം
|
||||||||||||||||||
| ശാസ്ത്രീയ വര്ഗീകരണം | ||||||||||||||||||
|
||||||||||||||||||
|
|
||||||||||||||||||
| Canis lupus familiaris |
മനുഷ്യന് ഇണക്കി വളര്ത്തുന്ന ഒരു ഓമനമൃഗമാണ് നായ. ചെന്നായയുടെ ഉപജാതിയും(Subspecies) സസ്തനികളിലെ കാനിഡെ കുടുംബത്തിലെയും കാര്ണിവോറ ഓര്ഡറിലെയും അംഗങ്ങളുമാണ് നായ്ക്കള്. ഇവ മനുഷ്യനുമായി വളരെയേറെ ഇണങ്ങുന്നു. മനുഷ്യന് ആദ്യമായി ഇണക്കി വളര്ത്താന് ആരംഭിച്ച ജീവിയും നായയാണ്. ഇന്ന് കാവലിനും മറ്റുപലവിധ ജോലികള്ക്കും മനുഷ്യന് കൂട്ടിനുമായി (Companian animal) നായ്ക്കളെ ഉപയോഗിക്കുന്നു. ഇന്ന് എണ്ണൂറിലധികം നായ് ജനുസ്സുകള് ഉണ്ടെന്ന് കണക്കാക്കപ്പെടുന്നു. അവയില് ഏറ്റവും ചെറിയ ജനുസ്സായ ചിഹ്വാഹ മുതല് ഏറ്റവും വലിയ ജനുസ്സുകളായ ഐറിഷ് വുള്ഫ്ഹൗന്ഡും ഗ്രേറ്റ് ഡേനും വരെ ഉള്പ്പെടുന്നു.
ഉള്ളടക്കം |
[തിരുത്തുക] ചരിത്രം
മനുഷ്യസംസ്കാരം ഉടലെടുത്തപ്പോള് മുതല് നായ്ക്കളെ ഇണക്കി വളര്ത്താന് തുടങ്ങിയിരുന്നു എന്ന് കരുതപ്പെടുന്നു.15000 വര്ഷം പഴക്കമുള്ള നായുടെ അസ്ഥികൂടം ജര്മ്മനിയിലെ ബൊണ്-ഒബെര്കാസ്സെല് (ഇംഗ്ലീഷില്:Bonn-Oberkassel) എന്ന സ്ഥലത്തു നിന്നും കുഴിച്ചെടുക്കുകയുണ്ടായി.[1].ആ അസ്ഥികൂടം ലഭിച്ചത് ഒരു മനുഷ്യന്റെ ശവക്കല്ലറയില് നിന്നാണെന്നത് മനുഷ്യരും നായ്ക്കളും തമ്മിലുണ്ടായിരുന്ന പുരാതന ബന്ധത്തെ കാണിക്കുന്നു.
[തിരുത്തുക] നായയുടെ ശരീരഭാഗങ്ങള്
 |
|
[തിരുത്തുക] നായ് ജനുസ്സുകളുടെ വികസനം
ഇന്ന് എണ്ണൂറിലധികം നായ് ജനുസ്സുകളെ ലോകത്തിലെ വിവിധ കെന്നല് ക്ലബ്ബുകള് അംഗീകരിചിട്ടുണ്ട്. പക്ഷെ അംഗീകരിക്കപ്പെടാത്ത വളരെയധികം നായ് ജനുസ്സുകള് ഇനിയുമുണ്ട്. അമേരിക്കയും യൂറോപ്പും ഒഴിച്ചുള്ള ഭൂഖണ്ഡങ്ങളിലെ നായ് ജനുസ്സുകളില് കുറച്ച് എണ്ണത്തെ മാത്രമേ കെന്നല് ക്ലബ്ബുകള് അംഗീകരിച്ചിട്ടുള്ളൂ.
ചില നായ് ജനുസ്സുകള് വളരെയധികം വര്ഷങ്ങള് കൊണ്ട് രൂപപെട്ടിട്ടുള്ളതാനെങ്കിലും, ആധുനിക നായ് ജനുസ്സുകലെല്ലാം മനുഷ്യര് പലയിനം നായ്ക്കളില് നിന്ന് ശ്രദ്ധാപൂര്വമായ പ്രജനനത്തിലൂടെ ഉരുത്തിരിച്ചെടുത്തിട്ടുള്ളവയാണ്. ആരോഗ്യപ്രശ്നങ്ങള് ഒഴിവാക്കാനും ആകാരഭംഗി വര്ധിപ്പിക്കാനുമെല്ലാമാണ് ഇങ്ങനെ ചെയ്യുന്നത്. ഇങ്ങനെ ഉരുത്തിരിഞ്ഞുവന്നിട്ടുള്ള ഓരോ ജനുസ്സുകള്ക്കും തനതായ സ്വഭാവസവിശേഷതകളും ശരീരപ്രകൃതിയും ഉണ്ട്.
