ചേരസാമ്രാജ്യം
വിക്കിപീഡിയ, ഒരു സ്വതന്ത്ര വിജ്ഞാനകോശം.
 ചേര സാമ്രാജ്യം |
|
| ഔദ്യോഗിക ഭാഷ | തമിഴ് |
| തലസ്ഥാനങ്ങള് | വഞ്ചിമുത്തൂര് കാരൂര് |
| ഭരണസമ്പ്രദായം | രാജഭരണം |
| മുന്പ് ഉണ്ടായിരുന്ന രാജവംശങ്ങള് | അജ്ഞാതം |
| പിന്തുടര്ന്നുവന്ന രാജവംശങ്ങള് | സാമൂതിരിമാര്, കൊച്ചി രാജ്യം, തിരുവിതാംകൂര്, ഹൊയ്സാല സാമ്രാജ്യം, വിജയനഗര സാമ്രാജ്യം |
പുരാതനകാലം മുതല് 15-ആം നൂറ്റാണ്ടിന്റെ അവസാനം വരെ തെക്കേ ഇന്ത്യ ഭരിച്ചരുന്ന രാജവംശമാണ് ചേര സാമ്രാജ്യം. (തമിഴ്: சேரர்) ആദ്യകാല ചേരര് മലബാര് തീരം, കോയമ്പത്തൂര്, കരൂര്, സേലം എന്നീ സ്ഥലങ്ങള് ഭരിച്ചിരുന്നു. ഇന്ന് കേരളത്തിന്റെയും തമിഴ്നാട്ടിന്റെയും ഭാഗമാണ് ചേരന്മാര് ഭരിച്ചിരുന്ന പ്രദേശം. മറ്റ് രണ്ട് തമിഴ് രാജവംശങ്ങള് ചോളരും പാണ്ഡ്യരുമായിരുന്നു. സംഘകാലഘട്ടത്തിനു മുന്പ് (ക്രി.മു. 100 - 200) തന്നെ ഈ മൂന്നു സാമ്രാജ്യങ്ങളും സ്ഥാപിതമായി. സംഘകാലത്താണ് തമിഴ് ഭാഷയും സാഹിത്യവും വളര്ന്നത്. ചേര സാമ്രാജ്യത്തിന്റ്റെ ഭരണകാലഘട്ടം രണ്ടായി വിഭജിക്കപ്പെട്ടിരിക്കുന്നു. ആദ്യകാല ചേര സാമ്രാജ്യം സംഘകാലത്തും രണ്ടാം ചേര സാമ്രാജ്യം ക്രി.വ 800 മുതല് 1102 വരെയുമാണ്.
ചേര സാമ്രാജ്യത്തിന്റെ തലസ്ഥാനം വഞ്ചിമുത്തൂര്, കരൂര് എന്നിവ ആയിരുന്നു. ഈ സ്ഥലങ്ങള് ഇന്ന് എവിടെയാണ് എന്നതില് ചരിത്രകാരന്മാര്ക്ക് ഏകാഭിപ്രായത്തിലെത്തിച്ചേരാനായിട്ടില്ല. ചേര സാമ്രാജ്യം തമിഴ്നാട്ടിലെ കോയമ്പത്തൂര്, നാമക്കല്, കരൂര്, സേലം, ഈറോഡ്, കേരളത്തില് കൊച്ചിക്ക് അടുത്ത പ്രദേശങ്ങള് എന്നിവിടെ വ്യാപിച്ചു കിടന്നതായി കരുതുന്നു. കേരളത്തില് കൊടുങ്ങല്ലൂരിന് അടുത്ത് തിരുവഞ്ചിക്കുളം ചേര സാമ്രാജ്യത്തിന്റെ തലസ്ഥാനമയിരുന്നു എന്നും