ക്രിക്കറ്റ് ലോകകപ്പ്

വിക്കിപീഡിയ, ഒരു സ്വതന്ത്ര വിജ്ഞാനകോശം.

അന്താരാഷ്ട്ര ലോകകപ്പ് ക്രിക്കറ്റ്
Best results in the ICC Cricket World Cup
സംഘാടകര്‍	അന്താരാഷ്ട്ര ക്രിക്കറ്റ് കൌണ്‍സില്‍
ശൈലി	ഏകദിന ക്രിക്കറ്റ്
സമയരേഖ	1975 – ഇതുവരെ
ഘടനകള്‍	റൌണ്ട് റോബിന്‍ & നോക്കൌട്ട്
പങ്കെടുക്കുന്നവര്‍	16 (അവസാന ഘട്ടത്തില്‍)1 (from 97 entrants)
യോഗ്യത നേടിയവര്‍	192 (total)
നിലവിലുള്ള ജേതാക്കള്‍	ഓസ്ട്രേലിയ
ഏറ്റവും നല്ല വിജയ ചരിത്രം	ഓസ്ട്രേലിയ(മൂന്നു തവണ ജേതാക്കള്‍)
ഏറ്റവും കൂടുതല്‍ റണ്‍സ്	സച്ചിന്‍ തെന്‍ഡുല്‍ക്കര്‍ (1,732)
ഏറ്റവും കൂടുതല്‍ വിക്കറ്റുകള്‍	ഗ്ലെന്‍ മക്ഗ്രാത്ത് (56)
1For 2007 World Cup. 2In World Cup history.

ഐ. സി. സി ലോകകപ്പ് ക്രിക്കറ്റ് അല്ലെങ്കില്‍ ലോകകപ്പ് ക്രിക്കറ്റ് പുരുഷന്മാരുടെ ഏകദിനക്രിക്കറ്റിന്റെ പ്രധാന ചാമ്പ്യന്‍ഷിപ്പ് ആണ്. നാലുവര്‍ഷത്തില്‍ ഒരിക്കല്‍ നടക്കുന്ന ഈ ചാമ്പ്യന്‍ഷിപ്പ് അന്താരാഷ്ട്ര ക്രിക്കറ്റ് കൌണ്‍സില്‍ ആണ് സംഘടിപ്പിക്കുന്നത്. പ്രാഥമിക റൌണ്ട് മത്സരങ്ങള്‍ തൊട്ട് ഫൈനല്‍ വരെ നീളുന്നതാണ് ഈ ചാമ്പ്യന്‍ഷിപ്പിന്റെ മത്സരക്രമം. ഈ ടൂര്‍ണമെന്റ് ലോകത്ത് ഏറ്റവും കൂടുതല്‍ ആളുകള്‍ വീക്ഷിക്കുന്ന കായിക ഇനങ്ങളില്‍ ഒന്നാണ്.^[1][2][3] ഐ സി സിയുടെ അഭിപ്രായപ്രകാരം ക്രിക്കറ്റ് ലോകക്കപ്പ് ആണ് ഏറ്റവും പ്രധാനപ്പെട്ട കായികമത്സരം. കാറ്റികമത്സരങ്ങളുടെ ഔന്നത്യത്തിനു ഉദാഹരണവുമാണ് ക്രിക്കറ്റ് ലോകക്കപ്പ്.^[4][5] ആദ്യത്തെ ലോകകപ്പ് ക്രിക്കറ്റ് 1975-ല്‍ ഇംഗ്ലണ്ടിലാണ് നടന്നത്. വനിതകള്‍ക്കുള്ള ഒരു ലോകകപ്പ് ക്രിക്കറ്റും 1973 മുതല്‍ നാല് വര്‍ഷത്തെ ഇടവേളയില്‍ നടന്നു വരുന്നു.

ഓസ്ട്രേലിയ മൂന്നു പ്രാവശ്യം ഈ കപ്പ് സ്വന്തമാക്കിയിട്ടുണ്ട്. വെസ്റ്റ് ഇന്‍ഡീസ് രണ്ടു പ്രാവശ്യവും ഇന്‍ഡ്യ, പാക്കിസ്ഥാന്‍ ശ്രീലങ്ക എന്നീ രാജ്യങ്ങള്‍ ഓരോ പ്രാവശ്യവും ഈ കപ്പ് സ്വന്തമാക്കിയിട്ടുണ്ട്.

2003 -ല്‍ ദക്ഷിണാഫ്രിക്കയില്‍ വച്ചു നടന്ന ലോകകപ്പില്‍ ഓസ്ട്രേലിയ ഇന്ത്യയെ തോല്‍‌പ്പിച്ച് കപ്പ് നേടി. ^[6]16 ടീമുകള്‍ പങ്കെടുക്കുന്ന 2007-ലെ ലോകപ്പ് ക്രിക്കറ്റ് മാര്‍ച്ച് 13-മുതല്‍ വെസ്റ്റ്‌ഇന്‍ഡീസില്‍ ആരംഭിച്ചു.

ഉള്ളടക്കം 1 ചരിത്രം 1.1 ആദ്യത്തെ ലോകകപ്പിന് മുമ്പ് 1.2 പ്രുഡന്‍ഷ്യല്‍ കപ്പ് 1.3 1987 – 2003 2 രൂപരേഖ 2.1 യോഗ്യത 2.1.1 തിരഞ്ഞെടുപ്പ് പ്രക്രിയ 2.2 ടൂര്‍ണമെന്റ് 3 ട്രോഫി 4 മാധ്യമങ്ങള്‍ 5 ആതിഥേയരുടെ തിരഞ്ഞെടുപ്പ് 6 താരതമ്യപ്പെടത്തലുകള്‍ 6.1 ഫലങ്ങള്‍ 6.2 ടീമുകളുടെ പ്രകടനം 6.3 വ്യക്തിഗത പുരസ്കാരങ്ങള്‍ 6.4 ലോകകപ്പിലെ മുഖ്യ ചരിത്രനേട്ടങ്ങള്‍ 7 ഇതും കാണുക 8 പുറത്തേക്കുള്ള കണ്ണികള്‍ 9 അവലംബം‍ 10 പുറത്തേക്കുള്ള കണ്ണികള്‍

[തിരുത്തുക] ചരിത്രം

[തിരുത്തുക] ആദ്യത്തെ ലോകകപ്പിന് മുമ്പ്

ആദ്യത്തെ ക്രിക്കറ്റ് ടെസ്റ്റ് മല്‍സരം 1877-ല്‍ ഇംഗ്ലണ്ടും ഓസ്ട്രേലിയയും തമ്മിലാണ് നടന്നത്. തുടര്‍ന്നു വന്ന വര്‍ഷങ്ങളില്‍ ഇരു ടീമുകളും ആഷസ് പരമ്പരയില്‍ സ്ഥിരമായി മത്സരിച്ചു. ദക്ഷിണാഫ്രിക്കയ്ക്ക് ടെസ്റ്റ് പദവി കിട്ടിയത് 1889-ല്‍ ആണ്.^[7] തെരഞ്ഞെടുക്കപ്പെട്ട ടീമുകള്‍ പരസ്പരം സന്ദര്‍ശിച്ച് മത്സരങ്ങള്‍ സംഘടിപ്പിച്ചു. 1900-ലെ പാരിസ് ഒളിമ്പിക്സില്‍ ക്രിക്കറ്റ് ഒരു മത്സര ഇനമായി ഉള്‍പ്പെടുത്തുകയും ഗ്രേറ്റ് ബ്രിട്ടന്‍ ഫ്രാന്‍സിനെ തോല്‍പ്പിച്ച് സ്വര്‍ണ്ണം കരസ്ഥമാക്കുകയുമുണ്ടായി.^[8] ഇതാണ് അവസാനമായി ക്രിക്കറ്റ് വേനല്‍ക്കാല ഒളിമ്പിക്സില്‍ പ്രത്യക്ഷപ്പെട്ട അവസരം.

രണ്ടിലധികം ടീമുകള്‍ പങ്കെടുത്ത ഒരു അന്താരാഷ്ട്രമത്സരം ആദ്യമായി നടന്നത്, 1912 ഇംഗ്ലണ്ടിലാണ്. ടെസ്റ്റ് കളിക്കുന്ന രാജ്യങ്ങളായ ഇംഗ്ലണ്ട്, ഓസ്ട്രേലിയ, സൗത്താഫ്രിക്ക എന്നീ രാജ്യങ്ങള്‍ തമ്മിലുള്ള ത്രിരാഷ്ട്ര ടെസ്റ്റ് മത്സരമായിരുന്നു അത്. പക്ഷെ മഴ മൂലവും കളികളുടെ ആധിക്യം മൂലവും കാണികള്‍ കുറവായിരുന്ന ഈ പരമ്പര ഒരു വിജയമായില്ല.^[9] തുടര്‍ന്നുള്ള വര്‍ഷങ്ങളില്‍ അന്താരാഷ്ട്ര ടെസ്റ്റ് മത്സരപരമ്പരകള്‍‍ രണ്ട് ടീമുകള്‍ തമ്മില്‍ മാത്രമായാണ് സംഘടിപ്പിയ്ക്കപ്പെട്ടത്. 1999-ല്‍ ഏഷ്യന്‍ ടെസ്റ്റ് ചാമ്പ്യന്‍ഷിപ്പ് സംഘടിപ്പിയ്ക്കുന്നത് വരെ അത് അങ്ങനെ തന്നെ തുടര്‍ന്നു.