ഒരേ ജനുസ്സല്ലാത്ത നായ്ക്കള് ഇണ ചേര്ന്നുണ്ടാകുന്നതാണ് സങ്കരവര്ഗ്ഗ നായ്ക്കള് (Crossbreed). ഇത്തരം നായ്ക്കളുടെ മാതൃ-പിതൃ ജനുസ്സുകള് വ്യത്യസ്തമാണെങ്കിലും ബുദ്ധിയിലോ ആരോഗ്യത്തിലോ തനത് ജനുസ്സുകളുമായി (സമവര്ഗ്ഗ ജനുസ്സുകള്)(Purebreed) വ്യത്യാസമുണ്ടാകാറില്ല. എന്നിരുന്നാലും സങ്കരവര്ഗ്ഗ നായ്ക്കള് അവയുടെ മാതൃ-പിതൃ ജനുസ്സുകളുടെ മിശ്രസ്വഭാവവിശേഷങള് പ്രകടിപ്പിക്കും. അവയുടെ ശരീരപ്രകൃതിയും മാതൃ-പിതൃ ജനുസ്സുകളുടെ ശരീരപ്രകൃതികള് കലര്ന്നതായിരിക്കും. ഇങ്ങനെ സങ്കരവര്ഗ്ഗ നായ്ക്കളെ വീണ്ടും മറ്റു ജനുസ്സുകളുമായും സങ്കരവര്ഗ്ഗ നായ്ക്കളുമായും ഇണ ചേര്ത്ത് കാലക്രമേണ തനതായ സ്വഭാവസവിശേഷതകളും ശരീരപ്രകൃതിയും ഉള്ള പുതിയ ജനുസ്സുകള്ക്ക് രൂപം നല്കുന്നു.
[തിരുത്തുക] ശരീരപ്രകൃതി
ആധുനിക നായ് ജനുസ്സുകള് വലിപ്പത്തിലും രൂപത്തിലും പെരുമാറ്റരീതികളിലും വളരെയധികം വ്യത്യാസപ്പെട്ടിരിക്കുന്നു. എങ്കിലും അടിസ്ഥാനപരമായി നായ്ക്കളുടെ ശരീരപ്രകൃതി വേട്ടയാടുന്ന മാംസഭുക്കുകളുടേതാണ്(ഇംഗ്ലീഷില്:Predators). അതു കൊണ്ട് തന്നെ ആക്രമണത്തിനും മാംസവും എല്ലുകളും കടിച്ചു മുറിക്കാനും പ്രാപ്തമായ ശക്തിയുള്ള താടിയെല്ലുകളും മൂര്ച്ചയുള്ള പല്ലുകളും നായ്ക്കള്ക്കുണ്ട്.
[തിരുത്തുക] കേള്വി
നായ്ക്കള്ക്ക് 16 Hz വരെ താഴ്ന്ന ആവൃത്തിയുള്ള ശബ്ദവും 45 kHz വരെ ഉയര്ന്ന ആവൃത്തിയുള്ള ശബ്ദവും കേള്ക്കാന് സാധിക്കും(മനുഷ്യന്: 20Hz-20kHz).[2]. നായ്ക്കളുടെ ചെവി പലദിശകളിലേക്കും തിരിക്കാന് സാധിക്കുന്നത് കൊണ്ട് ശബ്ദത്തിന്റെ ഉറവിടം വളരെപ്പെട്ടന്ന് മനസ്സിലാക്കാന് കഴിയും. കൂടാതെ മനുഷ്യര്ക്ക് കേള്ക്കാന് കഴിയുന്നതിന്റെ നാലിരട്ടി ദൂരത്തുനിന്നുള്ള ശബ്ദം കേള്ക്കാനും നായകള്ക്ക് കഴിയും. ഉയര്ന്ന കേള്വിക്ഷമതയുള്ള നായ്ക്കളുടെ ചെവി ചെന്നായ വര്ഗക്കാരുടെ പൊലെ ഉയര്ന്നു നില്ക്കുന്നതാണെന്ന് കാണാം, വീണു കിടക്കുന്നതരം ചെവിയുള്ള നായ്ക്കള്ക്ക് കേള്വിശക്തി കുറവായിരിക്കും.
[തിരുത്തുക] കാഴ്ച
നായ്ക്കളുടെ കണ്ണിന്റെ വലിപ്പവും ആകൃതിയും ജനുസ്സനുസരിച്ച് വ്യത്യസ്തമാണ്. നായ്ക്കള് വര്ണ്ണാന്ധതയുള്ള ജീവികളാണ്, എങ്കിലും അവയുടെ കണ്ണിന്റെ റെറ്റിനയിലെ കാഴ്ചാനാഡികളുടെ പ്രത്യേകതകള് മൂലം അവക്ക് നന്നായി കാണാന് സാധിക്കുന്നു. പല ജനുസ്സ് നായ്ക്കള്ക്കും 2700 വരെ കാഴ്ചവട്ടം (Field of Vision) ഉണ്ട്. മറ്റ് ജനുസ്സുളെക്കാള് കാഴ്ചശക്തി കൂടുതലുള്ള ജനുസ്സുകളെ സൈറ്റ് ഹൗന്ഡ് (ഇംഗ്ലീഷില് Sight Hound) എന്ന വിഭാഗത്തില് പെടുത്തിയിരിക്കുന്നു.
