കൊല്ലങ്കോട്‌ (കന്യാകുമാരി)

വിക്കിപീഡിയ, ഒരു സ്വതന്ത്ര വിജ്ഞാനകോശം.
കൊല്ലങ്കോട് എന്ന വാക്കാൽ വിവക്ഷിക്കാവുന്ന ഒന്നിലധികം കാര്യങ്ങളുണ്ട്. അവയെക്കുറിച്ചറിയാൻ കൊല്ലങ്കോട് (വിവക്ഷകൾ) എന്ന താൾ കാണുക. കൊല്ലങ്കോട് (വിവക്ഷകൾ)

അറബിക്കടലിന്റെ തീരത്ത്‌ സമുദ്രനിരപ്പിൽ സ്‌ഥിതി ചെയ്യുന്ന ഒരു ചെറു പട്ടണമാണ്‌ കൊല്ലങ്കോട്‌. ത്രിവേണി സംഗമത്തിന്‌ സാക്ഷ്യം വഹിക്കുന്ന കന്യാകുമാരി ജില്ലയിൽ, കന്യാകുമാരി മുനമ്പിൽ നിന്നും 70 കിലോമീറ്ററും, ജില്ലാ ആസ്ഥാനമായ നാഗർകോവിലിൽ നിന്നും 50 കിലോമീറ്ററും വടക്കും, കേരളത്തിന്റെ തലസ്ഥാനമായ തിരുവനന്തപുരത്തിനു‌ 40 കിലോമീറ്റർ തെക്കും മാറിയാണ്‌ കൊല്ലങ്കോടിന്റെ സ്ഥാനം. ഊരമ്പിൽ നിന്നും തുടങ്ങി പുന്നമൂട്ടുക്കട, ക്ച്ചേറ്റിനട, സിലുവപുരം, കല്ലുവെട്ടാങ്കുഴി, കണ്ണനാഗം, കാക്കവിള, ഇളം പാലമുക്ക്‌, മഞ്ഞത്തോപ്പ്‌, മേടവിളാഗം എന്നീ സ്ഥലങ്ങളും, വള്ളവിള, മാർത്താണ്ടൻതുറ,നീരോടി എന്നീ തീരദേശപ്രദേശങ്ങളും ഉൾപ്പെട്ടതാണ്‌ കൊല്ലങ്കോട്‌ പട്ടണം.

കാലാവസ്ഥ[തിരുത്തുക]

ഉഷ്ണമേഖലയിലുള്ള പ്രദേശമായതിനാൽ കാലാവസ്ഥയിൽ ഋതുഭേതങ്ങൾക്കൊത്ത്‌ വലിയ മാറ്റങ്ങൾ സംഭവിക്കുന്നില്ല. താപനില വർഷം മുഴുവനും 21 ഡിഗ്രിക്കും 34 ഡിഗ്രിക്കും ഇടയിൽ ആയിരിക്കും. മഴക്കാലത്ത്‌ ആർദ്രത ഉയർന്ന് 90 ശതമാനം വരെ എത്താറുണ്ട്‌.

സാമ്പത്തികം[തിരുത്തുക]

മത്സ്യബന്ധനം, കൃഷി എന്നിവയാണ്‌ പ്രധാന വരുമാനമാർഗങ്ങൾ. പരമ്പാഗത തൊഴിലുകളിൽ നിന്നുമാറി, സമീപത്തുള്ള തിരുവനന്തപുരം നഗരത്തിലെ സർക്കാർ ഓഫീസുകൾ, ടെക്നോപാർക്ക്‌, തുമ്പയിലെ വി.എസ്‌.എസ്‌.സി, നാഗർകോവിൽ നഗരത്തിലെ സർക്കാർ ഓഫീസുകൾ എന്നിവയിലും തൊഴിൽ ചെയ്യുന്നവർ ധാരാളമുണ്ട്‌.

രാഷ്ട്രീയവും ഭരണ സംവിധാനവും[തിരുത്തുക]

കൊല്ലങ്കോട്‌ തമിഴ്‌നാട്ടിലെ കന്യാകുമാരി ജില്ലയിൽ, വിളവൻകോട്‌ താലൂക്കിലെ ഒരു നഗര പഞ്ചായത്താണ്‌.കേരളത്തിനു സമാനമായ രാഷ്ടീയ അന്തരീക്ഷമാണു ഇവിടെയുള്ളത്. ഭാരതീയ ജനതാ പർട്ടി, മാർക്സിസ്റ്റ് പാർട്ടി, ഇന്ത്യൻ നേഷണൽ കോൺഗ്രസ് എന്നീ ദേസശീയ പാർട്ടികളാണു ഇവിടെ ശക്തമെങ്കിലും എ.ഐ.എ.ഡി.എം.കെ,ഡി.എം.കെ എന്നീ തമിഴ് പ്രാദേശിക പർട്ടികളും ഇവിടെ തങ്ങളുടെ സാന്നിധ്യം അറിയുക്കുന്നുണ്ട്.