1928-ല്‍ വെസ്റ്റിന്റീസിന്റെയും 1930-ല്‍ ന്യൂസിലാന്റിന്റെയും 1932-ല്‍ ഇന്ത്യയുടേയും 1952-ല്‍ പാകിസ്താന്റെയും വരവോടെ ക്രിക്കറ്റ് കളിക്കുന്ന രാജ്യങ്ങളുടെ എണ്ണം ഉയര്‍ന്നു എങ്കിലും അന്താരാഷ്ട്ര ക്രിക്കറ്റ് മത്സരങ്ങള്‍ അപ്പോഴും മൂന്നും നാലും അഞ്ചും ദിവസങ്ങള്‍ നീണ്ട് നില്‍ക്കുന്ന ടെസ്റ്റ് മത്സരങ്ങളായിരുന്നു.

1960-കളുടെ തുടക്കത്തില്‍ ഇംഗ്ലണ്ടിലെ കൌണ്ടി ക്രിക്കറ്റ് ടീമുകള്‍ ഒരു ദിവസം മാത്രം നീണ്ട് നില്‍ക്കുന്ന ദൈര്‍ഘ്യം കുറഞ്ഞ മത്സരങ്ങള്‍ കളിച്ച് തുടങ്ങി. 1962-ല്‍ നാല് ടീമുകളുടെ നോക്കൌട്ട് മത്സര രൂപത്തില്‍ (knockout competition)^[10] നടത്തപ്പെട്ട മിഡ്ലാന്റ്സ് നോക്കൌട്ട് കപ്പോടെയും തുടര്‍ന്ന് വന്ന 1963-ലെ ആദ്യ ജില്ലെറ്റ് കപ്പോടെയും ഇംഗ്ലണ്ടില്‍ എകദിന മത്സരങ്ങളുടെ ജനപ്രീതി വര്‍ദ്ധിച്ചു. 1969-ല്‍ ഒരു ദേശീയ സണ്ടേ ലീഗ് രൂപീകരിക്കപ്പെട്ടു. ആദ്യ അന്താരാഷ്ട്ര ഏകദിന മത്സരം 1971-ല്‍ ഓസ്ട്രേലിയയിലെ മെല്‍ബണില്‍ ഇംഗ്ലണ്ടും ഓസ്ട്രേലിയയും തമ്മില്‍ മഴ മൂലം ഉപേക്ഷിയ്ക്കപ്പെട്ട ഒരു ടെസ്റ്റ് മത്സരത്തിന്റെ അഞ്ചാം ദിവസം നിരാശരായ കാണികളെ തൃപ്തിപ്പെടുത്താനും ബാക്കി വന്ന സമയം ഉപയോഗപ്പെടുത്താനും വേണ്ടിയായിരുന്നു സംഘടിപ്പിച്ചത്. 40 ഓവറുകള്‍ വീതം ഓരോ ടീമും കളിച്ച ആ കളിയില്‍ ഒരു ഓവറില്‍ 8 പന്തുകളാണ് എറിഞ്ഞിരുന്നത്.^[11]

ആദ്യ ഏകദിനമത്സരങ്ങളുടേയും ഇംഗ്ലണ്ടിലും ലോകത്തിന്റെ മറ്റ് ഭാഗങ്ങളിലും സംഘടിപ്പിയ്ക്കപ്പെട്ട ഏകദിനപരമ്പരകളുടേയും വിജയവും വന്‍ ജനപ്രീതിയും ഐ.സി.സിയെ ഒരു ക്രിക്കറ്റ് ലോകകപ്പ് സംഘടിപ്പിയ്ക്കുന്നതിനെ പറ്റി ചിന്തിയ്ക്കാന്‍ പ്രേരിപ്പിച്ചു.^[12]

[തിരുത്തുക] പ്രുഡന്‍ഷ്യല്‍ കപ്പ്

വിപുലമായ ക്രിക്കറ്റ് പരമ്പര സംഘടിപ്പിക്കാനുള്ള വിഭവശേഷി ഉണ്ടായിരുന്ന ഒരേ ഒരു രാജ്യമായ ഇംഗ്ലണ്ടിലാണ് 1975-ല്‍ ഉല്‍ഘാടന ലോകകപ്പ് അരങ്ങേറിയത്.^[13] ആദ്യ മൂന്ന് മത്സരങ്ങള്‍ അവയുടെ പ്രായോജകരായ പ്രൂഡന്‍ഷ്യല്‍ പി.എല്‍.സിയുടെ പേര് ചേര്‍ത്ത് പ്രൂഡന്‍ഷ്യല്‍ കപ്പ് എന്നാണ് അറിയപ്പെട്ടത്. പകല്‍ സമയത്ത് നടന്ന കളികളില്‍ കളിക്കാര്‍ പരമ്പരാഗതമായ രീതിയില്‍ വെള്ള വസ്ത്രങ്ങള്‍ ധരിക്കുകയും ചുവന്ന പന്ത് ഉപയോഗിക്കുകയും ചെയ്തിരുന്നു. ഓരോ ടീമിനും ആറ് പന്തുകള്‍ വീതമുള്ള 60 ഓവറുകളാണ് ഉണ്ടായിരുന്നത്.^[14]

ആദ്യ ലോകകപ്പില്‍ ഓസ്ട്രേലിയ, ഇന്ത്യ, പാകിസ്താന്‍, വെസ്റ്റിന്റീസ്, ഇംഗ്ലണ്ട്, ന്യൂസിലാന്റ് (അന്നത്തെ ടെസ്റ്റ് പദവിയുള്ള 6 രാജ്യങ്ങള്‍) എന്നിവരെ കൂടാതെ ശ്രീലങ്ക, കിഴക്കന്‍ ആഫ്രിക്കയില്‍ നിന്നുള്ള ഒരു ടീം എന്നിവരടക്കം എട്ട് ടീമുകളാണ് പങ്കെടുത്തത്. ^[15] വര്‍ണ്ണവിവേചനം മൂലം അന്താരാഷ്ട്ര ക്രിക്കറ്റ് കളിക്കുന്നതിന് വിലക്കേര്‍പ്പെടുത്തപ്പെട്ട ദക്ഷിണാഫ്രിക്ക ഈ ലോകകപ്പില്‍ പങ്കെടുത്തില്ല. ലോര്‍ഡ്സില്‍ നടന്ന ഫൈനലില്‍ ഓസ്ട്രേലിയയെ 17 റണ്‍സിന് പരാജയപ്പെടുത്തിയ വെസ്റ്റിന്റീസാണ് ഈ ലോകകപ്പില്‍ ജേതാക്കളായത്.^[15]

1979-ലാണ് ടെസ്റ്റ് പദവി ലഭിച്ചിട്ടില്ലാത്ത രാജ്യങ്ങള്‍ക്കും^[16] ലോകകപ്പ് കളിക്കാനവസരം നല്‍കുന്ന ഐ.സി.സി. ട്രോഫി ആരംഭിച്ചത്. ശ്രീലങ്കയും കാനഡയും ^[17]ഇതിലൂടെ യോഗ്യത നേടി. ഫൈനലില്‍ ഇംഗ്ലണ്ടിനെ 92 റണ്‍സിന് തോല്‍പ്പിച്ച് വെസ്റ്റിന്റീസ് തന്നെ തുടര്‍ച്ചയായ രണ്ടാം ലോകകപ്പ് കിരീടം കരസ്ഥമാക്കി. ഈ ലോകകപ്പിന് ശേഷം നടന്ന ചര്‍ച്ചയില്‍ ഐ.സി.സി., ലോകകപ്പ് നാല് വര്‍ഷത്തില്‍ ഒരിക്കല്‍ നടത്താന്‍ തീരുമാനിച്ചു.^[17]

1983-ലെ ലോകകപ്പിന് തുടര്‍ച്ചയായി മൂന്നാമതും ഇംഗ്ലണ്ട് ആതിഥേയത്വം വഹിച്ചു. ഈ കാലയളവില്‍ ശ്രീലങ്ക ടെസ്റ്റ് പദവി നേടിയിരുന്നു, സിംബാബ്വേ ഐ.സി.സി. ട്രോഫിയിലൂടെ യോഗ്യത നേടുകയും ചെയ്തു. സ്റ്റമ്പുകളില്‍ നിന്ന് 30 വാര ദൂരത്തില്‍ ഒരു ഫീല്‍ഡിങ് വൃത്തം നടപ്പില്‍ വരുത്തി. നാല് ഫീല്‍ഡര്‍മാര്‍ എല്ലാ സമയവും ഈ വൃത്തത്തിനുള്ളില്‍ ഉണ്ടായിരിക്കണം എന്ന് നിഷ്കര്‍ഷിക്കുന്ന നിയമവും വന്നു.^[18] ലോകകപ്പ് തുടങ്ങുന്നതിന് മുമ്പ് വാതുവെപ്പുകാര്‍ക്കിടയില്‍ 66-1 എന്ന നിലയില്‍ സാധ്യത മാത്രം കല്‍പ്പിക്കപ്പെട്ടിരുന്ന ഇന്ത്യ, ഫൈനലില്‍ വെസ്റ്റിന്റീസിനെ തോല്‍പ്പിച്ച് ലോകകപ്പ് ജേതാക്കളായി.^[12][19]

