ഡെമോക്രാറ്റിക് പാര്ട്ടി (അമേരിക്കന് ഐക്യനാടുകള്)
വിക്കിപീഡിയ, ഒരു സ്വതന്ത്ര വിജ്ഞാനകോശം.
| ഡെമോക്രാറ്റിക് പാര്ട്ടി | |
| പ്രമാണം:Democratslogo.svg | |
| Party Chairman | ടിം കൈന |
|---|---|
| Senate Leader | Joe Biden (President of The U.S. Senate) Robert Byrd (Senate president pro tempore) Harry Reid (majority leader) |
| House Leader | Nancy Pelosi (speaker) Steny Hoyer (majority leader) |
| Founded | 1828 (modern)[1] 1792 (historic) |
| Headquarters | 430 South Capitol Street SE Washington, D.C. 20003 |
| Political ideology | Historical: Classical liberalism Bimetallism States' rights Modern: Social liberalism Progressivism Third Way Center-left |
| Political position | Fiscal: Center, Center left Social: Center, Center left |
| International affiliation | None |
| Seats in the Senate |  [2] |
| Seats in the House of Representatives |  |
| Color(s) | Blue (unofficial) |
| Website | www.democrats.org |
ഡെമോക്രാറ്റിക് പാര്ട്ടി അമേരിക്കന് ഐക്യനാടുകളിലെ രണ്ടു പ്രധാന രാഷ്ട്രീയ കക്ഷികളില് ഒന്നാണ്. ഇപ്പോഴത്തെ അമേരിക്കന് കോണ്ഗ്രസിന്റെ (110-ാമത് കോണ്ഗ്രസ്) ഇരു സഭകളിലും, അതായത് ജനപ്രതിനിധി സഭയിലും സെനറ്റിലും, ഡെമോക്രാറ്റിക് പാര്ട്ടിക്ക് ഭൂരിപക്ഷമുണ്ട്. പക്ഷേ നിലവില് അമേരിക്ക ഭരിക്കുന്നത് റിപബ്ലിക്കന് പാര്ട്ടിയാണ്. സംസ്ഥാനങ്ങളുടെ ഗവര്ണര് സ്ഥാനത്തിലും ഡെമോക്രാറ്റിക് പാര്ട്ടിക്ക് മുന്തൂക്കമുണ്ട്.
1830കളിലാണ് “ഡെമോക്രാറ്റിക് പാര്ട്ടി” എന്ന പേര് പ്രയോഗത്തില് വന്നു തുടങ്ങിയതെങ്കിലും പതിനെട്ടാം നൂറ്റാണ്ടിന്റെ അവസാന ദശകത്തില് തോമസ് ജെഫേഴ്സണ് സ്ഥാപിച്ച ഡെമോക്രാറ്റിക്-റിപബ്ലിക്കന് പാര്ട്ടിയുടെ പിന്തുടര്ച്ചയാണ് തങ്ങളെന്ന് ഡെമോക്രാറ്റുകള് അവകാശപ്പെടുന്നു. 1896-ല് വില്യം ജെന്നിങ്സ് ബ്രയാന് നേതൃസ്ഥാനത്തെത്തിയതു മുതല് സാമ്പത്തിക കാര്യങ്ങളിലും മറ്റും റിപബ്ലിക്കന് പാര്ട്ടിയുടേതിനേക്കാള് ഇടതുപക്ഷ നിലപാടാണ് ഡെമോക്രാറ്റുകള് സ്വീകരിക്കുന്നത്. ഫ്രാങ്ക്ലിന് ഡി. റൂസ്വെല്റ്റിന്റെ നേതൃകാലത്താണ് പാര്ട്ടി മുറുകെപ്പിടിക്കുന്ന വ്യക്തിസ്വാതന്ത്ര്യവാദം, തൊഴില്വര്ഗ്ഗാഭിമുഖ്യം തുടങ്ങിയ നിലപാടുകള് സ്വാംശീകരിക്കപ്പെട്ടത്. 1960കളിലെ പൗരാവകാശ പ്രസ്ഥാനത്തിന്റെ അനുരണനങ്ങളും പാര്ട്ടി നയങ്ങളില് ഉണ്ടായിട്ടുണ്ട്. എന്നാല് വിയറ്റ്നാം യുദ്ധകാലം മുതല് വിദേശ സൈനിക ഇടപെടലുകളുടെ കാര്യത്തില് പാര്ട്ടി രണ്ടു തട്ടിലാണ്. ബില് ക്ലിന്റണ് നേതൃത്വത്തിലെത്തിയ 1990കള് മുതലിങ്ങോട്ട് രാഷ്ട്രീയ തത്വസംഹിതകളില് കടുംപിടുത്തം കാട്ടാത്ത മധ്യവര്ത്തി നയമാണ് പാര്ട്ടി പൊതുവേ പിന്തുടരുന്നത്.