വിശ്വസിക്കുന്നു. അയല് രാജ്യങ്ങളുമായി ചേര രാജാക്കന്മാര് തുടര്ച്ചയായി യുദ്ധം ചെയ്തിരുന്നു. രാഷ്ട്രീയ സഖ്യങ്ങള് സ്ഥാപിക്കുവാന് ഇവര് ശത്രുരാജ്യങ്ങളുമായി വിവാഹബന്ധത്തില് ഏര്പ്പെട്ടിരുന്നു. ചേരരുടെ കാലത്ത് അവര് ഭരിച്ചിരുന്ന പ്രദേശങ്ങളില് വാണിജ്യം അഭിവൃദ്ധി പ്രാപിച്ചു. സുഗന്ധ ദ്രവ്യങ്ങള്, ആനക്കൊമ്പ്, തടി, മുത്ത്, രത്നങ്ങള് തുടങ്ങിയവ മലബാര് തീരത്തുകൂടെ ഈജിപ്ത്, റോം, ഗ്രീസ്, ഫിനീഷ്യ, അറേബ്യ, മെസൊപ്പൊട്ടേമിയ, പേര്ഷ്യ എന്നിവിടങ്ങളിലേക്ക് കയറ്റി അയച്ചിരുന്നു. കൊല്ലം, കൊടുങ്ങല്ലൂര് (മുസിരിസ്), തൃശ്ശൂരിനു അടുത്ത ഇയ്യല് , കോട്ടയം എന്നിവിടങ്ങളില് നിന്ന് കണ്ടെടുത്ത റോമന്, അറബി, ഗ്രീക്ക് നാണയങ്ങളില് നിന്ന് പുരാതനകാലത്തെ വാണിജ്യത്തിന്റെ തെളിവുകള് ലഭിക്കുന്നു. മുസിരിസ്, മകോതൈ, മഹോദയപുരം എന്നിങ്ങനെ അറിയപ്പെട്ടിരുന്ന ഇന്നത്തെ കൊടുങ്ങല്ലൂര് മലബാര് തീരത്തെ പ്രധാന തുറമുഖമായിരുന്നു. ചില കാലങ്ങളില് ചേരരാജാക്കന്മാരുടെ തലസ്ഥാനമായും മുസിരിസ് പ്രവര്ത്തിച്ചു. എറിട്രിയന് കാലഘട്ടത്തിലെ പെരിപ്ലസ് എന്നറിയപ്പെടുന്ന സഞ്ചാരികളുടെ രേഖകളില് മുസിരിസിനെ കുറിച്ചുള്ള വിവരണങ്ങള് കാണാം.
സംഘകാലത്ത് എഴുതപ്പെട്ട പതിറ്റുപത്ത് എന്ന കാവ്യത്തില് നിന്നാണ് ചേരരാജക്കന്മാരുടെ വംശീയതയെപ്പറ്റിയുള്ള വിവരങ്ങള് ലഭിക്കുന്നത്. കിട്ടാവുന്ന വിവരങ്ങള് വച്ച് അവരുടെ വംശാവലി ഇവിടെ കൊടുത്തിരിക്കുന്ന പ്രകാരം കീഴ്പ്പോട്ട് ആണ്. ഇതിനു പുറമേ പുറനാനൂറ് അകനാനൂര് എന്നിവയില് നിന്നും, രാജകാലത്തെക്കുറിച്ച് ചില വിവരങ്ങള് ലഭിക്കുന്നുണ്ട്.
ചക്രവര്ത്തിയുടെ അപരനാമങ്ങള്: പൊരുന്നൈത്തുറയന്
ചേര രാജാക്കന്മാരെ മൂന്നു കാലഘട്ടങ്ങളായി തരം തിരിക്കാം 1) ആദ്യകാല 2) ഇടക്കാല 3) വേണാട്ടു ചേരര്.