[തിരുത്തുക] ഘ്രാണനം
നായ്ക്കള്ക്കളുടെ മൂക്കില് ഒരു തപാല് സ്റ്റാമ്പിന്റെ അത്രയും സ്ഥലത്ത് ഏകദേശം 50 ലക്ഷം ഘ്രാണസംവേദിനീ കോശങ്ങള് ഉണ്ടന്നാണ് കണക്കാക്കപ്പെടുന്നത്. ഇത് നായ്ക്കളെ വളരെ നല്ല മണം പിടിക്കലുകാര് ആക്കുന്നു. നായ്ക്കളില് തന്നെ ചില ജനുസ്സുകള്ക്ക് മണം പിടിക്കാനുള്ള കഴിവ് മറ്റുള്ള ജനുസ്സുകളെ അപേക്ഷിച്ച് കൂടുതലായിരിക്കും ഇത്തരം ജനുസ്സുകളെ സെന്റ് ഹൗന്ഡ്(ScentHound) എന്ന വിഭാഗത്തില് പെടുത്തിയിരിക്കുന്നു. നായ് ജനുസ്സുകളില് വച്ച് ഏറ്റവും കൂടുതല് ഘ്രാണശക്തി ബ്ലഡ്ഹൗണ്ട്(BloodHound) എന്ന ജനുസ്സിനാണ്.
[തിരുത്തുക] രക്തചംക്രമണം
നായ്ക്കള്ക്ക് വളരെ കുറഞ്ഞ സമയം കൊണ്ട് തന്നെ വളരെയധികം ഊര്ജ്ജം ഉല്പ്പാദിപ്പിക്കാന് കഴിയും. ഹൃദയവും ശ്വാസകോശവും നായുടെ ശരീരത്തിനാനുപാതികമായി വലിപ്പം കൂടിയവ ആയതുകൊണ്ടാണിത് സാധിക്കുന്നത്. നായ്ക്കളുടെ രക്തത്തില് മനുഷ്യരെ അപേക്ഷിച്ച് ചുവന്ന രക്തകോശങ്ങള് കൂടുതലാണ്. സാധാരണ ഈ അധികമുള്ള രക്തകോശങ്ങള് നായുടെ പ്ലീഹയില് (spleen) സൂക്ഷിച്ചിരിക്കും. എപ്പോഴാണോ നായ്ക്കള്ക്ക് രക്തയോട്ടം കൂട്ടേണ്ട ആവശ്യകതയുണ്ടാകുന്നത് (ഉദാ: ഓട്ടം, മറ്റു നായ്ക്കളുമായി കടിപിടി), അപ്പോള് ഈ ചുവന്ന രക്താണുക്കള് രക്തത്തില് കലരുന്നു. ഈ സമയത്ത് ഹൃദയവും ശ്വാസകോശവും അവയുടെ പരമാവധി ശക്തിയിലായിരിക്കും പ്രവര്ത്തിക്കുന്നത്ത് അതിനാല് നായ്ക്കള്ക്ക് കൂടുതല് വേഗതയും മെയ്വഴക്കവും ലഭിക്കുന്നു. ഈ പ്രക്രിയ നായ്ക്കളുടെ ശരീരത്തിനുള്ളിലെ ചൂട് കൂടാന് ഇടയാക്കുന്നു. നായുടെ ശരീരത്തില് ചൂട് പുറത്തു കളയാന് സ്വേദഗ്രന്ഥികളില്ലാത്തതു കൊണ്ട് അവക്ക് വളരെ വേഗം വിശ്രമിക്കേണ്ടി വരുന്നു. നായ്ക്കുട്ടികളില് ഇത് എപ്പോഴും ദര്ശിക്കാവുന്നതാണ്, അവ മുതിര്ന്ന നായ്ക്കളെക്കാള് കൂടുതല് സമയം കളികളില് മുഴുകുന്നതുകൊണ്ടാണിത്.
