ഖുർ‌ആനിൽ അദ്ധ്യായാരംഭങ്ങളിലുള്ള കേവലാക്ഷരങ്ങൾ
ഖുർ‌ആനിലെ 29 അദ്ധ്യായങ്ങൾ ഒന്നോ അതിലധികമോ ദൈർഘ്യമുള്ള അറബി അക്ഷരങ്ങൾ കൊണ്ടാണ് ആരംഭിക്കുന്നത്. ഈ അക്ഷരങ്ങൾക്ക് ഏന്തെങ്കിലും തരത്തിലുള്ള ഒരു അർത്ഥവും ഇല്ല. തുടർന്നുള്ള വാക്യങ്ങളുമായി ഘടനാപരമായോ, അർത്ഥപരമായോ ബന്ധമില്ലാത്തവയാകയാൽ ഇവ വേറിട്ടു നിൽക്കുന്ന അക്ഷരങ്ങൾ (അറബി: ألحروف المقطة) എന്നറിയപ്പെടുന്നു. ഇവയുടെ അർത്ഥമോ വിശദീകരണമോ മുഹമ്മദ് നബി(സ)യും നൽകിയിട്ടില്ല.[1]
ഉദാ: അലിഫ് ലാം മീം, ത്വാഹ്
ഒന്നു മുതൽ അഞ്ച് അക്ഷരം വരെ ദൈർഘ്യമുള്ള പദങ്ങളായാണ് ഇവ കാണപ്പെടുന്നത്. ഇവയിൽ പല അദ്ധ്യായങ്ങളിലും ആവർത്തിച്ചവയും അവർത്തിക്കാത്തതുമായ പദങ്ങളുമുണ്ട്. നാല് അദ്ധ്യായങ്ങളുടെ പേരായി ആ അദ്ധ്യായങ്ങളുടെ ആരംഭത്തിലുള്ള കേവലാക്ഷരം ആണ് ഉപയോഗിക്കുന്നത്.
അദ്ധ്യായങ്ങളും കേവലാക്ഷരങ്ങളും[തിരുത്തുക]
കേവലാക്ഷരങ്ങളും ആ പദങ്ങൾ കൊണ്ട് ആരംഭിക്കുന്ന അദ്ധ്യായങ്ങളുടേയും പട്ടിക.
| കേവലാക്ഷരം | അറബി ലിപി | അദ്ധ്യായം / അദ്ധ്യായങ്ങൾ |
| അലിഫ് -ലാം -മീം | الَمَّ | അൽ ബഖറ: |
| അലിഫ് -ലാം -മീം -സ്വാദ് | الَمَّصَ | അഅ്റാഫ് |
| അലിഫ് -ലാം -റാ | الَرٰ | യൂനുസ് |
| അലിഫ് -ലാം -മീം -റാ | الَمّرٰ | റഅദ് |
| കാഫ് -യാ -ഐൻ -സ്വാദ് | كۤهٰيٰعۤصۤ | മർയം |
| ത്വാഹാ | طٰهٰ | ത്വാഹാ |
| ത്വാ -സീൻ -മീം | طٰسۤمّۤ | ശുഅറാ |
| ത്വാ -സീൻ | طٰسۤ | നംല് |
| യാസീൻ | يٰسۤ | യാസീൻ |
| സ്വാദ് | صۤ | സ്വാദ് |
| ഹാ -മീം | حٰمۤ | മുഅ്മിൻ |
| ഖാഫ് | قۤ | ഖാഫ് |
| നൂൻ | نۤ | ഖലം |
വ്യാഖ്യാനം[തിരുത്തുക]
ഇത്തരം അക്ഷരങ്ങളെ പറ്റി പ്രധാനമായും രണ്ട് അഭിപ്രായങ്ങൾ അഥവാ വിശ്വാസങ്ങളാണ് നിലവിലുള്ളത്.
1. അർത്ഥമോ വ്യാഖ്യാനമോ അറിഞ്ഞുകൂടാത്ത ഈ അക്ഷരങ്ങൾ ഖുർ‌ആനിൽ അല്ലാഹു നിക്ഷേപിച്ചിട്ടുള്ള ഒരു രഹസ്യമാണ്. മുഹമ്മദ് നബി(സ)യുടെ അനുചരന്മാരിൽ പ്രധാനികളും ഖലീഫമാരുമാ‍യിരുന്ന അബൂബക്കർ , ഉമർ , ഉസ്മാൻ , അലി തുടങ്ങിയവരും ഇബ്‌നു മസ്‌ഊദ്, ശബൈഈ, സുഫ്‌യാനുഥൌരീ തുടങ്ങിയ പണ്ഡിതന്മാരും ഖുർ‌ആൻ വ്യാഖ്യാതാക്കളിൽ ഒരു വിഭാഗവും ഈ അഭിപ്രായമുള്ളവരായിരുന്നു.
2. നബി മുഖേന ഇത്തരം അക്ഷരങ്ങളുടെ വ്യാഖ്യാനം ലഭ്യമല്ലെങ്കിലും അവയിൽ ഖുർ‌ആന്റെ അമാനുഷികതയെക്കുറിച്ചുള്ള സൂചനകൾ അടങ്ങിയിരിക്കുന്നു എന്ന നിലപാടുള്ളവരാണ് രണ്ടാമത്തെ വിഭാഗം.പല അദ്ധ്യായങ്ങളിലും ഈ കേവലാക്ഷരങ്ങൾക്ക് ശേഷം ഖുർ‌ആന്റെ മഹത്ത്വം വിവരിക്കുന്ന വചനങ്ങൾ ഉള്ളതു കൊണ്ടാണ് ചില വ്യാഖ്യാതാക്കൾ ഇങ്ങനെ അഭിപ്രായപ്പെട്ടത്.
ഇതും കാണുക[തിരുത്തുക]
പുറത്തേക്കുള്ള കണ്ണികൾ[തിരുത്തുക]
അവലംബം[തിരുത്തുക]
- ↑ വിശുദ്ധ ഖുർ‌ആൻ വിവരണം, മുഹമ്മദ് അമാനി മൗലവി, വാല്യം ഒന്ന്, എഴാം പതിപ്പ്, കേരള നദ്‌വത്തുൽ മുജാഹിദീൻ , കോഴിക്കോട്.