[തിരുത്തുക] 1987 – 2003

ആദ്യമായി ഇംഗ്ലണ്ടിന് പുറത്ത് നടന്ന ലോകകപ്പ് 1987-ല്‍ ഇന്ത്യയിലും പാകിസ്താനിലുമായാണ് നടത്തപ്പെട്ടത്. കളിയുടെ ദൈര്‍ഘ്യം 60 ഓവറില്‍ നിന്ന് ഇന്ന് കാണുന്ന രീതിയില്‍ 50 ഓവറായി ചുരുക്കപ്പെട്ടു. അതിന് കാരണം ഇന്ത്യന്‍ ഉപഭൂഖണ്ഡത്തില്‍ ഇംഗ്ലണ്ടിലെ വേനല്‍കാലത്തെ അപേക്ഷിച്ച് പകലിന് ദൈര്‍ഘ്യം കുറവായിരുന്നു എന്നതാണ്.^[20] ലോകകപ്പ് ഫൈനലിന്റെ ചരിത്രത്തിലെ ഏറ്റവും ചുരുങ്ങിയ റണ്‍ വ്യത്യാസമായ 7 റണ്‍സിന് ഓസ്ട്രേലിയ ഇംഗ്ലണ്ടിനെ പരാജയപ്പെടുത്തി ലോകകപ്പ് നേടി.^[21][22]

ഓസ്ട്രേലിയയിലും ന്യൂസിലാന്റിലുമായി നടത്തപ്പെട്ട 1992-ലെ ലോകകപ്പില്‍ നിറമുള്ള വസ്ത്രങ്ങളും, വെള്ള പന്തും, ഫീല്‍ഡിങ് രീതിയിലെ പുതിയ രീതികളും, പകലും രാത്രിയുമായി അഥവാ ഡേ ആന്റ് നൈറ്റ് രീതിയില്‍ നടത്തപ്പെടുന്ന കളികളും ഉള്‍പ്പെടെ നിരവധി പരിഷ്കാരങ്ങള്‍ നിലവില്‍ വന്നു. വര്‍ണ്ണവിവേചനവും അതിനെ തുടര്‍ന്നുണ്ടായിരുന്ന വിലക്കും ഒഴിവാക്കപ്പെട്ടതിനാല്‍ ദക്ഷിണാഫ്രിക്ക ആദ്യമായി പങ്കെടുത്ത ലോകകപ്പും ഇതാണ്.^[23] മോശം തുടക്കത്തെ മറികടന്ന് പാകിസ്താന്‍ ഫൈനലില്‍ ഇംഗ്ലണ്ടിനെ 22 റണ്‍സിന് തോല്‍പ്പിച്ച് ജേതാക്കളായി.^[24]

1996ലേത് ഇന്ത്യന്‍ ഉപഭൂഖണ്ഡത്തില്‍ നടന്ന രണ്ടാമത്തെ ലോകകപ്പായി. ചില ഗ്രൂപ്പ് മത്സരങ്ങള്‍ക്ക് ആതിഥേയത്വം വഹിച്ച് ശ്രീലങ്കയും ഇന്ത്യയ്ക്കും പാകിസ്താനുമൊപ്പം ചേര്‍ന്നു.^[25] സെമിഫൈനലില്‍ ശ്രീലങ്കയ്ക്കെതിരെ 254 റണ്‍സ് ലക്ഷ്യവുമായി മറുപടി ബാറ്റിങ്ങിനിറങ്ങിയ ഇന്ത്യയ്ക്ക് 120 റണ്‍സ് എടുക്കുന്നതിനിടെ 8 വിക്കറ്റ് നഷ്ടപ്പെട്ടു. ശ്രീലങ്ക കൂറ്റന്‍ വിജയത്തിലേക്ക് നീങ്ങുന്നതിനിടെ ടീമിന്റെ പ്രകടനത്തില്‍ രോഷാകുലരായ ഇന്ത്യന്‍ ആരാധകര്‍ കളി തടസപ്പെടുത്തുകയും തുടര്‍ന്ന് ശ്രീലങ്ക ജയിച്ചതായി പ്രഖ്യാപിക്കുകയും ചെയ്തു.^[26] ലാഹോറില്‍ നടന്ന ഫൈനലില്‍ ഓസ്ട്രേലിയയെ 7 വിക്കറ്റിന് തോല്‍പ്പിച്ച് ശ്രീലങ്ക ആദ്യമായി ലോകകപ്പ് കരസ്ഥമാക്കി.^[27]

ഇംഗ്ലണ്ട് ആതിഥേയത്വം വഹിച്ച 1999 ലോകകപ്പില്‍ അയര്‍ലണ്ട്, നെതര്‍ലാന്റ്സ്, സ്കോട്ട്ലാ‍ന്റ്, വേല്‍സ് എന്നീ രാജ്യങ്ങളും മത്സരവേദികളായി.^[28][29] സൂപ്പര്‍ 6 സ്റ്റേജില്‍ ദക്ഷിണാഫ്രിക്കയെ അവസാന ഓവറില്‍ പരാജയപ്പെടുത്തി യോഗ്യത നേടിയ ഓസ്ട്രേലിയ^[30] സെമി ഫൈനലില്‍ ദക്ഷിണാഫ്രിക്കയുമായിത്തന്നെയുള്ള മത്സരത്തില്‍ അവസാന ഓവറില്‍ ബാറ്റ് ചെയ്യുകയായിരുന്ന ലാന്‍സ് ക്ലൂസ്നറും അലന്‍ ഡൊണാള്‍ഡും തമ്മില്‍ ഉണ്ടായ ആശയക്കുഴപ്പത്തിന്നിടയില്‍ കൈയ്യില്‍ നിന്ന് ബാറ്റ് വീണ് പോയ ഡൊണാള്‍ഡ് റണ്ണൌട്ടാവുകയും മത്സരം സമനിലയിലാവുകയും ചെയ്തു. തുടര്‍ന്ന് ഓസ്ട്രേലിയ ഫൈനലിലേക്ക് യോഗ്യത നേടുകയും 132 റണ്‍സ് എടുത്ത പാകിസ്താന്‍ നല്‍കിയ വിജയ ലക്ഷ്യം 20 ഓവറുകള്‍ക്കുള്ളില്‍ 8 വിക്കറ്റുകള്‍ കൈയ്യിലിരിക്കെ മറി കടന്ന് ജേതാക്കളാവുകയും ചെയ്തു.^[31]

ദക്ഷിണാഫ്രിക്കയും സിംബാബ്വേയും കെനിയയും സംയുക്തമായി 2003 ലോകകപ്പിന്റെ ആതിഥേയത്വം വഹിച്ചു. പങ്കെടുക്കുന്ന ടീമുകളുടെ എണ്ണം പന്ത്രണ്ടില്‍ നിന്ന് പതിനാലായി വര്‍ദ്ധിച്ചു.ശ്രീലങ്കയോടും സിംബാബ്വേയോടും നേടിയ വിജയങ്ങളും ന്യൂസിലാന്റ് സുരക്ഷാകാരണങ്ങളാല്‍ കെനിയയില്‍ ഒരു കളി കളിക്കാന്‍ വിസമ്മതിച്ചതും കെനിയയ്ക് സെമിഫൈനലിലേക്ക് യോഗ്യത നേടിക്കൊടുത്തെങ്കിലും അവര്‍ ഇന്ത്യയോട് സെമി ഫൈനലില്‍ തോറ്റു. ഫൈനലില്‍ 2 വിക്കറ്റ് നഷ്ടത്തില്‍ 359 എന്ന ഫൈനലിലെ എക്കാലത്തെയും കൂടിയ സ്കോര്‍ നേടിയ ഓസ്ട്രേലിയ ഇന്ത്യയെ 125 റണ്‍സിന് പരാജയപ്പെടുത്തി.^[6][32]

[തിരുത്തുക] രൂപരേഖ

[തിരുത്തുക] യോഗ്യത

അന്തര്‍ദേശീയ ടെസ്റ്റ് മത്സരങ്ങള്‍ കളിക്കുന്ന രാജ്യങ്ങള്‍ ലോകകപ്പ് മത്സരത്തിന് നേരിട്ട് തിരഞ്ഞെടുക്കപ്പെടുമ്പോള്‍ മറ്റു ടീമുകള്‍ക്ക് യോഗ്യതാമത്സരങ്ങളില്‍ പങ്കെടുക്കേണ്ടതുണ്ട്.