[തിരുത്തുക] ഭക്ഷണക്രമം
[തിരുത്തുക] ഭക്ഷണവസ്തുക്കള്
വളര്ത്തു നായ്ക്കള് മാംസഭുക്കുകളാണോ മിശ്രഭുക്കുകളാണോ ഏന്നതിനെക്കുറിച്ച് ഗവേഷകര്ക്കിടയില് ഇപ്പോഴും അഭിപ്രായവ്യത്യാസം നിലനില്ക്കുന്നുണ്ട്. കാര്ണിവോറ നിരയില് ഉള്പ്പെട്ടതു കൊണ്ട് മാത്രം നായ്ക്കള് പൂര്ണ്ണമാംസഭുക്കുകളാണെന്നു പറയാന് കഴിയില്ല. കാരണം മറ്റു പൂര്ണ്ണമാംസഭുക്കുകളെ പോലെ ചെറുതല്ല നായയുടെ ആന്തരാവയവങ്ങള്. കൂടാതെ നായ്ക്കള് അവയുടെ ശരീരപ്രവര്ത്തനങ്ങള്ക്ക് മാംസജന്യമായ ജീവകങ്ങള് കുറഞ്ഞ അളവിലേ ഉപയോഗിക്കുന്നുള്ളൂ. നായ്ക്കള്ക്ക് പല തരത്തിലുള്ള ഭക്ഷണസാധനങ്ങള്, പച്ചക്കറികളും ധാന്യങ്ങളും ഉള്പ്പടെ, ദഹിപ്പിക്കാനും അവയില് നിന്ന് ധാതുക്കളും ജീവകങ്ങളും ആഗിരണം ചെയ്യാനും കഴിയും. വളര്ത്തു നായ്ക്കളെ ശ്രദ്ധാപൂര്വമായ മാംസരഹിത ഭക്ഷണരീതിയിലൂടെയും ആരോഗ്യത്തോടെ വളര്ത്താന് സാധിക്കും അവയുടെ ഭക്ഷണസാധനങ്ങളില് മുട്ടയും പാലും ഉള്പ്പെടുത്തിയാല് മതിയാകും.
നായ്ക്കള് ഇടക്കിടെ പുല്ല് തിന്നാറുണ്ട്. ഇത് വയറ്റിലെ അനാവശ്യവസ്തുക്കളെ പുറത്തു കളയാനാണെന്നു വിശ്വസിക്കപ്പെടുന്നു. പുല്ല് വയറ്റിലെ വസ്തുക്കളുമായി കെട്ടിപ്പിണയുകയും ഛര്ദ്ദിയിലൂടെ ഈ വസ്തുക്കള് പുറത്തു വരികയും ചെയ്യുന്നു[3]. നായ്ക്കളില് ഛര്ദ്ദി സാധാരണമാണ്. നായ്ക്കള് ചവയ്ക്കാതെ കടിച്ചു വിഴുങ്ങുന്ന മൃഗങ്ങളായതു കൊണ്ട് വയറ്റിലെത്തുന്ന എല്ല്, രോമങ്ങള് എന്നിവ പുറത്തുകളയാനാണിത്.
[തിരുത്തുക] അപകടകാരികളായ വസ്തുക്കള്
മനുഷ്യര് കഴിക്കുന്ന പല ഭക്ഷണസാധനങ്ങളും നായ്ക്കള്ക്ക് അപകടം വരുത്തിവെക്കാറുണ്ട്. ചോക്ലേറ്റ് (തിയോബ്രോമിന് വിഷബാധ), ഉള്ളി, പച്ചയും ഉണങ്ങിയതുമായ മുന്തിരിങ്ങ എന്നിവ അതില് ചിലതാണ്[4]. കൂടാതെ ച്യൂയിംഗ് ഗം, മധുരീക്രിതികള് എന്നിവയും അപകടമുണ്ടാക്കുന്നു.
മുന്തിരിങ്ങയില് നിന്നുള്ള കടുത്ത അപകടം 2000-ആമാണ്ടില് മാത്രമാണ് തിരിച്ചറിഞ്ഞത്. വളരെ കുറഞ്ഞ അളവില് പോലും ഉണങ്ങിതോ പച്ചയോ ആയ മുന്തിരൈങ ഉള്ളില് ചെന്നാല് നായ്ക്കള്ക്ക് കടുത്ത വൃക്ക സ്തംഭനം (ഇംഗ്ലീഷ്:Acute Kidney Failure) ഉണ്ടാകുന്നു. ഇതിന്റെ കാരണം ഇതുവരെ കണ്ടെത്താന് കഴിഞ്ഞിട്ടില്ല.
പാകം ചെയ്ത എല്ലുകള് നായ്ക്കള്ക്ക് നല്കാന് പാടുള്ളതല്ല. ചൂട് എല്ലുകളുടെ രാസഘടന മാറ്റുന്നു അതുമൂലം എല്ല് ചവക്കുമ്പോള് അത് പിളര്ന്ന് ചെറിയ കഷ്ണങ്ങളാവുകയും ദഹനപ്രക്രിയക്ക് തടസ്സമുണ്ടാക്കുകയും ചെയ്യുന്നു.
മനുഷ്യരുടെ പല മരുന്നുകളും നായ്ക്കള്ക്ക് വിഷകരമാണ്. മദ്യം മനുഷ്യരിലുണ്ടാക്കുന്ന ദൂഷ്യഫലങ്ങള് നായ്ക്കളിലും ഉണ്ടാക്കുന്നു. പല ചെടികളും നായ്ക്കള്ക്ക് വിഷകരമാണ്[5].