ഉള്ളടക്കം |
[തിരുത്തുക] ഒന്നാം ചേര രാജാക്കന്മാര്
- 1) പെരുംചോറ്റ് ഉതിയന് ചേരലാതന് ( കരികാല ചോളന്റെ സമകാലികന്)
- 2) ഇമയവര്മ്മന് നെടും ചേരലാതന് ( ഉതിയന്റെ പുത്രന്)
- 3) പല്യാനൈചെല് കെഴുകെട്ടുവന് ( ഉതിയന്റെ പുത്രന്, ഇമയന്റെ സഹൊദരന്) മഹാരജാവാകാതെ കീരീടാവകാശീയായി കഴിഞ്ഞു.
- 4) നാര്മുടിച്ചേരല്( കളംകായ്കണ്ണൈനാര്മുടി) മഹാരജാവാകാതെ കീരീടാവകാശീയായി കഴിഞ്ഞു.
- 5) ചെങ്കുട്ടുവന് ചേരന് (കപ്പല്പിറകോട്ടിയ വേല്കെഴുകെട്ടുവന്) കോടുങ്ങല്ലൂരിലെ കണ്ണകി പ്രതിഷ്ഠ നടത്തി. ആദ്യ കാല ചേരരില് ഏറ്റവും പ്രമുഖന്
- 6) ആട്ടു കോട്ട് പാട്ട് ചേരലാതന് യുദ്ധാനന്തരം പടവാളുമേന്തി പാട്ടും ആട്ടവും ആറ്റിയിരുന്നതു കൊണ്ടീ പേര്
- 7) ചെലവക്കടുംകോ അഴിയാതന് ( കപിലരുടെ സമകാലികന്)
- 8) പെരുംചേരല് ഇരുമ്പൊറൈ
- 9) ഇളം ചേരല് ഇരുമ്പൊറൈ
[തിരുത്തുക] ഒന്നാം ചേര സാമ്രാജ്യം
[തിരുത്തുക] രണ്ടാം ചേരസാമ്രാജ്യം
[തിരുത്തുക] കുലശേഖര ആഴ്വാര്
കുലശേഖരവര്മ്മ (ക്രി വ 800-820)[1] , രണ്ടാം ചേര സാമ്രാജ്യത്തിന്റെ സ്ഥാപകന്. തമിഴിലെ ഭക്തിപ്രബന്ധമായ പെരുമാള്തിരുമൊഴിയുടെയും, സംസ്കൃതത്തില് മുകുന്ദമാല യുടെയും കര്ത്താവ്. കുലശേഖര കാലത്താണ് കേരളത്തിലെ ക്ഷേത്രങ്ങളില് കൂത്തമ്പലങ്ങളും ദേവദാസി സമ്പ്രദായവും ആരംഭിച്ചത്. ക്ഷേത്ര ശില്പകലയും ചിത്രരചനയും ഇതേകാലഘട്ടത്തില് വികാസം നേടി. ക്ഷേത്രങ്ങളോടു ചേര്ന്നുള്ള പാഠശാലകള് പലതും(കാന്തളൂര്ശാല, പാര്ത്ഥിവപുരംശാല, തിരുവല്ലാശാല, മൂഴിക്കുളംശാല തുടങ്ങിയവ) വളരെ പ്രസിദ്ധമായി. ഗുരുകുല സമ്പ്രദായത്തിലൂന്നിയ ഈ ശാലകളിലെ വിദ്യാര്ത്ഥികള്ക്ക് താമസവും ഭക്ഷണവും സൌജന്യമായിരുന്നു.
ക്രിസ്തീയര്ക്കും ജൂതന്മാര്ക്കും കുലശേഖര ആഴ്വാര് ഒട്ടേറെ അവകാശാധികാരങ്ങള് അനുവദിച്ചുകൊടുത്തിരുന്നു.