[തിരുത്തുക] സംഘടനാ സംവിധാനം
ഡെമോക്രാറ്റിക് പാര്ട്ടിയുടെ ദേശീയ സമിതി (ഡി.എന്.സി.)യാണ് പാര്ട്ടിയുടെ പ്രചാരണകാര്യങ്ങള് നിയന്ത്രിക്കുന്ന പരമോന്നത സമിതി. പാര്ട്ടിയുടെ ആശയാടിത്തറ രൂപപ്പെടുത്തുന്നതും ഡി.എന്.സി.യാണ്. പ്രസിഡന്റ് തിരഞ്ഞെടുപ്പില് സുപ്രധാനമായ ഡെമോക്രാറ്റിക് ദേശീയ സമ്മേളനത്തിന്റെ മേല്നോട്ടം, തിരഞ്ഞെടുപ്പിനുള്ള ധനശേഖരണം, പ്രചാരണ തന്ത്രങ്ങള്ക്കു രൂപംനല്കല് എന്നിവയും ദേശീയ സമിതിയുടെ ചുമതലകളാണ്. ഓരോ സംസ്ഥാനത്തെയും പാര്ട്ടി സമിതിയുടെ അധ്യക്ഷന്മാരും ഉപാധ്യക്ഷന്മാരും, തിരഞ്ഞെടുക്കപ്പെടുന്ന ഇരുന്നൂറു പ്രതിനിധികളും, പോഷക സംഘടനകളുടെ പ്രതിനിധികളും ചേര്ന്നാണ് ഡെമോക്രാറ്റിക് ദേശീയ സമിതിക്ക് രൂപം നല്കുന്നത്. അംഗങ്ങള് ചേര്ന്ന് നാലുവര്ഷത്തേക്ക് അധ്യക്ഷനെ തിരഞ്ഞെടുക്കുന്നു. പാര്ട്ടിയുടെ പ്രതിനിധി അമേരിക്കന് പ്രസിഡന്റ് ആയിരിക്കുമ്പോള് സാധാരണഗതിയില് അദ്ദേഹം നിര്ദ്ദേശിക്കുന്നയാളെയാണ് അധ്യക്ഷനായി തിരഞ്ഞെടുക്കാറ്.
ദേശീയ സമിതി കൂടാതെ പ്രതിനിധി സഭ, സെനറ്റ്, സംസ്ഥാന നിയമനിര്മ്മാണ സഭകള് എന്നിവയിലേക്കുള്ള തിരഞ്ഞെടുപ്പുകളില് മേല്നോട്ടം വഹിക്കാനും വ്യത്യസ്ത സമിതികളുണ്ട്. യുവാക്കള്ക്കായി യംഗ് ഡെമോക്രാറ്റ്സ് ഓഫ് അമേരിക്ക, കോളജ് ഡെമോക്രാറ്റ്സ് എന്നിങ്ങനെ രണ്ടു പോഷകസംഘടനകള് പാര്ട്ടിക്കുണ്ട്.
[തിരുത്തുക] ആശയ സംഹിതകളും ശക്തികേന്ദ്രങ്ങളും
1890കള് മുതല് ഡെമോക്രാറ്റിക് പാര്ട്ടി ലിബറല് നിലപാടുകളോടാണ് ആഭിമുഖ്യം പുലര്ത്തുന്നത്. കര്ഷകര്, തൊഴിലാളികള്, തൊഴിലാളി സംഘടനകള്, മത-വംശീയ ന്യൂനപക്ഷങ്ങള് എന്നിവരോട് ആഭിമുഖ്യം പുലര്ത്തുന്ന പാര്ട്ടി നിയന്ത്രണങ്ങളില്ലാത്ത സമ്പദ്വ്യവസ്ഥയ്ക്ക് എതിരാണ്. 1930കള് മുതല് സാധുജനങ്ങള്ക്കായുള്ള ക്ഷേമപദ്ധതികള്ക്കുവേണ്ടി പാര്ട്ടി വാദിക്കുന്നുണ്ട്. ഇരുപതാം നൂറ്റാണ്ടിന്റെ മധ്യകാലഘട്ടത്തില് തൊഴില് സംഘടനകളായിരുന്നു പാര്ട്ടി നയങ്ങളില് സ്വാധീനം ചെലുത്തിയിരുന്നത്. 1960കളില് ശക്തിപ്പെട്ട ആഫ്രിക്കന്-അമേരിക്കന് വിഭാഗവും 1970കള്ക്കു ശേഷം സജീവമായ പരിസ്ഥിതി വാദികളും പാര്ട്ടിയുടെ ആശയ സംഹിതകളില് കാര്യമായ സ്വാധീനം ചെലുത്തുന്നുണ്ട്.