[തിരുത്തുക] ബുദ്ധിശക്തി
നായ്ക്കള് ബുദ്ധിശക്തിയില് മുന്പില് നില്ക്കുന്ന മൃഗങ്ങളാണ്. ജനുസ്സനുസരിച്ച് നായ്ക്കളുടെ ബുദ്ധിശക്തിയില് ഏറ്റക്കുറച്ചിലുകള് കാണാം. ബോര്ഡര് കോളി, പൂഡില്, ജര്മന് ഷെപ്പേര്ഡ്, ഗോള്ഡന് റിട്രീവര്,ഡോബര്മാന് പിന്ഷര് എന്നീ ജനുസ്സുകളാണ് നായ്ക്കളില് ബുദ്ധിശക്തിയില് മുന്പില് നില്ക്കുന്നത്. ഈ ജനുസ്സുളെല്ലാം പരിശീലിപ്പിച്ചെടുക്കാന് എളുപ്പമുള്ളവയാണ്. അവ നിര്ദ്ദേശങ്ങളുടെ അര്ത്ഥം വേഗം ഗ്രഹിക്കുകയും അതിനനുസരിച്ച് പെരുമാറുകയും ചെയ്യുന്നു. മറ്റു പല ജനുസ്സുകള് നിര്ദേശങ്ങള് ഗ്രഹിക്കാന് താമസിക്കുമെങ്കിലും അവയുടെ കഴിവ് മറ്റു പല മേഖലകളിലും കാഴ്ചവെക്കുന്നു ഉദാ: മണം പിടിക്കല്, വേട്ടയാടല്.
നായ്ക്കള് പരിസരങ്ങളോട് വളരെയധികം ഇണങ്ങിച്ചേരുന്നവയായതിനാല് മനുഷ്യരുടെ പല സേവനങ്ങള്ക്കും ഉപയോഗസജ്ജമായ നായ ജനുസ്സുകള് തലമുറകളിലൂടെ വികസിച്ചു വന്നിട്ടുണ്ട്. ഇന്ന് പല മെഖലകളിലും നായ്ക്കള് ഒരവിഭാജ്യഘടകമാണ്. നിയമപരിപാലനം, രക്ഷാപ്രവര്ത്തനം, കാവല്, കന്നുകാലി മേക്കല്, അന്ധര്ക്ക് വഴികാട്ടല് തുടങ്ങിയവ അതില് ചിലത് മാത്രം. എന്നിരുന്നാലും സങ്കീര്ണ്ണമായ കാര്യങ്ങള് നായ്ക്കള്ക്ക് പഠിക്കാന് കഴിയുകയില്ല. അതിനാല് അന്ധരെ സഹായിക്കുന്ന നായ്ക്കള്ക്ക് അപകടകരമായ സാഹചര്യങ്ങള് ഒഴിവാക്കാന് പ്രത്യേക പരിശീലനം നല്കുന്നു.
[തിരുത്തുക] നായ്ക്കളുടെ ആരോഗ്യം
[തിരുത്തുക] ജീവിത കാലം
ജനുസ്സനുസരിച്ച് നായയുടെ ജീവിതകാലം വ്യത്യാസപ്പെട്ടിരിക്കുന്നു. ശരാശരി 10 മുതല് 12 വര്ഷം വരെയാണ് നായ്ക്കളുടെ ആയുസ്സ്. പല ജനുസ്സുകളും ഉദാ: ബുള് ഡോഗ്,ഗ്രേറ്റ് ഡേന്,മാസ്റ്റിഫ് കുറച്ചു കാലം മാത്രമേ ജീവിക്കാറുള്ളൂ 6 മുതല് 7 കൊല്ലം വരെ.[6] ആയുസ്സ് കൂടിയ ജനുസ്സുകളായ പൂഡില്,ബോര്ഡര് ടെറിയര്,ഡാഷ്ഹണ്ട് എന്നിവക്ക് 14 മുതല് 15 വര്ഷം വരെ ആയുസ്സുണ്ട്.[7] സങ്കരവര്ഗ്ഗ നായകള് പൊതുവേ തനത് ജനുസ്സുകളേക്കാള് കൂടുതല് കാലം ജീവിക്കുന്നു.
[തിരുത്തുക] അസുഖങ്ങള്
നായ്ക്കള്ക്ക് പലതരം അസുഖങ്ങള് വരാറുണ്ട്. മിക്ക രോഗങ്ങളും നായ്ക്കളില് മാത്രം കാണുന്നവയാണെങ്കിലും ചിലത് മനുഷ്യരിലേക്കും പടര്ന്നുപിടിക്കാറുണ്ട്.