[തിരുത്തുക] രാജശേഖരവര്മ്മ
കുലശേഖര പരമ്പരയിലെ രണ്ടാമത്തെ ചക്രവര്ത്തിയായ രാജശേഖരവര്മ്മയാണ് (ക്രി.വ. 820-844) കേരളീയനായ ചേരമാന് പെരുമാള് നായനാര്. ഇദ്ദേഹത്തിന്റെ കഥ ചേക്കിഴാര് പെരിയപുണാരണത്തില് വിവരിക്കുന്നുണ്ട്. ബാല്യകാലം തിരുവഞ്ചിക്കുളത്താണ് ചിലവഴിച്ചത്. അച്ഛന് സന്യാസം സ്വീകരിച്ചതോടെ അദ്ദേഹം ചക്രവര്ത്തിയായിത്തീരുകയായിരുന്നു. മാധവാചാര്യരുടെ ശങ്കരവിജയത്തിലും ശങ്കരാചാര്യരുടെ ശിവാനന്ദലഹരിയിലും രാജശേഖരവര്മ്മയെപ്പറ്റി പ്രതിപാദിക്കുന്നതിനാല് അദ്ദേഹം ശങ്കരാചാര്യരുടെ സമകാലികനായിരുന്നു എന്നാണ് അനുമാനിക്കപ്പെടുന്നത്. ചേരരാജാക്കന്മാരുടേതായി ലഭിച്ചിട്ടുള്ള ഏറ്റവും പഴക്കം ചെന്ന ശാസനം രാജശേഖരവര്മ്മയുടേതായ വാഴപ്പിള്ളി ശാസനം ആണ്. അദ്ദേഹം സുഹൃത്തായ സുന്ദരമൂര്ത്തി നായനാരുമൊത്ത് ദക്ഷിണേന്ത്യ മുഴുവനും ഉള്ള ശിവക്ഷേത്രങ്ങളിലേക്ക് തീര്ത്ഥയാത്ര നടത്തിയെന്നും തീരുവഞ്ചിക്കുളത്ത് വച്ച് രണ്ടു പേരും സമാധിയായെന്നും വിശ്വസിപ്പെടുന്നു.
[തിരുത്തുക] സ്ഥാണുരവിവര്മ്മ
ചേരമാന് പെരുമാളിനു ശേഷം ചക്രവര്ത്തിയായത് സ്ഥാണുരവി ആണ്. ക്രി.വ. 844 മുതല് 885 വരെ അദ്ദേഹം രാജ്യം ഭരിച്ചതായി കണക്കാക്കപ്പെടുന്നു. അദ്ദേഹത്തിന്റെ ഭരണത്തിലെ അഞ്ചാം വര്ഷമാണ് വേണാട്ടില് വച്ച് അവിടത്തെ നാടുവാഴി തരിസാപ്പള്ളി ശാസനം കൈമാറ്റം ചെയ്തത്. കൂടല്മാണിക്യം ക്ഷേത്രത്തിലും ഇദ്ദേഹത്തിന്റെ ഒരു ശാസനം ഉണ്ട്. ചോളചക്രവര്ത്തിയായ ആദിത്യചോളന്റെ സമകാലികനായിരുന്ന അദ്ദേഹം ചോളന്മാരുമായി നല്ല ബന്ധം പുലര്ത്തിയിരുന്നു. തില്ലൈസ്ഥാനം രേഖ ഇതിന് ഒരു തെളിവാണ്. തഞ്ചാവൂരിലെ ഒരു പ്രഭുവായ വിക്കി അണ്ണന് രണ്ടു പേരും ചേര്ന്നാണ് ചില സ്ഥാനമാനങ്ങള് ചാര്ത്തിക്കൊടുക്കുന്നത്. പല്ലവന്മാര്ക്കെതിരായ യുദ്ധത്തില് സ്ഥാണു രവി സൈനിക സഹായം ചോളന്മാര്ക്ക് കൊടുത്തിരിക്കാമെന്നും സിദ്ധാന്തങ്ങള് ഉണ്ട്. തരിസാപ്പള്ളി ശാസനത്തില് പറയുന്ന വിജയരാഗദേവര് സ്ഥാണുരവിയുടെ മരുമകന് ആണ്. ശങ്കരനാരായണീയം എന്ന ഗ്രന്ഥം രചിച്ച ശങ്കരനാരായണന് അദ്ദേഹത്തിന്റെ സഭയിലെ അംഗമായിരുന്നു. ഇക്കാലത്ത് മഹോദയപുരത്ത് പ്രസിദ്ധമായ ഒരു വാനനിരീക്ഷണശാല ഉണ്ടായിരുന്നു എന്ന് വിശ്വസിക്കപ്പെടുന്നു. സ്ഥാണു രവിയുടെ കാലത്താണ് പ്രസിദ്ധനായ അറബി വ്യാപാരിയായ സുലൈമാന് കേരളം സന്ദര്ശിച്ച് യാത്രാവിവരണം രേഖപ്പെടുത്തിയത്.