പൗരസ്വാതന്ത്ര്യം, സാമൂഹിക സ്വാതന്ത്ര്യം, തുല്യാവകാശം, ഉത്തരവാദിത്ത സമ്പദ് വ്യവസ്ഥ, സര്ക്കാര് ഇടപെടലുകള്ക്കു സാധ്യതയുള്ള വാണിജ്യനയം എന്നിവയാണ് സമീപ ദശകങ്ങളില് പാര്ട്ടി ഉയര്ത്തിപ്പിടിക്കുന്ന ആശയങ്ങള്. അടിയന്തര ഘട്ടങ്ങളില് ഉയര്ന്ന വരുമാനക്കാരില് നിന്നും കൂടുതല് നികുതി ഈടാക്കി ദാരിദ്ര്യവും സാമൂഹിക അസന്തുലിതാവസ്ഥയും ഇല്ലാതാക്കുക സര്ക്കാരിന്റെ ധര്മ്മമാണെന്നും പാര്ട്ടി പൊതുവേ വിശ്വസിക്കുന്നു.
പഴയ കോണ്ഫെഡറസിയില് അംഗങ്ങളായിരുന്ന തെക്കന് സംസ്ഥാനങ്ങളായിരുന്നു ഒരുകാലത്ത് ഡെമോക്രാറ്റുകളുടെ ശക്തികേന്ദ്രങ്ങള്. എന്നാല് ഈ സംസ്ഥാനങ്ങളില് ഭൂരിഭാഗവും പിന്നീട് റിപബ്ലിക്കന്മാരുടെ നിയന്ത്രണത്തിലായി. നിലവില് വടക്കു കിഴക്ക്, കാലിഫോര്ണിയ ഉള്പ്പെടുന്ന പസഫിക് തീരം, ഗ്രേറ്റ് ലേക്ക്സ് പ്രദേശങ്ങള്, മധ്യ-പശ്ചിമ സംസ്ഥാനങ്ങള് എന്നിവിടങ്ങളിലാണ് പാര്ട്ടിയുടെ അടിത്തറ ശക്തമായിട്ടുള്ളത്. സമീപകാലത്ത് വിര്ജീനിയ, അര്ക്കന്സാസ്, ഫ്ലോറിഡ എന്നീ തെക്കന് സംസ്ഥാനങ്ങളിലും, കൊളറാഡോ, മൊണ്ടാന എന്നീ സംസ്ഥാനങ്ങളിലും പാര്ട്ടി നിലമെച്ചപ്പെടുത്തിയിട്ടുണ്ട്. ന്യൂയോര്ക്ക് സിറ്റി, ലൊസ് ഏഞ്ചലസ്, ഷിക്കാഗോ, ഫിലാഡെല്ഫിയ, ഡിട്രോയിറ്റ്, സാന് ഫ്രാന്സിസ്കോ, ഡാലസ്, ബോസ്റ്റണ് തുടങ്ങിയ മഹാനഗരങ്ങള് ഡെമോക്രാറ്റിക് പാര്ട്ടിയുടെ ശക്തിദുര്ഗ്ഗങ്ങളാണെന്നു പറയാം.
[തിരുത്തുക] അവലംബം
- ↑ Aldrich, John H. (1995). Why Parties?: The Origin and Transformation of Political Parties in America, 6, 97. ISBN 0-226-01272-7 The hallmark of the "modern mass political party" is "mobilization of the electorate." Author credits the Democratic Party as the first party ever to achieve modern, mass-based status.
- ↑ Independents Joe Lieberman and Bernie Sanders caucus with the Democratic Party, giving the Democratic Caucus two extra seats (58/99). One Senate seat in Minnesota is still in dispute.