നായ്ക്കള്ക്ക് വരുന്ന അസുഖങ്ങളില് നായ്ക്കള്ക്കും മനുഷ്യര്ക്കും ഒരു പൊലെ മാരകമായതാണ് പേവിഷബാധ(Rabies) അല്ലെങ്കില് ജലഭയം(Hydrophobia). പേവിഷബാധമൂലം സസ്തനികളില് എന്സെഫലിറ്റിസ് അതായത് തലച്ചോര് വലുതാവുന്ന അവസ്ഥയുണ്ടാകുകയും മരണം സംഭവിക്കുകയും ചെയ്യുന്നു. പ്രതിരോധ കുത്തിവെപ്പിലൂടെ മാത്രമേ പേവിഷബാധ തടയാന് കഴിയൂ. നായ്ക്കള്ക്ക് വരുന്ന മറ്റു രണ്ട് മാരകരോഗങളാണ് പാര്വൊ, ഡിസ്റ്റംബര് എന്നിവ. ഇവക്കും ഫലപ്രദമായ പ്രതിരോധ കുത്തിവെപ്പ് നിലവിലുണ്ട്. ഇവ കൂടാതെ പരമ്പരാഗതമായി വരുന്ന രോഗങ്ങളും നായ്ക്കളില് കാണാറുണ്ട്. കൂടാതെ മനുഷ്യരില് കാണപ്പെടുന്നത് പോലെ ഹൃദ്രോഗം, വൃക്ക രോഗങ്ങള്, കാന്സര് മുതലായവയും നായ്ക്കളില് കാണപ്പെടാറുണ്ട്.
[തിരുത്തുക] പരാദങ്ങള്
പരാദബാധ നായ്ക്കളില് വളരെയധികം കാണപ്പെടുന്നുണ്ട്. സാധാരണ ചെള്ള്, പേന്, വിര മുതലായ പരാദബാധ നായ്ക്കള്ക്കുണ്ടാകും. നാടവിര, കൊക്കപ്പുഴു, കുഴല്വിര എന്നിവ നായ്ക്കളില് കാണപ്പെടുന്നു. പല വിരകളും ഗര്ഭാവസ്ഥയില് തന്നെ നായ്ക്കുട്ടികളിലേക്കു പ്രവേശിക്കുന്നു. ഇവക്കെല്ലാം ഫലപ്രദമായ ചികിത്സകള് ഇന്ന് നിലവിലുണ്ട്.
[തിരുത്തുക] പ്രജനനം
വളര്ത്തുനായ്ക്കള് സാധാരണയായി ലൈംഗികമായി പ്രായപൂര്ത്തിയാവുന്നത് 6 മാസം മുതല് 12 മാസം വരെയുള്ള പ്രായത്തിലാണ്. ചെറിയ ജനുസ്സുകള് വലിയവയേക്കാള് വേഗത്തില് പ്രായപൂര്ത്തിയാവുന്നു. ചില വലിയ ജനുസ്സുകളില് പ്രായപൂര്ത്തിയാവാന് 2 വര്ഷം വേണ്ടി വരാറുണ്ട്. മിക്ക ജനുസ്സിലെ പെണ് നായകളും 6-12 മാസത്തിനുള്ളില് ആദ്യത്തെ മദിചക്രത്തിലൂടെ (ഇംഗ്ലീഷ്:Estrous cycle) കടന്നു പോകുന്നു. ഇതിന്റെ മൂര്ധന്യാവസ്ഥയിലാണ് പെണ് നായ ശാരീരികമായും മാനസികമായും ഇണ ചേരലിന് സജ്ജമാകുന്നത്. വര്ഷത്തില് രണ്ട് തവണ മാത്രമേ നായ്ക്കള്ക്ക് മദി ചക്രം ഉണ്ടാവുകയുള്ളൂ.
നായ്ക്കളുടെ സാധാരണ ഗര്ഭകാലം 56 മുതല് 72 ദിവസം വരെയാണ്, ഇതില് ഏറ്റക്കുറച്ചിലുകള് കാണാറുണ്ട്. സാധാരണ ഒരു പ്രസവത്തില് ആറ് കുട്ടികളാണ് ഉണ്ടാവുക, പക്ഷേ കുട്ടികളുടെ എണ്ണത്തില് ജനുസ്സനുസരിച്ച് വലിയ വ്യത്യാസങ്ങള് കാണും. വളരെ ചെറിയ ജനുസ്സുകള്ക്ക് അതായത് ടോയ് ഡോഗ്സ് ഒരു പ്രസവത്തില് നാല് കുട്ടികളില് കൂടുതല് ഉണ്ടാവാറില്ല. എന്നാല് വലിയ ജനുസ്സുകള്ക്ക് ഒരു പ്രസവത്തില് 12 കുട്ടികള് വരെ ഉണ്ടാകുന്നു. ഒരു പ്രസവത്തില് 24 കുട്ടികളെ പ്രസവിച്ച ഇംഗ്ലീഷ് മാസ്റ്റിഫ് ജനുസ്സില് പെട്ട നായയാണ് ഇപ്പോള് ലോകറെക്കോഡിനുടമ.[8]
[തിരുത്തുക] മനുഷ്യരുമായുള്ള ബന്ധം
നായകള് വളരെ സാമൂഹ്യ ബോധം പ്രകടിപ്പിക്കുന്നവയാണ്. മനുഷ്യരുടെ ജീവിത-സാമൂഹിക സാഹചര്യങ്ങളുമായി നായ്ക്കള് വളരെയധികം ഇണങ്ങിച്ചേരാനുള്ള കഴിവ് തന്മൂലം അവയ്ക്കുണ്ട്. മനുഷ്യരോടൊത്ത് കളിക്കുന്നതിലും മനുഷ്യരാല് പരിശീലിപ്പിക്കപ്പെടുന്നതിലും നായ്ക്കള് സന്തോഷം കണ്ടെത്തുന്നു. മനുഷ്യരുനായുള്ള ഈ ഒത്തിണക്കം പണ്ട് കാലത്ത് നായ്ക്കളെ ഉപയോഗിച്ച് ഫലപ്രദമായ വേട്ടകള് നടത്താന് സഹായിച്ചിരുന്നു.