[തിരുത്തുക] രാമവര്മ്മ
സ്ഥാണു രവിയുടെ അനന്തരഗാമിയായ രാമവര്മ്മകുലശേഖരന് സാഹിത്യകലകളുടെ പ്രോത്സാഹകന് എന്ന നിലയിലാണ് പ്രസിദ്ധന്. ക്രി.വ. 885 മുതല് 917 വരെ അദ്ദേഹം ഭരണം നടത്തി എന്ന് കണക്കാക്കപ്പെടുന്നു. വാസുദേവഭട്ടതിരി അദ്ദേഹത്തിന്റെ സദസ്യനായിരുന്നു എന്നാണ് കരുതപ്പെടുന്നത്. രാമവര്മ്മ തന്റെ പുത്രിയെ ആദിത്യ ചോളന്റെ പുത്രനായ പരാന്തക ചോളന് വിവാഹം ചെയ്തു കൊടുത്തു എന്നും ചില പണ്ഡിതന്മാര് വിശ്വസിക്കുന്നു. വിദേശസഞ്ചാരിയായ മസൂദി ഇദ്ദേഹത്തിന്റെ കാലത്താണ് കേരളം സന്ദര്ശിച്ചത്.
[തിരുത്തുക] ഗോദരവിവര്മ്മ
ഗോദരവിവര്മ്മന് ക്രി.വ. 917 മുതല് 944 വരെ ചേരസാമ്രാജ്യാധിപതിയായി. നെടുമ്പുറംതളി, അവിട്ടത്തൂര്, ചോക്കൂര്, തൃപ്പൂണിത്തുറ, ഉദയംപേരൂര് എന്നിവിടങ്ങളില് നിന്നും അദ്ദേഹത്തിന്റേതായ ശാസനങ്ങള് ലഭിക്കുകയുണ്ടായി. ഇതിലൂടെ അദ്ദേഹത്തിന്റെ ഭരണകാലഘട്ടങ്ങളെക്കുറിച്ചുള്ള ധാരണ ലഭിക്കുന്നു. അദ്ദേഹത്തിന്റെ ഭരണകാലത്തില് സാമ്രാജ്യത്തിനു കീഴില് കേരളം മുഴുവനും ഉള്പ്പെട്ടിരുന്നു എന്ന് തെളിവുകള് ഉണ്ട്. എന്നാല് ഇക്കാലത്ത് ചോളന്മാര് ദക്ഷിണകേരളം ആക്രമിച്ചതോടെ അന്നു വരെയുണ്ടായിരുന്ന ചെര-ചോള ബന്ധം വഷളായി. എന്നാല് ദക്ഷിണകേരളത്തിലെ ആയ് രാജ്യം ചേര സാമ്രാജ്യത്തോട് ചേര്ക്കപ്പെട്ടതോടെ തെക്കന് പ്രദേശങ്ങളില് സംഘര്ഷാവസ്ഥ നിലനിന്നു.