യോഗ്യതാ മത്സരങ്ങള്‍ ആദ്യമായി പ്രചാരത്തില്‍ വന്നത് രണ്ടാം ലോകകപ്പ് മുതലാണ്. അതില്‍ ഐസിസി ട്രോഫിയില്‍ മുന്നില്‍ വന്ന രണ്ട് ടീമുകള്‍ ലോകകപ്പ് മത്സരത്തില്‍ പങ്കെടുത്തു.^[16] ഐസിസി ട്രോഫിയില്‍ നിന്നും തിരഞ്ഞെടുക്കുന്ന ടീമുകളുടെ എണ്ണം ഓരോ ലോകകപ്പിലും വ്യത്യാസം വരാറുണ്ട്. ഇപ്പോള്‍ ആറു ടീമുകളെയാണ് തിരഞ്ഞെടുക്കുന്നത്. ഐസിസി മേല്‍നോട്ടം നിര്‍വഹിക്കുന്ന വേള്‍ഡ് ക്രിക്കറ്റ് ലീഗ് എന്ന യോഗ്യതാരീതിയാണ് തിരഞ്ഞെടുപ്പിന് ഉപയോഗിക്കുന്നത്. 2009 മുതല്‍ ഐസിസി ട്രോഫി ഐസിസി ലോകകപ്പ് യോഗ്യതമത്സരം എന്നായിരിക്കും അറിയപ്പെടുക.^[33]

ഐസിസിയിലെ 87 അഫിലിയേറ്റഡ് രാജ്യങ്ങളിലും അസോസിയേറ്റഡ് രാജ്യങ്ങളിലും നിന്ന് അവര്‍ പങ്കെടുക്കുന്ന ഡിവിഷനനുസരിച്ചാണ് വേള്‍ഡ് ക്രിക്കറ്റ് ലീഗ് തിരഞ്ഞെടുക്കുന്നത്.

[തിരുത്തുക] തിരഞ്ഞെടുപ്പ് പ്രക്രിയ

1. മേഖല മത്സരങ്ങള്‍: മുന്നില്‍ വരുന്ന ടിമുകളെ ടീമിന്റെ റാങ്കിങ്ങും ഡിവിഷനിലെ ഒഴിവുമനുസരിച്ച് ഏതെങ്കിലും ഡിവിഷനിലേക്ക് ചേര്‍ക്കുന്നു.
2. ഒന്നാം ഡിവിഷന്‍: 6 ടീമുകള്‍ - എല്ലാ ടീമുകളും ലോകകപ്പ് യോഗ്യത മത്സരങ്ങളിലേക്ക് യോഗ്യത നേടുന്നു
3. മൂന്നാം ഡിവിഷന്‍: 8 ടീമുകള്‍ - ഏറ്റവും മികച്ച 2 ടീമുകളെ രണ്ടാം ഡിവിഷനിലേക്ക് ഏടുക്കുന്നു
4. രണ്ടാം ഡിവിഷണ്‍: 6 ടീമുകള്‍ - ഏറ്റവും മികച്ച 4 ടീമുകള്‍ ലോകകപ്പ് യോഗ്യത മത്സരങ്ങളിലേക്ക് യോഗ്യത നേടുന്നു
5. അഞ്ചാം ഡിവിഷന്‍: 8 ടീമുകള്‍ - ഏറ്റവും മികച്ച 2 ടീമുകളെ നാലാം ഡിവിഷനിലേക്ക് ഏടുക്കുന്നു
6. നാലാം ഡിവിഷന്‍: 5 ടീമുകള്‍ - ഏറ്റവും മികച്ച 2 ടീമുകളെ മൂന്നാം ഡിവിഷനിലേക്ക് ഏടുക്കുന്നു
7. മൂന്നാം ഡിവിഷന്‍ (രണ്ടാം എഡിഷന്‍): 6 ടീമുകള്‍ - ഏറ്റവും മികച്ച 2 ടീമുകള്‍ ലോകകപ്പ് യോഗ്യത മത്സരങ്ങളിലേക്ക് യോഗ്യത നേടുന്നു
8. ലോകകപ്പ് യോഗ്യത മത്സരങ്ങള്‍: 12 ടീമുകള്‍ - ഏറ്റവും മികച്ച 6 ടീമുകള്‍ ലോകകപ്പിലേക്ക് യോഗ്യതയും ഏകദിനമത്സരങ്ങള്‍ കളിക്കാനുള്ള അര്‍ഹതയും നേടുന്നു

[തിരുത്തുക] ടൂര്‍ണമെന്റ്

ലോകകപ്പ് ക്രിക്കറ്റിന് അതിന്റെ നടത്തിപ്പു രീതിയില്‍ ധാരാളം മാറ്റങ്ങളുണ്ടായിട്ടുള്ളതായി അതിന്റെ ചരിത്രത്തില്‍ കാണാം. ആദ്യത്തെ നാലു ടൂര്‍ണമെന്റിലും എട്ടു രാജ്യങ്ങള്‍ നാലു വീതമുള്ള രണ്ട് ഗ്രൂപ്പുകളായാണ് മത്സരിച്ചത്.^[34] അതില്‍ ഗ്രൂപ്പ് മത്സരങ്ങളും നോക്കൌട്ട് മത്സരങ്ങളുമായി രണ്ട് ഘട്ടങ്ങളുണ്ടായിരുന്നു. ഓരോ ഗ്രൂപ്പിലേയും ടീമുകള്‍ പരസ്പരം മത്സരിക്കുകയും, മികച്ച രണ്ട് ടീമുകള്‍ സെമി ഫൈനലിലേക്ക് കടക്കുകയും ചെയ്തു. സെമിയില്‍ വിജയം നേടുന്ന ടീമുകള്‍ ഫൈനലില്‍ നേരിട്ടു. 1992-ല്‍ ദക്ഷിണാഫ്രിക്ക വിലക്കിനു ശേഷം തിരികെ വന്നപ്പോളുണ്ടാ‍യ ഒമ്പത് ടീമുകള്‍ ഗ്രൂപ്പ് ഘട്ടത്തില്‍ മുന്നില്‍ വന്ന നാലു ടീമുകള്‍ സെമി ഫൈനല്‍ കളിക്കാന്‍ അര്‍ഹത നേടുകയും ചെയ്തു.^[35] 1996 -ല്‍ ആറു ടീമുകള്‍ വീതമുള്ള രണ്ട് ഗ്രൂപ്പുകളായി ടൂര്‍ണമെന്റ് കൂടുതല്‍ വികസിപ്പിച്ചു.^[36] അതില്‍ ഓരോ ഗ്രൂപ്പില്‍ നിന്നും നാലു ടീമുകള്‍ വീതം ക്വാര്‍ട്ടര്‍ ഫൈനലില്‍ കടക്കുകയും തുടര്‍ന്ന് സെമി ഫൈനലുകളുമായിരുന്നു അത്തവണ.

1999, 2003 ലോകകപ്പുകളില്‍ ഒരു പുതിയ മത്സരരീതി നിലവില്‍ വന്നു. ടീമുകളെ രണ്ട് പൂളുകളിലായി തിരിച്ച് ഓരോ പൂളില്‍ നിന്നും മൂന്നു ടീമുകള്‍ വീതം “സൂപ്പര്‍ സിക്സ്”^[37] റൌണ്ടിലേക്ക് കടക്കുന്നതായിരുന്നു അത്. സൂപ്പര്‍ സിക്സില്‍ ടീമുകള്‍ എതിര്‍ ഗ്രൂപ്പില്‍ നിന്നും വന്ന മറ്റ് മൂന്നു ടീമുകളുമായി ഏറ്റുമുട്ടുന്നു. അതേ സമയം പ്രാഥമിക റൌണ്ടില്‍ അതേ ഗ്രൂപ്പില്‍ നിന്നും വന്ന ടീമുകളുമായി കളിച്ചപ്പോള്‍ ലഭിച്ച പോയിന്റ് നിലനില്‍ക്കുകയും ചെയ്യും. ഇത് പ്രാഥമിക റൌണ്ടില്‍ നല്ല പ്രകടനം കാഴ്ച വെക്കാന്‍ പ്രേരണ നല്‍കും.^[37] സൂപ്പര്‍ സിക്സിലെ ഏറ്റവും മികച്ച നാലു ടീമുകള്‍ സെമി ഫൈനലിലേക്ക് പ്രവേശിക്കും.

2007 ലോകകപ്പില്‍ 16 ടീമുകള്‍ അണിനിരക്കുന്നുണ്ട്. ഇവയെ നാലു ടീമുകള്‍ വീതമുള്ള നാലു ഗ്രൂപ്പുകളായി തിരിച്ചിരിക്കുന്നു.^[38] ഓരോ ഗ്രൂപ്പിലേയും ടീമുകള്‍ റൌണ്ട് റോബിന്‍ രീതിയില്‍ പരസ്പരം കളിക്കുന്നു. ഗ്രൂപ്പിലെ മികച്ച രണ്ട് ടീമുകള്‍ സൂപ്പര്‍ എട്ട് റൌണ്ടില്‍ പ്രവേശിക്കുന്നു. സൂപ്പര്‍ എട്ടില്‍ ടീമുകള്‍ മറ്റു ഗ്രൂപ്പുകളില്‍ നിന്നും വന്ന ആറു ടീമുകളുമായി ഏറ്റുമുട്ടുകയും അതേ സമയം അതേ ഗ്രൂപ്പിലെ ടീമുമായി കളിച്ചപ്പോള്‍ ലഭിച്ച പോയിന്റ് നിലനില്‍ക്കുകയും ചെയ്യുന്നു.^[39] സൂപ്പര്‍ എട്ടിലെ മികച്ച നാലു ടീമുകള്‍ സെമി ഫൈനല്‍ പ്രവേശനത്തിന് അര്‍ഹത നേടുകയും അതിലെ വിജയികള്‍ ഫൈനല്‍ മത്സരത്തില്‍ ഏറ്റുമുട്ടുകയും ചെയ്യും.