നായ്ക്കള് സമൂഹജീവികളായതു മൂലം കൂട്ടത്തിലെ നേതാവിനോടുള്ള വിശ്വസ്തതയും കരുതലും ഉടമസ്ഥനോട് കാണിക്കുന്നു, ഇത് ജന്മനാലുള്ള വാസനയാണ്. എങ്കിലും മനുഷ്യരുടെ കാഴ്ചപ്പാടില് ഈ സ്വഭാവവിശേഷങ്ങള് സ്നേഹത്തിനോടും സൗഹൃദത്തിനോടും അടുത്തു നില്ക്കുന്നു. പല നായ് വളര്ത്തുകാരും ഒരു കുടുംബാംഗം എന്ന നിലയ്ക്കാണ് നായ്ക്കളെ കാണുന്നത്.
നായ്ക്കളെ മനുഷ്യര് പലതരം കാര്യങ്ങള്ക്ക് ഉപയോഗിക്കുന്നു, ജോലി ചെയ്യുന്ന നായ്ക്കളായി(ഇംഗ്ലീഷില് Working Dogs) പല ജനുസ്സുകളേയും ഉപയൊഗിക്കുന്നുണ്ട്.എങ്കിലും നായ്ക്കള് ഇന്ന് പ്രധാനമായും മനുഷ്യര്ക്ക് കൂട്ടിനായാണ് വളര്ത്തപ്പെടുന്നത്.നായ്ക്കള് മനുഷ്യനെ വളരെയധികം മേഖലകളില് സഹായിക്കുന്നതു കൊണ്ടും അവയുടെ വിശ്വസ്തത കൊണ്ടും മനുഷ്യന്റെ ഏറ്റവും അടുത്ത ചങ്ങാതി എന്ന പദവി നായ്ക്കള്ക്ക് ലഭിച്ചിരിക്കുന്നു. [9]
എന്നിരുന്നാലും നായ്ക്കളെ പല സംസ്കാരങ്ങളും വൃത്തിയില്ലാത്ത ജീവികളായി കണക്കാക്കുന്നു. പല ദേശങ്ങളിലും നായയുടെ ഇറച്ചി ഭക്ഷണമായി ഉപയോഗിക്കുന്നുണ്ട് ഉദാ: ചൈന,കൊറിയ,ഹോങ് കോങ്[10][11] ഭാരതത്തിലെ മിസോറം,നാഗാലാന്ഡ് എന്നീ സംസ്ഥാനങ്ങളിലും നായ ഇറച്ചി ഭക്ഷിക്കാറുണ്ട്.[12][13] ഒട്ടുമിക്ക സ്ഥലങ്ങളിലും നായ് ഇറച്ചി തിന്നുന്നത് മോശമായി കണക്കാക്കി സാമൂഹികമായി വിലക്കിയിരിക്കുന്നു.
[തിരുത്തുക] നായ്ക്കള് മതങ്ങളില്
[തിരുത്തുക] ചൈനീസ് വിശ്വാസം
ചൈനീസ് ജ്യൊതിഷത്തില് ആരാധിക്കപ്പെടുന്ന 12 മൃഗങ്ങളില് ഒന്നാണ് നായ. ചൈനീസ് പുതുവര്ഷത്തിന്റെ രണ്ടാമത്തെ ദിവസം ചൈനീസ് ജനത എല്ലാ നായകളുടെയും ജന്മദിനമായി കണക്കാക്കുന്നു.
