ജോർജ്ജ് ബൈറൺ

ഇംഗ്ലീഷ് വിലാസം

http://ml.wikipedia.org/wiki/Lord_Byron

ജോർജ്ജ് ഗോർഡൻ ബൈറൻ
തോമസ് ഫിലിപ്പ്സ് രചിച്ച ബൈറന്റെ ഛായാചിത്രം
ജനനം	ജോർജ്ജ് ഗോർഡൻ ബൈറൻ 1788 22 ജനുവരി(1788-01-22) ഡോവർ, കെന്റ്, ഇംഗ്ലണ്ട്
മരണം	1824 ഏപ്രിൽ 19 (പ്രായം 36) മിസ്സോലോംഘി, ഗ്രീസ്
തൊഴിൽ	കവി, രാഷ്ട്രീയപ്രവർത്തകൻ
ദേശീയത	ബ്രിട്ടീഷ്
സാഹിത്യ പ്രസ്ഥാനം	കാല്പനികത
പ്രധാനപ്പെട്ട കൃതികൾ	ഡോൺ ഹുവാൻ, ചൈൽഡ് ഹാരോൾഡിന്റെ തീർത്ഥാടനം
കുട്ടികൾ	അഡ ലവ്‌ലേസ്, അലീഗ്രാ ബൈറൻ
Influences ജോൺ മിൽട്ടൺ, അലക്സാണ്ടർ പോപ്പ്, എഡ്മണ്ട് സ്പെൻസർ
Influenced അലക്സാണ്ടർ പുഷ്കിൻ, ഇവാൻ തുർജ്ജനീഫ്, മിഖായേൽ ലെർമോണ്ടോഫ്, എബെനസർ ഇലിയട്ട്, ന്യൂട്ട് ഹാംസൺ, ജോൺ ക്ലേയർ, ഷാർലട്ട് ബ്രോണ്ടി, എമിലി ബ്രോണ്ടി, ആനി ബ്രോണ്ടി, ഗുസ്താഫ് ഫ്ലോബേർ

ഒരു ആഗലകവിയും കാല്പനികപ്രസ്ഥാനത്തിന്റെ നായകന്മാരിൽ ഒരാളുമായിരുന്നു ജോർജ്ജ് ഗോർഡൻ ബൈറൻ അല്ലെങ്കിൽ ലോഡ് ബൈറൻ (ജനനം: ജനുവരി 22, 1788; മരണം: ഏപ്രിൽ 19,1824). ബൈറന്റെ ഏറ്റവും അറിയപ്പെടുന്ന രചനകളിൽ "അവൾ സൗന്ദര്യത്തിൽ നടക്കുന്നു"(She walks in beauty) "നാം തമ്മിൽ പിരിഞ്ഞപ്പോൾ", "അതിനാൽ നാം ഇനി ചുറ്റിത്തിരിയുകയില്ല" (So, we'll go no more a roving), എന്നീ ലഘുകവിതകളും "കുഞ്ഞു ഹാരോൾഡിന്റെ തീർത്ഥാടനം" "ഡോൺ ഹുവാൻ" എന്നീ ആഖ്യാനകവിതകളുമാണ്. ഡോൺ ഹുവാൻ ബൈറന്റെ മരണസമയത്ത് പൂർത്തിയായിരുന്നില്ല. ഇംഗ്ലീഷ് ഭാഷയിലെ ഒന്നാംകിട കവികളിൽ ഒരാളായി കരുതപ്പെടുന്ന അദ്ദേഹത്തിന്റെ രചനകൾ ഇന്നും വായിക്കപ്പെടുകയും അവയുടെ സ്വാധീനം നിലനിർത്തുകയും ചെയ്യുന്നു.

അതിരുകടന്ന കടബാദ്ധ്യത, എണ്ണിയാൽ തീരാത്ത പ്രേമബന്ധങ്ങൾ, സ്വയം തെരഞ്ഞെടുത്ത പ്രവാസജീവിതം, അഗമ്യഗമനം (Incest) തുടങ്ങിയ ഉപരിവർഗ്ഗസഹമെന്നു പറയപ്പെടുന്ന അതിക്രമങ്ങളുടെ പേരിലും ബൈറൻ അറിയപ്പെടുന്നു. "ഭ്രാന്തൻ, മോശക്കാരൻ, അറിയുമ്പോഴേ അപകടമാകുന്നവൻ" (Mad, Bad and dangerous to know) എന്ന് അദ്ദേഹത്തിനു കരോളീൻ ലാംബ് പ്രഭ്വി നൽകിയ വിശേഷണം പ്രസിദ്ധമാണ്.

ഇറ്റലിയും ആസ്ത്രിയയുമായുള്ള യുദ്ധത്തിൽ ഇറ്റലിയിലെ വിപ്ലവസംഘടനയായ കാർബണാരിയിൽ ബൈറൺ ഒരു പ്രാദേശിക നേതാവായി പ്രവർത്തിച്ചു. തുടർന്ന് ഓട്ടമൻ ആധിപത്യത്തിനെതിരെയുള്ള ഗ്രീക്കുകാരുടെ വിമോചന സമരത്തിൽ പങ്കെടുക്കാൻ അദ്ദേഹം ഗ്രീസിലെത്തി. ഗ്രീക്കു ജനത ഇതിന്റെ പേരിൽ അദ്ദേഹത്തെ ഗ്രീസ് ഒരു ദേശീയ വീരനായി കൊണ്ടാടുന്നു. ഗ്രീസിലെ മിസ്സോലോംഘിയിലായിരിക്കെ അദ്ദേഹം പനി ബാധിച്ചു മരിച്ചു.