[തിരുത്തുക] ട്രോഫി

പ്രധാന ലേഖനം: Cricket World Cup Trophy

ഐ.സി.സി യുടെ ക്രിക്കറ്റ് ലോകകപ്പ് ഫലകമാണ് ലോകകപ്പ് വിജയികള്‍ക്ക് നല്‍കപ്പെടുന്നത്. ഇപ്പോഴുള്ള ട്രോഫി ആയിരത്തി തൊള്ളായിരത്തി തൊണ്ണൂറ്റി ഒന്‍പതിലെ ലോകകപ്പിനായി ഉണ്ടാക്കപ്പെട്ടതാണ്. ഈ ട്രോഫിയാണ് ലോകകപ്പ് ചരിത്രത്തിലെ ആദ്യ സ്ഥിരം ട്രോഫി. ഇതിനുമുന്‍പായി ഓരോ തവണയും പുതിയ ട്രോഫി ഉണ്ടാക്കുകയായിരുന്നു പതിവ്.^[40] ഈ ട്രോഫി ഗരാര്‍ഡ് & കൊ എന്ന കമ്പനിയിലെ ശില്‍പ്പികള്‍ രൂപകല്‍പ്പന ചെയ്ത് രണ്ട് മാസം കൊണ്ട് രൂപകല്‍പ്പന ചെയ്ത് ലണ്ടനില്‍ പ്രദര്‍ശിപ്പിക്കുകയായിരുന്നു..

ഇപ്പോഴുള്ള ട്രോഫി വെള്ളി കൊണ്ടും ഗിള്‍ഡ് കൊണ്ടും ആണ് ഉണ്ടാക്കപ്പെട്ടിട്ടുള്ളത്. ട്രോഫിയുടെ രൂപകല്‍പ്പന,‍ ഒരു സ്വര്‍ണ്ണ ഭൂഗോളം മൂന്ന് വെള്ളി സ്തംഭങ്ങളില്‍ നില്‍ക്കുന്ന തരത്തിലാണ്. സ്റ്റമ്പും ‍അതിനുമുകളിലുള്ള ബെയിലുകളും എന്ന തരത്തിലുള്ള സ്തംഭങ്ങള്‍, ക്രിക്കറ്റിന്റെ മൂന്ന് അടിസ്ഥാനപരമായ കാര്യങ്ങളെ സൂചിപ്പിക്കുന്നു: ബാറ്റിങ്ങ്, ബൌളിങ്ങ്, പിന്നെ ഫീള്‍ഡിങ്ങ്. ട്രോഫിയിലെ ഭൂലോകം ക്രിക്കറ്റ് പന്തിനെ സൂചിപ്പിക്കുന്നു.^[41] ഈ ട്രോഫി രൂപകല്‍പ്പന ചെയ്തിരിക്കുന്നത് പ്ലാറ്റോണിക്ക് ദിശകള്‍ കണക്കിലെടുത്തുകൊണ്ടാണ്, അതുകൊണ്ട് തന്നെ ഏത് വശത്ത് നിന്ന് നോക്കിയാലും ടോഫി ഒരേ പോലെ കാണാന്‍ കഴിയും. ട്രോഫിക്ക് 60 സെന്റിമീറ്റര്‍ പൊക്കവും 11 കിലോ തൂക്കവും ഉണ്ട്. മുന്‍‌വര്‍ഷങ്ങളിലെ വിജയികളുടെ നാമം ഈ ട്രോഫിയുടെ കീഴെ ആലേഖനം ചെയ്യപ്പെട്ടിട്ടുണ്ട്. അവിടെ ഇരുപത് നാമങ്ങള്‍ വരെ എഴുതാനുള്ള സ്ഥലം ഉണ്ട്. ^[42]

ഐ.സി.സി. യിലാണ് യഥാര്‍ത്ഥ ട്രോഫി വച്ചിരിക്കുന്നത്. ഇതിന്റെ ഒരു പകര്‍പ്പാണ് എല്ലാ തവണയും വിജയികള്‍ക്ക് നല്‍കപ്പെടുന്നത്. ഈ പകര്‍പ്പും യഥാര്‍ത്ഥ ട്രോഫിയും തമ്മില്‍ അതില്‍ ആലേഖനം ചെയ്യപ്പെട്ടിരിക്കുന്ന വിജയികളുടെ നാമത്തില്‍ മാത്രമേ വ്യത്യാസപ്പെടുന്നുള്ളൂ.

[തിരുത്തുക] മാധ്യമങ്ങള്‍

ലോകകപ്പ്, ഇരുന്നൂറിലധികം രാജ്യങ്ങളില്‍ സമ്പ്രേക്ഷണം ചെയ്യപ്പെട്ട്‍ രണ്ട് ബില്ല്യണ്‍ പ്രേക്ഷകരിലധികം പേര്‍‍ കാണുന്നതിനാല്‍ ലോകത്തിലെ ഏറ്റവും അധികം കാണികള്‍ ഉള്ള കായികമേളയില്‍ ഒന്നാണ്.^{[2][43][1][44][45]} ഈ കായികമേള രണ്ടായിരത്തി പതിനൊന്നിലും രണ്ടായിരത്തി പതിനഞ്ചിലും നടക്കുമ്പോഴുള്ള സം‌പ്രേക്ഷണാവകാശം 1.1 ബില്യണ്‍ അമേരിക്കന്‍ ഡോളറിനാണ് വിറ്റത്.^[46] സ്പോന്‍സര്‍ഷിപ്പ് അവകാശം വിറ്റത് മറ്റൊരു 500 മില്ല്യണ്‍ അമേരിക്കന്‍ ഡോളറിനും.^[47] 2003 ക്രിക്കറ്റ് ലോകകപ്പ് കളികള്‍ നേരില്‍ കണ്ടത് 626,845 ആളുകളാണ് എന്നാണ് കണക്ക്.^[48]

ഏകദിന ക്രിക്കറ്റ് മത്സരങ്ങളുടെ പ്രചാരം വര്‍ദ്ധിച്ചതോടുകൂടി ലോകകപ്പ് എന്ന കായികമാമാങ്കത്തിന്റെ പ്രചാരവും മാധ്യമ ശ്രദ്ധയും പതിന്മടങ്ങ് വര്‍ദ്ധിച്ചിട്ടുണ്ട്. 2003-ല്‍ സൗത്ത് ആഫ്രിക്കയില്‍ നടന്ന ലോകകപ്പിലാണ് ആദ്യമായി ഒരു ഭാഗ്യചിഹ്നം ഉപയോഗിക്കപ്പെട്ടത്. ഡാസ്ലര്‍ എന്ന സീബ്ര ആയിരുന്നു ആ ഭാഗ്യചിഹ്നം. ഓറഞ്ച് റക്കൂണ്‍ പോലെയുള്ള മെല്ലോ എന്നു പേരുള്ള ഒരു ജീവിയായിരുന്നു 2007 ക്രിക്കറ്റ് ലോകകപ്പിന്റെ ഭാഗ്യചിഹ്നം.^[49]

[തിരുത്തുക] ആതിഥേയരുടെ തിരഞ്ഞെടുപ്പ്

അപേക്ഷ നല്‍കിയിട്ടുള്ള രാജ്യങ്ങളില്‍ നിന്ന് അന്തര്‍ദേശീയ ക്രിക്കറ്റ് കൌണ്‍സിലിന്റെ എക്സിക്യൂട്ടീവ് കമ്മിറ്റി വോട്ട് ചെയ്താണ് ഓരോതവണയും ലോകകപ്പ് എവിടെ നടത്തണമെന്ന് തീരുമാനിക്കാറ്.^[50]

ആദ്യ മൂന്ന് ലോകകപ്പും ഇംഗ്ലണ്ടില്‍ വച്ചായിരുന്നു നടത്തപ്പെട്ടത്. ഉത്ഘാടന ചടങ്ങുകള്‍ നടത്തുവാനുള്ള വിഭവങ്ങള്‍ നല്‍കിക്കോളാം എന്ന് ഇംഗ്ലണ്ട് പറഞ്ഞത്കൊണ്ടാണ് ഐ.സി.സി, അദ്യ ലോക‌കപ്പ് അവിടെ നടത്തുവാന്‍ അനുമതി നല്‍കിയത് ^[13] . ഇന്ത്യ മൂന്നാം ലോകകപ്പ് നടത്തുവാന്‍ ആഗ്രഹം പ്രകടിപ്പിച്ചുവെങ്കിലും ഐ.സി.സി.യിലെ അധികം അംഗങ്ങളും ഇംഗ്ലണ്ടില്‍ ജൂണ്‍ മാസത്തില്‍ പകലിന് നീളം കൂടുതല്‍ ഉള്ളത് കാരണം^[51] ഒരു ദിവസം കൊണ്ട് കളി തീര്‍ക്കുവാന്‍ സാധിക്കും എന്ന് പറഞ്ഞതുകാരണം അങ്ങിനെ നടത്തുകയായിരുന്നു.^[52] ഇന്ത്യയിലും പാക്കിസ്ഥാനിലുമായി നടന്ന 1987 ക്രിക്കറ്റ് ലോകകപ്പ് ആണ് ഇംഗ്ലണ്ടിനു പുറത്ത് നടന്ന ആദ്യ ലോകകപ്പ്.