[തിരുത്തുക] ക്രിസ്തുമതവിശ്വാസം
ക്രിസ്തുമതത്തില് 1300ല് ഫ്രാന്സില് ജീവിച്ചിരുന്ന വിശുദ്ധ റൊക്കസ്(ഇംഗ്ലീഷ്:Saint Rochus) നായ്ക്കളുടെ രക്ഷകനാണെന്ന് വിശ്വസിക്കപ്പെടുന്നു. ആതുരസേവനത്തിനിടെ അദ്ദേഹത്തിന് പ്ലേഗ് രോഗം ബാധിച്ചു. മരണം വരിക്കുന്നതിനായി കാട്ടിലേക്കുപോയ അദ്ദേഹത്തെ ഒരു നായ ഭക്ഷണമെത്തിച്ചു സഹായിച്ചുവെന്നും അങണെ അദ്ദേഹം രോഗവിമുക്തനായെന്നും വിശ്വസിക്കപ്പെടുന്നു. ഓഗസ്റ്റ് 16 വിശുദ്ധ റൊക്കസ് ദിനമായി ആചരിക്കുന്നു.[14]
[തിരുത്തുക] ഇസ്ലാം മതവിശ്വാസം
ഇസ്ലാം മതവിശ്വാസപ്രകാരം നായകള് അശുദ്ധ ജീവികളായികണക്കാക്കപ്പെടുന്നു. തന്മൂലം നായ്ക്കളെ വളര്ത്തുന്ന ഇസ്ലാം മതക്കാര് വളരെ കുറവാണ്. പ്രവാചകനായ മുഹമ്മദ് നബിയുടെ വചനപ്രകാരം വേട്ടയാടുന്നതിനും കാലിമേയ്ക്കുന്നതിനും കാവലിനും അല്ലാതെ നായ്ക്കളുമായുള്ള ബന്ധം ഒരു മുസ്ലീമിന്റെ നല്ല പ്രവര്ത്തികള്ക്ക് എതിരാണ്. നായകളെ സ്പര്ശിച്ചാല് ഏഴു തവണ ശുദ്ധജലത്തില് കഴുകണമെന്നും അതില് ഒരു തവണ (കളി)മണ്ണ് കലര്ത്തിയ വെള്ളമായിരിക്കണമെന്നും ഇസ്ലാം നിഷ്കര്ഷിക്കുന്നു.എങ്കിലും നായ മുസ്ലിങ്ങളുടെ ഒരു വെറുക്കപ്പെട്ട ജീവിയാണെന്ന ധാരണ തെറ്റാണ്.അബൂ ഹുറൈറ റിപ്പോര്ട്ട് ചെയ്ത ഒരു ഹദീസില് ഒരു വേശ്യ ദാഹിച്ചു വലഞ്ഞ ഒരു നായക്ക് തന്റെ പാദരക്ഷ ഉപയോഗിച്ച് കിണറ്റിലിറങ്ങി വെള്ളം കോരിക്കൊടുത്ത കാരണത്താല് സ്വര്ഗ്ഗത്തില് പ്രവേശിച്ച ചരിത്രം ഇസ്ലാം പഠിപ്പിക്കുന്നുണ്ട്. ഒരു ജീവി എന്ന നിലക്ക് നായയെ സ്നേഹിക്കാന് തന്നെയാണ് ഇസ്ലാം പഠിപ്പിക്കുന്നത്.
[തിരുത്തുക] ആധാരസൂചിക
- ↑ Archaeology.org
- ↑ നായ്ക്കളുടെ കേള്വി ശക്തി
- ↑ http://www.wonderquest.com/DogsGrass.htm എന്തു കൊണ്ട് നായ്ക്കള് പുല്ല് തിന്നുന്നു?]
- ↑ നായ്ക്കളിലെ വിഷബാധ
- ↑ Duncan, K. L.; W. R. Hare and W. B. Buck (1997-01-01). "Malignant hyperthermia-like reaction secondary to ingestion of hops in five dogs". Journal of the American Veterinary Medical Association 210 (1): 51-4. PubMed
- ↑ നായ്ക്കളുടെ ആയുസ്സ്
- ↑ നായ്ക്കളുടെ ആയുസ്സ്
- ↑ ലോകറെക്കോര്ഡ് - ഒരു പ്രസവത്തിലെ ഏറ്റവും കൂടുതല് നായ്ക്കുട്ടികള്
- ↑ എങ്ങനെ നായ്ക്കള്ക്ക് മനുഷ്യന്റെ ഏറ്റവും അടുത്ത ചങ്ങാതി എന്ന പദവി ലഭിച്ചു.
- ↑ BBC Dog Meat Consumption in countries
- ↑ നായ് ഇറച്ചി - ചൈനയുടെ വിശിഷ്ടവിഭവം - ബിബിസിയില് നിന്ന്
- ↑ Hindu.Com Dog Meat consumption in Mizoram
- ↑ Dog Meat consumption in Nagaland
- ↑ വിശുദ്ധ റൊക്കസ്
[തിരുത്തുക] മറ്റ് ലിങ്കുകള്
- ഇന്ഡ്യന് കെന്നല് ക്ലബ്ബിന്റെ ഔദ്യോഗിക വെബ്സൈറ്റ്
- ഏറ്റവും ബുദ്ധിയുള്ള 10 നായ ജനുസ്സുകള്
- American Kennel Club
- Australian National Kennel Club
- Canadian Kennel Club
- Fédération Cynologique Internationale (FCI) - World Canine Organisation
- FCI International breed standards
- The Kennel Club (UK)
- New Zealand Kennel Club