വിജ്ഞാന് കേന്ദ്രങ്ങളായ വിഴിഞ്ഞവും കാന്തളൂരും സൈനിക കേന്ദ്രങ്ങളായി വികസിച്ചത് ഇക്കാലത്തായിരിക്കാം. ചോളന്മാര് തോല്പിച്ച് ശ്രിലങ്കയിലേക്ക് ഒാടിച്ച പാണ്ഡ്യരാജാവായ മാറവര്മ്മന് രാജസിംഹന് അദ്ദേഹം അഭയം നല്കിയതും ചോളന്മാരെ ചോടിപ്പിച്ചു.
[തിരുത്തുക] ഇന്ദുക്കോത വര്മ്മ
സ്ഥാണു രവിയുടെ മകനായ ഇന്ദുക്കോത വര്മ്മയാണ് അടുത്ത ചക്രവര്ത്തിയായത് .
[തിരുത്തുക] ഭാസ്കരരവിവര്മ്മ
[തിരുത്തുക] ഭാസ്കരരവിവര്മ്മ രണ്ടാമന്
[തിരുത്തുക] വീരകേരളന്
[തിരുത്തുക] രാജസിംഹന്
[തിരുത്തുക] ഭാസ്കരരവി മൂന്നാമന്
[തിരുത്തുക] രവിരാമവര്മ്മ
[തിരുത്തുക] രാമവര്മ്മ കുലശേഖരന്
[തിരുത്തുക] ചേരമാന് കഥ
[തിരുത്തുക] സംസ്കാരം, ഭാഷ
ഒമ്പതാം നൂറ്റാണ്ടില് മഹോദയപുരത്തെ ചേരന്മാര് അവരുടെ ശിലാലിഖിതങ്ങളില് മലയാളം അതിന്റെ ആദ്യകാലലിപിയില് ഉപയോഗിച്ചു. ഔദ്യോഗികരേഖകളില് ഇന്ത്യയിലെ ഒരു പ്രാദേശികഭാഷയുടെ ഉപയോഗത്തിന് ഇത് ഇന്ത്യാഉപഭൂഖണ്ഡത്തില്ത്തന്നെ ആദ്യ ഉദാഹരണങ്ങളിലൊന്നാണ്[2].
[തിരുത്തുക] സമകാലീന ചോളന്മാര്
- രാജരാജന് ക്രി.വ. 985-1016
- രാജേന്ദ്രന് പ്രഥമന് 1012- 1044
- രാജാധിരാജന് 1018-1054
- രാജേന്ദ്രദേവന് ദ്വിതീയന് 1052-1063
- വീരരാജേന്ദ്രന് 1063-1069
- അധിരാജന് 1067-1070
- കുലോത്തുംഗന് ഒന്നാമന് 1070-1122
[തിരുത്തുക] അവലംബം
- ↑ എ. ശ്രീധര മേനോന്, കേരള ചരിത്രം, എസ് വി, ചെന്നയ് ISBN 81 87156 00 7
- ↑ Social Science, Our Pasts-II, NCERT Text Book in History for Class VII, Chapter 9, The making of regional cultures, Page 122, ISBN 817450724
[തിരുത്തുക] കുറിപ്പുകള്
| ഇന്ത്യയിലെ മദ്ധ്യകാല സാമ്രാജ്യങ്ങള് | ||||||||||||
| സമയരേഖ: | വടക്കന് സാമ്രാജ്യങ്ങള് | തെക്കന് സാമ്രാജ്യങ്ങള് | വടക്കുപടിഞ്ഞാറന് സാമ്രാജ്യങ്ങള് | |||||||||
|---|---|---|---|---|---|---|---|---|---|---|---|---|
|
ക്രി.മു. 6-ആം നൂറ്റാണ്ട് |
|
|
(പേര്ഷ്യന് ഭരണം) |
|||||||||