ലോകകപ്പുകള്‍ പല രാജ്യങ്ങളുടെ സംയുക്ത സംരഭങ്ങളായിട്ട് പലപ്പോഴും നടത്തപ്പെട്ടിട്ടുണ്ട്. 1987-ലും 1996-ലും ഏഷ്യന്‍ രാജ്യങ്ങള്‍ ആണ് ലോകകപ്പിന് ആധിത്യമരുളിയത്. ആസ്ത്രലേഷ്യയില്‍ 1992-ലും, 2003-ല്‍ ദക്ഷിണാഫ്രിക്കയിലും 2007-ല്‍ വെസ്റ്റ് ഇന്‍ഡീസിലും ഇങ്ങനെയാണ് ലോകകപ്പ് നടന്നത്. ഇന്ത്യ, പാക്കിസ്ഥാന്‍, ശ്രീലങ്ക, ബംഗ്ലാദേശ് എന്നീ രാജ്യങ്ങളിലായിരിക്കും‍ 2011-ഇല്‍ ലോകകപ്പ് നടക്കുക. 2011-ലെ ലോകകപ്പിന്റെ കലാശ മത്സരം ഡെല്‍ഹിയില്‍ വച്ചായിരിക്കും നടക്കുക. എല്ലാ ടെസ്റ്റ് കളിക്കുന്ന രാജ്യങ്ങളും ഒരിക്കലെങ്കിലും ലോകകപ്പിന് ആധിത്യമരുളിയിട്ടുണ്ട്. വളരെ വൈകി ടെസ്റ്റ് കളിക്കുന്ന അംഗീകാരം ലഭിച്ച ബംഗ്ലാദേശ് മാത്രമാണ് ഇതിനൊരു അപവാദം.‍ 2011-ഇല്‍ ആ കുറവും പരിഹരിക്കപ്പെടും.

[തിരുത്തുക] താരതമ്യപ്പെടത്തലുകള്‍

[തിരുത്തുക] ഫലങ്ങള്‍

വര്‍ഷം	ആതിഥേയ രാജ്യം(രാജ്യങ്ങള്‍)	കലാശക്കളിയുടെ വേദി	കലാശക്കളി
			വിജയി	ഫലം	രണ്ടാംസ്ഥാനം
1975 കൂടുതല്‍ അറിയാന്‍	ഇംഗ്ലണ്ട്	ലോര്‍ഡ്സ്, ലണ്ടന്‍	വെസ്റ്റിന്‍ഡീസ് 291 for 8 (60 overs)	വെസ്റ്റ് ഇന്‍ഡീസ് 17 റണ്ണുകള്‍ക്ക് വിജയിച്ചു Scorecard	ഓസ്ട്രേലിയ 274 all out (58.4 overs)
1979 കൂടുതല്‍ അറിയാന്‍	ഇംഗ്ലണ്ട്	ലോര്‍ഡ്സ്, ലണ്ടന്‍	വെസ്റ്റിന്‍ഡീസ് 286 for 9 (60 overs)	വെസ്റ്റ് ഇന്‍ഡീസ് 92 റണ്ണുകള്‍ക്ക് വിജയിച്ചു Scorecard	ഇംഗ്ലണ്ട് 194 all out (51 overs)
1983 കൂടുതല്‍ അറിയാന്‍	ഇംഗ്ലണ്ട്	ലോര്‍ഡ്സ്, ലണ്ടന്‍	ഇന്ത്യ 183 all out (54.4 overs)	ഇന്ത്യ 43 റണ്ണുകള്‍ക്ക് വിജയിച്ചു Scorecard	വെസ്റ്റിന്‍ഡീസ് 140 all out (52 overs)
1987 കൂടുതല്‍ അറിയാന്‍	ഇന്ത്യ/ പാക്കിസ്ഥാന്‍	ഈഡന്‍ ഗാര്‍ഡന്‍സ്, കൊല്‍ക്കത്ത	ഓസ്ട്രേലിയ 253 for 5 (50 overs)	ഓസ്ട്രേലിയ 7 റണ്ണുകള്‍ക്ക് വിജയിച്ചു Scorecard	ഇംഗ്ലണ്ട് 246 for 8 (50 overs)
1992 കൂടുതല്‍ അറിയാന്‍	ഓസ്ട്രേലിയ/ ന്യൂസിലന്‍ഡ്	എം.സി.ജി, മെല്‍ബണ്‍	പാക്കിസ്ഥാന്‍ 249 for 6 (50 overs)	പാക്കിസ്ഥാന്‍ 22 റണ്ണുകള്‍ക്ക് വിജയിച്ചു Scorecard	ഇംഗ്ലണ്ട് 227 all out (49.2 overs)
1996 കൂടുതല്‍ അറിയാന്‍	ഇന്ത്യ/ പാക്കിസ്ഥാന്‍/ ശ്രീലങ്ക	ഗദ്ദാഫി സ്റ്റേഡിയം, ലാഹോര്‍	ശ്രീലങ്ക 245 for 3 (46.2 overs)	ശ്രീലങ്ക 7 വിക്കറ്റുകള്‍ക്ക് വിജയിച്ചു Scorecard	ഓസ്ട്രേലിയ ;241 for 7 (50 overs)
1999 കൂടുതല്‍ അറിയാന്‍	ഇംഗ്ലണ്ട്	ലോര്‍ഡ്സ്, ലണ്ടന്‍	ഓസ്ട്രേലിയ 133 for 2 (20.1 overs)	ഓസ്ട്രേലിയ 8 വിക്കറ്റുകള്‍ക്ക് വിജയിച്ചു Scorecard	പാക്കിസ്ഥാന്‍ 132 all out (39 overs)
2003 കൂടുതല്‍ അറിയാന്‍	ദക്ഷിണാഫ്രിക്ക/ഫലകം:ZIMc	വാണ്ട‌റേര്‍സ് സ്റ്റേഡിയം, ജൊഹാനസ്സ്ബര്‍ഗ്ഗ്	ഓസ്ട്രേലിയ 359 for 2 (50 overs)	ഓസ്ട്രേലിയ 125 റണ്ണുകള്‍ക്ക് വിജയിച്ചു Scorecard	ഇന്ത്യ 234 all out (39.2 overs)
2007 കൂടുതല്‍ അറിയാന്‍	West Indies	കെന്‍സിങ്ങ്ടണ്‍ ഓവല്‍, ബ്രിഡ്ജ്‌ടൌണ്‍	ഓസ്ട്രേലിയ		ശ്രീലങ്ക
2011 കൂടുതല്‍ അറിയാന്‍	ഫലകം:BGDc/ ഇന്ത്യ/ പാക്കിസ്ഥാന്‍/ ശ്രീലങ്ക	വാങ്കടെ സ്റ്റേഡിയം, മുംബൈ

[തിരുത്തുക] ടീമുകളുടെ പ്രകടനം

ലോകകപ്പ് കളിക്കാന്‍ ഒരിക്കലെങ്കിലും കഴിഞ്ഞിട്ടുള്ള രാജ്യങ്ങളുടെ എണ്ണം പത്തൊന്‍പത് ആണ്(യോഗ്യതാമത്സരങ്ങള്‍ കൂട്ടാതെ). എങ്കിലും, ഇതുവരെയുള്ള എല്ലാ ലോകകപ്പ് മത്സരങ്ങളും കളിച്ച രാജ്യങ്ങള്‍ ഏഴെണ്ണം മാത്രമേ ഉള്ളൂ, അതില്‍ തന്നെ അഞ്ചു രാജ്യങ്ങള്‍ മാത്രമേ ലോകകപ്പ് ട്രോഫി നേടിയിട്ടുള്ളൂ. ^[12] വെസ്റ്റ് ഇന്‍ഡീസ് ക്രിക്കറ്റ് ടീം ആണ് ആദ്യ രണ്ട് തവണയും വിജയിച്ചത്. ഓസ്ത്രേലിയന്‍ ക്രിക്കറ്റ് ടീം മൂന്ന് തവണയും ഇന്ത്യന്‍ ക്രിക്കറ്റ് ടീം, പാക്കിസ്ഥാന്‍ ക്രിക്കറ്റ് ടീം, ശ്രീലങ്കന്‍ ക്രിക്കറ്റ് ടീം എന്നിവര്‍ ഒരുതവണ വീതവും ഈ കപ്പ് നേടിയിട്ടുണ്ട്. വെസ്റ്റ് ഇന്‍ഡീസും (1975, 1979) ഓസ്ത്രേലിയയും (1999, 2003) മാത്രമാണ് രണ്ട് തവണ അടുപ്പിച്ച് ഈ കപ്പ് നേടിയവര്‍.^[12] ഓസ്ത്രേലിയ 8 കലാശക്കളികളില്‍ അഞ്ചിലും കളിച്ചിട്ടുണ്ട് (1975, 1987, 1996, 1999, 2003). അവസാന മൂന്ന് തവണയും ഓസ്ത്രേലിയ കലാശക്കളിയില്‍ കളിച്ചിട്ടുണ്ട്. ഇംഗ്ലണ്ട് ക്രിക്കറ്റ് ടീം ഇതു വരെ ലോകകപ്പ് നേടിയിട്ടില്ലെങ്കിലും മൂന്ന് തവണ രണ്ടാം സ്ഥാനക്കാരായിട്ടുണ്ട് (1979, 1987, 1992). ടെസ്റ്റ് കളിക്കാന്‍ യോഗ്യത നേടിയിട്ടില്ലാത്ത രാജ്യങ്ങളില്‍ വച്ച് ഏറ്റവും നല്ല പ്രകടനം 2003-ഇല്‍ സെമിഫൈനല്‍ വരെ എത്തിയ കെനിയന്‍ ക്രിക്കറ്റ് ടീമിന്റേതാണ്.^[12]