ഗതാഗതം[തിരുത്തുക]

തമിഴ്‌നാട്‌ സ്റ്റേറ്റ്‌ ട്രാൻസ്പോർട്ട്‌ ബസുകൾ നാഗർകോവിൽ, മാർത്താൻഡം, കളിയിക്കാവിള, പാറശ്ശാല, തിരുവനന്തപുരം, മധുര, ചെന്നൈ എന്നീ സ്ഥലങ്ങളിലേക്കു സർവീസ്‌ നടത്തുന്നു. കേരള സ്റ്റേറ്റ്‌ ട്രാൻസ്പോർട്ട്‌ ബസുകൾ തിരുവനന്തപുരം, എറണാകുളം, നെയ്യാറ്റിൻകര എന്നീ സ്ഥലങ്ങളിലേക്ക്‌ സർവീസ്‌ നടത്തുന്നു.കെ. എസ്. ആർ. ടി. സി. യുടെ തിരുവനന്തപുരം സിറ്റി രാജധാനി സർക്കുലർ ബസുകളും കൊല്ലങ്കോടിലൂടെ കടന്നു പോകുന്നു. 8 കിലോമീറ്റർ അകലെയുള്ള പാറശ്ശാലയാണ്‌ അടുത്തുള്ള റെയിൽവേ സ്‌റ്റേഷൻ. തിരുവനന്തപുരം രാജ്യാന്തര വിമാനത്താവളം 40 കിലോ മീറ്റർ അകലെയാണ്‌.

ജനവിഭാഗങ്ങൾ[തിരുത്തുക]

100 % സാക്ഷരത നേടിയ കൊല്ലങ്കോട്‌ പഞ്ചായത്തിന്റെ ജനസംഖ്യ 40000-ന്‌ മുകളിലാണ്‌. ഹിന്ദു, ക്രിസ്ത്യൻ, മുസ്ലിം മതവിഭാഗങ്ങളിലെ ജനങ്ങൾ ഇവിടെ വസിക്കുന്നു. മലയാളം, തമിഴ്‌ ഭാഷകൾ സംസാരിക്കുന്നു.

സംസ്കാരം[തിരുത്തുക]

പഴയ തിരുവിതാംകൂറിന്റെ ഭാഗമായ ഇവിടുത്തെ ജനങ്ങൾ തിരുവിതാംകൂർ സംസ്കാരം പിന്തുടരുന്നു.കൊല്ലങ്കോട്‌ തൂക്കമാണ് പ്രാദേശികമായി ഏറ്റവും പ്രധാനപ്പെട്ട ആഘോഷം. ഓണം, ക്രിസ്തുമസ്‌, റംസാൻ, ഈസ്റ്റർ തുടങ്ങിയ ആഘോഷങ്ങളും പ്രാധാന്യത്തോടെ കൊണ്ടാടുന്നു.

വിദ്യാഭ്യാസം[തിരുത്തുക]

പ്രധാന സ്കൂളുകൾ[തിരുത്തുക]

  • ഗവ: ഹയർ സെക്കൻഡറി സ്കൂൾ, കൊല്ലങ്കോട്‌
  • ശ്രീദേവി ഗേൾസ്‌ ഹയർ സെക്കൻഡറി സ്കൂൾ, കൊല്ലങ്കോട്‌
  • എ.ബി.സി. മെട്രിക്‌.ഹയർ സെക്കൻഡറി സ്കൂൾ, കൊല്ലങ്കോട്‌
  • ശ്രീവിദ്യാദിരാജ മെട്രിക്‌.ഹയർ സെക്കൻഡറി സ്കൂൾ, കൊല്ലങ്കോട്‌
  • ഡോ:അംബേദ്‌കർ സി.ബി.എസ്‌.ഇ. സ്കൂൾ,കൊല്ലങ്കോട്‌
  • സെന്റ്‌ അലോഷ്യസ്‌ ഹയർ സെക്കൻഡറി സ്കൂൾ, കൊല്ലങ്കോട്‌

ഇവക്കു പുറമേ പന്ത്രണ്ടോളം പ്രൈമറി സ്കൂളുകളും ഒരൂ ടീച്ചേഴ്‌സ്‌ ട്രെയിനിംഗ്‌ സ്കൂളും ഇവിടെയുണ്ട്‌.

4 കിലോ മീറ്റർ അകലെയുള്ള തൂത്തൂർ കോളേജിനെയാണ് ഇവിടുത്തെ വിദ്യാർത്ഥികൾ ഉന്നതപഠനത്തിനായി ആശ്രയിക്കുന്നത്.

മാധ്യമങ്ങൾ[തിരുത്തുക]

എല്ലാ പ്രമുഖ മലയാളം, തമിഴ്‌, ഇംഗ്ലീഷ്‌ ദിനപത്രങ്ങളുടെയും, തിരുവനന്തപുരം, നാഗർകോവിൽ എഡിഷനുകൾ ഇവിടെ ലഭ്യമാണ്‌. കേബിൾ ടെലിവിഷൻ സർവീസും ഇവിടെ ലഭ്യമാണ്.

പുറത്തുനിന്നുള്ള കണ്ണികൾ[തിരുത്തുക]