1996 ക്രിക്കറ്റ് ലോകകപ്പിന് ആതിഥ്യമരുളിയ ശ്രീലങ്ക മാത്രമാണ് ആതിഥേയരാജ്യങ്ങളില്‍ ലോകകപ്പ് നേടിയ ഒരേ ഒരു ടീം. പക്ഷെ ആ ലോകകപ്പിന്റെ കലാശക്കളി നടന്നത് പാക്കിസ്ഥാനില്‍ വച്ചായിരുന്നു.^[12] ഇംഗ്ലണ്ട് മാത്രമാണ് ലോകകപ്പിന്റെ ഫൈനല്‍ കളിക്കാന്‍ ഭാഗ്യം സിദ്ധിച്ച വേറെയുള്ള ഒരേ ഒരു ടീം. 1979-ല്‍ ആയിരുന്നു അത്. ആതിഥേയരാജ്യങ്ങളുടെ മറ്റ് മികച്ച് പ്രകടനങ്ങള്‍: ന്യൂസിലാന്റ് 1992-ല്‍ സെമിഫൈനല്‍ വരെ എത്തി; സിംബാബ്വേ 2003-ല്‍ സൂപ്പര്‍-സിക്സ് കളിച്ചു; കെനിയ 2003-ല്‍ സെമിഫൈനലില്‍ കളിച്ചു.^[12] 1987-ല്‍, സംയുക്ത ആതിഥേയ രാജ്യങ്ങളായ ഇന്ത്യയും പാക്കിസ്ഥാനും സെമിഫൈനലില്‍ എത്തിയെങ്കിലും ഇവരെ ഓസ്ത്രേലിയയും ഇംഗ്ലണ്ടും പരാജയപ്പെടുത്തി.^[12]

താഴെയുള്ള പട്ടിക ലോകകപ്പ് കളിച്ച രാജ്യങ്ങളുടെ പ്രകടനങ്ങള്‍ നിരത്തുന്നു.

ടീം	കളിച്ചത്			മികച്ച പ്രകടനം	കണക്കുകള്‍
	മൊത്തം	ആദ്യത്തേത്	അവസാനത്തേത്		കളിച്ചത്	വിജയിച്ചത്	തോറ്റത്	രാജിയായത്	ഫലം ഇല്ലാത്തത്
ഓസ്ത്രേലിയ‍	9	1975	2007	വിജയികള്‍(1987, 1999, 2003)	58	40	17	1	0
വെസ്റ്റ് ഇന്‍ഡീസ്	9	1975	2007	വിജയികള്‍ (1975, 1979)	48	31	16	0	1
ഇന്ത്യ	9	1975	2007	വിജയികള്‍ (1983)	55	31	23	0	1
പാക്കിസ്ഥാന്‍	9	1975	2007	വിജയികള്‍ (1992)	53	29	22	0	2
ശ്രീലങ്ക	9	1975	2007	വിജയികള്‍ (1996)	46	17	27	1	1
ഇംഗ്ലണ്ട്	9	1975	2007	രണ്ടാം സ്ഥാനക്കാര്‍ (1979, 1987, 1992)	50	31	18	0	1
ന്യൂസിലാന്റ്	9	1975	2007	സെമി ഫൈനല്‍ (1975, 1979, 1992, 1999)	52	28	23	0	1
സിംബാബ്വേ	7	1983	2007	സൂപ്പര്‍ സിക്സ്(1999, 2003)	42	8	31	0	3
സൗത്ത് ആഫ്രിക്ക	5	1992	2007	സെമി ഫൈനല്‍(1992, 1999)	30	19	9	2	0
കെനിയ	4	1996	2007	സെമി ഫൈനല്‍(2003)	20	5	14	0	1
ബംഗ്ലാദേശ്	3	1999	2007	റൌണ്ട് 1	11	2	8	0	1
കനഡ	3	1979	2007	റൌണ്ട് 1	9	1	8	0	0
നെതര്‍ലാന്‍ഡ്	3	1996	2007	റൌണ്ട് 1	11	1	10	0	0
സ്കൊട്ട്ലന്‍ഡ്	2	1999	2007	റൌണ്ട് 1	5	0	5	0	0
ബെര്‍മുഡ	1	2007	2007	-	0	0	0	0	0
അയര്‍ലാന്‍ഡ്	1	2007	2007	-	0	0	0	0	0
നമീബിയ	1	2003	2003	റൌണ്ട് 1	6	0	6	0	0
യുനൈറ്റഡ് അറബ് എമിറേറ്റ്സ്	1	1996	1996	റൌണ്ട് 1	5	1	4	0	0
ഈസ്റ്റ് ആഫ്രിക്ക	1	1975	1975	റൌണ്ട് 1	3	0	3	0	0

[തിരുത്തുക] വ്യക്തിഗത പുരസ്കാരങ്ങള്‍

1992-നു ശേഷം എല്ലാ ലോകകപ്പിലും ഒരു കളിക്കാരനെ “മാന്‍ ഓഫ് ദ ടൂര്‍ണ്ണമെന്റായി” പ്രഖ്യാപിക്കാറുണ്ട്:^[53]

വര്‍ഷം	കളിക്കാരന്‍	പ്രകടനം
1992	മാര്‍ട്ടിന്‍ ക്രോ	456 റണ്ണുകള്‍
1996	സനത്ത് ജയസൂര്യ	221 റണ്ണുകളും 7 വിക്കറ്റുകളും
1999	ലാന്‍സ് ക്ലൂസ്നര്‍	281 റണ്ണുകളും 17 വിക്കറ്റുകളും
2003	സച്ചിന്‍ തെന്‍ഡുല്‍ക്കര്‍	673 റണ്ണുകളും 2 വിക്കറ്റുകളും

1992-നു മുന്‍പ് ലോകകപ്പിനു മുഴുവനായി വ്യക്തിഗത അവാര്‍ഡ് ഉണ്ടായിരുന്നില്ല, ഓരോ കളിക്കും മാന്‍ ഓഫ് ദ മാച്ച് കൊടുക്കാറുണ്ടായിരുന്നെങ്കിലും. കലാശക്കളിയില്‍ മാന്‍ ഓഫ് ദ മാച്ച് അവാര്‍ഡ് കിട്ടുന്നത് ഒരു കളിക്കാരനെ സംബന്ധിച്ചിടത്തോളം ഒരു വലിയ അംഗീകാരമായി കണക്കാക്കപ്പെടുന്നു. കലാശക്കളിയില്‍ മാന്‍ ഓഫ് ദ മാച്ച് അവാര്‍ഡ് കിട്ടിയിട്ടുള്ളവര്‍:^[53]

വര്‍ഷം	കളിക്കാരന്‍	പ്രകടനം
1975	ക്ലൈവ് ലോയിഡ്	102 റണ്ണുകള്‍
1979	വിവിയന്‍ റിച്ചാര്‍ഡ്സ്	പുറത്താകാതെ 138 റണ്ണുകള്‍
1983	മൊഹീന്ദര്‍ അമര്‍നാഥ്	12 റണ്ണുകള്‍ വഴങ്ങി 3 വിക്കറ്റും 26 റണ്ണുകളും
1987	ഡേവിഡ് ബൂണ്‍	75 റണ്ണുകള്‍
1992	വസീം അക്രം	49 റണ്ണുകള്‍ വഴങ്ങി 3 വിക്കറ്റും 33 റണ്ണുകളും
1996	അരവിന്ദ ഡി സില്‍‌വ	42 റണ്ണുകള്‍ വഴങ്ങി 3 വിക്കറ്റും പുറത്താകാതെ 107 റണ്ണുകളും
1999	ഷെയിന്‍ വോണ്‍	33 റണ്ണുകള്‍ വഴങ്ങി 4 വിക്കറ്റുകള്‍
2003	റിക്കി പോണ്ടിങ്ങ്	പുറത്താകാതെ 140 റണ്ണുകള്‍
2007	ആദം ഗില്‍ക്രിസ്റ്റ്	149 റണ്ണുകള്‍

[തിരുത്തുക] ലോകകപ്പിലെ മുഖ്യ ചരിത്രനേട്ടങ്ങള്‍

ലോകകപ്പ് റെക്കോര്‍ഡുകള്‍[54]
ബാറ്റിങ്ങ്
കൂടുതല്‍ റണ്ണുകള്‍	സച്ചിന്‍ തെന്‍ഡുല്‍ക്കര്‍	1732 (1992-2003)
കൂടുതല്‍ ശരാശരി (കുറഞ്ഞത്. 20 ഇന്നിങ്ങ്സ്.)	വിവിയന്‍ റിച്ചാര്‍ഡ്സ്	63.31 (1975-1987)
കൂടുതല്‍ സെഞ്ച്വറി	സൗരവ് ഗാംഗുലി മാര്‍ക്ക് വോ സച്ചിന്‍ തെന്‍ഡുല്‍ക്കര്‍	4
കൂടുതല്‍ 50+ സ്കോറുകള്‍	സച്ചിന്‍ തെന്‍ഡുല്‍ക്കര്‍	16 (1992-2003)
കൂടുതല്‍ സ്കോര്‍	ഗ്യാരി കേര്‍സ്റ്റണ്‍ v യൂ.എ.ഇ	188* (1996)
കൂടിയ റണ്‍ പങ്കാളിത്തം	രാഹുല്‍ ദ്രാവിഡ് & സൗരവ് ഗാംഗുലി (രണ്ടാം വിക്കറ്റ്) v ശ്രീലങ്ക	318 (1999)
ഒരു ലോകകപ്പില്‍ ഏറ്റവും കൂടുതല്‍ റണ്‍	സച്ചിന്‍ തെന്‍ഡുല്‍ക്കര്‍	673 (2003)
ബൌളിങ്ങ്
കൂടുതല്‍ വിക്കറ്റുകള്‍	ഗ്ലെന്‍ മക്ഗ്രാത്ത്	55 (1987-2003)
കുറഞ്ഞ ആവറേജ് (കുറഞ്ഞത് 1000 ബൌളുകള്‍ എറിഞ്ഞതിനുശേഷം)	ഇമ്രാന്‍ ഖാന്‍	19.26 (1975-1992)
മികച്ച ബൌളിങ്ങ്	ഗ്ലെന്‍ മക്ഗ്രാത്ത് v നമീബിയ	7/15 (2003)
ഒരു ലോകകപ്പില്‍ ഏറ്റവും കൂടുതല്‍ വിക്കറ്റ്	ചമിന്ദ വാസ്	23 (2003)
ഫീല്‍ഡിങ്ങ്
കൂടുതല്‍ പേരെ പറഞ്ഞയച്ചത് (വിക്കറ്റ് കീപ്പര്‍)	ആഡം ഗില്‍ക്രിസ്റ്റ്	35 (1999-2003)
കൂടുതല്‍ ക്യാച്ചുകള്‍ (ഫീള്‍‍ഡര്‍)	റിക്കി പോണ്ടിങ്ങ്	18 (1996-2003)
ടീം
ഉയര്‍ന്ന സ്കോര്‍	ഇന്ത്യ v ബര്‍മുഡ	413/5 (2007)
കുറഞ്ഞ സ്കോര്‍	ക്യാനഡ v ശ്രീലങ്ക	36 (2003)
ഉയര്‍ന്ന റണ്‍ വ്യത്യാസം (runs)	ഇന്ത്യ v ബര്‍മുഡ	257 (2007)
ഉയര്‍ന്ന വിജയ ശതമാനം	ഓസ്ത്രേലിയ	68.96%
കൂടുതല്‍ തുടര്‍ച്ചയായ വിജയങ്ങള്‍	ഓസ്ത്രേലിയ	12* (1999–2003)

[തിരുത്തുക] ഇതും കാണുക

ക്രിക്കറ്റ്

ക്രിക്കറ്റ് ലോകകപ്പ് 2007

[തിരുത്തുക] പുറത്തേക്കുള്ള കണ്ണികള്‍

• Official ICC Cricket World Cup 2007 website
• Cricinfo's Cricket World Cup 2007 website
• Sri Lankan cricket info for World Cup 2007

[തിരുത്തുക] അവലംബം‍

1. ↑ ^{1.0 1.1} World Cup Overview. cricketworldcup.com. ശേഖരിച്ചത് 2007-01-29.
2. ↑ ^{2.0 2.1} cbc staff (2007-03-14). 2007 Cricket World Cup. cbc. ശേഖരിച്ചത് 2007-04-04.
3. ↑ Peter Switzer. Scoring Big. www.charteredaccountants.com.au. ശേഖരിച്ചത് 2007-02-24.
4. ↑ International Cricket Council. Cricket World Cup marketing overview. Cricket World Cup 2007. ശേഖരിച്ചത് 2007-01-30.
5. ↑ International Cricket Council. Cricket World Cup overview (PDF). Cricket World Cup 2007. ശേഖരിച്ചത് 2007-01-30.
6. ↑ ^{6.0 6.1} Ruthless Aussies lift World Cup. bbc.co.uk (2003-03-23). ശേഖരിച്ചത് 2007-01-29.
7. ↑ 1st Test Scorecard. cricinfo.com (1877-03-15). ശേഖരിച്ചത് 2007-01-28.
8. ↑ Olympic Games, 1900, Final. cricinfo.com (1900-08-19). ശേഖരിച്ചത് 2006-09-09.
9. ↑ The original damp squib. cricinfo.com (2005-04-23). ശേഖരിച്ചത് 2006-08-29.
10. ↑ The birth of the one-day game. cricinfo.com (2005-04-30). ശേഖരിച്ചത് 2006-09-10.
11. ↑ What is One-Day International cricket?. newicc.cricket.org. ശേഖരിച്ചത് 2006-09-10.
12. ↑ ^{12.0 12.1 12.2 12.3 12.4 12.5 12.6 12.7} The World Cup - A brief history. cricinfo.com. ശേഖരിച്ചത് 2006-12-07.
13. ↑ ^{13.0 13.1} The History of World Cup's. cricworld.com. ശേഖരിച്ചത് 2006-09-19.
14. ↑ Browning (1999), pp. 5-9
15. ↑ ^{15.0 15.1} Browning (1999), pp. 26-31
16. ↑ ^{16.0 16.1} ICC Trophy - A brief history. cricinfo.com. ശേഖരിച്ചത് 2006-08-29.
17. ↑ ^{17.0 17.1} Browning (1999), pp. 32-35
18. ↑ Browning (1999), pp. 61-62
19. ↑ Browning (1999), pp. 105-110
20. ↑ Browning (1999), pp. 111-116
21. ↑ Browning (1999), pp. 155-159
22. ↑ Cricket World Cup 2003. A.Srinivas. ശേഖരിച്ചത് 2007-01-28.
23. ↑ Browning (1999), pp. 160-161
24. ↑ Browning (1999), pp. 211-214
25. ↑ Browning (1999), pp. 215-217
26. ↑ 1996 Semi-final scoreboard. cricketfundas. ശേഖരിച്ചത് 2007-01-28.
27. ↑ Browning (1999), pp. 264-274
28. ↑ Browning (1999), p. 274
29. ↑ 1999 Cricket World Cup. nrich.maths. ശേഖരിച്ചത് 2007-01-28.
30. ↑ Browning (1999), pp. 229-231
31. ↑ Browning (1999), pp. 232-238
32. ↑ Full tournament schedule. BBC (2003-03-23). ശേഖരിച്ചത് 2007-02-22.
33. ↑ World Cricket League. ICC. ശേഖരിച്ചത് 2007-01-28.
34. ↑ 1st tournament. icc.cricket.org. ശേഖരിച്ചത് 2007-02-19.
35. ↑ 92 tournament. icc.cricket.org. ശേഖരിച്ചത് 2007-02-19.
36. ↑ 96 tournament. icc.cricket.org. ശേഖരിച്ചത് 2007-02-19.
37. ↑ ^{37.0 37.1} Super 6. Cricinfo. ശേഖരിച്ചത് 2007-02-19.
38. ↑ World Cup groups. cricket world cup. ശേഖരിച്ചത് 2007-01-28.
39. ↑ About the Event (PDF) 1. cricketworldcup.com. ശേഖരിച്ചത് 2006-09-02.
40. ↑ Trophy is first permanent prize in game's history. cnnsi.com. ശേഖരിച്ചത് 2006-08-29.
41. ↑ Cricket World Cup- Past Glimpses. webindia123.com. ശേഖരിച്ചത് 2006-08-30.
42. ↑ cricket world cup trophy. mapsofworld.com. ശേഖരിച്ചത് 2007-01-28.
43. ↑ Peter Switzer. Scoring Big. www.charteredaccountants.com.au. ശേഖരിച്ചത് 2007-02-24.
44. ↑ The Wisden History of the Cricket World Cup. www.barbadosbooks.com. ശേഖരിച്ചത് 2007-04-04.
45. ↑ Papa John's CEO Introduces Cricket to Jerry Jones and Daniel Snyder. ir.papajohns.com. ശേഖരിച്ചത് 2007-04-04.
46. ↑ Cricinfo staff (2006-12-09). ICC rights for to ESPN-star. Cricinfo. ശേഖരിച്ചത് 2007-01-30.
47. ↑ Cricinfo staff (2006-01-18). ICC set to cash in on sponsorship rights. Cricinfo. ശേഖരിച്ചത് 2007-01-30.
48. ↑ Cricket World Cup 2003 12. ICC. ശേഖരിച്ചത് 2007-01-29.
49. ↑ GuideLines for Media. cricketworldcup.com. ശേഖരിച്ചത് 2007-01-29.
50. ↑ Asia to host 2011 World Cup. Cricinfo (2006-04-30). ശേഖരിച്ചത് 2007-02-09.
51. ↑ World Cup Cricket 1979. cricket.beepthi. ശേഖരിച്ചത് 2007-01-29.
52. ↑ The 1979 World Cup in England - West Indies retain their title. Cricinfo. ശേഖരിച്ചത് 2006-09-19.
53. ↑ ^{53.0 53.1} Cricket World Cup Past Glimpses. webindia123.com. ശേഖരിച്ചത് 2007-01-29.
54. ↑ All records are based on statistics at Cricinfo.com's list of World Cup records

[തിരുത്തുക] പുറത്തേക്കുള്ള കണ്ണികള്‍

• Official ICC Cricket World Cup 2007 website
• Cricinfo's Cricket World Cup 2007 website
• Cricket News